Ésdras 4 - Dupade Uruode

Israélgosode ore umajosórone ore chucué dasocáringome israélgosode ujetiga jé ca ore chimate Pangarádejnai Dupade iguíjnai aja gaté jne

^1-2 Uje judágosode, benjamíngosode ore chajni aja daniri nanique mu ore umajosórone chudute ore ujnomei to uje Dupade urasade israélgose ore chirópo Pangarádejnai iguíjna cuchábi aja gaté rĩ. Enga jé uje ore tibágui Zorobabel, Jesúa ore, jé aja pangaránone uñane jeta ore catecã́ri ore, enga ore chojningame ore: –Ajuécho ome yoque ujetiga yátago Pangarádejnai Dupade iguíjnai taja uaque jeta yipéco to. Uje jé yoco uaque to gu ome Dupade. Uje uaquẽcho uacachidode ome Dupade, mu yẽco yocachidode ome to.– Ga ore chojninga: –Uacamóño uje asíriagosode ore eduguéjnai uté uje i tu Esarhadón, uté iroque yocurasade uyoque aja puniri uné nanique, ga jé yoco uaque. Uje yudúco uacangaráni Dupade ujnomei to nanique uje yiríngo iji de, ga jĩraque yẽco yocachidode cuchiso ome to nanique.–

³ Mu Zorobabel, Jesúa, jé aja judíode ore angaránone uñane udore ore chajnai ore uruode nanique. Enga ore chojningame ore: –Que yipótago ati átayo Pangarádejnai Dupade iguíjnai Témplo úringai porágaja yoque.– Ga ore chojninga: –Chamáñaje pérsiagosode ore eduguéjna cuchábi uje i tu Círo uté iroque israélgosode uyógaja de gu jetiga gusu israélgosode yógome yocangureni Dupade iguíjna cuchábi jeta yirógo aja gaté.–

⁴ Ga jé u uje purása quedéjnane uje ore déji puniri uté to nanique ore chucué dáyipie gajnarénguenie gatuaque jeta ca israélgosode ore chimate Dupade iguíjna cuchábi aja gaté jne.

⁵ Enga purása quedéjnane udore ore chisi ome daplátadie ome eduguéjnane iroguipísode uñane enga chiroque datocaidode udore aja ore uniri Pérsia nanique jeta ore chijnimi jóroque israélgosode ore iyoguéode ome ore eduguéjna cuchábi uje i tu Círo. Ore gaidi u gu ujetiga Círo tangári ore ga chaquĩ́ra israélgosode ome Dupade iguíjnai úringai porágaja gaté. Ga que ore cha ore tibágui pérsiagosode ore eduguéjnai uté nanique, ga jé ore chuságaja uje Círo doi guesi iji dáringai eduguéjna nanique ga eduguéjna cuchábi uñai chácariji charidi nanique uje i tu Darío.

⁶ Uje pérsiagosode ore eduguéjnai uñai cuse, uje uté i tu Asuéro nanique, ga purása quedéjnane iji israélgosode ujade ore chiroque darusarane aja uté to uje ore chijnime israélgosode ore iyoguéode. Ore chetaque israélgosode iji dajade gu iji guidáidatéi Jerusalén, jé aja puniri Judá údode jnese to.

⁷ Mu uje pérsiagosode ore chécãrapo deduguéjnai rĩ ga ejoi uté i tu Artajérjes, ga jé ate uje israélgosode ore umajosórone ore ijo ome dajnimingone dara to. Uje ore pota jeta peduguéjnai Artajérjes tangári ore enga jé ca israélgosode chiro Dupade iguíjna cuchábi aja gaté to. Enga udore ore churúsãre israélgosode iyoguéode enga ore churúsare iji darúpisode uje i tu araméo. Ga urusarane déji to uje ore chajnerame darusarane quigode to iji pérsiagosode uruode ujetiga ore chirajapise israélgosode iyoguéode to iji udore ore urúpisode. Ga ore churúsãre páyipiedie ipesungórone uruode iji darujna aode udore nanique, ga páyipiedie ipesungórone udore ore íode u udojo nanique: Bislam, Mitrídates, Tabeel, jé aja udore jorane eduguéjna uñane to.

