Ésdras 9 - Dupade Uruode

Ésdras urasade judío ore pésu dagajnarétigade ome Dupade nanique uje ore cho dacotéji purása quedéjnanie

^1-2 Uje chise dirode uñai nanique enga israélgosode ore angaránipísode uñane tibágui yu nanique ujetiga ore catecã́ri yu. Enga ore chojningame yu: "Yocopise yocáyugu israélgosode uyoque enga a yingongo cuchadatérigaja ua jne. Yocurasade e ore cho dacotéji purása quedéjnanie to, jé aja udore ore ujnacarode to. Que gusu ore, mu Dupade iroguipísode uñane iji yocujade jé u ore to uje ore chisa dacotedie to iji purása quedéjnane urodie, jé aja levígosode uñane to, jé aja yoqueduguéjnapísode uñane to, uje bajaque u ore uje ore chisa purása quedéjnane urodie ica. Uje obiréjnapise ome yoque uje Dupade chetaque uje israélgosode yimeco yóguiji purása quedéjnane ore urodie to. Uje purása quedéjnane ore jmapiedie gajnarénguepísi ga que déji pajénique ore jmapiedie. Yojningane purása quedéjna ore íode u udojo: cananéogosode, hitítagosode, ferezéogosode, jebuséogosode, amonítagosode, moábgosode, egíptogosode, amorréogosode ore."

³ Uje yudute udore ore uruode enga cho jetiga yúdode cho cojño, cojñóngome ore ojñane. Enga yajnangarase yiguidé iji yaróbabia ome ojñane, enga yajnangarásapo yatui aja yejode rĩ, enga yajnangarásapo yabuayé aja yejode to rĩ.

⁴ Yujode jnanío yátago yógaja ñane uje yitodógopísa Dupade yui jeta ájningai tocade ome yoque gu arorade udore ore ate gajnarénguipísode. Enga cho jeta íjnoque yetotiguei enga yo áidaja jnumi enga yimóji jnumi. Mu yidota yu aja uje yiraja uje e idógosi guedé batigai jeta ore tẽrája Dupade ome degode cuchiso.

⁵ Yiguidedie jé ate uje yajnangarase que, ga yĩriji ga jĩraque yáyipie déji Dupade enga yicatecã́ri Dupade.

⁶ Ga yósi tome Dupade: "¡Pangarádejná Dupade á! ¡Yangureni Dupade á! Yajengopísome yurasade ore isocade enga a ca yiraja yuru quitígome ua jne. Uje yurasade uyoque yocate gajnaréngone quérã enga cho jeta chujé raja ñane gáyode enga chise gatajnoquei.

⁷ Ga jé chome yocayode jnani bajácho udore uje ore adode gajnarénguipíso nanique, ga jé chuságaja disi ejode uyoque to, yocadode gajnarénguipíso to. Bajuéga yocayode ore eduguéjnane ome ore ujode eduguéjna nanique ga ore déji ore jmainie nanique. Mu que gusu yoqueduguéjnane nanique mu bajuégapísa baroguipísode ome purása quedéjnane ore ujetiga purása quedéjnane cho cucha bisidéguiji ore to nanique. Enga ore chejna yoque nanique enga ore chijnime yóguiji yocuniri enga ore chorei yóguiji danirone nanique, enga ore cho cucha bisidéguiji yóguiji daniri ujade nanique. Mu cajire disi ejode uyóguiji de to. E yicopísi yocayode ore jmapiedie to. Ga yajengopísome yoquisocade iji baquei.

⁸ Pangarádejná, Dupade á, Yocangureni tu ua. Yirajágo uje yocurasade uñane qué déji purása quedéjnane jmainie iji udore, udore. Mu arorade uyoque ga e bajnime yoque iji udore jmainie enga borepoi yóguiji yocuniri tudé to rĩ. Enga bajuéga ome yoque jeta yipéco yoquiguíjnane iji bedai puyai tudé. Uje yugúcoji purása quedéjnane jmainie diríca enga cho jeta ca yimóngopo yocajiritique diríca rĩ, mu bajnime yóguiji ore jmainie enga e yico yocuniri udé enga e basiapome dírecaringuéi ome yoque rĩ, ga e yimóngopo yocajirigode to rĩ. Enga e yugúcopoji yocuniri udé rĩ enga e idájapo yóguiji yoquisasõre casodica ore uniri, enga e tijode cho jnángome yoque iji yocuniri tudé uje yugúcopoji de rĩ.

