Ésdras 3 - Dupade Uruode

Arorade ore ipesute bajai tu Dupade gaserani iji Jerusalén

¹ Uje e ore chise deda arode nanique ga ore guejnane guedosi e gari iji ti iji ore guida arode uje ore chacáji nanique, ga jé ore chimátapo ñane gaté rĩ aja ore idáidatéi Jerusalén.

² Ga ore chimate dáyipiedie ujetiga pipesute israélgosode ore angureni Dupade gaserani bajaque jne. Ore gaidi tu gu jeta ore dopísi Dupade iro casicaite, Moisés casicaite, ojningane cucha quigode jnese ome ore guẽrapáidode cuchiso yui jeta ore tẽrame Dupade. Dupade gajné ore aserãte orangórone ore íode u udojo: Josadac ujnacari u uñai uje i tu Jesúa, ga ujode Dupade iroguipíso ore upo uñane rĩ; jé aja Salatiel ujnacari jé upo uñai to rĩ uje uté i tu Zorobabel, jé aja uté iguiosode uñane to rĩ. Ga ore cháta raja ñane ome Dupade gajné gaserãte.

³ Arorade ore todo daniri jogosórone purása quedéjna ore mu que ore cha doi Dupade ojningane cucha nanique. Ga jé u uje ore chucuepísi Dupade gajné gaserãte bajai jogadípisi jeta ore chise jogadi enga ore chirópo dorai tiji jogate bajai jogadi te rĩ. Ga ore chujé Dupade gajnéone cuchiso iji durasedie jnese, jeta ore chiborome Pangarádejnai Dupade, ga ore chujépo ome Pangarádejnai Dupade rĩ iji guedéjnoringáne ga ore chibórapo degode ome Dupade rĩ iji guedéjnoringáne jnese.

⁴ Enga arorade udore ore jnusina judíode jnusinamáni dire uje i tu Guiguíjna Noñiméone, uje ore jnusina nanique uje ore chiro daguíjnane aja dajesúode nanique jeta ca disi ejode ore chicadígui dayode coringane uje ore jnome Dupade ojningai punire ueradéjnai yui nanique. Ga ore dopísi Moisés urusarane quigode nanique ga ore chujé cuchisode iji dirode udore jnese ga ore chibore degode udore iji Pangarádejnai Dupade gajnei gaserãte gai, ga ore yugode cuchiso batigade jé u Moisés urusarane quigode to.

⁵ Que ore chimoque dínique gotique to ome degode cuchiso uje Pangarádejnai Dupade pota jeta ore tẽrame iji dirode jnese. Ga chise Dupade ojningane dire puyácho nanique enga que ore chimoque uje ore chujé ore yugode cuchiso ome Dupade iji udore to. Ore tẽrapome Dupade iji guedoside tocachúringane gatuaque to rĩ uje qué abape ga chosi daju péode iji ti. Que gusu ore jnusinamánone díño uje ore tẽrája Dupade iji, mu uñane pota ga ore tẽrája Pangarádejnai Dupade ome dachidode to iji dirode ujade.

⁶ Uje ore chajniapóji daniri casica rĩ, ga ore chise, ga ore guejnane guedosi gare iji ti yijmanuñai enga jé u uje jĩraque ore chujépo dachidode cuchiso ome Dupade nanique rĩ. Uje cáma ore chirópo Dupade iguíjna cuchábi aja gaté nanique rĩ, mu ore yuque bajade u dachidode cuchiso ome Pangarádejnai Dupade bajaque.

⁷ Ore chisi ome trabájo ome jnanione iji dajade uje ore chirajapise ladríllos úringane poracho, jé aja udore ore to uje ore chirajapise poridie uje ore chajugája jnumone, jé aja jnanione uñane uje ore charose poridie gai ga ueradipise gai. Ga ore chiroque ore aja jeta ore pésu ga ore chiro Dupade iguíjna cuchábi aja gaté. Enga ore chimate ore ome ore isagode udore ga ore chisi ome plátadie ome udore gatuaque. Ga jé u uje ore doi poridie oredie nanique iji tírogosode gari, jé iji sidóniogosode ore gari to rĩ, mu que ore chimate ore ome plátapísedie mu ore cho oréji dacade cucha, jé aja ore jotai víno, jé aja aceite to. Ga tírogosode, sidóniogosode ore chigaru daquesudie pore aja ñane ga ore chicháji yote quedéjnai gai iji ore uniri Líbano ejoi, ga jé u uje ore jnopo daquesudie údi rĩ aja punire uñai. Uje ore chise ore idai Jope enga israélgosode ore doi ga ore jno údi aja daniri jeta ore chajugája jnumone ome Dupade iguíjna cuchábi cutádedie. Uje pérsiagosode ore eduguéjnai Círo jé urúo ica ome ore gu jeta ore doi poridie iji sidóniogosode, tírogosode ore unirone.

