Éxodo 16 - Dupade Uruode

Dupade pésu arureque paquesupite diríjabode jeta tṍraji gaté ome israélgosode ore

¹ Israel ájnape disi ejode e ore jno jnese iji pajmini uje i tu Elim, ga ore chicáji pajmite uñai uje i tu Sin. Pajmini Sin uté déji garáijnane ajei ga déji pajmini Elim, pajmini Sinaí ore ujai nanique. Ore doringui casica iji Egı́pto jé guedosi quigaminóri u uje ore di iji pajmini Sin nanique ga dirode e chejna ore guı́dai chojmarai iji guedosi tuté nanique.

² Iji erãpetarei uté ga jé ore chietáyime Moisés, Aarón ore gaté rĩ.

³ Uje ore chojninga: –Uje yugúcoji Egı́pto ica ga yichago yoquĩraca piagode aja yoquejode ica uje yocãraqueguedie aquirájna irágu ga subudé yóguiji ejode ica ga que yejnángo. Mu uje uacajnicho yóguiji Egı́pto ica ga uacoreyoi yóguiji erã́petarégode udojo ga a yitogoi ome cutejmane yoquiyaguhéo jne iji udojo. Jé go uje Dupade que noñome yóguiji Egı́pto ica ga yichago yocóderigui aja uté to ica, mu a yichago yocóderigui aja erã́petarégode udojo gajneri uje Dupade chorei yóguiji erámone udojo ica.–

⁴ Ga Dupade chojningame Moisés: –A qué yipésabu ore potique jne jeta tṍraji gaté ome ore. Jecute angome barasade ore jnese jne jeta ore chimáta deréjnai gajnetı́go daboso iji yẽrapáidode udore ore pose ga gusu jeta ore taguı́ji deréjnai tudé. Ga a yajirape ore jne jetiga ore dopı́si yuru quigode jeoga jé ca ore doi.

⁵ Iji dire chojmaráitı́a ga angome ore jeta ore imatatígo orocoi jeta sué ore imatade gai iji dire chojmarai, ga a dire uñai jé gajnéone u ore imatade udore to jne iji dire puyai.–

^6-7 Ga Moisés, Aarón ore catecã́ri darasade ga ore chojningame ore: –A chise guedéjnoringái gajneri ga a quene ajnusináño to uje Dupade u uje chijnime uáguiji Egı́pto ica, ga e chudute uacachiétabáitigade ome re que. Ga iji durasé dirome ga a atijayo Dupade ome cutejmai átedaté jne. Mu uyoque ga gajnareque uje uacachietáyiñome yoque. Cachi uacojo ayoré yoque arı̃a, ga que yujñapejo ome uacabotique cucha.–

⁸ Moisés chojningame darasade ore: –A jecucha Dupade chisi ome cucha arione ome uaque jne gatuaque iji guedéjnoringáne, jé basa iji durasedie gatuaque gueranone u arurégode ome uaque jne jeta sué uacabáyode enga a ca toque jeta acho udore jnese. Dupade chiraja uje uacachietáyiñome diríca gu. A ajoso ati uyoque u uacachietabáidode uje que yujñapejome cuchárique uje ayoré yoque gu, mu jé uacachietabáidi upúsu Dupade iji gaté.–

⁹ Moisés chojningame dayai Aarón: –Angome yocujode Israel ájnape disi ejo jne enga ore chose Dupade iquei jnese jne, uje chudute ore ichietabáitigade ome re gu.–

¹⁰ Ga Aarón doi ga catecã́ri Israel ájnape disi ejode ore, mu uje qué catecã́ri ore ga jogadi u uje Israel ájnape disi ejode ore chajire garáijnane qui ga ore chimo gue abuja cuchabé ga Dupade ingoningájnai pijoguipı́siji gue abuja uaté.

