Ester 2 - Dupade Uruode

Eduguéjna cuchábi Asuéro ajegaidé Ester nanique ujetiga chácariji acoté casica Vásti jogadi ome dáringa eduguejẽ́ cuchabe

¹ Ga udojo quigade uje ajei e cho sere, ga ore eduguéjna cuchábi Asuéro e jnusipísi dacoté casica. Mu e purusãraque áyipiedie quigode jnese ga e que togápo jeta e pĩrongápo áyipiedie quigode to jne rĩ. Uje chiraja uje chãraque dejode ome dacoté diríca, ga jnusiétaguipíse, uje a jé ca chimópo dacoté casica to jne rĩ gu iji dejórique.

² Ga jé u uje iróquegatéode ore catecã́ri deduguéjnai ga ore chojningame: –Yoqueduguéjná. Jé areque jeta barógode ore chucué gapu omenie ome ua jne uje cáma ore chimo jnacánique ome raque to.–

³ Ga iróquegatéode udore ore jno daruode údi ome deduguéjnai tuté nanique ga ore chojningame: –Be ga atṍri barótigo uñéngo iji punirone jnese iji bajnepídi erãpe ujetiga ore jno dacueguedie gapu omei údi aja yoquidai Súsa udé to jne ome ua. Enga jé basa ga baroguipísi uje i tu Hegai a cháta ore aja bacoté uñanie iji baguíjna cuchábi ajé uñai uje bangara ajé uñai uté ome bacotedie. Ga a uté u jne jetiga chañuru gapudíe udire guio to ga chiroque daróguedie aja ore jne ujeta ore chariguétapise ore gáyode, jé aja cucha ai unérone jeta ore changuñéra ore gáyode to ujetiga dimane ore ome bei iji dire uñeque.

⁴ Jeta e amo ore enga a jé araja bajegaidéraque iji ore ujade jne, ga uaté a u jne jeta chácariji bacoté casica Vásti jogadi jne, enga a yoqueduguejẽ́ uaté to jne.– Ga ore eduguéjna cuchábi Asuéro irasiguipise ore áyipiedie ga jĩraque dopísi udire quigode jnese.

⁵ Enga jnani déji ore idai Súsa nanique uje i tu Mardoquéo. Enga purása quedéjna uté iji ore ujade, ga judío uté. Ga benjamíngose uté ga dai i tu Jaír nanique. Ga uté dáqui gatéode ore íode u udojo: Simei, Cis ore.

⁶ Ga yojningai Mardoquéo uté déji babilóniagosode ore isagode jnacáño ore gari to uje ore jno ore údi aja daniri nanique. Uje babilóniagosode eduguéjna cuchábi Nabucodonosor socárome judíode iji ore idai Jerusalén nanique, ga chisa ore eduguéjna cuchábi Jeconías ga jno údi aja daniri nanique, ga chátaja jnacarode uñane nanique to ga jnopo ore údi rĩ aja daniri, ga jiépisi isagode jnacáño udore ore nanique.

⁷ Ga Mardoquéo daquerámi ababía cusosi nanique, mu quigade ga daquerámi toi ga acoté topoi rĩ, ga ore toi jnese. Ga jé u nanique uje Mardoquéo cho dabi iji daquerámi abia iji dayé, daté ore quigade enga chimánaja gaté nanique. Ga uaté i tu Ester, jé basa ga i uñai tupo Hadása rĩ. Enga penocha goningane chejna raja nanique ga omépise. Enga que gusu enochai mu adode ueradípiso rĩ ga chaguesipise rĩ.

⁸ Uje e pududique eduguéjna cuchábi Asuéro áyipiedie iji ore idáyode jnese nanique, ga iroguipísode ore chimáta gapu omenie iji dedáyode, ga ore jno udire údi aja ore idáidatéi Súsa. Ga Ester uaté déji gapudíe udire ore ujade to uje ore diji eduguéjnai Asuéro iguíjnai. Enga Hegai chañuru ore guio to, uje uté isai tu deduguéjna cuchábi acotedie nanique jetiga ca cuchárique chona ore.

