Éxodo 12 - Dupade Uruode

Dupade que chujé israélgosode ore ape urejane uje ore chanire ojninga casé áyasa iyo aja daguíjnane piagode gu

¹ Uje Moisés, Aarón qué ore déji Egípto ga Dupade catecãrápoi ore rĩ.

² Enga chojningame ore: "Guedosi udé a u jne ujeta yijnime uáguiji egíptogosode ore jmainie. A oyo guedosi bajáguiji udé jne iji siqueredie jnese, ga a uacajnusinamánone díño jogapi guedosi u udé jne iji siqueredie gatuaque.

³ Enga angoño yuruode udojo ome uacarasade Israel ujnacare disi ejo ore jne enga oyósi te: 'Dupade chojningame uaque: A chise guedosi udé jne jeta dirode chejna yijmanáyone, ga asayo uacachidedie áyasai jne enga boyo ore údi aja uacaguíjnane jnese. Ga áyasa, jeoga áyasa quedéjna déji guiguíjna chojmara, chojmarane iji udore, udore.

⁴ Enga ajéyo áyasadie udire ga acho ga ejnáñopise. Mu jeta jé ca togome uaque gosode jeta ejnáño jnese ga abichoi uacacayade uje idógosi ore iji uaque ga ore tagu to ga ejnáño jnese, uje que yipota gu jeta óraño petígo.

⁵ Yojninganie u áyasadie, áyasa quedéjnanie ore jeta qué ore guejnanie siqueré chojmára iji dabatigai yui uje ueradedie u gu ome yu. Ga omenie upome yu rĩ jeta choquíode u, jeta jé ca cucha ajnangócho.

⁶ Ga a uacachidedie udire chácariji uacaguíjnane aja guedosi udé jeta e dirode gagájni iji yirídai. Dirode gagájni iji yirídai jne enga quene ajéyo uacachidedie udire jnese jne jeta guedé e perupi aja jnumi.

⁷ Ujeta ajéyo áyasadie udire jne enga ajuso iyoi guio jne enga a ameso uacaguíjnane piagoi ejode ome áyasadie iyode udore jnese. Yojningai tu uacaguíjnane piagode uje uacacho uaquegode udore iji udore ajéode. Uje e uacameso uacaguíjnane piagode enga jogadi quene u jeta acho uaté arione to iji uacaguíjnane ajéode.

⁸ Ujeta e amácho uacaguhéyadie áyasai gajneri iji uacapotade gáyode ga anícho ore acadie ugarabi aja to jne jeta chusaque áyasa arione udore, ga achopo arurégode aja rĩ uje íjnoque bisidi iji.

⁹ Jé ca acho áyasadie ãriátique jeta qué pioi charoriguíji uje qué sõrora. Jeoga gosi ãraquetique áyasa ãri, ga jé ca acho. Aguhéso áyasa gatoi, guídogorodíe ore to iji pioi gánique, jé aja uchade jnese iji ajei.

¹⁰ Ujeta áyasadie arione sué uacabai gajneri jeta ca acho jnese, mu ca oyo uacajũratu ga ca achayóji ti jeta acho dirome. Mu ãcho uacaquebéode udore gai jnese.

¹¹ Jetiga e acho áyasa arione udore iji uacaguíjnane ajéode ga ayáguenaño gatéode ome uacachabode jne enga dimane uac ujeta boyo ¡bu! aja uacaquitígo. Ga acho ¡cháca, cháca, cháca! jne ga aquejnáñome uacachabode jne. Ga aguiyópo uacaguidedie jne rĩ, ga dimane uacachiétigo iji uaque to rĩ. Ga dimane to uacagutádedie iji uacajmainie ome uacacoringai yui. Pangarádejnai Dupade Páscua u udé, jeta yujnusínango iji siqueredie jnese Yocangureni Dupade átedatéode ome yoque.

¹² Chamáñaje dejai tudé a jé u gajneri jeta yicáji egíptogosode ore idai tudé údode jnese ga a yequésãre ore ape urejane jnese gajneri iji ore iguíjna chojmara, chojmarane jnese iji ore idai údode. Jé aja ore gachidedie cuchiso ape bajade ore jnese to, ga a quene egíptogosode ore chiraja uje Dupa Eyúgojmai tu yu ga que ore angurenone dupa gotígo ujñapegome yujopié iyiejna.

