Éxodo 14 - Dupade Uruode

Dupade ipesute Yote Quedéjna Caratai ga jĩraque chajuque re iji israélgosode ore iquei

¹ Enga Pangarádejnai Dupade catecãrápoi Moisés gaté rĩ.

² Ga Dupade chojningame Moisés: "Moisés á, angome bojode Israel ájnape disi ejode ore jnese jeta ajnésacho uacaquigade ga achayo uacarengúrique aja ore idai Pi-hahirot ejode iji ore idai Migdol, Yote quedéjna Caratai ore ujai. Enga a uacarengúi uté idógosi yote quedéjnai jne iji ore idai Baal-zefón iquei.

³ Yigaidi tu gu jeta Faraón chucué jórogui uacajesúode ga a chojninga jne: 'Israel ájnape disi ejo casodica que ore chimo jóroque daquitique erãpe. Ga a ore bijna iji garáijnane udore gajneri.'

⁴ Mu a yipésapo Faraón jne rĩ ga a cusu rome uaque jne enga a chajna uaque jne ujeta chisínapo uaque jne rĩ ome daroquéode. Ujeta chisína uaque ga a yingo yúringai ujopíerãque cuchape ome uté gaté jne, jé aja uté jorane dasoldácho. Ga a quene egíptogosode pañapísiji yadode udojo jne enga quene ore chiraja uje Dupa Eyúgojmai uyu ga que uñeque doi ga cho yu to." Israel ájnape disi ejode ore doi Dupade uruode ome raque ga ore chajnésaru jnumi yui ga ore chicha darengúi aja ore idai ejoi uje i tu Pi-hahirot.

⁵ Enga egíptogosode ore eduguéjna cuchábi tṍra rome ore uje quene chiraja gu uje Israel ájnape disi ejode a ca ore chajniápo ore gánique jne rĩ, ga Faraón, irógode ore chojningame ñane: "¿Jé gotíguipié uje yujuéjo doi ome Israel ájnape disi ejo casodé ore diríca ga ũruso yoque diríca ya? Uje a jé yoquigaidápo ore ome yoquiroquéode jne rĩ iji yocuniri udé."

⁶ Jĩraque Faraón tibidi darógode ujetiga ore pésu oruti guebéquedaté, ga jé u uje nóna dasoldate uási ga ore jno, ga ore chajna Israel ájnape disi ejo casodé ore.

⁷ Que gusu Faraón oruti guebéquedaté mu uñane déji ga 600 guebéquedatéode udore uje ore choru ga que soldate eduguéjnarique chimoque guebéquedaté chojmarai uje ore chijnoque ore aja Israel ájnape disi ejode quigade. Ga guebéquedaté ujñapetade u ore orutode udore jnese iji Egípto nanique. Enga ore chejna dachidode guebéquedatéo uñane to aja Israel ájnape disi ejode ore quigade jnese.

⁸ Dupade pésu Faraón ga jĩraque cho cusu cusúgome Israel ájnape disi ejo casodé ga jé u uje chajna, chajna ore. Mu Israél ájnape disi ejode ore jochaguéjna aja dajesui, ga que ore dosóñime cuchárique gotique aja ore ajesúode erámio uje ore jnoji egíptogosode ore gari nanique.

⁹ Jocaningai gaisórone jnese iji Egípto ore jno ga ore chajna Israel ájnape disi ejode ga ore choru guebéquedatéode, buricade ore aja Israel ájnape disi ejode ore quigade. Ga ore chisína ore iji ore irengúi iji ore idai Pi-hahirot ejode uje idógosi ore idáyode uñai uje i tu Baal-zefón, uje ore idai uté déji Yote Quedéjna Caratai edúdi nanique.

¹⁰ Uje Israel ájnape disi ejode e ore chuniname eti Faraón, urasade e ore chisína ore ga ore dosóñime ore ga jé u uje ore chutṍri Dupade jeta chátaja ore.