⁹ Enga Hegai chajire Ester ga chimo uje omépise uaté, ga chimo uje atígo ueradípiso to. Jecute que chajirape cuchárique mu jĩraque chiroque daróguedie uñanie aja uaté ujetiga ore pésupúsu uaté ome eduguéjna cuchábi Asuéro yui. Ga iróguedie udire gare ore iji ti ga ore chirajapise dasocade ome cuchade, ga que pirógueraque uñáraque iji eduguéjnai Asuéro iguíjna cuchábi cho udire ome darajatígadatéode. Udire ore chariguéta Ester uaté gai ga ore chaguñéra cucha ai unérone aja uaté gai to. Ore chañurúpusu posode guio ga ore gaidi tu ujetiga Ester tagu ga ijoréjnapise ome. Enga Hegai cãra Ester ore jogadi ome ujodie gapui ore jogadode, ga Ester mochádi ueradéjnapise nanique.

¹⁰ Mu que uñeque chiraja uje judía Ester nanique. Chamáñaje Ester ipesusṍri uje i tu Mardoquéo jé urúo diríca gu uje chojninga: "Apógu báringa judía ome ore jne."

¹¹ Mu Mardoquéo chicáji gapudíe charidébei iji dirode jnese ga chácariji chequedíe iguíjnai ajé uñai uté iquei. Ga jecucha ga catecã́ri ore ome Ester ga chojninga: "¿Jé aregue gapua uaté uje i tu Ester a? ¿Ore chañurúpusu guio a?"

¹² Mu eduguéjna cuchábi que chajire gapudíe udire míraque iji uraque daguíjnai nanique. Ga ore chejna siqueré chojmara iji iguíjnai uje ore chariguéta gapudíe ore gáyode iji dirode jnese. Ga guedosíode chojmára iji ti nanique uje ore changuñéra cucha ai unéri aja gapudíe ore gáyode jnese iji dirode jnese. Ga cucha ai unéri uté i tu mirra ga gusu mirra uje ore changuñéra ore gáyode ome iji dirode jnese. Ga guedosíode chojmarápo iji ti rĩ uje ore chécãre dasocai ome gapudíe ga ore dopoi cucha ai unérone uñane rĩ ga ore chaguñerápo gapudíe gáyode rĩ ome udore. Ga jé u uje e dimanepise ore ome eduguéjnai iquei ga jecucha ga ore chijnire ñane aja uté iquei jnese.

¹³ Ga jé u uje gapudíe ore doi iquei ga ore chisi ome ore ajegaidérigui ore iguidé ueradéjna ome ore ga ore chojninga: "Be ga acája bajegaidéraque ore iguidé ueradéjna jé aja bajnutígo cucha nanganatácho, ga apésu ua ome eduguéjna cuchábi iquei to."

¹⁴ Ga eduguéjna cuchábi iroguipísi Hegai jno gapu chojmara údi aja deduguéjnai ujeta moji gari iji dejaque chojmarai. Ga dire ga iroguipísode uñai uje i tu Sáasgaz jno mochápasa údi aja ajé uñai uje mochápasadie charidi tu. Ga mochápasadie uñanie que ore chimópo deduguéjnai edodie rĩ ga ore chácariji iguíjnai ajei bisidec. Mu jetiga irasépise damochápasa adode ga tibidápoi uaté goto rĩ ga mopóji gari to rĩ iji dejade.

¹⁵ Mu chise diri nanique uje Mardoquéo ipesudé gapu uje i tu Ester ga gajnei dire u nanique ome eduguéjnai jeta doi iquei to gajiné. Ga Ester uaté daipísi i tu Abihail nanique, mu uje toi ga ujnacare uñai pésu abia uaté to aja gaté nanique. Ga jé u nanique uje Ester catecã́ri darodisṍri Hegai ga chojninga: "Ango bajegaidéraque ome yu iji ore iguidé ueradéjnanie enga a yigui jne ome eduguéjnai yui." Ga jé u nanique uje Hegai, iróguedie ore pésupúsu Ester ome ore eduguéjnai yui. Uje ijõrepise Ester uaté nanique, ga chaguesipise, ga Hegai iróguedie uje ore chariguéta Ester iji dirode jnese, udire ore irasépise uje ate omépise Ester gu iji ore ujade. Ga jé chopome Hegai uje irasépise adode to.

¹⁶ Ga ore eduguéjna cuchábi uje i tu Asuéro guejnanie siquerei e gari iji ti nanique ome dáringai eduguéjna. Ga ore isecaranone guedosío e chejna yijmanáyone nanique uje Ester chise uté to nanique, ga ore isecarani guedosi uté i tu Tebet ome pérsiagosode ore uruode nanique.