¹³ Ga a obiréjnapise ome yu jne uje Israel ujnacare disi ejode uacuñeque iguíjnai tu uté ga banire áyasa iyoi aja piagoi dosadode gu, ga obiréjna ome yu. Jeta yequésãre egíptogosode ape bajade ore jne, enga a yajire piguíjnane piagode aja yajesúode jne jeta áyasa iyoi déji guiguíjna piagoi ga jĩraque yiji ¡bu! iji guiguíjnai uté ga a ca yequésãre gosi ape urẽjai iji guijnatajei ga jĩraque yiji ¡bu! aja yiquigode.

¹⁴ Jecucha ga ajnusináño diri tudé gatuaque jne iji siqueredie ga acatecãchoi yu gatuáguiji jne. Ga apéso uacaninaqué cuchátique iji yojningai tuté dire gatuaque jne. Ga ajnusináño Áyasa Iyo Pãrésõri casicaite jne iji uacajñamini tuté to. Yuru iyiejnane quicho udojo ome uaque gu jeta jecucha apéso ga oyo uacape ejórigo ore quigome yadode udojo ome uaque jne jeta ore chidójnanga to.

¹⁵ Ujeta ajnusináño Áyasa Iyo Pãrésõri jne ga a ejnáño dire garitírigo jne uje a uacabosode u arurégode jne uje íjnoque bisitíguiji udore údode. Ga a jé ca achayo arurégode bisidi tuté aja uacaguíjnane to jne rĩ jé aja dire garitíode udojo eruei jne. Ujeta gosi tagu arurétique jeta bisidi déji ga ajócãcho gosi iji Israel ujnacare disi ejode uacajade jne ga cãra daquitígo ome uaque.

¹⁶ A amátayo uágaja ñane iji dire bajai tuté jne, jé iji dire garijitia to, ga Dupade gajnenguipíso dirode udore ome uaque, jeta apéso uacague iji udore. Ga dirode udojo a ca pisagápo cucha pisatíguiji jne rĩ, mu gusu jeta pipesute cucha pibosode iji udore.

¹⁷ A uacajnusinamáni udore arurécho uje uacacho ga que bisitique déji a qui jé u ome uaque to jne uje uacajnusináño uje yijnime uáguiji egíptogosode jmainie nanique iji ore uniri Egípto. Chamáñaje yuru iyiejnane quicho udojo ome uaque gu jeta jecucha apéso udore ga oyo uacape disi ejórigo ore quigome yadode udojo ome uaque jne jeta ore chidójnanga to.

¹⁸ Iji siqueredie jnese ujeta chise guedosi bajai ga jecucha uacáyipiedie déji arurégode uje que bisitique déji. Ujeta ore isecaranone díño chise 14 iji guedosi bajai tuté, ujeta guedéjnoringái e u enga acho arurégode jne uje que bisitique déji. Ga a quene uacayáyo udore úringane pibose jeta ore isecaranone díño e chise 21 iji guedosi bajai uté.

¹⁹ Qué yogotápo yuruode ome uaque gaté rĩ: Jé ca gosi chicha arurégode bisitígaja daguíjnai iji dire garitíode udojo jne. Mu gosi ujetiga tagu arurégode uje bisidi déji ga beyoi uté ga ajócãcho uté gosi iji uaquedai tudé. Jeta purása quedéjna gosi, jeoga Israel ujnacare disi ejode uña mu apúso ore aja jeta arocho gosi aja doi. Chamáñaje uté tagu arurégode uje bisidi déji ga que doi yuru quitique gotique to.

²⁰ Qué yijiápoi yurúiso ome uaque rĩ uje yojninga: Jé ca acho arurégode jeta bisidi déji jé aja dire garitíode udore eruei. Ujeta acayóji uacaquitígo erámio jne marínga, jé ca acadíchoi yojningane udojo ome uaque jne jeta chise guedosi tudé iji siqueredie jnese.'"

