Éxodo 19 - Dupade Uruode

Uje israélgosode ore chise pajmite uñai uje i tu Sinaí ga ore cho darengúji cucarani údi iji uté

¹ Uje guedosíode e gadióguiji Egípto yui uje ore jnoji ica ga Israel ájnape disi ejode ore díji erãpetarei uje i tu Sinaí nanique.

² Ore jnoji pajmini Refidim ica ga ore chise ujoi pajmite uñai uje i tu Sinaí ga ore cho darengúji cucarani údi iji uté.

³ Enga Moisés choru cucarani Sinaí uté nanique ujetiga catecã́ri Dupade iji ójo. Mu Dupade tibidi Moisés iji uté ga chojningame: –A yisi ome yuruode ome ua jne jeta angome uacáqui jnani bajai Jacob ájnape disi ejode udore ore. Yojningane u uacarasade israélgoso ore.

⁴ Angopísa yuruode ome ore ga ojningame ore jne: Pangarádejna Dupa Eyúgojmai chósi tome uaque: 'Uacapáñañoji uje yijnime uáguiji egíptogosode jmainie ica, ga cho jetiga yo arori iji yu ica ga uacácayoji yujnóngone ica ga yiyó uacádi aja yijogadi udé erãpe.

⁵ Enga uaque u uje uacajnecho yuru pirosobádode. Jecute ujetiga angachopísi yuruode quigode udojo jne enga ca amócho jeta beyoi quitique jne, enga a yo yurása yedójnariji uaque jne, uje uacajnuéño erámi unirisórone ore gáyode ome uacáringane pedójnario ome yu. Uyu u gu uje yajneque erámi údode jnese, ga jé yi yajéningome yedójnarique punire iji erámi tudé údode.

⁶ Ga a yipésu uaque jne enga a oyo sacerdóteode jnese iji jnumi iji yojningai uté uacaniri údode jnese jne. Uje a jé oyo uacasaque cucha pisaguíji yúringai picatecãraite iji uacaniri tuté údode. Ga a oyo punire pirosobátique jne uje yingaraque uacaqui gu ujeta eduyo yadode aja uacajesui uté jnese.' Ga ango udojo aja bojode israélgoso ore jne.–

⁷ Moisés doi jnumi tiji cucarani ga tibidi israélgosode ore dai bajade uñane ga chatata Dupade uru quigode ucode jnese ome ore.

⁸ Ga israélgosode ore dayode ore chojninga: –A jé ca israélgosode uyoque yimójo Dupade uru quitique ome yoque jne.– Ga Moisés choru cucarani uté gaté rĩ ga chingo darasade israélgose ore uru quigode ome Dupade gaté.

⁹ Ga Pangarádejnai Dupade chósi tome Moisés: –Angarami yuruode, uje a yicatecã́ri ua jne ga yibié u gue abuja utatájnaraque jne aja ua jeta yicatecã́ri ua. Ga a yuruode tṍraji gue abuja utatájna tuaté jne, ga barasade ore chudute yarecujate dosóguedie iji gue abuja utata tuaté ajei. Yigaidi u gu ujetiga barasade chudute uje yicatecã́ri ua ga jé ca potigayaquérique déji barásarique ome báringai yutocaite jne.– Moisés chajnerapome darasade ore uruode gaté rĩ ome Dupade enga chojninga: –E dimane ore jeta ore tangári ua gatuaque jne.–

^10-11 Dupade chojningame Moisés: –Moisés á, be jnumi tiji cucarani tudé jne, ga ango barasade ore jne ga ore churu daguidedie jnese jne uje a diri uñai u dirome gu jeta apéso uacágueraque iji cucarani Sinaí tudé ejoi ga a yi jnumi dirome ga a yiyáguena cucarani udé ójo dirome ga a ore pañaji yu jnese dirome iji cucarani tudé ójo ome dedodie.–

¹² Ga Dupade chojningame Moisés: –Apésu cucarani udé edúdi jne ga acha bajuyaquérigaja uté ga ca barasade udore uñeque chója uécha uñai jne iji cucarani yui, ga a ore chácariji uéchai jnese jne. Angopome ore jne rĩ jeta jé ca uñeque choru cucarani tudé to, jé aja jeta ca uñeque cunguésõri dosatique rĩ. Ujeta gosi choru, jeoga gosi charose re aja enga a gosi gajneque pitoringai jne.

