Efésios 6 - Dupade Uruode

Páblo cho quique disiode jé aja ore dayode ome pijmapié ueradedie quigode iji ore úringane Dupade jogasúo

¹ Disiode uaque á, uacajneque yuruode udojo: Uje e Jesucrísto gajneque uaque ga beyoi enga angachopísi uacayode udore ore, uje pijmapié ueradé uaté ujetiga apésorásu.

^2-3 ¡Pijoque uje Dupade cho cuchadatei iji disiode uacajnepídi uté ome uacayode arĩa! Iji uté áyipie pirosobádedie udire ujade jnese, ga bajé Dupade áyipie pirosobádedie uña udaque uje uté chujé dachagájade daru omío aja gai ujetiga ore doi quigode, uje chósi te: "O cuchadatéji bayé, baté ore jnese; enga a yipésu jne ga uerate cuchade quigode ome ua, ga a bacuecaringuei umare jne iji erámi tudé."

⁴ Enga e yibasája jnani abechugode uacajnepídode cucha iji de ome uacabode to: Ga yutṍri uaque ujetiga jé ca ajnicho uacabode ore ájningai ome uacáringárique josipíerãque go; e mu ajusópise uacasocade guio ome ore uje uacapéso ore aja gaté. Acachopise ore ga uacaquĩraquéode, uacoquigode cucha udore jnese ome ore chajnárase Yocangarádejnai Jesucrísto jmapiedie iji jnumone.

Páblo cho quique ayoré pisagode udore ore, jé aja ore gajnesõre jnutiminórone, ga jnusina ore gajnepídode ome ñane iji dáringane Crísto gajnecho

⁵ Ome ayoré pisagode uaque ga yutoquéode cuse to, jecute yósi tome uaque: Beyoi ga angachopísi uacajnesórone udore uje ore cho dajnéngu uáguiji erámi tudé. Atodóyo ore ome ore úringane uacajnesóño, ga oyo cuchadatéji ore. Enga jé ca paringaquérique chimere riji uacasocade ome ore gotique. Mu ome uacáyipie urenie udire ga ejnáño uágaja uacajnéone ore iroquéo; chamáñaje uacadi uté ome ore a jé cunguésõrirási uacangoninguite guesáringai ome Crísto uté.

⁶ Uacamóño uje ayoré pisagode uñane chisapise dejode, mu gusu ujetiga ore gajnesõre jnutiminórone udore dépisi ore ejode enga chajire ore iji datrabajádi gai. ¡Enga qui tu gu uje ayoré pisagode udore jnátupúsu dáringáringo pisígai bisideque ome dajnesórone dojo ayoré udore! Mu jé ca aracho ore aja ore jmapié gajnarengue uaté, yujode Dupade anguresõre uaque á. E mu ome uacáringane Crísto isacho ga jecucha ejnáño uacaguesi ome uacasagode cucha jnese uje uacajnesórone ayoréo chiroque uágaja. Chamáñaje Dupade ajequigode jé upúsu udore ome uaque gu.

⁷ Jecute ójiyoi gaté uje uacabeyoi ore iroquéode udore enga anínaño uágaja to. Chamáñaje que eduyo apéso uacatrabajádode ome uacojode ayoré udore gotique; e mu uacasagode gajnengóripísi tu Yocangarádejnai Jesucrísto uté.

⁸ Enga e pijógome uaque ujetiga gosi gajnesõre jnutiminóri cuse ome dáringai pisaque, jeoga ca pisaque gosi marínga, Yocangarádejnai a cho oré udore ore jnese jne uje ore ipesudode cucha ueracho.

⁹ Enga e yuruode quisórone u ayoré pisagode gajnesórone uaque to á: Ga uacáyipiedie quigode a jé chorase uacasagode ayoré udore jmapié ueradé uaté to, ujetiga jecucha ajuso ore guio gatuaque. Jé ca ajmongachója ore gotique ome uacadojnóngamátigade. E mu ajnusináñorása uje uacajnesṍri cuse jnese iji gaté. ¡Ga uacajnesṍri jé upúsu uacaroque bisidégode gajnesṍri uté to, enga Yocangarádejnai Crísto u! Jé ũré uje uté que cãra dasocárique ome uaque gotique, mu jmapié jé chojmara iji jnumi ome ayoré gajnesórone, ayoré pisagode uaque jnese.

Uje e idógosi Páblo urusarane cárta eruei ome éfesogosode, enga e chatata Dupade anguretasórone isocai ujetiga ore doi pocaningai ome Satanás Iji uté urusarane udojo eruei yui, ga Páblo chacãra Dupade anguretasónique aja soldátique iji éfesogosode ore uniri, uje soldádi uté doi dajocaningai enga chijna deduguéjnai gajnéone cõráchaque jeta dimane ome damajósoningo ore yui.