⁸ Rehum u uñai uje soldádode ore eduguéjnai tu nanique. Simsai upo uñai to rĩ, ga uté u uje urusãrai ore áyipiedie quigode. Uje ore chimate darusarane ga ore chiroque darusarane aja pérsiagosode ore eduguéjna cuchábi uje i tu Artajérjes. Ga ore chĩretapise darusarane ome jerusaléngosode ore iyoguéode.

⁹ Que gusu yatatagode jnanío udore uje ore chijnime israélgosode ore iyoguéode mu ore jorane déji to, ga ore adode ajirisórone u uñane uje ore nóna ore to, jé aja eduguéjnane uñane iji ore uniri údode to. Yojningane udore eduguéjna ore dayode unire bajade íode u udojo nanique: Pérsia, Erec, Babilónia, Súsa uje i uñai u Elam.

¹⁰ Ore eduguéjna cuchábi casicaite uje i tu Asnapar ujnomeránguipíse uté nanique ome purása quedéjnane. Mu uté chijócãre eduguéjnane udore ore dayode nanique iji daniri, jecute ore ujnacarode e ore cho daniri iji israélgosode ore ujade to iji ore uniri uté nanique. Ga ore idáyode déji ore uniri Samária, jé iji punirone uñane to uje ore déji guedé cacadi yui iji tiédaté edute uñai uje tié uaté i tu Éufrates.

¹¹ Ga jnanione udore cháta raja ñane jnese uje ore churúsãre israélgosode iyoguéode jnese jeta ore eduguéjna cuchábi Artajérjes chajire to. Ga ore chósi tome darusarane quigode: "Yocurusarane gajnengóri tu ua, Yoqueduguéjná, Artajérjés. Barógode uyoque uje yirójo yocurusarane udojo aja ua, yocuniri déji guedé cacadi yui iji tiédaté Éufrates uécha uñai.

¹² Barógode judío uje barógaja yocuniri ica e ore chimátapo ñane aja ore idáidatéi Jerusalén ujetiga ore chirópo aja gaté rĩ. E ore chimate ore angureni Dupa iguíjnai cutádedie aja gatéode, ga e ore pésapo eruéode aja gaté rĩ. A e badute to uje gajnarénguipíse ore isocade iji yocujade nanique, enga que ore tangaripísi cuchárique nanique.

^13-14 Yitodógo gu jetiga ore pésapo dajuyaquéode iji dabai iji Jerusalén údode jnese jne rĩ, enga a ore suru dabai jne ome dajuyaquéode enga a amo jne ujetiga ca ore tangárapoi baruode rĩ. Ga a amópo jne rĩ jeta etoque ore ome cuchade enga a ca ore chopo boré to jne rĩ ome daplátadie. Jecute yurúsãco cuchade quigode udojo ome ua, yoqueduguéjná. Baroque uréone u yoque, ga a jé ca yujuéjo jne jeta gajnareque israélgosode ore adode ome ua.

¹⁵ Jecute yocósi te ome ua, yoqueduguéjná. Acué judíode dáquiode ore urusarane iji bari, uje a déji bari gu iji baniri Pérsia uté. Ujetiga acué ore urusarane iji bari iji ta enga a amo jne uje que ore tangárapoi pérsiagosode eduguéjna uñeque áyipiedie nanique rĩ, mu jecucha ga ore tagu ore uruode aja iji eduguéjna cuchábode udore gajnepídode erámio jnese. Ga ore pésu dáyipiedie ome pocaningane yúode gatuaque, jecute pérsiagosode uaquejnáño ore idáidatéi Jerusalén uté nanique. Jecute jé ca ajuégapo petotiguei ome ore jne rĩ.

