Éxodo 13 - Dupade Uruode

¹ Ga jé u nanique uje Dupade catecã́ri Moisés ga chojningame:

² "Ẽcho uacape urejane ore ome yu jnese ga yo yajnéngu udore ore jnese jne. Jé aja uacachidode cuchiso jnese ore ape bajade, ẽcho udore ome yu to uje yajnecho ore to."

³ Udojo quigade ga Moisés catecã́ri darasade ore ga chojningame ore: "Diri tudé uje uacaboyo iji egíptogosode ore uniri, ga oyo uacajnusinamáni dire iji uté jne. Chamáñaje e diyajmanguipise uje uaquejnárecho egíptogosode ore josipiedie uje ore chiroque uágaja daroquéode bisideque. Mu Dupade e chingo cutejma dajopié iyiejna aja egíptogosode ore iji diri tudé ga e chijna uáguiji ore gari. Jecute jetiga ajnusináño diri udé jne ga jé ca acho arurégode iji ujeta bisidi déji.

⁴ Uje uacaboyóji guedosi udé iji Egípto ga uacacoringui guedosi udé i tu Abib.

⁵ Ujeta Dupade e chorei uáguiji derani punire jne enga ajnusináño uacacoringai iji Egípto iji uacacoringui udé guedosi Abib udé jne. Yojningai tudé punire ome uaque, uerate erámone iji. Ga cutepéode jiei iji, ga jnacarai ueradápo iji to rĩ jeta aquirájnanie tagu ga irisode jiei iji. Mu puniri tuté ga jé uacojode ayoré ore jogate uje ore íode u cananéogosode, jé aja hitítagosode, jé aja amorréogosode, jé aja hevéogosode, jé aja jebuséogosode ore to. Uje Dupade jé ichagája uaquéode nanique uje chingo uacáquiode icaite mu a quene uruode tocade ome disi ejode uaque jne.

⁶ Ujeta ajnusináño uacacoringui guedosi udé iji puniri uté jne enga acho arurégode iji jne ga ejnáño dire garitírigo ome arurégode udore úringáringo piboso jne, jeta jé ca anícho arurégode udore bisitígaja. Mu iji dire garitíode udore quigaminóri dire ga apéso uacaninaquei iji uté jne jeta acho uacabose unérone iji jnese. Chamáñaje a ajnusináño Dupade átedatéode ome uaque gu iji diri uté jne uje chijnime uáguiji egíptogosode ore jmainie nanique.

⁷ Iji dire garitíode udojo ga jé ca uacuñeque chijna arurégode bisitígaja daguíjnarique jne, jeoga arureque jeta bisidi déji, enga jé ca ajuécho udojo jne ome uacaniri tuté údode.

⁸ Enga acacho uacabode ome dire puyade udore quitique ga ojnichome ore jne: 'Yipéco udojo gu jeta yujnusinángo Dupade átedaté casodica ome yoque uje chijnime yóguiji egíptogosode ore jmainie nanique.'

⁹ A ojnichome uacabode ore jne: 'Yocujnusinamánone díño udore gajnúone u ore urusarane Dupade urúo uje jnanione uñane ore chigaru aja denochade, jeoga ore jmanecade, uje ore gaidi tu gu ujetiga Dupade uruode udore ca jnoji ore ajénique. Mu uyoque ga yipéco yocujnusinamánone díño udore enga yocáyipiedie déji Dupade uruode úringane patatacho, ga jé u uje yacaco ñane ome quigode. Chamáñaje Dupade u gu uje chijna detotiguejnai ome egíptogosode ore nanique uje chijnime yóguiji ore jmainie, ga jé tiógara ujetiga yicoi ojningane cucha jnese.

¹⁰ Jecute jé ca amócho siqueréraque jne jeta chise guedosi Abib enga ajnusináño Dupade átedatéode udore gatuaque uje chijnime uáguiji egíptogosode ore gari nanique.'

^11-12 A Dupade chicha uágaja puniri Canaán uté to jne uje chichaga aja uacáquiode ore nanique enga a quene ore ájnape disi ejode agúsoji puniri tuté jne. Mu jeta e agúsoji ga asíñome uacape urejane ome Dupade jne iji te, jé aja uacachidode cuchiso ore ape bajade to rĩ jeta Dupade gajneque ore.

¹³ Ujeta Dupade gajneque bachidé burica quedéjna ape bajai jne, enga apota ujeta qué chapite, ga be áyasa ataque, jeoga áyasa quedéjna ataque ga ajéyo ga ẽrame Dupade ga bachidábi burica quedéjnape qué chapídosi to ga quene o bachidi iji uté jne. Mu jeta jé ca ẽcho bachidéraque áyasa ataque ome Dupade, jeoga áyasa quedéjna ataque, ga apatigase bachidábi burica quedéjna uté etabítecoro. Mu uacape diyoqui bajade ore ga a oyo ore oré ome Dupade jne ga a uacaplátadie u ore oré jne jeta ẽchome Dupade.