¹⁰ Yujode Dupade jogasúo uaque á, ome uacajnéone yurusãracho udojo ga cási yujé yu aja guesi gáyode. Enga yujnusinamánone cucha u udojo iji yuru erueminórone ome uaque: Jé ca acadíchoi uje uacajnesṍri tupúsu Yocangarádejnai Jesucrísto, uje Ujopíerãque Cuchape uté. Jecute beyoi ga jecucha ajuécho ujetiga uté pésu uacáringane uajácho iji gaté ome cutejma dajopiédaté, detotiguei ore gatuaque.

¹¹ Pijoque gu uje jecucha dimane uacamajósõri Satanás gatuaque ujetiga chijna uágaja daringaqué gajnéone cucha ome dajosipiedie udire. Jecute ajmacho uacajnéone cõráchaque jnese aja uaque uje Dupade gueranome uaque, ujetiga jĩraque dimane uágome cucha dacate gajnarétique yui enga a pãrécho uágome Satanás josipiedie udire. Enga a jé uacajogate uacáringane uajádiji gaté jne ome uacasocai uté.

¹² Uacamóño arĩa uje yugúcoji yocajnei pocaninga gai; mu que qui tu go ujetiga yicoi pocaningai ome yocujode erámi unirísoño ore uje ore pijógome dao ayorei uté. E mu pimojma yocacháidode udore ore. Chamáñaje Satanás u, jé aja uté utocaite ponáyone jnese iji gaté yui, uje udore etotiguei basíji ñane yúode. Enga qui jé u uje yicoi pocaningai ome pujopié gajnarengue uásejnanie udire, jé aja ore asutedie. Ga yoquijocaningai gajnetodie jé upo pujopié gajnarénguenie rĩ uje udire cho dajnéngu ijnangununie jogadi udé erãpe jnese ome dáringanie josipíerẽi. Jé basa ga yicopoi yoquijocaningai ome pujopié noñánguenie udire jnese rĩ uje ore ijocayaque cuchade iji gaté yui.

¹³ Obiréjna uje iquiñiringuetaque Satanás, utocaite ponáyone ore isocade udore arĩa. Jecute yigotape yuruode ucode ome uaque: Jé idé ga asayo ¡saque! Dupade gueranone cõráchaque jnese ome uacáringane pãrécho. Satanás a chachẽre uaque iji dire gajnarétique jne arĩa, jecute a jecucha dimánerase uágome yui gatuaque. Ome uacasocai uté ga a jé ca toguírasome Satanás jeta chijnime uacãrírique jne. Que gusu ujetiga uté ca chose uaque, mu a ayáñome uté jne. ¡A amácho uacajnei pocaninga ome uté jnese aja guesi, mu a jé ate uje uacadotáyo uáguiji uacayáguesiringai uté jne!

¹⁴ Jé ũré uje Satanás, ujodie pujopié gajnarénguei jocaningai jé gajmaque uaque arĩa. ¡Jecute ayágueyo jmame, enga adotáyopísa uáguiji uacayáguesiringai jé idé ome uté yui! Cucha bajai tu ujetiga oyo uacagarubu cucha uréone, ¡enga agachopúsu udore aja uaque! Uje e uacadotáyo uáguiji cucha uréone iji uacajépisi, enga dimánerase uágome Satanás yui ujetiga uté chachẽre uaque. Enga yacãra uacasocai uté aja soldátique uje chigarupúsu dapajei ome dagarubi uté; chamáñaje pésu re ome dagaidi pocaninga uté yui gu. Enga oyópo uacãrésorone guebecho iji pate ujñapetade rĩ ome uacaróbedie úringanie parénguei. Qui tu arĩa uje e uacajuso uacáringane ayoré ujñapetácho guio iji Dupade edominone, ¡uje uté upúsu uje pésu yocúringane ujñapetácho ome uyoque gu! Ujetiga Satanás chachẽ́rirase uaque marínga, a jé ca uté õráchatique chacárasaja uaque, ome uacáringane pãrécho udore. Adi tu soldátique uje chigui daguidé uaté uje pipesudéji guebéode, jecute a ca umajosórone õrachade chacája uté ome arobé úringa parengue.

¹⁵ Enga oyópo uacachiete uajádode iji Pujnomé Ueradi quigode to rĩ; chamáñaje Dupade, uacajesereringai ome ñane ero tu gu. Enga qui tu uje e uacajóyopise uágaja uaquero uajade uaté, enga e que toc ujetiga pucuayaque uágaja jnutique. Enga yacãra uacasocai uté aja soldátique uje e chuchíe dachiete uajádode udore ome dagaidi pocaninga yui; enga jé u uje etóguiji gaté ome dacháidode damajósõre udore, ga que guípieraque cho caru gotique.

