Ésdras 6 - Dupade Uruode

^1-2 Uje judíode etesórone ore urusarane chise eduguéjna cuchábi Darío nanique enga jĩraque chajire ore urusarane quigode. Enga catecã́ri daroguipísode uñai enga chojningame uté: "Bo jne enga acáji yiguíjnai uñai iji yoquidáidatéi Ecbatána uje déji yocuniri Média ajei. Enga bo ga acáji yiguíjna cuchábi uté ajei uñai jne uje eduguéjna cásodicáite ore urúsaraníe dáyipiei jogadi tu yigode darujna ao iji uté." Ga eduguéjnai Darío iroi jno enga quítequiguíji eduguéjnai ojningai daguíjna ajei uñai enga chise mu chajire darujna aode mu jĩraque chimo eduguéjna casicaite Círo urúsaraníe dáyipiei iji darujna aode. Ga urusarane chósi te nanique:

³ "Siqueré qué chojmára nanique ome Círo casicaite iji úringai eduguéjna nanique uje purúsãra áyipiedie nanique iji darujna ao. Ga áyipiedie udire quigode jé u udojo. Ga áyipiedie chojninga: 'Ueradéjna ome uyu ujetiga porangápo Dupade iguíjna cuchábi aja gaté rĩ iji ore idáidatéi Jerusalén. A yujuéga doi ome judíode ore jne jeta ore chajniápo aja daniri rĩ. Yigaidi tu gu jeta ore pésapo Dupade iguíjna cuchábi casicaite cutádedie aja gaté rĩ iji jogadi casicaite, enga ore chimánaja gaté jne. Yigaidi tupo rĩ ujetiga ore tẽrája Dupápisi uté ome degode cuchiso jne rĩ. Enga yipota jeta ore chiro jne enga a umaningai iji gaté a chise 27 métrodie jne iji gaté, jé basa ga pajei iji jnumi a chisápo 27 métrodie rĩ.

⁴ Yajéode u ujetiga ore chiro Dupade iguíjna cuchábi ome cucaranenie ga ajéningo a gadióguiji gaté jne, enga ore chicha poridie aja ajei uñai yui iji gaté, ga qué ore jnopo ajei uñai údi aja gaté rĩ ga ore chirome cucaranenie aja gaté enga ajéode gare iji gaté uje ore chimate. Eduguéjnai Círo uyu a yimate cucaranenie, poridie ore oredie jne jé aja Dupade iguíjnai cutádedie oredie to rĩ ome pérsiagosode yoquimátajadie plátai.

⁵ Dupade gajnéone cucha déji daguíjna cuchábi nanique iji Jerusalén, uje pipesudé iji órodie, plátadie ore uje yoqueduguéjna casicaite Nabucodonosor oite udore aja yocuniri Babilónia nanique, enga yatiregópo jne rĩ, ga judíode a ore jno udore údi jne aja daniri. Ujetiga ore chimate Dupade iguíjna cuchábi aja gaté jne enga a ore chichapóji jogadode jne rĩ iji ajei."

⁶ Uje eduguéjnai Darío chimo Círo urusarane uje juéga Dupade iguíjnai ome judíode ore nanique jeta ore chirópo aja gaté rĩ, enga jé u uje eduguéjnai Darío jĩraque churúsãre darusarane ome judíode etesórone ore jeta chiroque darusarane aja ore. Ga ore eduguéjnai uje i tu Tatnai uté gajneque urusarane jeta chajire urusarane ome darasade ore. Ga urusarane gajnesórone uñane upo Setar-boznai rĩ, jé aja jorane eduguéjna ore rĩ uje ore unirone déji guedé cacadi yui iji tiédaté Éufrates uécha uñai. Ga eduguéjnai Darío uruode chósi tome ore: "Eduguéjnane uaque, boyo bu iji judíode ujade iji ore idai Jerusalén údode.

⁷ Ca apésopo judíode ore eduguéjnai ujuredie rĩ. Yigaidi tu gu jeta jĩraque ore chimate Dupade iguíjna cuchábi aja gaté rĩ iji jogate baja casicaite.