¹⁷ Mu ore eduguéjnai uté uje i tu Asuéro chijnorapise Ester, ga ijnoraquei jiépisi ome, ga sué ijnoraquei casica gai ome dacoté bajé casica uje i tu Vásti. Ga jiépisi ijnoraquei ome Ester uaté. Ga ajegaidé tupúsu uaté ome damochápasadie gapu uñanie. Ga jé u nanique uje ore eduguéjnai Asuéro chisa ducayo nanganatai ga chajója Ester gatoi ga chojninga: "Báringa eduguejẽ́ cuchabe e pijógome yocurasade ore jne, ga jé u uje báringa yacotépise e pijógapo ome yu to rĩ. Ga yacoté casica Vásti a é picadiguepise jne ome yurasade ore jnese, uje é bácariji uaté charidi gu."

¹⁸ Ga jé u uje eduguéjna cuchábi pésu daninaquédatérique ome Ester nanique ga tibidi dojode eduguéjna, jé aja daroguipísode ore jnese iji dejnane puníño ore jnese uje ore batigai chise 127 nanique. Ga jé u uje ore tṍraji dajñarenie ome pijnane. Ga jé u uje pésu ore pose uneréjnane ga ore taguíji ñane gari uje ore nína raque ome acoté Ester uaté. Ga jé u uje tẽrája darasade ore to ga ueradípise gueranone cucha ome ore ga ore chojningame: "Caniranguipise yoqueduguéjnai uté ome yoque." Que gusu uté mu que chutai darasade iplátadie ome re iji deréjnane udojo to, ga icaniratiguei tuté imoi tu uje nína re ome dacoté icha Ester uaté gu.

Mardoquéo chudute soldádode ore uruode iji quedéjnarique nanique uje qué ore pésu dajéode ome eduguéjna cuchábi Asuéro úringárique chuque

¹⁹ Enga chise dire uñai ga ore diapo gapu omenie uñanie údi rĩ iji ore eduguéjnai uté iguíjnai. Ga Ester ipesungóri Mardoquéo e chácariji ore eduguéjnai iguíjnai piagoi ejoi uje ore di gapudíe údi iji uté.

²⁰ Mu Ester jé ate uje que chatata dáringa judía ome ore to, ga que chingo dapesungóri ome ore to uje judío to. Chamáñaje Mardoquéo jé urúo gu ome, jecute dopísi uruode quigode. Uje que déji Mardoquéo iguíjnai mu que cha tangári uruode.

²¹ Iji dirode udore uje Mardoquéo qué chácariji dayaridi tuté iji ore eduguéjnai iguíjnai pijnani mu chudute soldádode ore uruode iji quedéjnarique uje udore ore gajnepídi tu jeta ore chácariji deduguéjnai ejode ujeta ore chirote ejode. Ga soldádode eduguéjna ore to ga ore íode u Bigtán, Téres ore. Ga e ore pésu dajéode ujetiga ore chujé eduguéjna cuchábi Asuéro.

²² Ga jé u uje Mardoquéo tibidi Ester uaté ga chingome uje soldádode eduguéjna cuchábode e ore pésu dáyipiedie ome abai ujetiga ore chujé jne. Ga jé u uje Ester chingome dabai ga chojningame: "Jnanione uñane déji uje a ore chujé ua jne, ga barodisórone ore u uje ore íode u udojo: Bigtán, Téres ore. Ga barasade uñai chudute ore uruode ga chingome yu, ga jé basa ga yingome ua to. Ga barasai tuté i tu Mardoquéo."

²³ Uje e ore chiraja jnese uje jé ũrepise Mardoquéo ojñane ga jé ore doi eduguéjna cuchábi irodisórone udore, enga jé u uje ore chigaru ore etabídode ga ore chigaru ore aja gatéode ga ore cho cocho, cochógaja jnumone. Ga jé u uje eduguéjna cuchábi irógode uje ore churúsãre cucha dacadode aja quigode, enga ore churúsãre Mardoquéo i iji degode darujna ao ga ore chatata uje uté iquetaque uraque deduguéjnai. Darujna aoi uté u nanique uje purusãraque cucha dacadode jnese iji uje tocade nanique iji eduguéjna Asuéro gajnepídi erãpe údode jnese.