Ester 5 - Dupade Uruode

Ester cháguena eduguéjna cuchábi charipi guiguíjna piagoi iquei nanique jeta chaquĩ́ra ome urasade úringáringo chuque

¹ Dirode gadióguiji cuchade udore quigade enga jé u uje Ester pésupúsu re ome dabai yui, ga chacája daguidé ueradéjnanie uje úringai eduguéjna pijógome daguidedie udire. Ga jno ga chicáji eduguéjnai iguíjna cuchábi gatócoro uje guesája ejode iji gatócoro, ga cháguena eduguéjna cuchábi charipi guiguíjna piagoi iquei.

² Ga eduguéjnai Asuéro chimo Ester iji daguíjnai piagoi uje Ester cháguena iquei. Enga chisa dogué nanganatáguejna ga jĩraque chusẽre Ester ome, ga imoi tu uje chijnóra dacoté Ester ga juéga dari jeta tibágui ga catecã́ri. Ga quene Ester tibágui uraque deduguéjnai ga chisa ogué uaté eruei ¡saque!

³ Enga abai catecã́ri ga chojninga: –¿Bagaitique cucha iji yu iji de, Yeduguéjemía, Ester á? ¡Ujetiga atárasi yejnane pidáyo gatócoro iji yu, ga a yisírasome ua jne! Jecute ca ajéngome yu ga ango bapotigátique cucha ome yu, ga a yisi ome ua jne.–

⁴ Ga jé u uje Ester catecã́ri ga chojningame: –Ujetiga bajéo enga acásõra uyu iji diri tudé jne. E yipésu yoquibose uneréjnapisode uje charore yocubusugúgode. Yigaidi tu gu jeta araja yijnoraquei tome ua, enga abidi baroguipísi Amán to jne, ga chacásõra yóguiji to jne. Uje jecucha yucuei tu báringárique picotaque gatuaque iji deréjna pitade.–

⁵ Ga jé u uje eduguéjnai Asuéro catecã́ri darógode uñai ga chojninga: –Acuebi yiroguipísi jne uje i tu Amán. Ga chacásõra Ester uyoque to iji yocatigai.– Ga jé u uje eduguéjna cuchábi Asuéro, iroguipísi uje i tu Amán ore jno ga ore chicáji Ester atigai to ga ore taguíji to.

⁶ Uje qué ore déji dáringane chagu gai, mu eduguéjnapisi catecã́ri Ester ga chojningame: –Be ga ango bapotigátique cucha ome yu to ujetiga yisi ome ua. Ujetiga bajéode u ga a yajuque yejnane pidáyo ga bajneque gatócoro jne.–

^7-8 Ga Ester chajnai uruode ga chojninga: –A cáma yingo yipotigádi cucha ome ua jne. Mu yutaite bajai tu ujetiga jec ũré amesẽre yu enga yipésapo yoquibosode dirome rĩ, ga acapóji de dirome rĩ ga yajopóji ñane gari dirome rĩ. Ga bajõrai tuté uje i tu Amán a jé nonapo ua aja de to dirome rĩ. Enga jé u dirome jeta yingopísa yipotigádi cucha ome ua dirome.–

Amán pésu ore uchiejnatígo aja gaté nanique ujetiga chuguhese Mardoquéo iji ójo te jne ga cho cocho, cochógaja jnumi te jne

⁹ Enga judíode ore jmongarájasṍri uje i tu Amán doi guesi tiji Ester ore atigai jogadi ga nína re aja guesi yui ga chojningame re iji dajei: "Ester a cho cuchadatei iji yu to, uje cháta dabai, uyógaja ñane ome dabose unérone gatuaque." Ga doi guesi iji eduguéjnai iguíjnai mu chimo Mardoquéo iji daquei uje chácariji piagoi ejoi, mu timíninga aja dei bisideque. Ga que chichaga dagataidie aja jnumi iji iquei to. Ga ajei dotãripise ome Mardoquéo uté.

¹⁰ Ájningaránguipíse mu pógu dájningai aja dajesui. Mu uje Amán chise daguíjnai ga tibidi dacoté uje i tu Zeres, ga tibidápoi dajõrapísode ore jnese rĩ. Ga jé u uje chisípise dabai ome ore jnese.

¹¹ Ga chojningame dacotaquéode ome re: –Uacamóño yu iji de uje quene ugúcharanguipíse yu to. Enga cucha dacadode uerachome yu jnese. Yabode jiépoi ore rĩ. Ga yoqueduguéjna cuchábi Asuéro edugádode jõrai tu yu ga yujnué irógode gáyode jnese.

¹² Ga jiei yoqueduguéjna cuchábi iroguipísode, mu gusu yu uje acoté cháta yógaja ñane, abai uyoque, iji yocúringane chagu gáyode ga que uñeque chacásõra yoque to. Ga e tibidápoi yu rĩ ujeta yajópo ãraquetique dirome rĩ.

¹³ Mu cucha chojmarai déji uje jecucha pésu yajei dotáningane. Enga judío tuté u uje i tu Mardoquéo. Ga u uje yajire iji eduguéjna cuchábi iguíjnai ejode iji dirode jnese uje ijnimique yajei dotáningai uje cachi dojnóngaja uyu gatuaque gu. Ga que chichaga dagataidie aja jnumi iji yiquéode to. Uje qué uté eca ga cachi isíome cucha dacadode ome yu.–

¹⁴ Ga jé u uje acoté, jorane ore chojningame: –Jé go que apésu ore uchiejnatígo aja gaté enga idájapise ójo tiji jnumi. Enga umaningai métrode chejna ayoré chojmarárique jne. Enga aguhese judío uté iji ójo te jne ga a cho cocho, cochógaja jnumi te jne. Ga a obéri eduguéjna cuchábi yui dirome jne enga jé u ujetiga juéga betésõri uté ome ua ga ajé jne ga a cho cocho, cochógaja jnumi jne ga quene tijode cho jnángome ua jne jeta a ca amópo betésõri uté iji beduguéjnai iguíjnai ejode rĩ. Ga jé u ujetiga acásõra ore iji ore atigárique dirome enga quene pirasitigai irágu bajei to jne.– Ga jé u uje Amán irasique ore uruode ga ore pésu uchiejnane aja gaté ome Mardoquéo yui ujetiga ore chuguhese iji ójo ga cho cocho, cochógaja jnumi dirome.