Ester 3 - Dupade Uruode

Eduguéjnai Asuéro iroguipísi Amán chetaguipise Ester ipesusṍri Mardoquéo nanique uje que dosóñime gu

¹ Ga chise diri nanique uje ore eduguéjnai Asuéro chucué jnanírique jeta pésu cuchade aja quigode iji ore uniri údode jne. Ga ajegaidi jnani i tu Amán, ga dai i tu Hamedáta. Ga jnani bajai Agag ape disi ejo Amán uté. Enga jé u nanique uje eduguéjnai Asuéro chisi ome Amán uté úringai eduguéjna ome ujetiga pangarate to ome urasade.

² Enga eduguéjna cuchábi Asuéro irógode uñane ore dosóñime Amán uté jnese, jé aja guidai idaisórone uñane jnese. Ga Amán uté chise ore ga ore chichaga dagataidie aja jnumi tiji iquei jnese, ga ore chichaga datajidode aja jnumone iji iquei to. Ga jé ore isoca uté ome deduguéjna cuchábi Asuéro to. Ga ore eduguéjna cuchábi jé uruode u diríca ujetiga ore dosóñime Amán uté jnese. Mu Mardoquéo que todo to ga que chichaga dagataidie aja jnumi iji iquénique to, ga que chichaga datajidi aja jnumi tiji iquei to, enga chijna re iji.

³ Enga jé u uje eduguéjnai irógode ore catecã́ri Mardoquéo ga ore chojninga: "¿Ama jé ca adute to a uje yoqueduguéjnai jé urúo ujeta yichajo yoquigataidie aja jnumi iji ujoi eduguéjna uté iquei jnese, uje uté i tu Amán?"

⁴ Mu jé ate iji dirode jnese uje Amán chise Mardoquéo ejode, mu que chichaga dagataidie aja jnumi iji iquéode to. Mu jé isoca uje eduguéjna cuchábi iroguipísode chojningame Mardoquéo: "Be ga achaga bagataidie aja jnumone iji iquéode to." Mu Mardoquéo que tangári ore uruode to. Mu quene chajnai ore uruode ga chojningame ore: "Judío yu to ga que yichaga yigataidie aja jnumi tiji Amán uté iquénique to." Ga jé u uje ore chayója Amán uje ore gaidi tu gu ujetiga ore chiraja ujetiga Amán uté chidota re ome Mardoquéo angoninguite paritigade. Ga ore chojningame: "Judío déji de to uje que chichaga dagataidie aja jnumi iji baquéode to."

⁵ Ore eduguéjna cuchábi iroguipísi uje i tu Amán chudute ore ojñane ome Mardoquéo enga ájningaránguipíse ga pota chujépise Mardoquéo.

⁶ Mu que gusu Mardoquéo, mu Amán ájningaránguipíse iji dajei ome judíode ore jnese iji ore uniri ujade uje Mardoquéo urása ore gu. Ga pésu dáyipiedie iji dajei jeta ore chejna judíode iji dajade jnese iji deduguéjna cuchábi Asuéro gajnepídi puníño údode jnese.

Asuéro chijócha eduguéjna cuchábi ajei údi nanique ujetiga pejnaque judíode jnese iji gajnepídi erãpe údode jnese

⁷ Ga jé u uje Amán, jorane dojo eduguéjna irócho ore pésupúsu dáyipiedie ome judíode bajaque. Ga ore isecarãte bajai guedosi u nanique uje i tu Nisán uje ore chucué dínique jeta ore áyipiedie tocade iji dínique jne. Jé u uje ore churúsãre guedosíode íode iji darujna ao ajámamone, ga ore chimate ga ore chimeri ñane údode. Ga jé u uje Amán chisa ore urusarámone darujna ahábio chojmarátique jeta chajire gãrapírique guedosi íriguiji ujeta ore chejna judíode iji uté guedosi. Ga jé u uje Amán chajire ga tõrapísiji ga chojninga: "A dirode gadióguiji yirídai iji guedosi uté uje i tu Adar, enga jé u jne jeta yejnángo judíode jne iji yocujade." Jecute guedosírigo amirone qué chojmára iji yirídai nanique jeta ore áyipie gajnarénguenie udire tocade ome judíode ore úringáringo chuque. Enga Asuéro guejnanie siquerei e gare iji yirídai nanique ome dáringai eduguéjna uje Amán ore pota jmongarája judíode iji dajade.

