Ésdras 10 - Dupade Uruode

Udore ore jnese uje ore cho dacotéji purása quedéjnane urodie nanique ga ore chatire udire darasade gai

¹ Enga Ésdras uté doi Dupade iguíjna cuchábi ejoi ga chichaga dagataidie aja jnumi, enga catecã́ri Dupade enga chingo darasade ore isijnaringuéone aja Dupade enga popise iji dejode. Enga jnanione uñane, jé aja chequedíe uñanie ore chimo uté iji te, ga ore tibágui enga ore popise iji ejode to, jé aja ore abode to.

² Mu qué ore déji dagoyedie gai jnese, mu jnani chijnare raja Ésdras ujetiga catecã́ri uje i tu Secanías nanique. Jnani bajai Elam ape disi ejo u Secanías uté, uje dai i tu Jehiel nanique. Enga Secanías uté chojningame Ésdras: "Jé ũrepise ua, Ésdras, uje e yicagóji quedéjnane ome yocangureni Dupápisi adode. Uje jiei yoque uje yoco yocacotedie iji purása quedéjnane urodie. Mu piotiguei qué déji ome israélgosode uyoque ujetiga yajníngo Dupade gai enga ca cho dajuñame yoque jne.

³ Ga a yicoi jne enga a yirójo yocacotedie purása quedéjna ore aja doi jnese jne, jé aja ore abode to. Ga jé ũrepise yoque ome yocuruode udojo. Ga yicopoi Dupade uruode ijnorasórone uacacajnaquéode quigode jne rĩ uje uacoyo yoquiquique ome Dupade ojningane cucha."

⁴ Enga uté chojninga: "Ésdrás, ãriji uje bachaga bagataidie aja jnumi, enga acate yoque to enga yangácoi ua jne. Ajnusi ua ome Dupade adode enga acate yógome ga a yicoi bacajnaquéode quigode jnese jne."

⁵ Ga Ésdras chague jmame nanique enga catecã́ri Dupade iroguipísode, levígosode ore, jé aja israélgosode uñane ore jnese. Ga chósi tome ore: "Enga asíyome uacaru iyiejájnane ome Dupade ujetiga beyopísi Secanías uru quigode jnese." Ga jé u uje ore chajnai Ésdras uruode, enga ore chojningame: "Ejẽ́, a yicoi uté uru quigode jnese jne ga ũrepise yógome yocuruode udore jne."

⁶ Ga udojo quigade nanique enga Ésdras jnoji Dupade iguíjna cuchábi ejoi ga chicai dajõrai iguíjnai uje uté i tu Johanán enga uté dai i tu Eliasib. Enga Ésdras moji uté iguíjnai, mu que taque to, enga que chójiapo yotique rĩ, uje áyuguhebátigade chajo aja jnumi, ga nápisaja jnumi. Ga áyipiedie que jnoji arorade ore isoca gajnaréngone udore uje que ore dopísi Dupade áyipiedie quigode gu.

⁷ Udojo quigade ga ore eduguéjnane chiroque daruode aja darasade iji Judá údode jnese, jé aja ore idáidatéi Jerusalén údode jnese to. Enga ore tibidi arorade ore jnese enga ore chósi tome darusarane: "Ajnáñoji yoquidáidatéi Jerusalén udé jnese, ga yipéco yocuáguedatéraque iji Jerusalén udé jne, ujetiga arorade uyoque jnese yicatecãcoi ñane jnese iji udé.

⁸ A dirode gadioque eti eso yóguiji yocuague to, mu uaque gosi ujetiga ca chise yóguiji yocuague jne enga a yajnóco gosi ome ugúchade jnese jne, enga a arorade uyoque a yirójo gosi aja doi jne iji yocuniri ujetiga gosi ca doi yoquibijnane to. Uje uaqueduguéjnane uyoque yocáyipiedie u udiji ome uaque gu, jecute jé ca oyo cucha bisidéguiji uje yibicoi uáguiji yocuague."

