Éxodo 18 - Dupade Uruode

Moisés iyoquíjnai Jétro chajmita dãsarai nanique iji ore irengúi iji erãpetarei ajei

¹ Moisés iyoquíjnai Jétro u uje catecãraite Dupade ome darasade ore iji ore uniri Madián nanique. Enga Jétro uté chudute Dupade átedatéode ome dãsarai Moisés, urasade Israel ájnape disi ejode ore, ga chudúdapo uje Dupade chijnime ore iji Egípto nanique rĩ.

² Moisés e chiroque dacoté, Séfora, dape gárode ore aja dayoquíjnai nanique, enga iyoquíjnai Jétro uté suse ore guio iji daniri Madián ome dãsarai.

³ Moisés abode udore uñai i tu Gersón nanique. Dayé pésu i nanique enga chojninga: "A yĩ́care Gersón aja jne, uje Gersón i qui u uje purása quedéjna yu iji yacoté urasade ujade."

⁴ Moisés abode uñai i u Eliezer nanique, uje Moisés chojninga nanique: "A yĩ́care Eliezer aja yape ejoi udé jne uje jé yunuchu gu yunuchui que uje yáquiode ore gãrésõri Dupa uje diji yu ga chãraque yu ome Faraón asṍrenie nanique, ga qué yapite to nanique."

⁵ Uje Moisés jnoji erã́petarégode udore ga chicáji garáijnane ajã́ro yoríco uje ore chojningame uaté Dupade Gajné Ajã́ro Uaté. Ga Moisés iyoquíjnai Jétro diji ore iji ore irengúi iji uté, ga nóna Moisés acoté, abode aja ore iji uté.

⁶ Ga Jétro catecã́ri Moisés ga chojningame: –Bayoquíjnai tu yu arĩa, uje yi u Jétro ga qué yidójnajo uaque iji de, bacoté, bape gárode ore uyoque, jeta jé uajate uaque.–

⁷ Moisés chimo dayoquíjnai ga chuchiéjna yui ga chibéro raja jnumi ga tagu dayoquíjnai uredie uje iyoquíjnai quene diapóji Moisés gu rĩ. Uje Moisés cha chisa dayoquíjnai pajei ga chirógaja daquigade ga ore pusi Moisés iguíjnami cárpape údi to.

⁸ Ga Moisés iyoquíjnai ore chácariji uté ga jé u uje Moisés cho dojñame dayoquíjnai ga chatata Dupade átedatéode ome ore iji datã, jé aja uje ore jnoji Egípto nanique. Jé upome Faraón josipiedie ome ore uje Dupade cho dajuñame Faraón uté, urasade ore ga gose úringai ducusuréchoquí ome cucha ponai jnese. Chatatapo ore isocade to rĩ uje ore déji erãpetarei ajei enga Dupade guẽrate cuchade ome ore uje chona ore, ga jecucha chingo dáringai cuchape aja ore uje jecucha chiqueta udore iji ore jnuéngaisórone cucha jmainie.

⁹ Moisés iyoquíjnai Jétro uté irasiguipise re ome Moisés ojña quigode udore uje Dupade chiquetápise Israel ájnape disi ejode ore ome egíptogosode ore josipiedie nanique.

^10-11 Ga chojninga: –Picotaque Opejã Dupa Eyúgojmai uté ome Israel ájnape disi ejode uaque uje uté chijna uáguiji egíptogosode ore eduguéjna cuchábi Faraón gari nanique. Uje Faraón uté que juéga doi ome uaque nanique ga cho jeta acatáyoja uté jmainie, mu Pangarádejnai Dupade chijna uáguiji uté jmainie ga jnuéngai uté ome cutejmai detotiguejna. Ga que qué potigayaquérique déji yajénique uje Dupapísi u Pangarádejnai ga jnuéngai purása quedéjnane ore angurenone dupa gotígo jnese iji erãpe ponai. Ga ore jnuéngaisṍripísi tu Dupade uté jnese.

¹² Jétro uté doi aquirájna abi ga tẽrame Dupade, ga chibore iji daseradéjnai gai ome Dupade. Enga tẽrája Dupade ome cuchiso uñéngo to. Ga Aarón, Israel ájnape disi ejo ore dayode ore di jnese jeta ore chacásãra Moisés, iyoquíjnai ore iji ore posode udore gai uje ore chachietáji Dupade ome átedatéode udore gu.

Moisés chucué dojode jnani uñéngo ujetiga ore cháta isai aja uje tangári darasade ore ujuré gajneóne cucha nanique

¹³ Dire uñai ga Moisés chácariji dayaridi iji durasé ga urasade Israel ájnape disi ejo ore pésu dajochai ujetiga ore chingo dajuré gajnéone cucha aja Moisés iji charidi uté. Ga gaidi u gu jeta chaquĩ́ra gosi ome ate noñátique jeta ca pésapo uté rĩ. Ga chacate ore ome jeta ore cha dajei dotáningane ome ñane ga ore cho paráguiji jnumi ome ñane. Mu Moisés urasade jé ore chejna deréjnai iji uté jeta ore tangári Moisés uru quigode ome raque to jé aja guedéjnoringái.

¹⁴ Uje Moisés iyoquíjnai chimo Moisés urasade ore ga chojningame dãsarai: –¿Gotique gu a uje bácariji jnumi iji deréjnai údode, jé udore ore cháguena bejode iji deréjnai údode to? ¿Gotique gu a uje gusu ua ome ore ujuredie ome ñane uje bácariji jnumi tiji ore gatócoro?–

¹⁵ Ga Moisés chajnai dayoquíjnai uruode ga chojninga: –Uje yurasade udore ore ujuredie cuse ome ñane enga ore chucué yu ujetiga yingo Dupade uru quigode ome ore.

