Ésdras 8 - Dupade Uruode

Arorade ore dayode íode u udojo uje ore nóna Dupade iroi Ésdras nanique uje chajniapója Jerusalén rĩ

¹ Ésdras churúsãre jnanione ore íode uje eduguéjnai Artajérjes juéga doi ome ore nanique jeta ore nóna uté aja dajei nanique uje ore jnoji Babilónia ga ore chajni aja daniri Judá nanique. Enga churúsãre arorade gãrapíode jnani bajácho ore íode to rĩ. Ga u udojo:

^2-3 Jnani bajade uñai uje i tu Finees, uté ape disi ejoi u uñai nanique uje i tu Gersón. Jnani bajai uñai uje i tu Itamar, uté ape disi ejode uñai upo ore jorane uñai to nanique rĩ uje uté i tu Daniel. Jnani bajai David ape disi ejode uñai upo nanique rĩ uje uté i tu Hatús. Ga Hatús uté daipísi i u Secanías nanique. Jnani bajai Paros ape disi ejode uñai upo nanique rĩ uje uté i tu Zacarías ga Zacarías uté iguiosode jnanío nóna to uje ore batigai chise 150.

⁴ Jnani bajai Pahat-moab ape disi ejode uñai nóna ore to nanique uje uté i tu Elioenai, ga Elioenai uté dai i tu Zeraías. Uté iguiosode jnanío nóna uté to nanique ga ore batigai chise 200 nanique.

⁵ Jnani bajai Zátu ape disi ejode uñai nóna ore to nanique uje uté i tu Secanías. Enga Secanías uté dai i tu Jahaziel. Secanías uté iguiosode jnanío nóna uté to nanique ga ore batigai chise 300.

⁶ Jnani bajade uñai Adín ape disi ejode uñai nóna ore to nanique uje uté i tu Ebed, ga uté dai i tu Jonatán, enga Ebed uté iguiosode jnanío ore nóna uté to nanique ga ore batigai chise 50.

⁷ Jnani bajai Elam ape disi ejode uñai déji yocujade to nanique uje uté i tu Jesaías, ga uté dai i tu Atalías. Uté iguiosode jnanío nóna uté to nanique ga ore batigai chise 60.

⁸ Jnani bajade uñai Sefatías ape disi ejode uñai nóna ore to nanique uje uté i tu Zebadías ga uté dai i tu Micael enga Zebadías uté iguiosode jnanío ore nóna to nanique ga ore batigai chise 80.

⁹ Jnani bajade uñai Joab ape disi ejode uñai nóna ore to nanique uje uté i tu Obadías, ga uté dai i tu Jehiel enga Obadías uté iguiosode jnanío ore nóna uté to nanique ga ore batigai chise 218.

¹⁰ Jnani bajade uñai Bani ape disi ejode uñai nóna ore to nanique uje uté i tu Selomit ga uté dai i tu Josifías enga Selomit uté iguiosode jnanío ore nóna uté to nanique ga ore batigai chise 160.

¹¹ Jnani bajade uñai Bebai ape disi ejode uñai nóna ore to nanique uje uté i tu Zacarías ga uté dai i tu Bebai enga Zacarías iguiosode jnanío ore nóna uté to nanique ga ore batigai chise 28.

¹² Jnani bajade uñai Azgad ape disi ejode uñai nóna ore to nanique uje uté i tu Johanán ga uté dai i tu Hacatán enga Johanán iguiosode jnanío ore nóna uté to nanique ga ore batigai chise 110.

¹³ Jnani bajade uñai Adonicam ape disi ejode u uñane to uje ore íode u Elifelet, Jeiel, Semaías ore, enga ore iguiosode jnanío ore nóna ore to nanique ga ore batigai chise 70, mu ejópise ore nanique.

¹⁴ Jnani bajai Bigvai ape disi ejode uñane nóna ore to uje ore íode u Utai, Zabud ore, enga ore iguiosode jnanío nóna ore to ga ore batigai chise 70 nanique.

Ésdras chutai judíode ore eduguéjnai Ido ome levígosode uñéngo ujetiga ore nóna to aja Jerusalén

¹⁵ Uje cáma yico nanique mu Ésdras uyu yimáta arorade uyógaja tiédaté edúdi nanique uje uaté i tu Aháva. Ga yoquimochádode gadióguiji tié uaté edúdi. Ga yicatecã́ri yujode aroraque ore nanique jé aja Dupade irógode ore jnese to, mu yo yáyugu yu diríca uje que levígosode uñeque déji yocari to uje levígosode ore u uje pésu cuchade aja ñane iji Dupade iguíjna cuchábi ajéode nanique.