⁹ Ga jé u nanique uje ore guejnane dire gadioque enga judágosode, benjamíngosode ore tṍraji dajñarenie uje ore doi ore uague nanique ga que uñeque chácariji siñeque nanique. Uje guedosíode gagájni iji ti nanique enga ore uague jogadi u 20 nanique, enga jé u uje arorade ore déji ñane gari jnese nanique. Enga arorade udore ore chimáta ñane aja Dupade iguíjna cuchábi ajei gatócoro nanique. Ga beque nanique ga gueyequejnapise, mu que uñeque chicai siñeque ome ore charidi uté, ga tejnupise ome ore enga ore cho ta-ta-ta jnese ome dasadodéringai ome uraque deduguéjnane áyipiedie.

¹⁰ Ga jé u uje Dupade iroguipísi Ésdras chague ga catecã́ri ore iji dejode, enga chojningame ore iji dejode: –Israélgosode uyoque jecucha ga yoquibade cus ome Dupade. Mu yoquibade chicai gatéode gu uaque uje uacasayo purása quedéjnane urodie.

¹¹ Jecute yósi tome uaque: Ca apócho uacasocade mu angoño uacate gajnaréngone ome uacayode ore angureni Dupade to. Ãraracho ga oyósi tome Dupade: "Dupade á, máraque yógome ua, mu e dimane yógome ua jeta yicoi bojningane cucha quigode to." Mu angaráño uacaquitígo ome purása quedéjnane ore, enga arócho uacacotedie purása quedéjna aja dode.–

¹² Uje Ésdras cha dara ga ore narare jnese ga ore ichorájna enga ore ichorai suru gaté. Enga ore chojninga jnese: –Ejẽ́, a yicoi baruode quigode jnese jne.–

^13-14 Mu ore chojninga: –Bamo uje jiei uyoque ga que yácagoji jnutique, enga jiei gueyequejna to. Jecute ajuéga doi ome yoque jne enga a yajníngo to aja yoquidáyode. Bamo uje jiei yoque ga a ca jĩraque yipéco bajegaidode cucha. Mu yico ga a yatiregope yocacotedie purása quedéjna ore jne, enga jé u jeta yajníngopó uacabai jne rĩ iji de. Mu yoqueduguéjnane uje yijínango ore aja de, a ore chácariji de jne enga a ore chirote gadoi iji de. Enga ango yoquiríringárique dire aja yoque jne enga a yiringopísiji bojningárique dire jne. Enga a yimáco yocacotedie aja ore urasade jne ga jé u jne ujeta yijínangopo yoqueduguéjnane uñane aja de rĩ. Ga a ca yicopo jne rĩ iji de ga jé yusájoja eti yirajágo eti Dupade ájningai doi jnumi ome yoque jne.–

¹⁵ Gusu jnani gagájnione uje ore chetaque ore áyipiedie ga jnanione udore ore íode u udojo nanique: Asael ujnacari Jonatán u uñai, Tícva ujnacari upo uñai rĩ uje uté i tu Jahazías; enga levígose gárode ore u uñane to uje ore chetaque ore áyipiedie quigode ga jnani gárode udore ore íode u Mesulam, Sabetai ore.

¹⁶ Mu arorade uñane jnese ore doi ore áyipiedie. Enga Ésdras doi enga chicha judíode ore dayode aja ore charidode ujetiga ore chajire darasade jnanío ore adode aja quigode uje udore ore acotedie u purása quedéjnanie to. Guedosíode gadioque ome ore ajiritigade udore uje ore chajire jnani chojmara, chojmarane jnese ore adode aja quigode.

¹⁷ Dire bajai u iji guedosi bajai nanique uje padode ajirisórone udore ore cha dajiritigade ome jnanione ore jnese uje udore ore cho dacotedie iji purása quedéjnane urodie nanique.