¹⁶ Uje e uacasayo Dupade gueranone cõráchaque ucode jnese, mu yutṍri uaque jetiga jé asayópo uñai gaté rĩ. Enga yojningai u guebeque uejátique uje pichajaque iji soldátique õrachade uñane iquei jnese ome soldádi uté úringai parenguipise. Querújna oidi uté ga irágu uté gosi yui jnese. ¡Adójnacho uje uacanguretigai gajnui tupúsu guebeque uejai uté, yijorane uaque á! Ujetiga jecucha ajnáño guebei uté gatuaque ga imoi tu uje gusu uacanguretáyo Crísto uté yui ome uaque iji uacajnéone cucha dacacho jnese. Ujetiga pichoguírase uágome sijnanguipísi Satanás uté ojo ditaguedie udire, mu a pajnique udire ¡sere! ome uacanguretigai uté.

¹⁷ Enga Dupade gueranone cõráchaque uñai qué déji to ujetiga asayópo to rĩ, enga uacatarode gãrésõri u. Enga uacáringane piquetacho jé upúsu uacatarode gãrésõri uté. Jecute ome uacasocai uté uje e uacadotáyo uáguiji uacáringane piquetacho ome Dupade, enga yacãra uágaja soldátique uje chimate daquetangóri guebégaja datoi, uje chãraque dataroi gu; enga que todópo dejórique rĩ iji dagaidi pocaninga uté jmainie. Ga cuchadatei tu uacõráchaque uñai to, ujetiga ajnáño to. Enga Dupade Ujopié Espíritu Sánto gueranone Dupade urúo u. A jecucha dimánerase uaque gatuaque ujetiga achome Dupade Uruode udore iji uacajnéone pocaninga ome Satanás. Chamáñaje Dupade Uruode udore gajnui tu quesérique iji uacajmainie ujetiga acásoi uté.

¹⁸ Uje uacagúsoji uacajnéone cucha dacate udojo gai jnese, mu jé ca acadíchoi ujetiga jecucha acatecãchoi Dupade, jé iji dirode jnese gatuaque. Ujetiga Dupade Ujopié Espíritu Sánto chijocase uacáyipiedie, enga jĩraque atatayo uacáyuguhebátigade cucha jnese ome Dupade, jé aja uacajei jochaquéode cucha ponáyo udore jnese to rĩ. Uje cuchade udore déji uacáyipiedie ga ãrijínaño uaquejode gatuaque, enga jé ca abéroyo uágome uacacatecãraitigade udore ome Dupade. ¡Enga jé ca ayáyo uacangoroné ome yui ujetiga Dupade chátaja uaque! Mu que gusúrasu ujetiga ajóchayo uté ajei údi ome uaque arĩa; mu jecucha atáyoi uté ome uacojode Dupade anguretasóño uñane jnese gatuaque to rĩ.

¹⁹ ¡Enga jecucha ajóchayo Dupade ajei údi ome yu gatuaque to á! Yipotigátedatéi tu jeta piotiguérique dérasi yu ome Crísto uté ujnomei úringai pute, ga Dupade uté chimanirase yuru quigode aja yibijnani ome Dajopié uaté. Yajéode upúsu ujetiga picasitigai déji yu uje yichapísa Dupade uté áyipie pipoguiede cásidicáite aja guesáringai enga choquípisirásiji guesi ome yangarásorone udore jnese.

²⁰ Yujnusiname uaque uje yugúsi yúringai pujurúgai iji de, enga gose Pujnomé Ueradi quigode. Chamáñaje yo yiba yatatagode udore, ome yúringai Jesucrísto utocaite. Jecute cuchadaté ome yu ujetiga acatecãchoi Dupade ome yu, jeta jé ca yagutúrasu yu ome yúringai dara iji de, uje yajnepídi jé u gu ome Yutocaisṍri uté.

Uje Páblo dépisi darusarane cárta eruei yui ome éfesogosode udore, ga noñome darasitigade iji ore gari; enga chijócha Dupade ajei údi ome ore

²¹ Yiraja uje a apótayo arajáyo yujnomei, yisocade ore jnese, yijorane uaque á. Jecute e yutṍri yoquijnoránguipísi Tíquico uté, yocujoi Yocangarádejnai Jesucrísto anguresõre, ujetiga uté chatata yajnéone cucha dacate tocachucho udojo jnese ome uaque ujetiga chise uaque jne. Ueradípise Tíquico uté jmapié, uje ũrepise uté ome dajnéone Yocangarádejnai iroquéo jnese.

²² Jecute uté upúsu uje yirógaja uaque, jeta arajáyo yaríjogosórone, yoquisocade iji udé. Enga Tíquico ojñane udore a chiborátaja ujetiga ajnusoi uágome cuchade.

²³ ¡Yipésupú ga Yocai Dupade, Yocangarádejnai Jesucrísto ore chisíome derani uté pajesereringa ome uaque jnese, ome uacáringane Dupade anguresóño, jõ! Ga yajéode upo rĩ ujetiga ore pésu ga uacajnoraquéode ome ñane jecucha chajnerame re gatuaque, jé aja ujetiga uacanguretigai iji Crísto quérã, quérã gaté.

²⁴ Ga ¡yipésupú ga Dupade uté chingongara dacaniratiguei aja Yocangarádejnai Jesucrísto ijnorasórone udore jnese uje que ore ijnoraquei eruénique cuse ome uté, jõ!