Ésdras 7 - Dupade Uruode

Chise diri nanique uje pacadisṍri uje i tu Ésdras chajniapója Jerusalén rĩ

^1-4 Cuchade udojo quigade uje pérsiagosode ore eduguéjnai u Artajérjes enga Dupade iroi Ésdras chajniapója Jerusalén to nanique rĩ. Enga Ésdras uté dayé i tu Seraías, jé basa ga uté dáquide i tu Azarías nanique. Ga uté dáqui gatéode ore íode u udojo to: Hilcías, jé aja Salum, Sadoc, Ahitob, Amarías, Azarías, Meraiot, Zeraías, Úzi, Búqui ore.

⁵ Enga que gusu udore, mu Abisúa upo uñai nanique rĩ, jé aja Finees, Eleazar ore to rĩ, jé aja Aarón to uje Dupade iroguipise bajai u uté nanique jeta pésupúsu cuchade aja quigode iji Dupade iguíjnai nanique.

^6-7 Enga Ésdras uté chirajapise Moisés urusarane quigode uje Pangarádejnai, israélgosode ore angureni Dupade, chisi ome Moisés uté nanique, enga Ésdras uté chacate darasade ome darajatigade udore nanique. Eduguéjna cuchábi Artajérjes irasique Ésdras uté nanique uje Ésdras angureni u Dupade ome re gu enga Pangarádejnai Dupade jecucha chátaja Ésdras uté gatuaque. Jecute uje uté chutai cucháriguiji eduguéjnai Artajérjes nanique, ga jĩraque chisíome utaidode cucha jnese ome nanique. Ga chise diri nanique uje babilóniagosode ore eduguéjnai uté juéga doi ome judíode uñane jeta ore chajni to aja dedai casicaite Jerusalén. Ga jé u nanique uje Ésdras jnoji Babilónia to. Dupade irógode uñane jno to nanique. Yojningane u udojo ore uje ore gajnepídi u picatecãraitigade ome Dupade ome darasade ore, jé aja levígosode to, jé aja deyade ore to uje ore chijñecáraja Dupade iradedie, jé aja Dupade iguíjna cuchábi piagode irodisórone ore to rĩ, jé aja udore ore uje ore isagode u cucha pisaque uñane iji Dupade iguíjnai cuchábi ajei to. Uje eduguéjna cuchábi Artajérjes guejnanie siqueré gare iji ti nanique ome dáringai eduguéjna ga jé u uje Ésdras, jorane ore, ore chajni aja daniri nanique.

^8-9 Enga Ésdras ore guejnane guedosi chejna yijmanai nanique iji daniri yúode uje ore chisápo dedáidatéi Jerusalén nanique rĩ. Enga Dupade chatapísaja ore iji dajei.

¹⁰ Enga Ésdras chejnapise daguesi ome dajirigode Moisés urusãracho Dupade urúo, ga chirajapise nanique. Gaidi u gu jeta chacate darasade ore ome to ga ore chiraja Dupade juegádode cucha, jé aja garéngone cucha rĩ, ujeta ore pésupúsu udore aja quigode jnese to.

¹¹ Dupade iroque sacerdote Ésdras uté nanique, jé aja pacadisõre uje chirajapise israélgosode ore angureni Dupade uruode quigode jnese uje Pangarádejnai uté chisi ome israélgosode ore dayode jnani bajácho nanique. Uje pacadique Ésdras uté nanique ome Dupade uruode jecute chirajapise juegádode cucha quigode, jé aja garéngone cucha quigode to. Uje cáma Ésdras uté ore jno nanique ga eduguéjna cuchábi uje i tu Artajérjes chisi ome darusarane ome Ésdras. Enga eduguéjna cuchábi urusarane u udojo nanique uje chatata dáyipiedie quigode iji darusarane udojo:

¹² "Uaqueduguéjnai Artajérjes uyu ga bajneque yirasitigade, Ésdrás. Dupade iroguipísode uñai u ua, ga pacadique ua ome gaté jogonóri Dupápisi uruode quigode nanique, ga e bacate ore ome barajatigade udore gatuaque to.