⁸ Enga Amán que chajirape cuchárique mu jĩraque tibágui eduguéjnai Asuéro ujetiga chingo dáyipiedie ome uté. Ga chojninga: –Bamo uje ore tangári ua jnese iji yocuniri udé údode, jé aja bejnane puníño unirisórone ore to uje ore tangári ua iji dedáyode jnese to. Mu purása quedéjnane uñane qué déji uje ore déji yocujade mu que ore cháta raja yoque enga ore cãra dajogadode ome yoquijogadode. Ore cãrapo dáyipiedie quigode rĩ ome báyipiedie quigode to. Uje chiese ore angureni dupa gotique áyipiedie cãra daquigode ome báyipiedie quigode, enga ore chajire dayode urusarane Dupade urúo ga ore dopísi áyipiedie quigode. Jé basa ga que ore doi baruode quigode. Ga que ore cho barasade uñane gotique to uje ore tangaripísi ua. Jecute jé ore tiógarapísa jeta ajuéga ore ome yoque ga yejnángo ore jne.–

⁹ Ga Amán uté qué jno daruode udore údi ome eduguéjna cuchábi Asuéro nanique ga chojninga: –Cucha amiri tu jeta arúsãre báyipiedie quigode ome judíode ore úringáringo chuque ome yoque ujetiga jé bajéo to. Yipotapísa jeta be yuruode udore, ga uyu u jne jeta yisi ome yiplátadie ome ua jne ome cucha dacatígo udore yúode. Ga a yajico yeranenie plátapísei batigárique jne ga a chise 330.000 kílodie.–

¹⁰ Ga jé u uje ore eduguéjnai uje i tu Asuéro chejñu dajmanepié ga chisi ome judíode ijmongarájasoremei uje i tu Amán. Ga imoi tu uje jé ũrepise ore ome ore áyipiedie quigode.

¹¹ Ga ore eduguéjnai uje i tu Asuéro chojningame daroguipísi Amán: –Que yipota beranenie plátai. Jé dóji. Mu bo ga apésu báyipiedie ome bojningane ore. Ujetiga ajé ore ga ajé ore. Uje jé yurúo ome ua to.–

¹² Uje ore isecaranone díño chise 13 nanique iji guedosi uté uje i tu Nisán, ga ore tibidi eduguéjna cuchábi irógode uñane uje ore gajnepídi tu uje ore churúsãre eduguéjnane áyipiedie iji degode darujna ao to. Ga jnanione udore ore churúsãre Amán áyipiedie aja quigode ome judíode ore úringáringo pejnaque yui to. Uje ore chimate darusarane udore ga ore churúsãre eduguéjna cuchábi Asuéro i aja darusarane eruei, ga ore chisa eduguéjna cuchábi jmanepié ga ore chajo aja deduguéjnai i ejoi ¡taque! Ore gaidi u gu ujetiga ca potigayaquérique déji uñeque uje eduguéjnai Asuéro áyipiedie jé upúsu to. Uacamóño uje ore uruode cãra rome ñane iji eduguéjna cuchábi Asuéro gajnepídi erãpe uté, jecute uje eduguéjna cuchábi irógode udore ore churúsãre darusarane ome eduguéjnane iji udore, udore ga ore churúsãre ore urúpisode iji darusarane.

¹³ Ga jé u uje ore chisi ome darusarane ome daróquegatéode ga ore chojningame ore: –De dojo yoqueduguéjna cuchábi áyipiedie, ga boyo údi aja ore idáyode jnese iji yoqueduguéjnai gajnepídi erãpe údode jnese.– Ga urusarane udore quigode jé u udojo: "Yoqueduguéjna cuchábi Asuéro áyipiedie u udiji ujetiga asayo judíode ore iji uacajade jne iji yoquisecaranone dire uje gadióguiji yirídai iji guedosi uté uje i tu Adar, ga ajéyo ore iji uacajade iji dire chojmarai tuté jnese jne. Ga ejnáño ore jnese jne. Ga ajéyo choquíjnane, jé aja jnacarode, jé aja disiode, disidíe, chequedíe ore jnese, ga ejnáñopise ore. Jeta jnanírique chujé dojórique jnani jne ga jé gajneque dei ugúchade jnese."

^14-15 Ga jĩraque eduguéjna cuchábi Asuéro iroquéode udore chise erámi údode jnese. Uje qué idája ore ojningai dire, mu ore gaidi tu ujetiga dimanepise ore urasade ome diri yui ujeta ore chujé judíode iji dajade. Ga que ore chimoque guida ajámatique iji eduguéjnai Asuéro gajnepídi erãpe ome darusarane jeta ca chise to. Ore gaidi tu gu jeta ore jocaningai chise judíode ore jnese jeta chuque ore jnese. Jecute eduguéjnapísi urasapísode iji idai Súsa uté ore chudute jnese to uje a ore chujé judíode iji dajade to jne. Enga ore urasade ore chudute to ga jñata ore idai tiji jnumi, ga uñane todópisa ore ojñane yui. Jé basa ga eduguéjna cuchábi Asuéro, Amán ore chóji dajódode yote piocho ga ore chãrai dajópidóde iji ñane yúode uje ore ninapúsu raque ome ore áyipie tocachuguedie yui.