²¹ Uje ore chejna udore guesi ga Moisés tibidi Israel ujnacare disi ejode ore dayode jeta chajnerame Dupade uru quigode ome ore. Enga chojningame ore: "Boyo jne enga beyosi uacachidé áyasa abatígui jne, jeoga áyasa quedéjna ababi. Enga uacajogasúode a apéso udore gajneri iji dejai tudé. Iji dejai tudé ga a apéso Dupade ojninga Páscua uaté jne. Uje a ajéyo áyasa abidie ga a acho udire arione jne iji dejai tudé.

²² Ajuso uaqueguedie áyasai udire iyode guio jne ga aníchoja bajóraque jne. Ga a acáyo pamatadéraque iji áyasa iyoi tuté ga anguñechója uacaguíjnane piago dosadode jnese. Ujeta e ameso uacaguíjnane piago ejode ome áyasa iyoi ga jé ca uacuñeque dopoi guetíguiji daguíjnai ajénique jne rĩ, jé aja jeta guedé quene chipésosi guesi.

²³ Uje Pangarádejnai Dupade a chidójnanga yoquiguíjnane jnese jne iji dejai tudé jne ome doidi pitoringa uje chequésãre egíptogosode ore ape urejane. Uje que ore chimese daguíjnane piago ejode to ome áyasa iyoi ga chequésãre ore abode iji. Mu jeta gosi chimese daguíjnai piago ejode ga Pangarádejnai Dupade chajire mu áyasa iyoi déji piagoi ga jĩraque jno ¡caru! aja dajesui. Dupade iroquei jé u ome Israel ujnacare disi ejode uyoque jeta yicoi ga yimeco yoquiguíjnane piago ejode ome ojningai áyasa iyo uté ga a yocape urejane ore chapídome utocaidi pitoringa jne.

²⁴ Que Dupade potapísa jeta átedatéode udore jnoji israélgosode uacáyipiedie, ga uru iyiejnane quicho udojo ome uaque jeta ajnusináño Áyasa Iyo Pãrésõri iji siqueredie jnese, ga oyo uacape ejórigo ore quigome adode udojo ome uaque jne jeta ore chidójnanga to, jé aja erámi eruénique.

²⁵ Dupade a chorei uáguiji ojningai punire ueradéjna jne. Jecute ujetiga e agúsoji puniri tuté uje chingo uacáquirigo ore nanique enga jecucha apéso Páscua uaté adode iji siqueredie jnese uje uacajnusinamáni u Áyasa Iyo Pãrésõri gatuaque.

²⁶ Ga a uacape disi ejórigo a ore chojningame uaque jne: '¿Ama Páscua uaté quitique nanique a? uje uacojnichome uté Áyasa Iyo Pãrésõri.'

²⁷ A ojnichome ore jne: 'Páscua qui u uje ore tẽra áyasadie ome Dupade nanique ga imoi tu uje que ore chijáro raja dangoninguitique ome Dupade uru quitígo ome raque. Jé upo rĩ uje Dupade chiroque daroi aja egíptogosode ore ape urejane nanique jeta chequésãre ore ape urejane udore, mu que cunguésõri Israel ujnacare disi ejode ore iguíjnane to iji egíptogosode ore iguíjnane ujade nanique, uje chiraja gu uje que ore chimoque uru quitique ga ore chimese daguíjnane piagode ome áyasadie iyoi gu. Isocai u udé nanique uje Dupade chãraque yocape urejane ore nanique ome datocaidi pitoringa.'" Uje Moisés chejna dajúdode udojo aja guesi ga Israel ujnacare disi ejode ore chichaga dagataidie aja jnumi jnese, ga ore catecã́ri Dupade uje ore chudute uje a ore chapídome Dupade ujuyaquérique jne jeta ore chimese daguíjna piagode ejode ome Áyasa Iyo Pãrésõri.

²⁸ Uje ore chejna dacatecãraitigade aja guesi ga udore ore jno ga que ore chimoque darasade Moisés, Aarón ore uru quitígome raque. Ore chiraja gu uje Dupade uru quichome ore.