¹⁶ Ujetiga ajuéga jeta ore chimánapo cuchade aja gaté rĩ iji guidáidatéi Jerusalén údode enga a ore chichapo dajuyaquérigaja dabai jne rĩ, enga a etoguipísapo judíode rĩ iji daniri uté iji guedé cacadi yui iji tié Éufrates uécha uñai. Enga jogadi a jé u jne ujetiga ore sué punirone uñane gáyode jnese iji guedé cacadi yui enga a bijna punirone udore jnese ome ua jne, enga a ca ore chopo doré ome ua to jne rĩ. Ga e gusu yocurusarane quigode."

¹⁷ Enga ore urusarane e chisápo eduguéjna cuchábi Artajérjes uté rĩ. Enga uté churúsãre darusarane ome ore to ga chirógaja ore to. Ga chósi tome darusarane: "Yurusarane gajnengórone u: soldádode eduguéjnai uje i tu Rehum, jé aja Simsai uje uté churúsãre deduguéjnane áyipiedie, jé aja udore ore jorane jnese uje ore uniri i tu Samária, jé aja ore jorane uñane to uje ore unirone cãra ome ñane iji guedé cacadi yui iji tiédaté uécha uñai uje tiédaté uaté i tu Éufrates. "Yipésupú ga ijõre uaque jnese jõ.

¹⁸ Yirógode e ore naráraja uacarusarane gáyode iji yejode uje uacarúsãchoji uacaruode diríca. Ga ore chajnerame yoque to jeta yirajágo quigode to.

¹⁹ Enga yacaranguipis uje uacangoño cuchade udore aja yu. Ga e yucuegoi uacojningane judío ore dáquiode urusarane udore jeta yajico quigode. Enga jé ũrepise uaque ome uacarusarane udore quigode, uje judíode jecucha ore chimáta ñane nanique aja dedai tuté nanique jeta ore catecã́ri ñane ome pocaningane yúode. Enga jé upo rĩ uje ore tagu purása quedéjnane ore eduguéjnane áyipiedie aja enga que ore tangári ore nanique.

²⁰ Jé aja uje judíode ore eduguéjnane ore cho dedáji Jerusalén uté jnese nanique enga ujnomeranguipise ore nanique iji erámi údode jnese ome dojode ayoréo. Ga ore chijna detotiguéode aja purása quedéjnane uaque jnese nanique uje uacanirone déji guedé cacadi yui iji tiédaté Éufrates uécha uñai. Ga uacayode jnani bajácho jecucha ore cho doré nanique ome israélgosode eduguéjnane udore ore.

²¹ Jecute yósi tome uaque: Angoño yuruode ome judíode udore ore iji Jerusalén jeta ore cha ore chiro Dupade iguíjnai, jé aja cuchade uñane iji ore idai údode jeta ore cha chiro udore to jnese, jé aja jeta yáyipie ichadie chise ore jne.

²² Yajnepídi jé u to ore idai tuté údode, jecute ajichopise cuchade yúode iji te ore idáidatéi Jerusalén údode jeta jé ca uacaruode udojo tocade to. E gusu yuruode unojo ome uaque."

²³ Uje ore eduguéjna cuchábi Artajérjes urusarane chise ore enga ore naráraja gai iji soldádode eduguéjnai iquei uje i tu Rehum, ga Simsai, jorane uñane ore déji jnese. Enga jĩraque ore quítequiguíji ore idáidatéi Jerusalén. Enga ore nóna soldádode ore to, enga soldádode ore chãraque judíode ore isagode cucha pisacho ome ore jeta ca ore chirópo dorade cucha rĩ.

²⁴ Ga iyajmanguipise nanique uje que ore chirópo Dupade iguíjna cuchábi aja gaté rĩ. Mu uje pérsiagosode ore eduguéjna uñai déji nanique uje i tu Darío, ga uté guejnanie siquerei e gare nanique ome dáringai eduguéjna, ga uté juegate nanique ome israélgosode jeta ore chirópo Dupade iguíjna cuchábi aja gaté rĩ.