Éxodo 17 - Dupade Uruode

Moisés chujé cucarané ome dogué nanique ga yodi tṍraji

¹ Chise diri nanique uje Israel ájnape disi ejode jnese ore jnoji erãpetarei uté uje i tu Sin, ga ore jnome daquei garósi, garósi. Chamáñaje Dupade jé urúo gu ujetiga ore jnopója dajesúrique. Mu uje ore jno enga ore chise pajmitique uje i tu Refidim nanique, ga ore chácariji uté ga ore cho degu iji, mu que ore jopitique cuse iji to nanique.

² Ga ore dosója Moisés ga ore chojninga: –¡Asi yóguiji yotique jeta yójigo!– Enga Moisés chajnai ore uruode ga chósi tome ore: –¿Jé gotíguipié uje uacoyo chere, chere ome Dupade ga uacacho uaquejode ome Dupade, uyoque ga que ayáyo aguhétayo cuchade yibai jnese?–

³ Ga Israel ájnape disi ejode udore jé ãre chejna ore ga jé u uje ore chedo Moisés iji dajade jnese. Ga ore chojningame Moisés: –¿Gotique gu uje bajnime yóguiji Egípto ica ya? A bajéode u jeta yitogoi ome yocuyátigo iji erámone udojo, yocabode ore uyoque, jé aja yocachidode cuchiso ore jnese.–

⁴ Moisés tangári ore uru gajnaréngone udore ome re ga jé u uje chijóchapíse Dupade ajei údi ome re, enga chojningame: –Yangarádejná, ¿ga jé yo ringome yijorane udore ayoré ore gajneri a? Uje a ore chujé yu gajneri, ga ore chajnangarase yu aja dejode jne enga ore chimitingare yu ome cucaranéringui gajneri.–

⁵ Ga Dupade chojningame Moisés: –Ajína Israel ájnape disi ejode ore dáquiode uñéngo jne ga beyoi uacarasade udore ore iquei jne enga ayáguenaño jne ga ajna bogué jne uje bajé tié ome ica uje tié uaté i tu Nílo nanique. Ga aroque ore aja baquigade jne ga acayóji pajmini uje cucarãte uté uje ore chojningame uté Horeb, ga a quene amóño yẽratique cucha ome uaque jne.

⁶ Uje a yirote uáguiji pajmini uté jne uje i tu Horeb ga a yajo yu aja cucarané cucháberaque dosatique jne iji to. Uje e eso yojningai uté pajmite gajneri ga ajé cucarané uaté ome bogué jne ga a yodi tṍraji jne ga barasade ore chóji yote bayai tuté jne.– Enga Moisés doi Dupade uruode ga Israel ájnape disi ejode ore dáquiode ore pañapísiji uje Moisés chujé cucarané cuchabé uaté ome dogué.

⁷ Ga Moisés pésu pajmini uté i nanique ga chĩ́care Meríba aja. Meríba i qui u Pichietabátigade Jogadi. I uñai u Masah nanique. Ga Masah i qui u Petingaquéode Jogadi, chamáñaje ore chetingare Dupade nanique gu. Ga ore chojningame daruode: "¿Ga Pangarádejnai gotique déji yoquejode, jeoga jé ca déji yoquejode? ¡Uje chiese yocagutíyabádi u uté mu que ujñapegome yoque iji yoquiyaridi udé!"

Israélgosode ore doi dajocaningai ome amaléquegosode nanique

⁸ Uje amaléquegosode ore chudute uje Israel ájnape disi ejode ore déji pajmini Refidim ga ore doi dajocaningai ome ore iji pajmini uté.

⁹ Moisés chojningame Josué: –Josué á, amáta jnacarode uñéngo jne jeta ore doi pocaningai ome yoquicasisórone udore jne. Ujeta e ajócãchome ore dirome ga a yugúsiji uacabai iji oroné cucháberaque dirome ga a yujé yogué aja uacabai dirome uje Dupade gajné yogué tuaté jeta Pangarádejnai chatapísaja uaque.–

¹⁰ Josué jno enga nóna pocaningai irajasórone jnacare ore aja dacasisórone udore yui jeta ore chujé ñane uje ore i tu amaléquegosode. Uje Josué ore jnome dajocaningai yui ga jĩraque Moisés nóna dajorane Aarón, Hur ore ga ore choru oroné cuchabé uje idája ore iji jnumi.

¹¹ Uje Moisés chãrai dajmanecade iji gaté ga Israel ájnape disi ejode ore chose desórone udore, mu uje Moisés chiramurase dajmanecade enga ore yusórone amaléquegoso chose Israel ájnape disi ejode udore ore.

¹² Uje Moisés e jmanecade íjnoque ga jorane, Aarón, Hur ore, ore doi cucarané ga ore chicháji Moisés ejoi ga ore chojninga: "Moisés á, ácariji udaque gai ga yisago bajmanecade iji gaté." Ga jé u uje ore cháguena Moisés dosadode ga ore chisa jmanecade iji gatéode jé aja guedé sereringai.

¹³ Josué, ujode jnacare ore doi amaléquegosode udore ga Josué chose aja ore údi, ga ore chichagu ore ome daquesé cuchábode. Ga jé u uje ore chijnime rángome Josué ore nanique enga Josué ore sué amaléquegosode udore ore gai ome dajocaningai.

¹⁴ Ga jé u uje Pangarádejnai Dupade chojningame Moisés: –Arúsãre cucha dacadode udojo iji aode jeta jé ca picadiguiete yadode udojo ome uaque uje yẽrate uacáringane pirosobácho ome uaque.– Ga Dupade chojningápome Moisés rĩ: –Apésu to jeta Josué chududipise yuruode udojo to uje a yĩropise amaléquegosode ore amirone iji dínique jne, jeta jé ca pujnusinápo udore ore rĩ iji deréjna pitade jnese jne.–

¹⁵ Enga jé u nanique uje Moisés pésu daseradéjnai ome Dupade nanique ga chojninga: "A yipésu yaseradéjnai tudé i jne, ga a yojningame jne 'Pejnasõre Pangarádejnai.' Chamáñaje gajnua tu punínique pijogútoraque bandéra ome dáringa pisígai. Enga cho jetiga uté chicha dabandéragaja Israel ájnape disi ejode yoquibai to ga yoquipijogúsõri u uté ome dáringai pijosingõre."

¹⁶ Quigade enga Moisés chejnapúsu daruode ga chojninga: "¡Pangarádejnai uté u uje chopise bandéra docoidéraque iji pijmanéringui ome yoque uje yijnángo uté i aja yocajesúode! ¡Pangarádejnai e cho dajocaningame amaléquegosi casodé ore to diríca. Mu que gusu diríca uje Pangarádejna Dupa Eyúgojmai cho dajocaningame amaléquegosode, mu a jé chuságaja ore ape disi ejode jnese to jne rĩ!"