⁹ Uje ore chisa israélgosode yoque nanique mu que ajíñome yóguiji te jmete ica iji yocúringane pujuya jmainie. Enga bajocase pérsiagosode ore eduguéjnane áyipiedie enga ore chorepoi yóguiji yocuniri udé ica rĩ, enga ore utocaite yoque ica jeta yirógopó baguíjna cuchábi aja gaté rĩ. Enga udore ore chañurupúsu yoquio iji yocuniri Judá údode, jé aja yoquidáidatéi Jerusalén udé údode to ujetiga ca pijocayaque yóguiji údode ome ayorérique."

¹⁰ "¡Yocangureni Dupade á! Caniranguipise ua ome yoque diríca, jecute que yiraja yuru quitígome ua. Uje israélgosode e yajníngopója yocate gajnaréngone rĩ. ¿Jé yoco ringome yoque jne? uje que yipéco bojningane cucha gu.

¹¹ Uje yocayode chise puniri udé iji taningai nanique enga baroque baruode atatasórone uñane aja ore nanique ujetiga ore chingo baru quigode aja yocayode jnani bajaque ore nanique, ga ore chósi tome ore nanique: 'A oyo uacaniri iji purása quedéjnane ore unirone to jne, mu añuchopúsu uaqueo ujetiga ca beyoi ore jmapiedie to. Uje purása quedéjnane udore gajnarenguipise ore isocade gu enga ore pésu daniri iyiejnaringuei iji yedominone iquei.

¹² Jecute ca ajuécho uacarodie ome udore ujnacarode jeta ore cho dacotedie iji ore. Ca ajuéchopo jeta uacajnacarode chójiapoi udore ore urodie gari to rĩ. Enga ca átayo uágaja purása quedéjnane udore, enga ca asíñome uacaru uréone ome ñane uje uacacuei tu pajesereringai ome ñane gu. Mu ujetiga angaráño uacajogatígome udore ore jne enga a etoque uaque jne, mu eti átayo uágaja udore ore jne enga a asereráñoja jne. Enga ajusopise uaqueo ome purása quedéjnane ore, ga a amóño jne uje cuchade déji uaque jnese iji uacaniri tudé. Enga a ca pijocayaque uacape disi ejórigo iji uacaniri udé jne, jé aja uacape gatérigo ore."

¹³ "Mu yocayode jnani bajaque que ore tangári baruode atatasórone ore nanique enga jé u nanique uje ore chirate purása quedéjnane jmapié noñánguenie nanique, enga jé u nanique uje máraque ore ome ua to nanique. Jecute yocajneque bajuyaquéode nanique ome yoque enga bajuéga yógome purása quedéjnane nanique uje ore jno yocúdi aja daniri. Jecute cuchadatei u ome yoque ica uje bajuégapo arorai ome yoque aja yocuniri rĩ.

¹⁴ Jecute quedéjnapise uje e yicopoi betégode cucha rĩ iji yocuniri tudé ajei, enga yisígo yocurodie ome purása quedéjnane ore jeta ore cho dabai iji ore ujnacarode, enga yocujnacarode, jé aja jnanione uyoque uñane ore chisa dacotedie iji purása quedéjnanie to. Yirajágo uje que ore jmapiedie déji bajénique, mu e yicoi ore jmapiedie udire. Jé go uje a e pisijnaringuédatépise ome yoque jõ. Enga a bájningai tocade ome yoque jne enga a ejnápise yoque jne, enga a jé ca yocuñeque chapite jne jeta bájningadatéi tuté tocade ome yoque."

¹⁵ Enga Ésdras qué jnopo dacatecãraitigade údi rĩ ome Dupade ga chósi tome: "Pangarádejná, israélgosode yocangureni Dupade tu ua. Ũrepise ua enga que bo bajuñame ayorérique bisideque. Mu bajuyaquéode di gu yoquisijnaringuéone. Mu barasade uyoque uñane qué yiquecágo iji erámi gu bosongaquéode ome yoque. Jecute yugúcoji baquei iji diri tudé. Mu e yirajagópo yocúringane máraque rĩ iji baquei, jecute que yicájnaco yógome ua, Dupade á."