¹³ "Yarecujaidie u udiji ome israélgosode ore jnese iji yocuniri Pérsia udé údode eti barásarique uñeque jeta pota nóna ua aja uacaniri casicaite yui jne enga pujuegate ome uté gosi, cuchiyíode upúsu Dupade irógode sacerdote ore uje ore gajnepídi tupúsu picatecãraitigade ome Dupade ome darasade ore, jé aja levígosode uñane ore to.

¹⁴ Uje beduguéjnai uyu, jé aja yijõrápisode uje gare ore iji ti, yipótago ujetiga ajmita barasade ore iji uacaniri Judá údode, jé aja Jerusalén údode rĩ. Yoquigaidi tu gu jeta araja barasade isocade ujetiga ore dopísi Dupade uruode quigode to, uje purusarane udore déji bajmainie gatuaque to.

¹⁵ Enga ajnoque yijorane yoqueranone cucha to ome israélgosode uacangureni Dupápisi uje uté cho dedáji uaquedáidatéi Jerusalén uaté to. Uje yipéco yocáyipiedie diríca gu ujetiga ajnoque yoqueranenie óro to ome uacangureni Dupápisi, jé aja yoquiplátadie to rĩ uje pipesudei tiji plátapisedie ga orerẽ́ to.

¹⁶ Mu que gusu peduguéjnane uyoque jeta yẽcója uacangureni Dupápisi mu ajnoque barasade israélgose ore gueranone to uje ore uniri u yocuniri Babilónia udé to, jé aja Dupade irógode gueranone to uje ore pota gu jeta ore chisi ome deranone ome Dupade to ujetiga ca cuchárique chona Dupade iguíjna cuchábi atique iji uaqueda casica Jerusalén.

¹⁷ Ujetiga ese Jerusalén enga be oré tome aquirájna pariguéjnane jne, jé aja aquirájna pariguéjna ichájnane, jé aja áyasa choqui pariguéjna ichájnane to, jé aja ore acade trígo to, jé aja víno to ga bo údi aja Dupade iguíjna cuchábi iji Jerusalén ga ore tẽrája uacangureni Dupade ome ore gueranone udore to iji dajnei gaserãte gai.

¹⁸ Mu yoqueranone amirone a qué déji jne enga bajorane uaque acueyoi uacáyipiedie ome jne jeta beyoi uacáyipiedie quitígome jne, jeta e acatecãchoi Dupade ome pirajatigai ome jne.

¹⁹ Mu Dupade gajnéone cucha orerã́cho uñane qué déji Babilónia udé uje yoqueduguéjna casicaite Nabucodonosor oicho udore aja yocuniri nanique. Enga a ajnóngapo ore aja uacaniri jne rĩ, enga achapo udore ore aja Dupade iguíjna cuchábi ajei jne rĩ, uje jerusaléngosode ore angureni Dupápisi gajneque udore nanique gu."

²⁰ "Ga yojningame ua, Ésdrás, uje guesája yiguíjnane uñane ome ua uje cucha orerane déji yiguíjnane udore ajéode, enga ajire ga ajnoque bameserãtígo ome uacangureni Dupápisi iguíjnai ujetiga qué cuchárique chona.

²¹ Eduguéjna cuchábi Artajérjes uyu yósi tome yiroguipísode uñane to rĩ uje ore déji punirone udore iji guedé cacadi yui iji tiédaté Éufrates uécha uñai, uje udore ore ajiriguipise cucha orerane yúode to iji ta uje ore chañuru guio. Ga a yósi tome uaque: 'Dupade iroguipise Ésdras uté enga chirajapise gaté unirísõri Dupade guetégode cucha, jé aja imeserane cucha to. Ujetiga Ésdras uté chutai uágome yugúcharique jne, enga jĩraque asíñome jne.