Dupa Eyúgojmai diji egíptogosode ore uniri nanique enga chequésãre ore ape urejane jnese nanique

²⁹ Iji dejai uté nanique iji dejnínga gatócoro ga Pangarádejnai Dupade diji ore uniri tuté nanique enga chequésãre egíptogosode ore ape urejane jnese nanique. Ga jé chome Faraón uté to uje ape urẽjai toi to nanique uje eduguéjna cuchape dayé mu. Ore jurúgayode uje idája ore iji ore iguíjnane mu jé ore abode toi to nanique. Jé aja egíptogosode ore gachidode cuchiso ape bajade to uje ore toi jnese nanique.

³⁰ Enga egíptogosode ore niji jnese iji enga ore uyacaminíji dedáyode udore údode jnese nanique ome dajnusiétigajnáne uje ore abode toi gu. Ga Faraón uté, iróquegatéode jé ore niji to ga ore u uyacarane to nanique. Que tita egíptogosode uñeque iguíjnarique nanique jeta ca gosi atique toji.

³¹ Ga qué dejaque iji dejai tuté nanique uje Faraón tibidi Moisés, Aarón ore jeta catecã́ri ore. Enga chojningame ore: –¡Boyo ga ajucho uáguiji yurasade ore ujade! ¡Angaráño uacaquitique ome yoque, uacarása uégode uaque! Boyo ga acatecãchoi uacangarádejnai Dupade gotique iji sañeque jeta jé uru quichome uaque.

³² Uacajóyo uágaja diríca jeta uacachidedie cucha nóna uágaja doi, ga jé ejnáño uacachidedie aquirájnai, áyasai ore jnese ga boyo ¡bu! aja uacajesúrique. Mu angoño yu aja uacangarádejnai tuté, jé socaseti chátabája yu to jne.–

³³ Egíptogosode ore cho dedojnaringué ome Israel ujnacare disi ejode to ujeta jĩraque ore jnome dajesúrique iji ore uniri uje ore todo gu jeta Dupade cháta ore aja disi togode ore to jne.

³⁴ Israel ujnacare disi ejode uje ore jnoji Egípto nanique ga ore pésu dagúchade aja píode ga ore utade dotíyai déji cadudie iji ore ejode uje que ore chanire bisitígaja nanique. Ga ore chipocásu udore gáyode iji piedie cadui ga ore chicháji daguidedie, datarãpéode ore ajei iji dagúchade gatócorodie ga jé u uje ore jnome dajesui ga ore chisa dagúchade ga ore chijnónguiji dorotaidie aja dajesui tuté.

³⁵ Uje ore jno ga ore doi Moisés uru casodica ome ore ga ore chutai dejominórone egíptogose ome ore ugúchade jeta ore chisi ome ore aja ore ajesui. Ga ore chutai óro, pláta, jé aja ore iboradie jeta déji ore.

³⁶ Pangarádejnai pésu egíptogosode ore icaniratiguei ga Israel ujnacare disi ejode ore chutai ore ome cuchade ga jĩraque ore chisi ome ore utaidode jnese ome ore. Ga cho jeta Israel ujnacare disi ejode ore chajnose egíptogosode ome cuchade enga ore chejnapise dagúchade aja ore.

Israélgosode ore jnoji Egípto nanique ga ore chopise Dupade úringai pirosobate aja dajesui

³⁷ Uje ore jnoji dedai Gosén ga ore chicáji egíptogosode idáyode uñane uje ore íode u Ramsés, Sucot ore ga ore chajuque ore idáyode udore iji gatócorodie aja dajesui. Que pisecarané chequedíe, disiode ore nanique. Gusu ore isecaranone u jnanione ga ore chiraja udore batigai ga 600.000 ore nanique iji Israel ujnacare disi ejode udore ore uje ore jocaningárique gaisõriráso udore ore jne.

³⁸ Israel ujnacare disi ejode ore jno nanique ga purása quedéjnane uñane ore íjnongaja ore quigade to nanique. Jé aja ore gachidedie áyasai, aquirájnanie ore, ore jno jnese. Ga ayoré betígajna udore ore nanique aja dajesui.

³⁹ Uje Israel ujnacare disi ejode ore jnoji dedai ga que ore chucué dabosode aja dajesui ga ore pésu datáiso dotíya iji dajeque pajei ujeta ore tagu uje íjnoque bisitíguiji udore. Chamáñaje egíptogosode jĩraque ore chiroque ore aja doi gu iji dedai.