¹⁶ Ore chatata dajuré gajnetígo cucha ome yu jnese, ga jé u uje obiréjna gosode uje pujuredie ipesusóño ore ga que potigayaque ore ome ore ujórique ayoré uyoque. Jé basa ga obiréjna uñane to uje que ore pésu dojórique ayoré ujuréraque ga que paguhéta cuchárique udore ore gánique. Ga a yiraja Dupade áyipie pirosobádedie quigode, ga a yirajápo uruode quigode rĩ, ga jé u uje yingo yurasade udore ore to jeta ore doi Dupade ojningane uru quicho to.–

^17-18 Ga Moisés iyoquíjnai chojningame dãsarai Moisés: –Que uerate basocai uté uje gusu ua ome cutejmane udore ayoré ore betígajnai. Uje a aquíjnoque ga ayoréode udore uje jé ore chirote bei a ore íjnoque to iji dayáguesiringáne iji bejode. Ga basai uté cucha pisaque a na ua aja jnumi jne ga que toc jeta qué apésapo rĩ iji dire uñeque uje chibéro ua gu.

¹⁹ Angaripísabi yuru quigode udojo ome ua. Yiraja uje Dupade a chatapísaja ua jne ome basagode udore cucha ome barasade ore. Jecute yósi tome ua iji de: Ácariji barasade udore, Dupade ore ujai jne. Ga barasade chingo dajuré gajnetique cucha aja ua, ga angome Dupade gaté. Ga Dupade jé basa chingo pujuredie udire quique arétigarique aja ua ga jé basa bangome barasade udore ore gaté jeta ore doi jne.

²⁰ Ga acadipise ore ome Dupade garéngone cucha jnese, jé aja pujuegádode cucha rĩ. Uje bagaidi tu gu jeta ore chiraja dasocáringome cuchade udore iji babijnani jne.

²¹ Mu jé ca edu ua ome ore ujuré gajnéone cucha udore jne. Acué jnani áyipierane uñéngo to jne jeta ore cháta basai uté aja ua jne. Enga bacuegode udore jnani ore u jeta angoninguite guesaque ore ome Dupade ojningane cucha jnese, ga jé ca urutaque udore ore jne, mu ũrepise ore ome cuchade jnese. Jé aja ujetiga jé ca ore jnari pláta docoidé bisidégueraque ome raque. Moisés á, be ga ajuguína Israel ájnape disi ejode udore ore aja bajegaitígo jnanío udore ore ga ore chajire ore yúode to. A udore uñane chajire ore yúode jne uje 10 u ore. Jé basa ga uñane chajire ore yúode jne uje 50 u ore. Jé basa ga uñane chajire ore yúode jne uje 100 u ore, jé uñane chajire ore yúode uje 1.000 u ore.

²² A udore ore u jne ujetiga ore chucué pujuredie ipesusóño iji uacojórigo ayoré ore. Mu ujetiga ca ore chijnime ore ujuréraque ãrírique enga quene ore tibágui ua, Moisés á, ujetiga atata Dupade uru quitígo ome cucha dacadode udore. Jecute ajuéga pujuré garósabidie ome jnanione udore jeta ore chedu rágome jeta ore pésu aja quitígo. Mu jeta jé ca ore chijnime pujuréraque ãrírique ga jé u jeta quene ajire gosi ujuré gajnetique cucha yúrique to. Ga a ore chibéro basagode udore imenuringuejnai iji babai jne, ga a agutíyame udore ore to jne.

²³ Qué etingarape yajequigode udojo ome ua. Ja seca Pangarádejnai Dupade jé ajequicho to ome ua ga a tijode cho jnángome ua jne jeta barasade jnacare uñéngo jé ore ajirique darasade udore ore ujuredie aja quigode to. Ga a jĩraque jnanione udore uje ore cháguena bejode iji deréjnai údode, ga a ca ore cháguenapo barosatique jne rĩ jeta jé jnacarode udore uñéngo jé ajirique ore ujuré gajnetígo cucha aja quigode to. A ore irasique re jne uje a jĩraque ore chajni ¡bu! aja daguíjnaringo ga que ore chachopo bejode rĩ.–

²⁴ Moisés tangári dayoquíjnai uru quigode ome re ga doi ajequigode ucode iji deréjnai údode.

²⁵ Doi Israel ájnape disi ejode ga chimáta ore uje áyipierãque udore ore iji darasade ore ujade. Ga udore ore uje Moisés pésu ore úringane eduguéjna ga chicha ore aja ore urasade ujade jeta ore chajire ore yúode. Enga uñane irodigode 10, jé 50 uñane, jé basa jorane ga 100, jé qué uñane irodigode chise 1.000.

²⁶ Iji deréjnai údode ga udore ore doi dasagode cucha pisacho iji darasade ore ujade iji dedai údode. Gusu pujuré dejnanie jeta ore tibágui Moisés ome udire, mu jeta pujuré ajámami ga ore eduguéjna jnacarode udore ore pésu aja quigode.

²⁷ Mu chise diri ga Moisés iyoquíjnai Jétro pota jetiga chicapóji daniri casica to rĩ, ga chingongara raja dãsarai Moisés ga jé u uje jnopome dajesui to rĩ.