Ester 4 - Dupade Uruode

Uje judíode ore chudute uje a ore chujé ore jne ga jnusiétaguipíse ore nanique

¹ Uje Ester ipesungóri uje i tu Mardoquéo chudute to uje a ore chujé ore jne ga jnusiétaguipíse. Ga chajnangarase daguidedie iji dabai jnese ga chigui bora dañorai uje chichagu gai teque, teque. Ga dopoi puchucurui ga chujmute dójo gai. Ga doi ga chayo iji ore idai Súsa údode ga popise aja dajesúode. Ga agoyedie chirarese gaté ga cho jeta chise gatodé ajnoquei ajei.

² Ga chijna dagoyedie aja eduguéjna cuchábi iguíjnai ga chijnare raja piagoi uje chácariji. Uje que pujuegate jeta gosi chacája eduguéjna cuchábi iguíjnai ajei ome daguidé dañoréraque uje chichagu gai tec, teque.

³ Ga que gusu Mardoquéo uté uje poja dajesúode iji ore idai údode, mu jé isocai tu ome ujode judío ore jnese iji punirone jnese iji ore eduguéjnai uté gajnepídi erãpe. Ga jnusiétaguipíse ore to, ga ore po jóroque ome dajnéone pijmongaquéo jnese. Ga judíode udore uñane ore moji puchucurúode jogadode ga que ore niji iji damochádode puchucuru gáyode. Ga ore chigui daguidé dañorenie jnese aja dajesúode ga imoi u uje ore jnusiétigade na ore aja jnumi.

Dimane Ester nanique ujetiga tẽra re ome abai enominone jeta chaquĩ́ra ome urasade úringáringo chuque

⁴ Ester iróguedie, irógode ore uje udore ore isai tu jeta ore chãraque deduguejẽ́ uaté ome cuchade ore chimo Mardoquéo uté iji eduguéjna cuchábi iguíjna cuchábi piagoi iquei enga jĩraque ore catecã́ri Ester. Ga ore chojningame: "Mardoquéo qué chácariji yoqueduguéjnai iguíjna cuchábi piagoi ga chigui daguidé dañoré tiji uté ga poji dayaridi tuté." Uje Ester chudute dapesungóri ujnomei ga jnusiétaguepíse to. Ga chaquĩ́ra dapesungóri, ga chisi jórogome iguidé omenie ome mu que chisa gueranenie, ga que chapúsu dáringai jnusiétaque.

⁵ Ga jé Ester catecã́ri eduguéjna cuchábi irodisórone eduguéjnai uje i tu Hatac ga chojningame: "Abágui uacojningai tuté uje i tu Mardoquéo ga chatata dajnusiétigai gajnetique cucha ome yoque, ga ango urúrigo aja yu jne."

⁶ Ga jé u uje eduguéjna cuchábi irodisórone ore eduguéjnai uje i tu Hatac jno ga chise Mardoquéo iji ore idai gatócoro uje ajã́ro déji uté ga idógosiji eduguéjnai iguíjnai piagoi uté. Ga catecã́ri Mardoquéo ome jnusiétigai gajnetique cucha.

⁷ Ga Mardoquéo chojningame Hatac: "Yoqueduguéjna cuchábi Asuéro iroguipísi Amán a chijnime pocaningai ome judíode uyoque jne ujetiga ore chejna yoque jne iji dajade. Enga Amán uté chimanirase eduguéjnai Asuéro diríca ujetiga doi utoquéode enga a jiei plátapise gueranenie jne."

⁸ Ga jé u uje Mardoquéo chijnime eduguéjnane ore urusarane ga chisi ome Hatac ga chojninga: "Jináca, ga asi ome beduguejẽ́ cuchabé Ester ga chajire to. Ga a chirajapise Amán ore áyipiedie quitígo jnese jne ome ore urusarane udojo quigode jne. Chamáñaje Amán e chiroque eduguéjnai Asuéro uruode udore aja yoquidai Susa údode jnese gu ome judíode uyoque yocúringáringo chuque." Ga Mardoquéo chojningame Ester iroi: "Angome yoqueduguejẽ́ uaté ujetiga chaquĩ́rape dabai ome urasade uyoque yocajnéone pijmongaquéo."

