Ester 8 - Dupade Uruode

Eduguéjna cuchábi Asuéro juéga nanique ujetiga judíode chimáta ñane ome dajnei pocaninga yui to ujeta ore chirota ñane to ome desórone dojo ayoré yúode to

¹ Iji diri uté uje ore chujé Amán iji nanique ga jé u uje ore eduguéjnai Asuéro chisi ome judíode guetésõri Amán uté iguíjnai ome eduguejẽ́ cuchabé Ester ujetiga cho daguíjnai iji to. Ga jé u uje jĩraque ore eduguéjna cuchábi tibidi Mardoquéo to. Ester quene chingome deduguéjnai uje iguiosipise Mardoquéo uté gu.

² Enga eduguéjnai chijnime dajmanepié enga chisi ome Mardoquéo jeta cho dajnéngu to. Yojninga jmanepié uaté u uje chisi ome Amán diríca, mu e chijnapóji gari que uje ore chujé gu. Ga jé u uje Ester catecã́ri dapesungóri Mardoquéo to ga chojningame: "Be yiroquéode to. Uje yoqueduguéjna cuchábi e chisi ome Amán casé iguíjnai ome yu jé aja ugúchade ore jnese, ga apésu cuchade udore aja quigode jnese to. Enga a yopise yiroguipísi iji ua jne."

³ Ga jé u uje Ester tibágapoi uraque deduguéjnai iquei rĩ ga chichaga dagataidie aja jnumi iji iquei ga popise iji dejode ga chojningame: –Osõripise yurasade judío uyoque. Ga ca be baroque sijnai casé áyipiedie casidé jne. Uje uté áyipiedie u diríca ujetiga chejna yurasade uyoque iji uacajade jnese.–

⁴ Ga jé u uje ore eduguéjna cuchábi chisa dogué nanganatagué ga chusẽre Ester ome dogué uaté uje pipesudé uaté iji óro nanganatagué. Ga jé u uje Ester chisa ga chague jmame ga jé catecãrápoi dabai gaté rĩ.

⁵ Ga chojningame: –Yeduguéjna Cuchábi á, ¿jec ũré enga amesẽre yu a? Ujetiga barasique ua ome yisocade, ga arécho yáyipie quigode udojo ome bajéode, ga bebi yuruode quigode udojo: Enga aroque barógode aja jeta ore churúsãre báyipie ichárigui quitígo, enga ore chĩro Amán casé áyipie bajedie udire quigode. Enga arúsãre jeta ca chuque yurasade uyoque iji uacajade jne. Yojningane u judíode uyoque uje yugúcoji bajnepídi erãpe údode jnese. Ga que gusu jeta aroque barusarane aja yoquidai údode, mu aroque barusarane aja bejnane pidáyo údode jnese to iji bajnepídi erãpe ujetiga ore chiraja uje que angári Amán ajei dotáningane ome uyoque.

⁶ Mu jetiga etaque yáyipiedie udiji enga que yiraja yisocáringome yu ujetiga yimo yiguiosode iji yenominone uje ore chujé ore iji yenominone iquei.–

⁷ Ga jé u uje ore eduguéjna cuchábi Asuéro cháta judío uje i tu Mardoquéo, eduguejẽ́ Ester ore aja ñane uje catecã́ri ore ga chojningame ore: –Bamo uje jé ũrepise ua uje yetaguipise Amán casé áyipiedie quigode diríca uje jmongarája judíode uaque. Ga ore chujé uté iji ipesudi ore uchiejna ójo diríca. Ga yijna ugúcha dipeséode, iguíjna cuchábi ore iji acoté gari to ga yisi ome Ester to ga cho dajnéngu jnese.

⁸ Mu que toc ujetiga pĩrocho yurusãraque bajade quigode. Chamáñaje yaca yijmanepié uaté iji otate utatai diríca ga yajo aja yurusãraque bajade, ga yurúsãre yurusãratígo iji eruei to.– Ga chojningápome ore rĩ: –Mu beyoi ga apéso uacáyipiedie ome uacarasade judío ore jeta ore chirota raque jne ome desórone, ga arúsãcho uacarusãratígo to enga a yaca yijmanepié tuaté iji otate utatai jne ga yajopo aja uacarusãratígo eruéode ga jé u jne ujetiga uacáyipiedie quitígo tocade jne ome uacarasade.–