¹¹ Ga Moisés ujode Israel ájnape disi ejo chojningame Moisés: –¿Ama jé ca ore óderigui déji Egípto to diríca ya? uje a bapotigádi u ujeta yichago yocóderigui aja garáijnane udojo jeta ore chujé yóguiji udé uje babo yocúdi iji Egípto diríca. ¿Gotique uje que ajíome yóguiji Egípto diríca, ga jé ca aroque yógaja doi iji Egípto diríca?

¹² Jé go uje yingongome ua diríca mu jeta qué yácagoji egíptogosode ore gari, ga jé yicoi ore iroquéode gatuaque. Jeta ore cho daróguiji yoque marínga, jé dóji. Mu beteque diríca eti angári yocuru quitique, ga jé bajnari yógome doi. ¡Que cucha gotique jeta ore cho daróguiji yoque mu cucha gajnarei tu jeta yichago yoquigachotígaja garáijnane udojo gajneri!–

¹³ Ga Moisés cho quique darasade ore ga chojninga: –¿Jé gotíguipié uje uacatodóyo? Jé ca atodóyo gotique. Uje a anguretáyo Dupade ome ojningane cucha yúode gajneri, ga jé u uje chátaja yoque jeta yipáñangoji úringai pátajasṍre. Ga a jé ca yimóngopo yocajnasórone egíptogose udore ore jne rĩ. Chamáñaje a Dupade chingongara cutejmai detotiguejna aja ore jne gu.

¹⁴ Jé ca oyo uacáyugu uágome uacajnetique pocaningai yui, uje a jé ca uaque u jne gu jeta ajéyo egíptogosode ore. Mu a Dupade chicha raja uacaquei jne gu, ga a u jne jeta gajneque uacajnetique pocaninga jeta cho dajocaningame to.–

¹⁵ Dupade chojningame Moisés: –¿Gotique uje batai yu jeta qué yátaja barasade, uaque? ¡Angome bojode Israel ájnape disi ejo ore ga ore jnome dajesui tuté erãpe!

¹⁶ Ga yojningai tu ua, Moisés á, jeta ajé bogué uaté aja yote quedéjna cuchábi uté gai jne enga íjnoque yodi jne iji bogué údi, ga jé u uje bojode Israel ájnape disi ejo ore chajuque tié cuchabé uaté jne, ga ore chicai uéchamitó uje íjnoque yodi iji ore aquesupídi gu.

¹⁷ A yipésu egíptogosode ore úringane ducusuré jne enga a jé ore chajna uágaja yote quedéjna cuchábi uté jochai to jne jeta ore choru guebéquedatéode, buricade ore aja jne ga jogadi u jne jeta yingo yúringai ujopíerãque aja udore ore jnese iji te.

¹⁸ Ujeta egíptogosode ore chudute darasade ujnoméone udore jne enga quene ore chiraja yu uje Dupa Eyúgojmai uyu jeta jé yi yisocáringome cucha ponai ore jnese.–

^19-20 Uje Dupade chejna daruode udore guesi ome Moisés ore ga jĩraque Dupade irótique gaté unirísõre chumuchásu ore iquemitobé gue abuja ga chicháji ore quigade ga suru egíptogosode ore edominone enga que qué ore chimo Israel ájnape disi ejode ore gotique. Ome egíptogosode ga Dupade pésu ga juduque erámi ome ore, jé basa ome Israel ájnape disi ejode ore ga Dupade pésu ga díreca erámi, ga que toc jeta egíptogosode chisína Moisés, urasade ore iji dejai údode uje juduque ore guípiedie gu ome gue abuja utatájna tuaté.

²¹ Uje Moisés chujé dogué taja yote quedéjnai jochai gai ga jé u uje Dupade chiroque emi aja uje tṍraji guedé garani ga chubúchu yote quedéjna cuchábi uté ¡pu, pu! ga jĩraque chajuque re iji ubuchupídi. Ga Dupade u uje ipesute jnumi úringai cajnore iji Israel ájnape disi ejode udore ore iquei. Ga gaidi u jeta ore chicáji uéchamitó.

²² Uje Israel ájnape disi ejode ore chajuque yote quedéjnai uté cajnóningai ga yodi jé udé iji ore dosadode jnese. Ga ore chajire darasei ga yodi chicai gaté iji ¡ti! Jé chopóji ore ãrachua te rĩ uje yodi chicáji ¡ti!

