Ester 6 - Dupade Uruode

Amán pota Mardoquéo úringárique chuque nanique mu Dupade chiringare Mardoquéo aja gaté nanique ga chisi ome úringai pujnuéngaisṍre ome

¹ Iji dejai tuqué ga moi derocopise ome ore eduguéjnai ga edodie cho paque, paque iji jnumi. Ga chojningame darógode: –Moi derocome yu to, ga beyoi uaquegode darujna ao uje purusãracho cucha dacate obiréjnane iji uaquegode darujna ao udojo. Enga ãrarachója gáyode ga yangarami quitígo to jne iji uacabijnanone to.–

² Ga jé u uje ore naráraja gai ga ore chijnime Mardoquéo i bajaque to. Uje uté u diríca uje iquetaque ore eduguéjnai diríca ome gajné casodé pijmongaquéo. Uje irodisórone soldácho ore eduguéjnane pota ore chujérase diríca uje ore íode u Bigtán, Téres ore. Uje Mardoquéo chudute ore ijmongaquéode diríca, ga chingome uraque deduguéjnai diríca ga chiqueta uté diríca.

³ Ga ore eduguéjnai pésu dapregúnta ga chósi tome darógode ore: –¿Ama cáma yẽcója Mardoquéo diríca ome cutejmane átegoningájna ome yu a?– Ga jé u uje irógode chojninga: –Jé ũré ua uje cáma yẽcója ome cuchárique gotique diríca.–

⁴ Uje eduguéjnai, irógode qué ore catecã́ri ñane ome Mardoquéo átegoningáne gajnetique cucha ujetiga ore eduguéjnai tẽrája ome cuchárique, mu Amán chise ore iji ore úringane casecasé gai. Ga chobéri uraque deduguéjnai yui gu ujetiga catecã́ri ga chujé detésõri Mardoquéo to. Ga eduguéjna cuchábi chojninga: –¿Gosi a uje déji yiguíjnai gatócoro to?–

⁵ Ga ore chojninga: –Bedugádi Amán u to arĩa.– Ga jé u uje eduguéjnai chojninga: –Arógaja gadoi ga chicáji de to.–

⁶ Ga jé u uje eduguéjnai catecã́ri daroguipísi uje i tu Amán ga chojningame: –¿Ama eduguéjna cuchape ua ga orási ringome gosi átegoningáne ome ua, jeta ẽrája gosi ome átegoningáne to a?– Ga Amán jos eti eduguéjna cuchábi ojningai tu re ga chojningame re iji dajei: "Ise mu yoqueduguéjnai ojningai u yu jõ, ga pota tẽrája yu."

^7-8 Ga jé u uje Amán chojninga: –Ujetiga eduguéjna cuchape yu ga a yósi tome gosi ome átegoningáne ome yu: A yisírasome yiguidé ueradéjnapiseraque ome uté gosi ga chiguírase to. Jé chopome yoruti burica to, a yisírasome gosi to, ga gosi chorúrasu to ga ore chicháji ayo nanganatáguejnárique iji buricai gatoi.

⁹ Ga a yibidírasi yiroguipísirique uje sué yirógode uñane ore gáyode jnese, ga uté a u jne ujetiga jnorase buricai uté údi aja ajáro uje déji yoquidai gatócoro. Ga a uté tibidírasi ga chojningárasa: "Yoqueduguéjna cuchábi isocai tudé uje irasique gosi átegoningáne ome re."-

¹⁰ Ga eduguéjna cuchábi Asuéro chojningame Amán: –Aguito ga bo yiguidé údi aja judío uté iji yiguíjnai piagoi uje i tu Mardoquéo, jé aja yoruti burica to, enga ca amoque yocuru quitígome jne jeta be yocuru quigode ome to.–

¹¹ Ga jé u uje Amán dopísi deduguéjnai uruode ome Mardoquéo uté, uje que toque gu jeta chó deduguéjnai áyipiedie gáyode. Uje Mardoquéo e chacája eduguéjnai iguidé enga e choru eduguéjnai oruti burica, ga jé u uje Amán jno údi aja guidai ajáro ga tibite iquei ga chojninga: "Yoqueduguéjna cuchábi isocai tudé uje irasique gosi átegoningáne ome re."-

¹² Jé u uje Amán ore diapo iji deduguéjnai iguíjnai rĩ, ga Mardoquéo chijnare raja dayaridébei iji eduguéjnai iguíjnai piagoi ejoi. Jé basa Amán chajni aja daguíjnai to, mu chajire dádi aja dajesui uje jnusiétaguipíse gu.

¹³ Ga Amán chise daguíjnai ga chatata dojñane ome dacoté, dajorane ore. Ga jorane, acoté ore chajnai uruode ga ore chojningame: –Amán, bamo uje judío Mardoquéo arĩa, ga a e uté angureni dupa chijnime uté iji bajmainie. A ca toque jne jeta ajnué uté gai, enga a uté u jne jeta sué babai. Jé basa ga disiña ua jne iji uté jmainie. Obiréjnapise uje baruode, bajmongaquéode a jé ca tocade jne ome judíode ore úringáringo dequejnacho.–

¹⁴ Uje qué ore catecã́ri ñane iji Amán uté iguíjnai, mu ore eduguéjnai iroi tibidi Amán enga chojningame: –Aguito, ga agu yoqueduguejẽ́ Ester, ore posode to.– Ga jé u uje Amán chague jmame ga tibágui uraque deduguéjnai pijnane.