⁹ Ga jé u uje Hatac jĩraque jno ga chayóji Ester yui ga chingome Mardoquéo uruode ome.

¹⁰ Ga jé u uje Ester chojningame daroi: "Bo, ga abágui Mardoquéo ga angome yuruode ome ga ósi tome jne:

¹¹ 'Eduguéjnai Asuéro irógode ore chiraja jnese uje que pujuegate jeta pacája eduguéjnai gari iji iguíjnai ajei uñai bisideque. Que gusu irógode mu pérsiagosode uyoque jnese yirajágo jnese to uje que pujuegate ujeta picatecãraite eduguéjna cuchátique ujetiga jé ca pijnangaite ayorérique bajaque ome eduguéjna cuchátique. Purusãraque to uje gosi a catecã́ri yoqueduguéjnai bisideque ga jé uté gosi úringai chuque jogadi jé u to. Mu ujetiga gosi cási eduguéjnai enominone ga eduguéjnai chimo gosi ga chosõre gosi ga doi dogué óropise ga chãrai iji gosi yui, ga e que toque jeta chuque gosi ome ujórique ayoré. Mu uyu ga dirode e chejna ayoré chojmarai ga chejnapo ayoré uñai jmanáyone rĩ iji yui uje que yisápo eduguéjnai Asuéro rĩ uje que tibidi yu gu.'"

^12-13 Ga jé u uje Hatac chingome Ester uruode ome Mardoquéo nanique, ga Mardoquéo chajnai uruode ga chojninga: "Bopo yuruode údi ome uaté rĩ ga ósi tome jne: 'Ester, judía ua to arĩa. A ajos eti babai a chejna yoque jne, enga a aqueca jne uje bácariji iguíjna cuchábi ajei to. Mu a ore chujé ua to jne uje ore urusarane quigode jé u jeta chuque judíode uyoque jnese.

¹⁴ Mu yanguretapise jeta Dupade chijnime yóguiji udore ore jmainie. Que pimo jeta Dupade jé ajéode u ome ua diríca uje pésu banéningai ome yoqueduguéjna cuchábi uje gaidi tu gu jeta aqueta yoque jne iji yocajnéone pijmongaqué jmainie. Mu ja seca angoninguite paré ua ome Dupade ga juéga ua ome pitoringai, ga cháta baguiosode aja ua to jne. Ja seca chujé ua, mu judíode yoquiquetangónique uñeque a tṍraji sañeque ome yoque, enga chirota yógome yocumajosórone udore jne.'"

¹⁵ Uje Ester chudute dapesungóri Mardoquéo uruode udore, ga jé u uje quene tangári uruode quigode.

¹⁶ Ga jé u uje chojningame daroi: "Bopo yuruode údi ome Mardoquéo rĩ ga ósi tome baruode jne: Mardoquéo á, a yiji baruode jne. Ga amáta yocujode judío ore aja ñane jnese iji yoquidai Súsa údode jnese. Enga yocurasade judío uaque acatecãchoi Dupade iji dejaque gadiógode, jé aja dire gadiógode rĩ, enga oyo uacayágome uaque. Ga uacagaidi tu jeta Dupade tangaripísi uaque. Enga a jé cho yiróguedie uyoque iji de. A yoco yocuyágome yoque to jne enga a jé yicatecãcoi Dupade jne ga jé yoquejnane dire jé u uaquejnane dire ome Dupade jeta yicatecãcoi to. Ga a yejnángo yoquicatecãraitigade aja guesi jne, ga jé u jne jeta yẽra yu ome yoqueduguéjnai Asuéro enominone jne, jé aja iquei ore. Enga chujé yu, ga jé chujé yu jne."

¹⁷ Ga jé u uje Mardoquéo jĩraque jno ga doi darasade judío ore ga jé chimáta ore aja ñane, ga ore dopísi Ester uruode quigode.