^18-19 Dupade iroguipísode ore uje ore acotedie u purása quedéjnanie nanique ga ore íode u udojo: Josadac ujnacari Jesúa ujnacarode u uñane, jé aja Jesúa uté iguiosode uñane to. Enga udore ore íode u udojo nanique: Maasías, Eliezer, Jarib, Gedalías ore. Udore ore jnese ore chajo raja nanique ujetiga ore chiroque dacotedie purása quedéjnai aja doi. Enga ore tẽrája Dupade ome dachidode aquirájna pariguéjna jnese ujetiga Dupade irógode ore chibore enga Dupade chĩro ore ate gajnaréngone to.

²⁰ Imer ape disi ejode u uñane to ga ore íode u: Hananí, Zebadías ore.

²¹ Harim ape disi ejode u uñane to ga ore íode u: Maasías, Elías, Semaías, Jehiel, Uzías ore.

²² Pasur ape disi ejode u uñane to ga ore íode u: Elioenai, Maasías, Ismael, Natanael, Jozabad, Elása ore.

²³ Levígosode uñane ore ape disi ejode u to nanique ga udore ore íode u udojo to: Jozabad, Simei, Kelaía (uje i uñai u Kelíta), Petaías, Judá, Eliezer ore.

²⁴ Deyade uñai uje chijñecáraja Dupade iradedie uté acoté u purása quedéjnanie uña to nanique ga deyai uté i tu Eliasib nanique. Dupade iguíjna cuchábi piagode irodisórone uñane ore acotedie u purása quedéjnanie to nanique ga udore ore íode u udojo nanique: Salum, Telem, Úri ore.

²⁵ Israélgosode uñane uje ore chisa purása quedéjnane urodie to nanique ore íode u udojo to: Paros ape disi ejode u uñane ga ore íode u udojo: Ramía, Jezías, Malquías, Mijamín, Eleazar, Malquías uñai, Benaía ore.

²⁶ Elam ape disi ejode u uñane to ga ore íode u udojo: Matanías, Zacarías, Jehiel, Abdi, Jeremot, Elías ore.

²⁷ Zátu ape disi ejode u uñane ga ore íode u udojo: Elioenai, Eliasib, Matanías, Jeremot, Zabad, Azíza ore.

²⁸ Bebai ape disi ejode u uñane ga ore íode u udojo: Johanán, Hananías, Zabai, Atlai ore.

²⁹ Bani ape disi ejode u uñane ga ore íode u udojo: Mesulam, Maluc, Adaía, Jasub, Seal, Ramot ore.

³⁰ Pahat-moab ape disi ejode u uñane ga ore íode u udojo: Adna, Quelal, Benaía, Maasías, Matanías, Bezaleel, Binúi, Manasés ore.

^31-32 Harim ape disi ejode u uñane ga ore íode u udojo: Eliezer, Isías, Malquías, Semaías, Simeón, Benjamín, Maluc, Semarías ore.

³³ Hasum ape disi ejode u uñane ga ore íode u udojo: Matenai, Matata, Zabad, Elifelet, Jeremai, Manasés, Simei ore.

³⁴ Bani ape disi ejode u uñane ga ore íode u udojo: Madai, Amram, Uél,

³⁵ Benaía, Bedías, Quelúhi,

³⁶ Vanías, Meremot, Eliasib,

³⁷ Matanías, Matenai, Jaasai ore.

³⁸ Binúi ape disi ejode u uñane ga ore íode u udojo: Simei,

³⁹ Selemías, Natán, Adaía,

⁴⁰ Macnadebai, Sasai, Sarai,

⁴¹ Azareel, Selemías, Semarías,

⁴² Salum, Amarías, José ore.

⁴³ Nebo ape disi ejode u uñane ga ore íode u udojo: Jeiel, Matatías, Zabad, Zebina, Jadau, Joel, Benaía.

⁴⁴ Yatatagode udore ore jnese u nanique uje ore acotedie u purása quedéjnanie, mu udore ore jnese ore chatire udire darasade gai, jé aja udire ore abode ore chatirépo udore ore to nanique rĩ jetiga ore chácariji datedie urasade ore ujade.