⁸ Jé yurúo ome uaque ujetiga átayoja judíode ore dayode uje udore ore u uje ore chajire orasórone uje ore pésu Dupade iguíjna cuchábi aja gaté. Asíyome judíode ore dayode jne ga ore chimate Dupade iguíjnai adode ome yutaidedie uacaplátai jne. Enga uacamánenie a u Dupade iguíjnai adode udore oredie ome uacaplátadie. Yojninganie uacaplátai u uje yiroque uágaja jeta oyo yoré ome uacaplátarigui. Ca oyo yutaidedie plátai udire uja jne jeta asíyome udore. Yigaidi tu gu jetiga jé ca cuchárique chona Dupade iguíjna adode, ga jĩraque ore chimánaja gaté jne. Yojningane u uaque jnese uje uacanirone déji guedé cacadi yui iji tiédaté Éufrates uécha uñai.

⁹ Mu que gusu uacaplátadie udore mu uacachidode cuchiso u to; yojningane u aquirájna pariguéjnane uje ichájna, jé aja áyasa choqui pariguéjnane to uje ichájna, jé aja áyasa choqui icáguejnángone. Asíyome uacachidode udore ome Dupade iroguipísode iji dirode jnese jeta ore tẽrame Dupade gatuaque uje Dupápisi uté enga déji gatajnoquei uéchai. A ore chingo uaque jne dajegaitígo iji uacachidode enga a udore u jne eti aríño údi iji ore. Mu que gusu udore mu átayo uacacade trígo aja to, jé aja echoi, víno, acéite ore, ga asíño ome ore to iji deréjnane jnese jne.

¹⁰ Yipota jeta ore tẽra uacachidode udore ome Dupade iji deréjnane jnese enga Dupade uje déji gatajnoquei chimo ore guẽrapáidode udore enga irasique re ome. Yigaidi tu gu ujetiga ore catecã́ri Dupade iji gaté ome uyu to, jé aja yujnacarode jnese jeta Dupade uté chacacãre yoque to ome cucha omone.

¹¹ Mu ujetiga uaque gosi ca doi yuruode quigode to jne, enga a pijnimé uté gosi iguíjna cutáderaque jne enga a pipesute asi iji eruei jne ga ore chata asi jne iji eruei enga a asicopise jne. Enga a pichajuque uté gosi pajei tome ¡jñaque! jne. Ga a ore doi uté gosi iguíjnai enga ore chajnangarase iguíjnai aja dejode jne.

¹² Dupápisi u uje ajegaite ore idai Jerusalén uté nanique ujetiga picotaque i ueradéjnai iji uté gatuaque. ¡Enga yajéode u ujetiga uñeque doi enga chécãre yuruode quigode, jeoga pésu judíode ujuredie uje ore pésapo Dupade iguíjna cuchábi aja gaté rĩ, enga a Dupápisi uté cho dajuñame uté gosi jne! Eduguéjna cuchábi Darío uyu uje yojningame uaque: Ca uacuñeque chó yojningane cucha udojo uñeque gánique gajiné. E gusu uje yurúsãre yojningane udojo ome uaque."

Judíode ore chimate Dupade iguíjnai aja gaté nanique uje ore chiro aja gaté

¹³ Eduguéjnane udore uje ore unirone déji tiédaté Éufrates uécha uñai iji guedé cacadi yui uje ore chajire Darío uté urusarane quigode enga ore dopísi uruode quigode jnese. Uje eduguéjna cuchábi urúo udojo ome ore ga que toc jeta gosi ca doi uru quigode to. Yojningane u Tatnai, Setar-boznai, ore jorane eduguéjna uñane jnese.

¹⁴ Ga jé u nanique uje judíode dayode ore chiro Dupade iguíjna cuchábi aja gaté nanique. Enga que ore anguretigai chicai jnumi ome Dupade gu Dupade uruode atatasórone uje ore chacate ore gatuaque gu ome Dupade uruode. Yojningane Dupade uruode atatasóño udore ore íode u udojo nanique: Hagéo, jé aja Ido ujnacari Zacarías ore. Israélgosode ore angureni Dupa chiroque ore aja iguíjnai úringai poraque nanique, enga chise diri nanique uje ore chimate Dupade iguíjna cuchábi aja gaté nanique. Pérsiagosode ore eduguéjnane uñane u to nanique uje ore pésu daru iyiejnane ome israélgosode ore jeta ore chirópo Dupade iguíjnai cuchábi aja gaté rĩ, jecute ore dopísi udore ore uru quigode jnese to. Yojningane u eduguéjna cásodicáite Círo, Darío, Artajérjes ore.