^11-12 Dupade e catecã́ri Moisés iji uté ga chojningame: –Yudute Israel ájnape disi ejode udore ore ichietabáitigade udore ome yu que. Ga angome yuruode ome ore jne ga ojningame ore jne: 'Iji guedéjnoringái udé gajneri a acho cucha arione iji jne. Mu iji durasé dirome ga a acho arurégode iji dirome jeta subudépise uaque jnese iji udore. Uje yigaidi u gu jeta arajáyopise uje Dupa Eyúgojmai u Uacangarádejnai uyu.'–

¹³ Iji guedéjnoringái uté ga Dupade ojningai casodé cucha ãri di iji ore. Ore chajire mu e diji ore ga jiriridı́e u uje cho poto, poto aja ore yui ga chı̃reta ore irengúi uqué ¡pac! Jé basa ga iji durasé ga guejnatui piéjna ore irengúi ejode.

¹⁴ Mu uje guedé e chicho erámi ga guejnatui base iji ugarabia ga ore chajire jogadíso mu ore chimo cucha pibotatígo uje chosi arureque paquesupite diríjabode. Uje ore chajire dejode mu arureque paquesupite diríjabode chapúsosi erámi aja iji erãpetarei údode.

¹⁵ Ga Israel ájnape disi ejode que ore chiraja gotique ga ore chojningame: "Cajire to gotique. Chimo jóroque re chapuse erámi taja cucha pimojma gotique." Moisés chingo ore ga chojninga: –Dupade guẽrate arureque gajnúone udore ome yoque ujetiga yoco cucha pibose iji udore.

¹⁶ Ga chósi tome yoque: 'Beyoi ga amátayo udore ga jé atingachopísa uaque jne. Uaquetígo, jeoga jnani chojmarai yutı́go chise 2 lítros jne iji ayoré chojmara, chojmara, chojmarane jnese. Ujetiga abechuque uaque gosi ga gosi yutı́go sué dajorane yutı́go gáyode jeta uaque gosi abode subudé iji udore to.'–

¹⁷ Israel ujnié disi ejode ore doi udojo ga uñane yugode orocoi, jé uñane yugode garósi.

¹⁸ Uje ore di degode údi nanique ga ore chatingare iji pı́rique uje i tu gómer, ga jé u uje ore chajuguı́na ome dajogasúode ore. Uje uñane ore yugode orocoi mu ore chejna jnese. Jé basa uje ore yugode garósi mu que chona dajogasúrique gotique. Chamáñaje uje ore chamáta degode ga ore áyipiedie déji jeta jé chopise dajogasúode ore, ga que ore chisa udore iquénique.

¹⁹ Ga Moisés chojninga: –Jé ca uacuñeque noñome deque dirícarique ujeta gosi pota cho dajõratu mu acho iji deréjnai tudé jnese, ga jé ca ası́yo dire uñai tiji jne.–

²⁰ Mu uñane que ore tangári Moisés gotique, enga ore cho dajõratu arurégode udore, mu dire ga ore chajire dajõrani casodé mu júpuchade cho poto, poto iji, ga chorite ga chusaque dejode. Ga Moisés pojna udore ore uje que ore tangári uru quitique gu.

²¹ Ayoré chojmara, chojmarane ore chimáta dajegaitı́go iji arureque gajnúone udore jeta ore tagu iji deréjnai, uje guedé idájapise iji jnumi ga guedé ojodie chisite udore aja jnumi.

²² Mu uje chise dire chojmaráitı́a ga jiei ore yugode, ga ore chajuguı́na dajogasúode, ga ga gare píode ome ore jnese, enga que chona uñeque. Ga jé u uje ore asutedie jno ga ore catecã́ri Moisés ome ore isocade udore.

²³ Ore chingo Moisés ga Moisés chojningame ore: –Dupade jé urúo diríca gu jeta jiei yoquigode iji dire chojmaráitı́a uje que pota gu jeta yisago yoquejórigo iji dire garijitia gu, enga pota jetiga yoco yocujñare iji dire garijitia gatuaque uje dire puyaque gu ome Dupade. Jecute jeta uacãraca piagórigo déji, ga achachója piogode jne iji dire chojmaráitı́a udac jeta sué uacabáyode jne, mu a acho udore irérigui dirome iji dire garijitia uje a jé ca pisaque pejóriguiji dire garijitia uaté dirome gu.–

²⁴ Uje ore tangári Moisés uruode ga ore chicha dabosode iredie aja sodi, ga chise durasé iji dire uñai ga ore chajire mu titame jnupuchade ga que choridápo gotique rĩ.