²³ Faraón uté, isoldate dipeséode jé ore chajna Israel ájnape disi ejode ore aja yote quedéjna cuchábi gatócoro uje ore choru guebéquedatéode, buricade aja uté ajei to.

^24-25 Uje e dirájnai ga Dupade chácariji gue abuja ajei uje pioi ocaraidie déji uaté ga chajire Faraón ore iji dádi uje e ore chise yote quedéjnai ajei, ga pésu dasocai ome ore ga ore gachidode guebéquedatéo dugudie base ¡pac, pac! ga uñane chijna dajorane aja dajesúode ga ore chácariji ñane údode. Ga ore chisa dabade ome dachorade uje que ore chimópo darípieraque gotique rĩ. Ga jé u uje egíptogosode chojningame ñane: –Ayáyo Israel ájnape disi ejode ore, ga yiyágo ore uje a ore angureni Dupade gotique u uté uje cho dajocaningame uyoque ga chirota darasade udore ore. Jecute chicha raja darasade ore yui ga socárome yóguiji udore ore quigade. Gaidi u jeta ca yisínango ore. ¡Boyo ga yajnésaco aja yoquiquigade ga yajníngo to!–

²⁶ Uje Moisés e ore déji yote quedéjna uéchamitó gaté ga Dupade chojningápome Moisés rĩ: –Ãrai bajmanai aja yote quedéjnai gai te rĩ ga yore egíptogosode ore gai, jé aja guebéquedatéode ore, jé aja ore orutode burica jnese to. Ga jé u jne jeta chejna udore ore.–

²⁷ Iji direjnímei ga Moisés chãrai dajmanai aja tié cuchabé gai te rĩ ga yodi cho jara aja cajnóningai tuqué. Mu yodi yore aja cajnóningai uté uje cho tié jochaque cajnórone que. Uje egíptogosode ore pota jóroga jeta qué chachẽrápo jóroque gatéode iji tié cuchabé tuaté jmainie rĩ, mu que toc jeta qué gosi chapite iji, uje Dupade u gu uje ipesute jeta yodi uté jĩraque chaco ore gáyode, ga ore toji jnese.

²⁸ Uje ore chajna Israel ájnape disi ejode ore ga que Faraón iroque soldate chojmarátique qué ecási iji yodi uté uje Dupade chojne ore gai. Yodi uté chusũrurase ore gachidode guebéquedatéode ga pépita. Chusũrurásapo ore gachidode burica rĩ, ga chejna urugúode ga udore chácariji yodi ica gai jnese.

²⁹ Uje Israel ájnape disi ejode ore chaquesu tié cuchabé tuaté iji pajei ga cajnore jochai iji ore iquei ga ore chimo yodi iji dejode uje déji ore arasei, ore ãrachua ore, mu jé ore ate tiji uje ore chise uéchai ga que uñeque toji gotique.

³⁰ Diri uté u nanique ga Dupade chijnime Israel ájnape disi ejode ore ome cutejmai detotiguejna iji egíptogosode ore ujade. Ga egíptogosode ujnomerãque ore nanique uje jé pujnuéngaisṍre ore to ome ore ujode ayoréo, mu que ore úringai pujnuéngaisṍre cunguésõri Dupade etotiguejnai gotique to. Uje Israel ájnape disi ejode ore déji yote quedéjna cuchábi uéchamitó ga ore chajire yote quedéjnai garérodie iji sona mu ore chimo egíptogosi casodé ore iji sona uje ore tutúdiji yodi gai ga emi chijna ore aja garérodie iji sona.

³¹ Uje Israel ájnape disi ejode ore chimo damajósõri casodé egíptogose ore iji yodi ica gáyode ga quene ore jnusina uje Dupade u uje ujopíerãque ga sué cuchade gáyode jnese. Jecute ore cho chíguiji jnumi uje ore tijapísa uje Dupade chiqueta ore, mu chejna ore umajósõri casodé. Ga jé u uje ore doi ga ore changureta Dupade gaté ome damone Dupade acho, ga que ore chietáyime Moisés júdode Dupade urúo gotique rĩ.