¹³ Ujeta gosi chujé dajmanai aja cucarani udé jne enga ajéyo gosi jne enga amitingácho ome cucaranenie jne, jeoga achoyo gosi údode jne ome uacojórigui. Ujetiga uacachitique cuchiso u jeta choru cucarani uté jne marínga, jé ajéyo jne. Jeta ayoré, jeoga cuchiso marínga, jé ajéyo gosi. A barasade ore choru cucarani udé jne rĩ jeta ore chudute púpuri pubúchuraque ga jogadi quene u uje pujuegate cucarani udé ome ore jeta ore choru.–

¹⁴ Moisés doi jnumi iji cucarani ga jé u uje chingo darasade ore jnese jeta ore pésu rágome dire uñai yui jeta ore catecã́ri Dupade dirome. Ga jé u uje urasade ore churu daguidedie jnese ujetiga ore chimate re iji dire uñai yui.

¹⁵ Moisés chojninga: –Amachopise uaque to ome dire uñai yui jeta yico dirome. Ga jé ca uacuñeque, jeoga uacuñáraque jé ca cunguésõri damanique iji dejai tudé gajneri, jé aja jeta yiyágo Dupade ojningane cucha udore eruei.–

¹⁶ Dirode e gadioque uje Dupade catecã́ri Moisés diríca. Ga iji durasé tudaque ga guéode uruode déji erámi, jé aja ajnorane, ga gue abuja utatájna basája cucarani ójo gai. Ga quene jogadi u uje israélgosode ore chudute ubuchutique trompéta enga ibisóguejnapise agoyé iji cucarani uté ójo ga ore cho ta-ta-ta iji dasadodéringane jmainie jnese iji darengúi údode ome trompéta uaté agoyé.

¹⁷ Moisés chingo darasade ore ga ore noñome darengúi iji te ga ore tibágui cucarani uje i tu Sinaí jeta ore chise Dupade iji cucarani tuté. Ga ore pésu dajochai aja cucarani uté yui, ga ore chise ga ore cháguena gatéode iji dosadi.

¹⁸ Ore chajire cucarani Sinaí uté mu nóña ga pioque úyujnai iji jnumi uje Dupade e chiqueta raja ore iji to ga Dupade pi u pioque cuchábi aja ore uje chiqueta raja ore iji cucarani uté. Uje pioi úyujnanie popío aja gaté ga cho ejo pipota úyujna aja gaté uje popío. Cucarani uté dosadode tãrara, tãrara ga cho cocho, cochóguiji jnumi.

¹⁹ Jé basa ga trompétadie agoyedie quérã, quérã to iji cucarani ójo. Moisés catecã́ri Dupade, mu Dupade cho daru iji gue uruode ome Moisés ga catecã́ri Moisés to.

²⁰ Dupade chácariji cucarani Sinaí uté ójo uje idájapísiji jnumi ga tibidi Moisés iji dayaridi ga chojninga: –Moisés á, ¡oru to á, ga ese yu iji yiyaridi tudé á!– Ga jé u uje Moisés choru to.

²¹ Ga Dupade catecã́ri Moisés iji uté ga chojningame: –Be jnumi ga angome barasade israélgose ore jeta jé ca ore chója bacapídi uéchai iji cucarani udé jne. Ga jé ca ore ajegaidápo yúringárique pimoi. Jé soca totígo jiei iji udore ore jne jeta ore chója bacapídi uéchai uje yãraque mu.

²² Jé cho sacerdóteode to uje ore gajnei tu jeta ore déji yiquénique, ujetiga ore pésupúsu rágome yiquei to. Mu jeta udore uñeque basája yiquei bisideque jne ga a gosi cachodi jé u ome yu jne.–

²³ Moisés chajnai Dupade uruode ga chojninga: –A ca yurasade udore ore pota cucarani Sinaí udé úringárique porute jne, uje e ore chudute bãrétigai ome re gu. Chamáñaje yicoi baruode gu ga yipéco eruei te rĩ jeta jé ca ore chója uéchai, ga yojnijome ore: "Udé uécha uñai e que qué piyójapo rĩ. E puyaque gu."–

²⁴ Mu Dupade chojningápome Moisés rĩ: –Be jnumi ga abágui bayai Aarón jetiga choru cucarani udé to jne. Mu jé ca ajuéchome sacerdóteode, ayorébui ore jeta ore basája uacacapídi uéchai iji gadoi uje yugúsiji uté gu. Ujeta gosi chetingare jeta chose cucarani udé yui jne enga que toc jeta qué gosi chapídapo to rĩ ga cachodi jé u ome yu.–

²⁵ Moisés doi jnumi ga chatata Dupade ojningane udojo jnese ome israélgosode ore.