^16-17 Mu yutṍri jnanione uñane diríca eti ore chicáji ore idai Casífia jetiga ore catecã́ri ore angaránipísi iji uté uje i tu Ido. Ga yutocaidode u jnani ibijógode nanique iji darasade ujade enga yutocaidode udore ore íode u udojo nanique: Eliezer u uñai, jé aja Ariel, Semaías, Elnatán ore. Enga Jarib upo uñai rĩ, jé aja Elnatán uñai. Jé aja Natán, Zacarías, Mesulam ore to. Uje Dupade uruode acadisórone ore nóna ore aja Ido uté to ga ore íode u udojo to: Joiarib u uñai, enga Elnatán uñai jé upo uñai rĩ. Ga yojningai Ido uté a dérasi Jerusalén enga a dorási Dupade iroquéode to iji Dupade iguíjnai cuchábi, enga uté jorane Dupade irócho déji uté idai Casífia to. Ga yósi tome yutocaidode ore: "Angoñome Ido uté jne ujetiga chiroque darasade uñéngo aja yoque jeta jnani bajaque Leví ape disi ejo ore, ga ore nóna yógaja Jerusalén ga ore doi yocangureni Dupa iroquéode to iji iguíjna cuchábi."

¹⁸ Ga yacaranguipis ome Dupade uje Ido uté tangári yoque, ga uté chiroque darasade uñéngo aja yoque. Ido uté urasade uñai uje nóna yógaja dajei i tu Serebías. Áyipieránguipíse Serebías uté nanique, enga uté gãrapi u jnani bajai Máhli enga levígosode uñai u Máhli uté to nanique. Enga Serebías uté nóna dajnacarode, desade ore nanique ga ore batigai chise 18 nanique.

¹⁹ Enga Ido uté urasade uñane uje ore íode u Hasabías, Jesaías udore ore gãrapi jnani bajaque jé chojmára nanique uje uté i tu Merári nanique. Ga jnanione udore nóna yógaja yocajesui to nanique ga ore nóna dajnacarode, desade jé aja dajogasúode ore jnese enga ore batigai chise 20 nanique.

²⁰ Enga levígosode udore atapiésorone jnani nóna yoque to nanique enga ore batigai chise 20 nanique enga yurúsãre ore íode to jnese nanique. Uje yoqueduguéjna cuchábi David casicaite ichajapite udore ore dayode aja Dupade iguíjna cuchábi nanique ujetiga ore cháta cuchade aja levígosode ore nanique.

²¹ Ga jé u nanique uje yugúcoji tié uaté edúdi jnese uje tié uaté i tu Aháva nanique, ga yicatecã́ri arorade ore uyoque nanique ga yojningame ore: "Beyoi ga yoco yocuyágome yoque jne ga yicatecãcopísi Dupade ome yoque jne ujetiga chingo yoquiyoguéode ome yoque jne. Enga yijóchago yocangureni Dupade ajei údi to ome yoque ujetiga nóna yógaja quedéjnane to enga a ca cuchárique chósi ti iji yoque jne. Ujetiga chañurupúsu yocacotedie guio, jé aja yocabode ore guio to rĩ, jé aja yocachidode cuchiso to, jé aja yocoidode ore gueranone cucha ome Dupade enga a yiríngo jne ome yocúringáringo ayoré uajácho jnese.

²² Uje yutárasi eduguéjna cuchábi diríca ujetiga irógode soldácho nónarása yógaja dajei eti ore chãraque yógome oriechoquírigo uje a ore chachẽre yoque ga ore jno yocugúchade údi, mu que yutai gotique. Chamáñaje yojningame uté gu uje Dupade jecucha ga chañuru dacuesórone ore guio, jé basa ga ájningarãque ome udore uje ore chicai quedéjnane ome adode.

²³ Jecute yoco yocuyágome yoque nanique, enga yicatecãcoi yocangureni Dupade ome yoque to, ga jĩraque tangári yoque enga chañuru yoquio aja yocajesúode.

^24-25 Ga udojo quigade nanique ga yicatecã́ri Dupade iroguipísode uñane iji arorade yocujade nanique. Ga yicatecãrainone udore 12 nanique ga yósi tome ore nanique: "Ajnócho eduguéjna cuchábi, jorane ore gueranone ome Dupade iguíjna cuchábi jne, jé aja yocujode israélgoso ore gueranone cucha to. Enga añuchopúsu guío jne iji dajei." Enga jnanione udore uje 12 ore, gárode udore ore íode u udojo: Serebías, Hasabías ore.

²⁶ Ga yuguhese cucha orerane udore uje yigaidi tu gu jeta yirajágo ikílode batigade, ga jé u uje yurúsãco iji darujna aode jetiga yirajagopise batigai, enga jé u uje yisígome ayoré chojmara, chojmarane udore ujetiga ore chijnoque. Uje yuguhese ore gueranenie plátai enga ikílo batigai chise 21.450. Pagapíode uje pipesute iji pláta, ga yisecãco ore ga batigai chise 100. Yuguhese ore gueranenie óroi to enga ikílode chise 3.300.

