Ester 7 - Dupade Uruode

Amán pésu ore uchiejnane ome Mardoquéo nanique mu jé gajneque dapesudi casé nanique ga ore jno údi aja ójo ga ore chigaru etabi ga cho cocho, cochógaja jnumi

¹ Enga eduguéjna cuchábi Asuéro, iroguipísi uje i tu Amán ore jno ga ore chicáji eduguejẽ́ Ester atigai ejoi to.

² Iji ore atigai uté quigade uje ore chóji víno enga jé u uje eduguéjna cuchábi catecã́ri dacoté Ester ga jnusinápo dapregúnta casé ome to rĩ uje chojninga: –¿Ama bapotigátique cucha ome yu, Ester a? Be ga angome bapotigátique cucha ome yu. Jetiga bapotigate yejnane puníño, ga yajuguíji gatócoro ome ua.–

³ Ga jé u uje Ester chajnai uruode ga chojningame uté: –Yeduguéjna cuchábi á, ujetiga amesẽre bacoté uyu yuruode, enga apota ujetiga araja yipotigátique cucha, enga a yingo yipotigádi ome ua jne, mu yipotigádi chojmarápise. Ga u ujetiga ca ajuéga jeta ore chejna yurasade uyoque jne, enga ca ajépo uyu to jne rĩ.

⁴ Uje e ore jmongarája yurasade uyóguiji uacajade gu, ga a ore chujé yoque jnese dirome. Ore gaidi tu gu ujetiga ore tẽra yógome pitoringai, ga tita erámi ome yurasade uyoque jnese.– Ga chojninga: –Ujeta ore tẽrarása yógome purása quedéjnane ore ujetiga yicoi ore iroquéode bisideque, enga a ca yĩrararírase ore gáyode uje qué uecárase yoque gu, enga gajnarenguirase ujetiga yipésu bajuredie ome cucha ajámatique, Yeduguéjna Cuchábi á. Jé basa ga ore jmongarája yocúringane chuque ga yicatecã́ri ua jeta ca ajuéga yurasade uyoque yocúringai dequejnaque.– Ga chojninga: –Bamo uje a ore chejna yoque jne enga a íjnoque bagutíyabádode jne, uje bagutíyabádode u yurasade uyoque to ome cuchade.–

⁵ Ga jé u uje eduguéjnai Asuéro chojningame Ester: –¿Gosi jmongarája uaque to a, barasade uaque iji yocujade? ¿Uacajmongarájasónique uté jé déji rique to a?–

⁶ Enga jé u uje Ester chajire Amán enga chusẽre ga chojninga: –¡Yoquetésõri u jnani sijnai uté iji yoquejoi uté uje i tu Amán!– Ga jé u uje Amán chudute eduguejẽ́ cuchabé Ester uruode ga edodie tocade, ga chajuguipise aguté ome uruode udojo. Enga todópisa eduguéjna cuchábi Asuéro, acoté Ester ore yui.

⁷ Enga jé u uje ore eduguéjnai Asuéro ájningaránguipíse uje chudute uje Amán jmongarája acoté Ester uaté gu. Ga jnoji ore gari ga chicáji daguíjnai gatócoro ga etógaja dajesui. Mu Amán qué chácariji ore atigai tuqué jogadi. Ga jé chijócha Ester ajei údi ome re uje chiraja uje eduguéjnai Asuéro a pota chutígome gu.

^8-9 Ga jé u uje ore eduguéjnai chajniapója ore atigai jogadi uqué, mu chimo Amán uje chujépise dedodie aja dacoté uaqué edodie tiógarei uje chichaga dagataidie aja jnumi iji acoté charidi ejópisi. Ga jé u uje ore eduguéjnai tibite Amán gai ga chojningame: –¿Ama apota jetiga angarája yacotépise iji yimochádi to a?– Ga jé u uje eduguéjna cuchábi irodingórone soldácho ore chudute uru dosógode ga ore chayóji deduguéjnai yui, ga ore chayóji Amán yui to ga ore chisa iji Ester iquei enga ore chojninga: –¿Yoco ringome uté jne a?– Ga jé u uje ore doi borapei ga ore chigaru Amán edodie gai ome borapei. Uje imoi tu uje ore chujépise gosi jne gu. Ga jé u uje irógode uñai catecã́ri deduguéjnai uje uté i tu Harbóna, ga chojningame: –Ajuéga Amán ga yujégo jne iji ipesudode ore uchiejna gai uje umaripise uté uje umaningai chise 20 métrodie iquei diríca. Uje chiese Mardoquéo gajneque diríca ujeta chigaru aja ójo diríca ga cho cocho, cochógaja jnumi diríca. Mu gajnareque Amán áyipiedie quigode ome Mardoquéo uté. Uje uté u uje gãreque ua ome bamajosórone ore diríca. Uje ueradéjnapise Mardoquéo adode mu Amán uté jé jmongarája bisideque.– Ga jé u uje ore eduguéjnai chojninga: –¡Boyo údi aja ipesudi uté ójo ga aguhéso iji gai ga cho cocho, cochógaja jnumi jne!–

¹⁰ Ga jé u uje ore jno Amán údi aja ipesudi casé ore uchiejna aja ójo enga ore chigaru etabi ga cho cochógaja jnumi. Ga Amán ipesudome Mardoquéo mu jé gajneque dapesudi casé. Ga jé u uje quene tijode cho jnángome ore eduguéjna cuchábi uje chimo Amán uje e topísi.