Chise diri nanique uje quene ore pésapo Pangarádejnai Dupade iguíjna cuchábi aja gaté rĩ uje i u "Témplo"

⁸ Enga siqueredie e gare nanique ome israélgosode ore uje ore chisápo daniri te rĩ, ga guedosíode e garapóji siqueredie quigade nanique rĩ, ga jé u nanique uje quene ore pésu Pangarádejnai Dupade iguíjna cuchábi adode aja gaté. Salatiel ujnacari Zorobabel, jé aja Josadac ujnacari Jesúa ore cháta rágaja dojode Dupade iroguipíso uñane ome Dupade iguíjnai úringai pipesute, jé aja levígosode uñane to uje ore guejnanie siqueré e chejna ayoré chojmarai. Levígosode ore gajné tu ujetiga ore chajire Dupade iguíjnai orasórone ore ipesudode aja quedéjnane jeta ueradipíso aja ajesúode.

⁹ Ga levígosode udore uje ore chajire Dupade iguíjna cuchábi orasórone yúode ore íode u udojo: Jesúa u uñai, ga ujnacarode ore u to uje ore chajire orasórone yúode to, jé aja Jesúa uyade ore; Cadmiel jé u uñai te rĩ, ga uté ujnacarode ore cháta raja dai to ga ore chajire orasórone ore yúode to, uje Cadmiel uté ore dáqui gatei u jnani bajai Judá nanique; Henadad jé upo uñai to rĩ uje chajire orasórone yúode to, ga uté ujnacarode ore u to uje ore cháta dai isagode aja to, jé aja Henadad uté uyade to.

¹⁰ Uje Pangarádejnai Dupade iguíjna cuchábi orasórone e ore chimate Dupade iguíjna cuchábi cutádedie aja gaté nanique, enga Dupade iroguipísode uje ore isai tu picatecãraitigai ome darasade ore jeta ore catecã́ri Dupade ome ore, enga ore chacája daguidé ueradéjnanie uje ore úringane Dupade iroque pijógome daguidedie udire nanique, enga ore chague enga ore chubúchu dabuchugode. Ga levígosode uje ore dáqui gatei i tu Asaf, udore ore chinguíra degode guebecho aja ñane ¡cã! ¡cã! ¡cã! Enga udore ore dopísi eduguéjna cuchábi casicaite David uruode quigode enga ore nínapúsu re uje e ore chimate Pangarádejnai Dupade iguíjna cuchábi cutádedie aja gaté gu.

¹¹ Ga levígosode uñane uje deyaque ore enga ore chijñecare ga ore cha, enga ore ujode deyaque ore chajnai ore iradedie, ga ore chijñecãre to ome Dupade iradedie. Ga deyade udore ore iradedie achachagúgode chósi te: "Beyoi to, ga yãcaco Pangarádejna Dupa Eyúgojmai gai to. Uje uté átegoningaránguipís ome yoque gu. Uté chejnápise dajnoraquei aja israélgosode uyoque ga que piyaque ijnoraquei eruénique." Ga israélgosode ore déji jnese ga ore chãrai riji gatéode, ga ore ichorájna, ga ore nínapúsu raque uje a ore chimo jne uje ore chirópo Pangarádejnai Dupade iguíjna cuchábi aja gaté, ga pirasitigai irágupúsu ore ajéode jnese, ga ore isi tu Dupade gai jnese.

¹² Mu Dupade iroguipísode uñane uje e choquíjnapise ore, jé aja levígosode uje choquíjna ore, jé aja israélgosode ore dayode uñane uje choquíjna ore to, ga ore popise nanique. Ore u gu uje ore chimópise Pangarádejnai Dupade iguíjna bajai úringai ueradíji gaté nanique. Ga choquíjnane udore ore popise uje cucha dacadode chijõrorase ore. Uñane ore po, jé uñane ore chãrai riji gatéode ga ore cana aja dajesúode.

¹³ Enga ore ichorájnai chichagu gatajnoquei nanique. Uñane ore nínapúsu raque, jé uñane ore popise, mu jé cho ñane ome ore ichorájnai ududisórone nanique.