¹⁵ Enga pérsiagosode ore eduguéjnai Darío guejnanie siqueré e chojmára iji ti nanique ome dáringai eduguéjna uje quene judíode ore chimate Dupade iguíjnai aja gaté nanique uje ore chiro aja gaté. Ga ore pésu guedosi i nanique ga i tu Adar, ga 3 de Adar u nanique uje ore chimanipise Dupade iguíjnai nanique aja gaté.

¹⁶ Enga pininaquei jogadi jé u nanique ome israélgosode enga ore chimáta ñane aja Dupade iguíjnai uté nanique ujetiga ore catecã́ri Dupade iji ejode, ga ore chutai Dupade eti Dupade dépoji daguíjnai jne rĩ ome ore. Ga Dupade iroguipísode ore déji jnese, jé aja levígosode ore déji jnese to, jé aja arorade ore jnese.

¹⁷ Enga ore jno nanique ga ore tẽrapísaja Dupade ome cutejmai daninaquédaté. Enga ore gachidode jiépisi nanique uje ore tẽrája Dupade ome, enga ore gachidode batigade u udojo: aquirájna pariguéjnane chise 100 nanique, aquirájna pariguéjnane uje ichájna chise 200, áyasa icáguejnángone chise 400 nanique, mu áyasa quedéjnane chise 12 uje udore imoi u israélgosode ore gãrapi dáqui Jacob uté ujnacarode uje gare ore iji yirídai to nanique. Ga ore chojninga: "Áyasa quedéjnane udore uje gare iji yirídai a yẽcome israélgosode yoquisijnaringuéone jne ujetiga Dupade chĩro yoquisijnaringuéone to iji yocuáguedie jnese."

¹⁸ Uje e ore chimate Dupade iguíjnai cuchábi aja gaté nanique enga jé u uje Dupade iroguipísode ore dopoi dasoca cásodicáite rĩ uje ore chijnire ñane aja Dupade iguíjnai ajei nanique, uje ore chacája enga ore pésu cuchade aja quigode aja ñane. Enga jé chopome levígosode to uje ore chijnire ñane aja Dupade iguíjnai ajei to uje ore pésu cuchade aja quigode to iji Dupade iguíjnai ajei. Ga ore dopísi Moisés casicaite urusarane quigode jnese enga que uñeque chimoque quitique. Enga e ujnomerángapo ore idáidatéi Jerusalén rĩ uje idaisórone e ore dopoi Dupade adode rĩ iji Dupade iguíjna cuchábi ajei.

¹⁹ Enga e ore dopoi dasocabé casicaite rĩ ome dajnusinamáneméi casicaite uje i tu Páscua. Jecute uje e chise guedosi bajaguipísi uje ore jnusinamáni dire jogapi tu 14 iji uté enga arorade ore doi dajmapié casicaite jnese iji dajnusinamáni tuté dire.

²⁰ Dupade iroguipísode, jé aja levígosode, ore churu dabáyode to ga que ore chimoque Moisés uru cásodicáite uje ore doi quigode jnese ome dáringáringo icha yui jeta icha ore ome dasagode Dupade acho yui. Ga jé u nanique uje ore chujé áyasa chocábi ome dajnusinamáni dire yui uje i tu Páscua. Mu que gusu ome raque mu ore pésu to ome arorade ore jnese, jé aja dojode Dupade iroque ore, jé aja levígosode ore jnese to.

²¹ Ga israélgosode ore jnese uje ore di nanique jeta ore pésapo Dupade iguíjnai aja gaté rĩ ore tagu cucha arione jnese nanique uje ore déji ñane gari nanique uje ore jnusina dajnusinamáni dire uje i tu Páscua. Enga purása quedéjnane uñane ore cháta raja ore to uje udore ore cha darasade angurenone cucha bisidégode ga ore changureta israélgosode ore angureni Dupápisi to.

²² Ga ore guejnane dire gare iji ti nanique ome daninaquéode, enga ore tagu arurégode iji daninaquéode udore mu que ore chanire bisidi taja uje ore tagu arurégode. Enga ore ininaquéode gajnengóri tu israélgosode ore angureni Dupápisi uje chijocase pérsiagosode ore eduguéjnai áyipie diríca ujetiga chaquĩ́ra ore umajosórone ome ore enga uté chatapísaja cuchade ome ore ome Dupade iguíjna cuchábi adode jeta ibisoguipise ore aja Dupade iguíjnai cuchábi uje ore chirópo aja gaté rĩ.