Ésdras 1 - Dupade Uruode

Pérsiagosode ore eduguéjnai Círo juéga nanique jeta judíode ore chajniapója daniri casica rĩ uje i tu Judá

¹ Uje qué israélgosode ore déji pérsiagosode ore jmainie nanique ga pérsiagosode ore pésu deduguéjna ichai nanique uje i tu Círo. Iji siqueré bajé uaté uje Círo uté déji dáringai eduguéjna nanique, mu Pangarádejnai e doi nanique ga na páyipie omé taja áyipie. Ga Pangarádejnai Dupade gaidi u gu ujetiga daruode atatasṍri Jeremías uruode tocade ome israélgosode ore uje chingome ore ica. Ga jé u nanique uje purúsãra Círo áyipie omenie ome urasade ore jnese ga chojningame darógode ore: "Boyo uacarúsaraníe yáyipiei údi ome yocurasade iji yocuniri údode jnese, enga ãrarachója gáyode ome ore jeta ore tangári quigode."

² Ga ore urúsaraníe Círo áyipie chósi tome ore jnese nanique: "Círo uyu, ga yurasade pérsiagosode uaque uaqueduguéjna uyu uje yiroque yurusarane aja uáguiji yoquirosadode gajiné. Ga yósi tome uaque: Pangarádejna Dupa Eyúgojmai u uje déji gatajnoquei, enga uté u nanique uje chicha purása quedéjnane ore eduguéjnane aja yoquijmainie nanique, ga yijnángo ore unirone iji ore gari ga e yocuniri querúpise to. Dupa Pujnuéngaisṍri u uje catecã́ri yáyipie diríca ujetiga yujuéga eti judíode ore chajniápo aja daniri casica rĩ uje i tu Judá, enga ore pésapo Dupade iguíjna cuchábi aja gaté jne rĩ, uje Dupade iguíjna cuchábi uté déji ore idáidatéi Jerusalén ica.

³ Jecute yósi tome Dupade uté gajnéone israélgose uáguiji yocujade. Ujetiga apótayopo uacaniri casica enga a yujuéga doi ome uaque jne eti ajníñopója uacaniri Judá te rĩ. ¡Yipésupú ga uacangureni Dupa chatapísaja uaque jne jõ! enga a eso uacaniri casica jne rĩ, enga apésopó Dupade iguíjna cuchábi aja gaté jne rĩ iji uaquedáidaté casica uté uje i tu Jerusalén. Uje Dupade cho darása iji israélgosode uaque enga cho dedáji uaquedai tuté Jerusalén nanique.

⁴ Yósi tome israélgosode uaque: ujetiga uacajorane ore jno, enga uacuñéngo chácariji yocuniri udé, enga asíñome uacaplátadie ome uacajõra dode udore ore ujetiga ore pésu Dupade iguíjna cuchábi aja gaté jne ome uacaplátadie. Mu que gusu uacaplátadie ome Dupade iguíjna cuchábi, mu asíñome uacagúchade ome ore to, jé aja óro, jé aja plátapise, jé aja uacachidode cuchiso rĩ, jé aja uacabosode to rĩ, jeta ore tagu to uje ore chiro Dupade iguíjna cuchábi aja gaté."

Chise diri nanique uje judíode ore pésu cuchade aja quigode ujetiga ore chajniápo aja ore unirípisi rĩ

⁵ Chise diri nanique uje judíode ore pésu cuchade aja quigode jetiga ore chajniapója dedai Jerusalén rĩ. Yojningane udore ore u judágosode ore angaránipísode, jé aja benjamíngosode ore angaránipísode to rĩ, jé aja Dupade irógode ore rĩ uje ore isai tu Dupade uruode ome darasade ore nanique, jé aja levígosode uñane to uje jecucha ore isagode u uje ore pésu cuchade aja quigode iji Dupade iguíjna cuchábi ajei. Udore ore jnese uje Dupade chijocase ore áyipiedie, ga ore jnusi rángome Pangarádejnai Dupade iguíjnai úringai pipesute to.

⁶ Uje e dimanepise ore ome doi enga ore acayade que ore agutu dagúchade ome ore. Enga ore chejna dagúchade aja dode jnese uje ore chisi ome ore, jé aja ore gachidode to. Ga uñane gueranenie u óro orerẽ́pisedie ome dajorane ore, jé aja pláta orerejnanie to. Ga que ayorérique iroque ore aja ore icaniratiguéode mu ore irasitigai gajnengóri u Dupade iguíjna cuchábi yui jeta ore chiro aja gaté jne.

⁷ Ga ore eduguéjnai uje i tu Círo uté doi nanique ga chijnime Nabucodonosor casicaite ijnimingone cucha oreránguejna iji Dupade iguíjnai ajei uje ore jno údi aja Babilónia nanique. Uje yojningane u udore uje Nabucodonosor chicháji dangurenone dupa quedéjna iguíjnai nanique, uje Dupápisi gajnecho nanique mu.

⁸ Ga jé u nanique uje ore eduguéjnai Círo tibidi daroguipísi nanique uje uté añerápisi ore iplátadie nanique ga chajire yúode gatuaque. Ga Círo iroguipísi uté i tu Mitrídates. Enga Círo chojningame daroguipísi: "Be ga asecãru Dupápisi gajnéone cucha oreránguejna udore, ga amate ga asi ome judíode ore eduguéjnai uje i tu Sesbasar enga a chijnongapója daniri uté rĩ.

^9-10 Jé u uje eduguéjnai uté iroguipísi Mitrídates doi ga chisecãru deduguéjnai ojningane cucha udore uje ore eduguéjnai Nabucodonosor jno udore údi aja uraque daniri nanique. Ga udore batigade u udojo: pagapíode uje pipesute iji órodie chise 30 nanique; pagapíode uje ore pésu iji pláta chise 1.000 nanique; queséode chise 29 nanique; bajodíe uje pipesudéji óro chise 30; bajo uñanie uje ore enochade cãra rome ñane uje pipesudei iji pláta chise 410 nanique; uje cuchade uñane dépoji to rĩ uje Dupade gajnecho udore to enga eduguéjnai iroi chimáta cuchade udore aja ñane ga batigai chise 1.000.

¹¹ Uje cháta Dupade gajnéone cucha batigade aja ñane uje pipesucho iji óro, plátapise ore enga chise 5.400 nanique. Ga jé u uje Mitrídates uté chisi ome judíode ore eduguéjnai Sesbasar jetiga chijnóngaja daniri te rĩ, ujetiga nóna darasade ore aja Jerusalén, uje pérsiagosode eduguéjnai Círo juéga doi eti ore chajniápo aja daniri casica rĩ.