²² Ujetiga Ésdras chutai yipláta orerẽ́pisedie uñáringui jne enga asíñome bu, mu jé ca oidérigui chãraja 3.300 kílos jne. Ujetiga chutai yocañerai trígo enga asíñopome to jne rĩ mu ca oidi chãraja 22.000 lítros. Jeta chutápoi víno rĩ enga asíñopome to jne rĩ, mu ca chãraja 2.200 lítros. Jetiga chutápoi aceite jne rĩ, enga asíñopome to jne rĩ, mu ca chãraja 2.200 lítros jne. Ujetiga chutápoi uágome echoi to jne rĩ ga jĩraque asíñome ipotigádode udojo bu ome jne.

²³ "A Ésdras u jeta chutai cuchade iji uaque, mu chopise jeta Dupápisi u uje chutai udojo ome daguíjnai. Jecute asíñome bu utaidode cucha jnese jeta chutai uágome. Yigaidi tu gu ujetiga Dupa Pujnuéngaisṍri ca cho dajuñame yujnacarode, ore uyoque, jé aja yuniri údode jnese jeta ca cho dajuñame yuniri jogonónique uñeque to.

²⁴ Enga a israélgosode ore cho yoré to jne, mu ujetiga Dupade iroque gosi enga que yipota jeta cho yoré to. Yojningane u Dupade iroguipísode sacedote uje ore gajnepídi u picatecãraitigade ome darasade ore, jé aja levígosode uñane to, jé aja deyade ore to uje ore chijñecáraja Dupade iradedie, jé aja Dupade iguíjna cuchábi piagode irodisórone ore, jé aja Dupade iroguipísode ore irógode to uje ore doi Dupade irógode ore iroquéode iji Dupade iguíjnai ejode. Ujetiga udore gaidode u Dupade iroquéode enga ca uñeque chopise yoré jne."

²⁵ "Mu yósi tome ua, Ésdras, e baraja bangureni Dupa uruode jecute acué bajorane iji israélgosode ore ujade uje ore chiraja Dupade uruode quigode to. Enga apésu bajõráringo ore úringáringo eduguéjna to enga a ore gajnepídi tu jne jeta ore chajire cuchade aja quigode jnese iji ore idáyode jnese uje déji guedé cacadi yui iji tiédaté Éufrates uécha uñai. Enga eduguéjnane udore ujetiga ore urásarigo botare ñane iji udore iquei, mu a jĩraque ore jnusina Dupade uruode ome darásarigo udore jne, enga chojningame ore: 'Déji de Dupade garéngone cucha, ipotigádode cucha.' Mu ujetiga agúpurai uacarásarique ome Dupade uruode quigode enga be jne enga o uté gosi quigome.

²⁶ Ujetiga uacarásarique ca doi Dupade uruode quitique enga jĩraque oyo uacajuñame uté gosi jne. Jeoga gosi chó deduguéjnai uyu yuruode uñeque gánique enga jé ate jeta pujuya uté gosi to. Jecute ujetiga gajnarenguipise gosi atique enga ajéyo uté gosi jne, jeoga ãracho uacaniri ome jne enga arócho aja doi jne jetiga jnoji uacaniri, jeoga ajucho gosi gai iji soldádode iguíjnai, jeoga gosi cho doré ome uaque. E gusu yurusarane ome uaque."

Ésdras chicota Pangarádejnai Dupade nanique

²⁷ Ésdras irasiguipise re enga catecã́ri Pangarádejnai Dupade nanique, ga chósi tome uté: "Pangarádejná, picotaguipise yocáqui cásodicáite ore angureni Dupa ua. Uje ua u gu uje bangurase eduguéjna cuchábi Artajérjes áyipie ga cháta baguíjna cuchábi aja yoque diríca iji yoquidai Jerusalén udé. Pota gu jeta baguíjnai ujnomei cusapo rĩ iji erámi tudé údode.

²⁸ Yacaranguipise to uje bangome bajnoraquédatéi ome yu diríca uje yugúsi eduguéjna cuchábi uté iquei diríca uje uté jorane déji ejode diríca to. Ua u to diríca uje basíome picasitígadatéi ome yu enga que yicájnaru yu ome ore iquei diríca. Ga jé u diríca uje uté juéga jeta yimáta israélgosode ore dayode jeta yajníngopója yocuniri rĩ, uje que pisoca ome eduguéjnarique jeta juéga doi ome purása quedéjnane uyoque mu."