Ester 9 - Dupade Uruode

Judíode nínapúsu raque jnese nanique uje Dupade chisi ome ore úringane pujnuéngaisóño ome ore gu

¹ Enga e chise ore ojningai dire nanique uje 13 de Adar u mu que chuque judíriguiji uté. Ga ore ijmongarájasórone ore jos eti ore u jne ujetiga ore sué judíode gai iji diri uté, mu judíode ore u uje ore sué damajosórone gáyode iji diri uté nanique.

² Enga jé u uje judíode ore chimáta rágaja ñane ome dajnei pocaninga yui iji ore eduguéjna guejnane puníño jnese uje 127 u ore nanique. Mu que pigaite ore iquénique ome pocaningai ipotigásõri casodé ore. Uje ore dosóñipísome judíode ore iji dedáyode udore údode gu, ga que uñeque cási ore gotique.

³ Ga jé cho eduguéjnane iji ore idáyode údode jnese. Uje ore chudute to uje ore eduguéjna cuchábi iroguipísi u Mardoquéo uje judío uté to, ga jé u uje ore chopise paraque ome judíode iji dajade.

⁴ Chamáñaje Mardoquéo ujnomei chise ore jnese gu uje ore eduguéjna cuchábi tangaripísi uté áyipiedie quigode, ga jé u uje ore dosóñime uté ujnomei yui jnese. Uje imenuringuei quérã, quérã iji dirode jnese, ga eduguéjna cuchábi cho dajõrápisi iji uté nanique ga jecucha Mardoquéo déji eduguéjna cuchábi gari iji iguíjna cuchábi to.

⁵ Mu judíode ijmongarájasórone uñane ore doi pocaningai ome judíode iji dajade, mu que ore ujñapegome judíode ore, ga judíode chejna ore ome daqueséode jnese.

⁶ Enga judíode yugode jnanío iji ore idai Súsa uté chise 500 ore batigai, mu que gusu ore, uje judíode iji punirone uñane jnese ore yugode jiépisi to.

⁷ Ga ore chejna dajmongarájasṍri casé Amán ujnacarode ore uje ore chejna yijmanáyone, ga ore chejnápise ore jnese. Ga ore guejnane udore íode u udojo: Parsandáta u uñai, Dalfón u uñai to rĩ, Aspáta upo uñai rĩ,

⁸ Poráta u uñai to rĩ, Adalía u uñai to rĩ, Aridáta u uñai to rĩ,

⁹ Parmásta upo uñai to rĩ, Arisai upo uñai to rĩ, Aridai upo uñai to rĩ, jé aja Vaizáta to rĩ.

¹⁰ Udore ore dáquide u Hamedáta, Amán dai uté. Ga judíode chejna ore, mu que ore cho dajnéngu ore ugúchade to.

¹¹ Ga ore eduguéjnai, uje i tu Asuéro, chudute to uje judíode chejna urasade ore aja jnumi uje ore idai jé u uté idai Súsa to, ga tibidi eduguejẽ́ Ester.

¹² Enga chojningame: –Ester, barasade judío ore yugode chise 500 iji de yidai, ga ore cháta yiro casé Amán ujnacarode ore to ga ore chejnápise ore. Ore guejnane iji yidai chise 500, enga a ca iyieque ore iji yejnane pidáyo idaisórone udore ore ujade to. Mu be ga ango báyipie quitígo aja yu jeta qué déji bapotigátique cucha, ga a yipésu ome ua jne.–

¹³ Ga jé u uje Ester catecã́ri dabai ga chojninga: –Ujeta jé arégome ua ga jé yurasade jno dajocaningai údi iji yoquidai Súsa udé dirome to, ga ore chirota rágome desórone uñéngo uje qué ore chucué dasocáringome yoque jeta ore chujé yoque. Uje jé u ore urusarane báyipiei to diríca ujeta judíode yirotágo yógome yoquisórone.– Ga Ester qué jno daruode údi ome dabai ga chojninga: –Jé ũré uje ore chujé Amán ujnacarode diríca, mu angome barógode ore ga ore chuguhese Amán ujnacarode udore to iji ore uchiejna casé ójo, ga jé ore doi dai casé isocai to uje ore chigaru etabi diríca ga cho cocho, cochógaja jnumi iji ore uchiejnai ójo diríca.–

¹⁴ Ga jé u uje ore eduguéjnai chiroque darógode aja Amán ujnacarode ore yui uje e ore chujé ore diríca, mu jé ore chopo dajuñame ore gaté rĩ. Ga jé u uje ore jno ore údi aja ore uchiejnai ójo to ga ore chigaru ore etabídode enga ore cho cocho, cochógaja jnumi to ga jé ore chopise dai casé isocai to.

¹⁵ Ga e chãraja eduguéjna cuchábi ojninga casé dire, mu qué judíode ore chujnungu quise ore jocaningai iji ore idai Súsa. Qué ore doi pocaningai iji eduguéjnai ojningai iqueminóri dire, ga ore yugode chise 300 iji dire chojmarai uté nanique. Mu jé isoca uje ore chejna ore, mu que ore cho dajnéngu degode ugúchade to.

^16-17 Ga jé isoca iji ore eduguéjnai guejnane puníño uje 127 u ore unirone udore, ga chise eduguéjnai ojningai dire ga judíode ore chugu dabáyode ome dajnei pocaninga, ga ore chejnápise dajmongarájasórone jnese iji dedáyode udore údode jnese. Ga ore yugode chise 75.000 nanique uje ore chugu dabai ome dajnéone pijmongaquéo. Ga ore chejna ore, mu que ore cho dajnéngu degode ugúchade. Mu gusu eduguéjnai ojningai dire u uje ore doi pocaningai tiji uté uje 13 de Adar u ome ore. Mu chise 14 de Adar ga judíode iji punirone uñane udore ore ininaquei jogadi tu ga ore nínapúsu raque jnese uje Dupade chisi ome ore úringane pujnuéngaisóño ome ore gu.