¹⁴ Ga a chise dínique jne jeta uacabode chojningame uaque: '¿Jé gotique uje uacapéso udojo quitique e?' Ga a ojnichome ore jne: 'Uje yugúcoji Egípto nanique ga yejnárejo egíptogosode ore josipiedie nanique uje yicoi ore iroquéode bisideque nanique. Mu chise diri nanique uje Pangarádejnai Dupade chijna cutejma dajopiéjna ome ore nanique ga chijnime yóguiji ore jmainie.

¹⁵ Ore asuté Faraón ducusuréchoquí nanique ga que juéga dóringome yoque nanique iji daniri. Jecute Pangarádejnai Dupade cho dajuñame ore nanique ga chequésãre egíptogosode ore ape bajade jnese nanique, jé aja ore gachidedie cuchiso ape bajade to nanique. Jecute yoco Dupade gajnéone iji yocachidode ore ape bajade ore, ga yoco yocape bajade ore oré ome Dupade to.

¹⁶ Yocujnusinamánone díño udore gajnúone u ore urusarane Dupade urúo uje jnanione uñane chigaru aja denochade, jeoga dajmanecade uje ore gaidi tu gu ujetiga Dupade uruode udore ca jnoji ore ajénique. Mu uyoque ga yipéco yocujnusinamáni dire udé enga yocáyipiedie déji Dupade uru iyiejnane úringane patatacho ga jé u uje yacaco ñane ome quigode. Chamáñaje Dupade u gu uje chijna detotiguejnai ome egíptogosode ore nanique uje chijnime yóguiji ore jmainie, ga jé tiógara jeta yicoi ojningane cucha jnese.'"

Dupade cho re iji gue abuja cucháberaque iji dirode, jé basa ga chopo re iji pioque ocarate cuchábedie rĩ iji dejade

¹⁷ Uje Faraón chiroque Israel ájnape disi ejode aja doi nanique iji Egípto, ga que Dupade chorei ore iji dajere arobé gotique uje jĩraque ore cáputaji filistéogosode ore uniri Canaán nanique. Dupade chiraja gu jeta ca ore ujñapeguírasome pocaningárique jne enga a jĩraque ore chajnésaruporásu Egípto rĩ. Jecute chorei ore iji dajeque ocórorãi uje chaquesu erãpetarei nanique.

¹⁸ Uje dajeque ocórorãi uté chicáji Yote Quedéjna Caratai to nanique jeta ore chaquesu uté ga ore chicáji uéchai nanique. Israel ájnape disi ejode udore ore jnoji Egípto nanique ga ore jochaguéjna aja dajesui ga cho jeta ore doi pocaningárique ome dapetígajnai nanique.

¹⁹ Israel ájnape disi ejode ore jnoji Egípto nanique ga Moisés chijnoque dáqui cásodicáite uñai José ajnoquéode aja dajesui uté to, uje José jé urúo ome israélgosode ore nanique gu uje chojninga: "Jeta yitoji puniri tudé jne marínga, ajuso yajnoquetígo guio jne. Jé ũrepise yu gu uje a chise diri jne ujetiga Pangarádejnai Dupade chijnime uáguiji egíptogosode ore jmainie, ga a ajnócho yajnoquéode aja uacajesúode jne ujetiga boyo iji de."

²⁰ Uje Israel ájnape disi ejode ore jnoji ore gajmini uje i tu Sucot nanique, ga ore chicáji ujoi pajmite yui uje ore chojningápome dajmini tuté Etam rĩ. Ga Etam uté qui u erãpetarei amotacúdi. Ga ore chicha darengúi aja Etam uté to nanique.

²¹ Uje Israel ájnape disi ejode ore jnome dajesúode erãpe nanique ga Pangarádejnai Dupade u uje nóna ore aja dajéode nanique. Ga Dupade cho re iji gue abuja cucháberaque nanique iji ore iquéode jeta ore chajna gue abuja tuaté iji jnumone iji dirode. Mu uje chise dejai ga Dupade chopo re iji pioque ocarate cuchábedie rĩ enga chijñate Israel ájnape disi ejo ore gáyode iji dejade. Gaidi tu gu ujeta ore diguiji dirode, dejade ore jnese ome isocade udore.

²² Uje diri u ga jecucha gue abuja cuchabé jogate ore iquéode iji dajei, jé basa ga jeta ore diguiji dejai ga pioque ocarate cuchábedie chijñate ore guípiedie gáyode aja ore ajesúode udore.