⁴⁰ Uje jnani bajai Israel, ujnacarode ore di iji Egípto to nanique ga ore guejnanie siquerei e chise 430 iji ore idai tuté ga quene uté ájnape disi ejode ore jnoji egíptogosode ore uniri uté.

⁴¹ Iji diri uté uje siqueredie e chise 430 nanique ga Israel ájnape disi ejode ore jnoji Egípto. Uje ore jnoji Egípto nanique ga ore chopise Dupade úringai pirosobate aja dajesui, ga cho jeta ore chicáji dajocaningárique yúrique nanique.

⁴² Iji dejai uté ga Dupade cho quique Israel ájnape disi ejode ore aja dajei uje timíninga ore aja quedéjnane ga jé jogate ore dosadi aja ore ajesui. Jecute Israel ájnape disi ejode jec aja deréjnane unojo to ga que ore áyipieraque jnopísiji Dupade cutejmane acho ome ore nanique. Ga jecucha ore jnusina dejai tuté to iji jogapiedie siquerei ga que motique déji ore edóraque uje Dupade cho ore quiguíji ore úringane urugu nanique iji dejai.

Dupade arecujaidie u udire ome ore jnusinamainé uaté Páscua yui

⁴³ Pangarádejnai Dupade cho quique Moisés, Aarón ore ome ore isocárique yúrique ome Israel ájnape disi ejode ore jnusinamainé Páscua yui. Enga chojningame ore: "Yarecujaidie u udire ome uacajnusinamainé uaté Páscua yui jeta jé ca ayóyo gánique jne enga jecucha ẽcho uacachitígome yu jne iji siqueredie jnese. Jeta chise yojningai tuté dire uje uacajnusináño Páscua iji, mu jé ca ajuécho úringárique pibósome purása quedéjnarique to jne iji uacajade.

⁴⁴ Mu ujeta uaque gosi gaite oré purása quedéjnarique enga jé doi uacasocai to uje chaquesu aoi tiji dajnungungué gai ga jé tiógara jeta tagu uaquẽrapáidode udore uacachite ãrío to jne ome yu.

⁴⁵ Mu jeta uacaroque ayorérique uje uté gaidedie u uacaplátadie ga ca ajuécho ome uté gosi jeta tagu to. Jé aja ayoré dírigo iji uaque, ca ajuécho ome ore to jne.

⁴⁶ Jé ca ajnicho iji guijnatajei uaquẽrapáidi uté uacachite arione. Mu achóji guijnatajei, ga jé ca abéroyopo ajnoquetique rĩ.

⁴⁷ Ga a jé uacarasade Israel ájnape disi ejo, uacajmapié jé u jnese iji uaquedáningo údode jnese.

⁴⁸ Mu ujetiga purása quedéjnarique déji uacari to iji uaquedánique jne enga pota chacásãra uáguiji uacabotique gánique jne jeta e Páscua upo rĩ, ga angoñome gosi jeta chaquesu dajnungungué aoi ga quene chacásãra uaque to, jeta chaquesuapo dabode ujnungunguenie aode to jne rĩ. Ga quene gosi cho jeta basíji uacaniri to nanique ga jé uacoyopise ñane iji jnumi. Mu jeta gosi pota chacásãra jóronga uaque to jne, mu gosi chetaque jeta chaquesu dajnungungué aoi, ga que toc jeta gosi chacásãra uáguiji yojninganie uaquẽrapaide uacachidé áyasa udire arione to jne.

⁴⁹ Jeta israélgosipíse gosi jeoga purása quedéjnai u iji uacajade mu yuruode chojmára ome ore jnese: ujetiga ca paquesuque aoi iji gosi ujnungungué gai enga que pujuegate jeta uté gosi chacásãra uáguiji uaquẽrapáidei uacachidé áyasa udire arione to."

⁵⁰ Israel ájnape disi ejode que ore chimoque Moisés, Aarón ore uru quitique uje Dupade jé urúo ome ore ica gu.

⁵¹ Ga diri uté u nanique uje Dupade chijnime Israel ájnape disi ejode nanique iji Egípto, enga ore cãra dáguedie ome ñane aja dajei ga ore jochade chicáji ¡tiiiiii! nanique.