²⁷ Yuguhese ore jopidode to uje 20 u enga udore pipesucho iji óro ueque enga ikílode chise 8 kílo. Enga bajodíe déji to uje gare uje pipesudéji bronce enga ore chicangurase udire gai ga nanganataguepísi, enga oredie jiépisi iji udire enga cho jeta óro uéguepísi udire.

²⁸ Enga yojningame jnanione udore ore diríca: "Yingarángo uacajogatígo ome yoque jne enga Pangarádejnai cho dajnéngu uaque jne. Jé aja uacajnungone cucha yingarángo jogatígo to ga Pangarádejnai gajnecho to jne, yocayode angureni Dupade uté. Yojninganie u pláta, órodie ore.

²⁹ Jecute añuchopúsu guio aja dajei jé aja ujetiga yiríngoji Jerusalén enga aráñoja sacerdóteode ore eduguéjnane ore jmana ajã́ronie ajéode jne. Enga a acháji israélgosode ore dayode edominone jne, jé aja levígosode ore edominone enga a puguheyágome ore jne iji Dupade iguíjna cuchábi ajei uñai jetiga ore chajirápome kílode gaté rĩ eti kílode jé upúsu yocurusarane quigode."

³⁰ Ga jé u uje Dupade iroguipísode, levígosode ore chisa ore gueranone ¡saque! ujetiga ore jno ore gueranone údi aja ore idáidatéi Jerusalén, ujetiga ore chicháji Dupade iguíjna cuchábi ajei to.

³¹ Uje chise guedosi bajai nanique uje dirode gare iji yirídai enga yicoji tiédaté edúdi uje i tu Aháva enga jé u uje yico ga yicagóji Jerusalén tiji. Enga yocangureni Dupápisi chatapísaja yoque iji dajei enga charanguipise yógome cuchade iji dajei, jé aja oriechoquíode to rĩ.

³² Uje yico yoquidáidatéi Jerusalén nanique enga qué yoco yocujñare nanique ga dirode gadiógome yoque iji yoquiyaridode.

³³ Mu dire uñai nanique enga jé u uje yicagóji yocangureni Dupade iguíjnai to. Ga jé u uje yuguhéco ore gueranone cucha kílode jetiga yajico kílode batigade, ga batigade jé upúsu yocurúsãra casodé quigode. Ga yisíome ore gueranone ome Dupade irógode uñai uje i tu Meremot uje uté dai i tu Urías. Ga uté jorane déji ejode to ga ore pañaji yocurasade gueranone cucha oreránguejna to, jé aja eduguéjna cuchábi, jorane ore gueranone cucha orerã́cho to. Ga Meremot uté jorane Dupade irócho udore ore íode u udojo: uñai i tu Eleazar, enga uté dai i tu Finees. Ga levígosode uñai déji to uje uté i tu Jozabad enga Jesúa ujnacari u uté. Noadías déji to uje uté dai i tu Binúi.

³⁴ Uje udore chajire cuchade kílode enga ore chajirápo yocurusarane enga ore chojninga: 'Batigade jé upúsu uacarusarane quigode.'

³⁵ Ga udojo quigade nanique ga arorade yẽcója israélgosode yocangureni Dupade to ome yocachidode cuchiso. Yoquẽrate bajade u aquirájna pariguéjnane uje ichájna enga gare iji yirídai yoqueranone. Enga yoqueranone jorane upo aquirájna icáguejnángone rĩ uje ore batigai chise 96, jé aja áyasa choqui pariguéjnane to uje ore batiga chise 77, jé aja áyasa quedéjna pariguéjnane to uje ore batigai chise 12 to ujetiga Dupade chajire enga chĩro yoquisijnaringuéone to. Enga ore chibore yoqueranone cuchiso udore ome Dupade gu uje yoquirasiguipise Dupade.

³⁶ Uje yimáco yoqueranone cuchiso ome Dupade enga jé u uje yipéco eduguéjna cuchábi áyipiedie quigode. Uje chojningame yoque ica: "Ujetiga aríñoji uacaniri enga asíñome yurusarane unojo ome yiroguipísode ore jne uje ore déji punirone udore iji guedé cacadi yui iji tiédaté Éufrates uécha uñai." Uje uté irógode ore chimo uté áyipiedie iji urusarane enga jé u uje ore chisi ome ore añerane cucha orerã́cho ome israélgosode ujetiga ca cuchárique chona Dupade iguíjnai, jé aja Dupade irógode ore to.