⁹ Ga jĩraque eduguéjnai tibidi daroguipísode uje ore gajnei tu jeta ore churúsãre deduguéjnai áyipiedie quitígo. Ga chojningame ore: "Arúsãcho Mardoquéo ore uruode quigode ga ca ayó uru quitique gai jne." Ga gadioque ore isecaranone guedosi nanique uje ore churúsãre Mardoquéo ore uruode, uje guedosi uté i tu Siván ome ore. Ga ore isecaranone dire chejna ayoré chojmarai ga gadióguiji ayoré uñai jmanai chojmarai. Uje ore chimate darusarane udore ga jé u uje ore jno udore údi aja judíode ore jnese, jé aja eduguéjnane ore jnese to uje ore déji eduguéjna cuchábi gajnepídi erãpe údode jnese. Uje eduguéjnai guejnane puníño chise 127 nanique ga punirone udore déji ore unirone Índia, Etiopía ore ujai nanique. Mu ore uruode cãra rome ñane iji eduguéjna cuchábi guejnane pidáyo, jecute ore churúsãre ore uruode iji ore gajnéone darusãraque gáyode jnese. Ga que uñeque chojninga: "Que yirajágo ore urusarane quitique uje que yocurúo gu." Jé chopome judíode rĩ uje ore déji punirone unirisórone udore ore ujade, ga ore gajnéone ore urusãracho purusãracho iji ore urúpisode to.

¹⁰ Eduguéjnai jmanepié jogadode déji ore urusarane udore jnese, jé aja i to. Ga ore chiraja uje jé ore eduguéjnai uruode u ore urusarane enga que toc jeta ca ore doi quigode jnese. Ga eduguéjnai chojningame ore nanique: "Beyoi yachidode burica ibisoguipísode uje iborataguipíso enga ocho jne ga boyo yuruode údi, enga jé ca ajicho cuchárigaja uacaqui uté yui to jne."

¹¹ Ga eduguéjnai uru iyiejnane udore chósi tome ore nanique: "Uaqueduguéjna cuchábi uyu yujuéga ujetiga judíode chimáta ñane iji yejnane pidáyo ujade ome dajnei pocaninga yui to ujeta ore chirota ñane to ome desórone dojo ayoré yúode to. Ga yujuéga to jeta judíode chujé desórone ore to, ga ore cháta desóningo acotérigui, atígo ore to. Enga ore chejna ore ga a jé ore gajneque detígo ugúcharigo to. Jecute ujetiga gosi ijnimique pocaningai ome judíode to, ga judíode a ore chujé gosi to.

¹² Enga pocaningai uté a tocade jne iji guedosi uté uje i tu Adar ujetiga dirode e gadióguiji yirídai iji guedosi uté.

¹³ Ga ujetiga yurusarane chise uaque enga jĩraque ãrarachója gai iji uacarasade ujade ga ore tangári quigode to. Ga judíode dimane ore to ome dajnei pocaninga yui."

¹⁴ Ga jé u uje buricade orusórone ore jno urusarane údi aja ore idáyode jnese. Ga jé u uje ore naráraja ore urusarane eduguéjnai urúo gai to iji uraque dedai uje i tu Súsa.

¹⁵ Uje Mardoquéo doi guesi iji eduguéjna cuchábi iguíjnai ajei ga chigui eduguéjna cuchábi guerané bora ueradéjnapise. Ga utata uneroque uaté mu porororinguéone déji ujade. Enga chacapója ducayo nanganatáguejnai to uje óro ueque. Ga iguidé dañoré déji gai to rĩ uje ore ipesudé iji ore acai líno ga caraté unerongue uaté. Ga urasapísode uje ore idai tu uté idai to ga ore chimo ga ore achietáji ga ore tibite gai iji daquéode.

¹⁶ Ga cho jetiga judíode udore déji ijnangunu cucháberaque ajénique diríca, mu cho jetiga quene ore doi guesi tiji ijnangunu cucháberaque ajei, ga ore chise dírecaringué cuchátique iji uéchai. Ga pininaquei jogadi tu ome ore uje ore chudute uje eduguéjna cuchábi juéga ome ore jeta judíode chugu dabai ome desórone yui to.

¹⁷ Mu que gusu judíode iji ore idáidatéi Súsa uje ore nína raque ome pujnomei ichai uté yui, mu jé chise eduguéjna cuchábi guejnane pidáyo unirisórone ore jnese. Ga judíode ore chimáta ñane iji pidáyode údode jnese ga ore pésu daninaquéode, ga ore pésu dabose unérone ome ñane uje ore chudute to uje pujuegate jeta ore chujé desórone ore to. Ga jiei ayoréode uñane uje ore cho judíode iji re to uje ore todo gu jeta judíode chujé ore to.