²⁵ Ga Moisés chojninga: –Acho uacamáta casodé arurécho jne iji dire garijitia tudé, uje Dupade gajneque diri tudé ga dire puyaque, ga jé ca uacuñeque chise dabotique iji garai údode jne iji sañeque.

²⁶ A jé ca Dupade chimoque dire chojmaráitíode jnese jeta chiramurase arurégode udore yoquibai gatuaque iji durasedie. Mu iji dire garijitia ga jecucha ga isocade u uje que déji gotique gatuaque. Dupade pota jeta oyo uacajñare iji dire garijitia gatuaque gu.–

²⁷ Mu iji dire garijitia ga uñane chijna jóronga dajnenie ome erámi jeta ore chimáta arurégode mu que ore chise cucháriguiji erámi gotique.

²⁸ Enga Dupade cho Israel ájnape disi ejode ore báji darasade udore ore angoninguite paritigade ome uru quigode to. Jecute Dupade chojningame Moisés nanique: –¿Ga jé cho rique jne jeta beyoi yuru iyiejnane udojo quigode ome uaque, jeta beyopoi yacajnaquéode quigode jnese to rĩ?

²⁹ Jé ca jnoji uacáyipiedie uje Dupa Eyúgojmai uyu uje yisi ome dire garijitia ome uaque gu ujetiga oyo uacajñare iji uté gatuaque. Jecute yõre yeranone arureque gajnúone udore iji dire chojmaráitı́a. Yigaidi tu gu ujetiga uacamatatígo orocoi iji dire chojmaráitı́a, ga a dire uñai jé gajnéone u uacamatade udore to jne iji dire puyai. Dire puyaque gu dire garijitia uaté ujetiga ácayoji uacayaritígo ga oyo parácho iji uaté.–

³⁰ Jé u uje Israel ájnape disi ejode jnese ore cho dire puyáguiji dire garijitia ga que ore chisa cucha pisatı́guiji jnese nanique.

³¹ Israel ájnape disi ejode udore ore pésu dabosode udore i nanique ga ore chojningame maná. Ga ore potedie udire uje i tu maná póroropise nanique ga chosi cucha ajñu atíãtaque uje pórorape ga i tu cilántro nanique. Ga uneripise ga cho cutepetique ome danéningajnai, ga cho jeta pimera uaté aja cutepeque pipesutique nanique.

³² Uje Moisés chojninga: –Dupade uru qui u udé ome uaque jeta angáchoi ga chósi tome uaque: "Ajuso maná udore uñéngo guio iji pı́rique jne jetiga gare lı́trodie dirome. Ga angoño uacajúseguíodie maná aja uacape disi ejórigo jne, ga a ojnichome ore jne: 'Yoquibosode u udojo nanique iji erãpetarei uje Dupade chisi ome yoque nanique uje chijnime yóguiji Egípto nanique.'"–

³³ Moisés catecã́ri dayai Aarón ga chojninga: –Be pı́rique ga acháji ti ga anire maná gare lítrorigui aja ajei jne. Enga acháji jogatique jeta ca pijocaya udire enga quigade ga acháji Dupade iguı́jna puyai ajei jeta yingongo disi ejórigo ore jne.–

³⁴ Enga chise diri uje Aarón doi Dupade uru quigode ome Moisés ga chicha maná aja Dupade uruode iquei iji pi ajei nanique iji Dupade iguı́jnai ajei. Ga chuse guio iji uté jogadi.

³⁵ Israel ájnape disi ejode udore ore tagu maná nanique aja siqueredie uje chejna ayoré gáredie uje que punínique jogosóningo uñeque déji ore ajesúode udore erã́petarécho nanique. Mu uje quene ore chise Dupade ojningai punire Canaán eruei nanique ga jé u uje que ore tagupo maná gotique rĩ, uje ore chise pachamite uñane uje udore unirisórone e déji. Enga jé u uje Dupade cha chisi ome maná udire ome ore nanique.

³⁶ (Adójnacho uje Israel ájnape disi ejode ore chatingara degode cucha piboso nanique ga ore pı́ode cuse ome udore ga pı́ode udore ore ı́ode u gómer, éfa ore. Ga lı́trodie gare iji gómer chojmarai nanique. Jé basa lı́trodie chejna yu iji éfa chojmara.)