¹⁸ Mu chise 15 de Adar ga quene judíode ore pésu daninaquei to iji ore idáidatéi Súsa uté, uje pocaningai eruei u ome ore nanique gu.

¹⁹ Mu judíode uñane jnese uje ore déji pidai ajámone ga ore jnusinamáni u 14 de Adar nanique. Jecute uje chise 14 de Adar ga judíode jecucha ore jnusina diri tuté iji siqueredie jnese ga ore pésu daninaquédatéi ome re iji uté uje ore jnusina Dupade átedatéode ome re uje chisi ome ore úringane pujnuéngaisóño ome ore to iji diri tuté. Enga ore tẽrája ñane ome dẽrate bisidégode iji dajnusinamáni dire tuté.

Ga judíode ore pésu dajñamáinone díño i nanique ga i tu Purim ome ore ga ore jnusina diri uté iji siqueredie jnese.

^20-21 Ga jé u uje Mardoquéo chiroque darusarane aja darasade judío ore iji ore eduguéjnai Asuéro guejnane pidáyo ore jnese ujetiga jé ore jnusinamáni dire jé u uté gatuaque jne iji siqueredie jnese. Ga ojningai tu 14 de Adar, mu pota jeta ore cháta daninaquéode aja 15 de Adar to uje súsagosode ore ininaquei u uté gu.

²² Ga chósi tome darusarane: "Yocagoyé quedéjnanie jogadi urásu guedosi Adar diríca, mu nóña ga pininaquéo ome yoque. Jecute apéso uacabose unérone ome ñane to iji dirode udore, enga osṍcho ñane iji dirode udore to, mu osṍchopo jmatágode ore to rĩ iji dirode udore to."

²³ Ga jé u uje judíode ore tangaripísi Mardoquéo uruode quigode ga que ore chimoque siqueréraque uje ore pésu daninaquéode iji 14 de Adar uté, jé iji 15 to.

²⁴ Enga judíode que ore chicadígui Amán ajnangarañámone darujna ao pébio uje pésu diri tiji ica jeta ore chujé judíode iji ijnimi dire uté. Uje churúsãre guedosi i diríca aja dajnangarañámone darujna ao ahábio ga judíode ore úringane chuque jogadi urásu ipesudi dire uté nanique.

²⁵ Ore jnusinápo to rĩ uje ore eduguejẽ́ Ester u uje narare darasade ore gai nanique uje catecã́ri dabai ome ore. Ga abai doi ga churúsãre darusarane ga chósi tome: "Beyoi Amán ga ijmongarápiode judío ore gajnei pujuyaqué chajni gai jne, ga cho daba dáyipie gajnarénguenie udire jne." Ga jé u uje ore jno Amán údi aja dapesudode uchiejna ójo ga ore chigaru aja ójo, ga ore chigaru etabi enga cho cocho, cochógaja jnumi nanique. Ga ore jno ujnacarode údi aja to ga ore patĩ́ora dai tiji uchiejnane ójo ga ore cho cocho, cochógaja jnumone to nanique.

²⁶ Ga judíode ore pésu dajñamáinone díño i nanique ga i tu Purim ome ore ga ore jnusina diri uté iji siqueredie jnese. Ga Purim i qui tu "Amán ajñamáini dire ome yocúringáringo chuguíraso." Ga jnani bajai Mardoquéo u uje chiroque darasade ore aja dajnusinamáneméone díño nanique.

²⁷ Ga jé judíode ore chajnerame to ome dape disi ejode, jé aja purása uñane to uje ore cho judío iji re to. Ga ore dopísi jnani bajai Mardoquéo uru quigode ga que ore chimoque 14, 15 de Adar iji siqueredie údode jnese, uje ore tẽrája ñane iji udore ome dabose uneréjnane, jé aja ore guẽrate bisidégode ome uñane to. Enga pininaquei jogadi tu ome ore iji siqueredie jnese.

²⁸ Ga judíode ore cãra dedáyode, danirone ome ñane mu que ore jnusinamánone dire udore jnoji ore ajénique to. Jé cho judíode ore unuchúode to uje ore cãrapo rome ñane rĩ, mu jé ore jnusina dirode udore jnese to iji dajogasúode nanique. Ujeta jnani bajaque ore nanique, jeoga disi ejo ore iji deréjnane udojo mu jé ore jnusina to.

^29-32 Enga jnani bajai Abihail uro Ester, imanisṍri Mardoquéo ore cháta raja ñane ome darusãraque ejórique to, mu jé chopise Mardoquéo urusãraque bajai to. Mu que ore chedu pininaquei, mu ore chátaja pagoyé quedéjnanie gajnei dire to iji darusarane. Ga chósi tome ore: "Ueradi tu jeta ajnusináño dirode uje yiyágo chagu nanique ome yocajnéone pijmongaquédatéo iji dirode udojo. Ueradi tu jeta ca acho uacabotígo iji yocujnusinamánone dire bajaguipíso, ga abóyopo iji uaquejode iji uté. Ga quene pininaquéode jogadi tu ome uaque iji uté iqueminórone dire omío." Ga ore eduguejẽ́ cuchabé Ester ore urusarane udore chise darasade jnese iji eduguéjna cuchábi Asuéro guejnane puníño údode uje udore chise 127 nanique. Ga Ester áyipiedie udire purusãracho to iji darujna aode ujetiga urasade pésu udire aja quigode jnese.