Éxodo 11 - Dupade Uruode

Dupade doi dajuyaqué uñeque ome Faraón, urasade ore jne enga a chujé ore ape urejane jnese jne

¹ Dupade chojningame Moisés: –A qué yiabi yujuyaqué uñeque ome Faraón, urasade ore jne. Mu ome ore gajnei yujuyaqué ejo ga a jé ca gusu jeta Faraón chiroque uágaja doi, mu a botare uágaja uacajesúrique jne jeta boyo iji ore uniri Egípto ¡bu!–

² Dupade chojningame Moisés: –Angome bojode Israel ujnacare disi ejo ore jnese, chequedíe aja jnanione ore jnese, ga ore chutai egíptogosode ga ore chojningame ore jne: 'A yicoji uacari jne, ga asíñome yocajnéone uacagúcha ome yoque uje pipesucho udore iji órodie, plátadie ore.'–

³ Dupade pésu ga egíptogosode que ore derógome Israel ujnacare disi ejode udore gotique. Jé chopo Faraón iroguipísode ore to rĩ uje ore chojningame Moisés: 'Urénga Moisés uté gotique ujopíeranguipíse.' Ga Moisés ujnomei chapuse ore uniri Egípto údode aja.

⁴ Uje Moisés qué déji Faraón gari ga chojningame uté: –Pangarádejnai Dupade jé urúo ome yu gu jeta qué yingo ua bajaque. Ga chojninga: 'A chise dejai gatócoro gajiné ga a yisṍriji uacaniri Egípto udé údode gajneri iji dejnínga gatócoro.

⁵ Ga a uacape urejane ore toji guiguíjna chojmara, chojmarane iji uacaniri Egípto udé údode jnese jne. Ga bape urẽjai a u to jne uje eduguéjnai cuchape ua mu. Ga jé chopome baróguedie uje ore ape bajade a toi to jne uje udire ijaroque cucha pijarode ome ua. Ga jé chopome uacachidode cuchiso ore ape bajade ga a ore toi to jne.

⁶ A adúcho puyacamini jne iji uacaniri Egípto údode jnese uje uacape urejane a ore toi jne gu. Ga que puyacárigo cho uacayacamini tudé uje cáma pimo mu ome uacai casodica ore nanique. Ga a jé ca amóñopo yujuyaquérique jne rĩ jeta jé cho udé.'

⁷ Mu a ca cuchárique chósi ti iji Israel ujnacare disi ejode ore jne, ga a ore cho chíguiji jnumi. A ore cho paraguipise jnese jne enga a ca pududique tamocórique agoyéraque jne iji ore idai uté údode. Jogadi u jne ujetiga arajáyo uje Dupa Eyúgojmai cãra dasocade ome egíptogosode, Israel ujnacare disi ejode ore uyoque.–

⁸ Ga Moisés chojningame Faraón: –A baroguipísode udore ore tibágui yu dirome uje ore déji barosadode iji bayaridi tudé. Ga a ore chichaga dagataidie aja jnumi iji yiquei enga a ore chojningame yu jne: 'Moisés á, bo ga barasade udore jé ore jogate baquigade iji bajesui tuté erãpe jne.' Uje quene yimóngo barógode udore dirome ujeta ore chichaga dagataidie aja jnumi iji yiquei uje ore dosóñime yu, ga quigade ga yicome yocajesui tuté.– Uje Moisés jnoji Faraón uté iquei ga ájningaránguipísaja dajesui.

⁹ Ga Dupade chojningame Moisés: –Yiraja uje Faraón a ca tangári uacaru quitígo jne, enga adójnachopísa jne uje a jé cachodi upome yujuyaquéringome egíptogosode ore jne rĩ.–

¹⁰ Uje Moisés, Aarón ore pésu Dupade ojningane udore jnese iji Faraón edominone, mu que doi ga juéga dórigo ome Israel ujnacare disi ejode ore gotique. Uje ore chingo jóroga jeta ore jnoji Faraón uniri. Chamáñaje Dupade jé ipesute Faraón úringai ducusuréchoquí gu ome ore.