Efésios 5 - Dupade Uruode

Yocajnepídi u ujetiga yiracopise Dupade aja adode jnese

¹ E uacapáñañoji Dupade icaniratiguédatéi uté uje chĩropise uacasijnaringuéone jnese enga pésu uacáringane icha ome uaque uje jé cunguésõri uté, yijorane uaque á. Pijoguipise uté ijnoraquei ome uaque to uje cho dape dedójnaripísode iji uaque. ¡Jecute jé tiógarapísa ujetiga arachopise Uacai Dupade uté aja jmapiedie jnese!

² Jecucha ga uacajnoraquei ome uacojode ayoréo choquípisirásiji guesi dirode jnese iji uacacuecaringuei udé. Ga ajnañórase Jesucrísto jmapié uaté iji jnumone uje chingongara dajnoraquei aja yoque. Uté tẽra re iji yoquiyaridi ujetiga yico yocúringane piquetaque. Enga gajnua tu áyasa pẽrapaidé uje piboré ome Dupade ga ai uneripísome uté uje chojare ai. Enga qui tu uje Dupade chimesẽripise Crísto úringai pẽrapaite ome yoquisijnaringuéone úringane pĩrocho.

³ Jecute ome uacáringane Dupade gajnecho, enga jé ca uñeque iji uacajade chachiápo re rĩ iji punganinga quedéjnarique. Jeoga pajegátigai gose gajnetígo cucha ponáyo udore, mu ca acunguésõriñoi udore uñeque to. Enga jé ca achacho uacáyipiedie aja cucha unejátique ome uacatãrarachúringai uté. ¡Uacamóño uje cuchade ucode jnese edo tu uacapotigué ayoréode, enga jecucha uaquerángate udore nanique; mu ca ẽ́cachopo cucha noñángone udore jnese gotique rĩ! Pijoque gu uje pisoca gajnaréngone udore que tiógara uacáringane Dupade urása ujñapetácho gotique.

⁴ Ga jé chopome uacaruode jnese rĩ uje tṍraji uacabijnanone, ujetiga ajusópise udore guio. Uacamóño uje puruode déji uje chiborátaja pajegátigai, uje udore qui tu pipotigué ayoréode. Poritaguipíso udore arĩa, ga ca achayo udore aja uacaruode ujetiga acatecãchoi ñane. Enga a jé chopome puruode uñane rĩ uje udore garani u pitáyipietigade; uje que cucha onique tṍraji puru bisidégode udore, ga jé ca acatecãchoi ñane ome udore to. Ga yutṍrapoi uaque rĩ jetiga jé ca amecho pujñiequé noñángone iji uacaruode gotique to; chamáñaje cuchade udore jnese que cunguésõri uacáringane icha ome Dupade go. ¡Mu omitigai tupúsurásu ujetiga beyoi ga achome uacaru omone ga acãcho Dupade gai ome cuchade jnese gatuaque!

⁵ Yipota jetiga adójnachopísa yuruode udojo, ¡uje que potigayaquérique déji udore ome úringane ũréo arĩa! Ujetiga gosi u, jeoga goto u, uje chachia re iji punganinga quedéjnarique, mu a jé ca pibi Crísto, Dupade ore úringane eduguéjna cuchape jogadi uté jne ome udore uñeque. Ga a jé chopome gosi, goto ore rĩ uje ore chejna raja dapotigué ayoréode adode, uje pajegátigai gose cuchade udore múñi. Ga a jé chuságaja udore ore rĩ uje ore jnaripísi cuchade ome re. Jé ũré uje Crísto, Dupade ore úringane eduguéjna cuchape jogadi puyáguipísome udore ore jnese to. (Adójnacho to uje ayoré tãrarachugode chopise dupa quedéjnane icotasórone iji Dupade edominone. Chamáñaje ore chicha Dupa Ũrei uté aja ti yui gu; jé basa ga ore cho dadupáji dapotigué ayoréode gajnéone cucha.) ¡Que toc ujetiga udore uñeque chorase dajnéngu Dupade gueranone cucha omío gotique uje uté e ichagája dabode ore yui icaite!

⁶ Yijorane uaque á, a uñane pota chãra uágome cuchade udojo, uje chiese ga ca puyaque pisijnaringuéiso udore ome Dupade. ¡Mu jé ca oyo ũréji ore aringaqué bisidégode udore! Ore gaidi tu ujetiga ore chorei uáguiji quedéjnarique ome Dupade gu. Mu que potigayaquérique déji uje Dupade ájningadatéi a tocade jne ome udore ore uje ore pésu cucha gajnaréngone udore.

⁷ Jecute jé ca beyoi udore ore uruode enga ca átayo uágaja ore to.

⁸ Uacamóño gu uje ijnangununie jongosõre uaque to nanique; mu uje uacatojmárañoji Yocangarádejnai uté, ga e uacagúsoi dírecaringuéi ajei iji deréjnane udojo. Jecute beyórasi enga apijócho ome uacáringane dírecaringué jongosóño.

⁹ (Adójnachopísa ujetiga ayoréode ore déji dírecaringuéi ajei, enga chiborátarásaja ujetiga cucha ueradode, cucha uréone, cucha ujñapetade udore jnese choqui guesi iji ore adode gatuaque.)

¹⁰ Jecute etingacho ujetiga arajáyo Yocangarádejnai imeserane cucha ome uaque enga beyoi udore quigode.

¹¹ Enga ca amecho uáguiji ijnangununie jongosórone ore ipesudode cucha bisidécho udore gotique. ¡Que cucha onique tṍraji udore arĩa! Jé basa ga beyoi uacate arégode ome uacáringane dírecaringué jongosóño. Ga uacasocai uté a pésu jeta ore ipesudode cucha bisidécho udore choqui guesi ome dáringane gajnarécho.

¹² Uacamóño gu uje pajegátigai gose ijnangununie jongosórone ore ipoguiédode dacho udore, jecute yajéjome ujetiga yĩ́caco udore.

¹³ Mu dírecaringuéi chome ibiotique uje chijñate ijnangununie gajnéone cucha gáyode, ga díreca enga quene pijoque udore adipísode jnese.

¹⁴ Chamáñaje dírecaringuéi isocai jé u gu. Ujetiga pecãraque cuchárique aja dírecaringuéi enga e que dépoji ijnangununie rĩ ome dáringai pipoguiete. Jecute ijnangununie jongosórone isocai uté jé cunguésõri purusãrasórone uñai urusarane, uje chósi te: "Mocucha chá, ¡ãriji iji bamoi! ¡Ãriji iji báringai toque uté quigade é! Enga Crísto a chijñate babai ome dadírecaringuéi."

Yocajnepídi u ujetiga yujucópise yocadode guio iji yocucuecaringuei udé jnese

¹⁵ Obiréjna uje cuchadaté uacáringane dírecaringué jongosóño, yijorane uaque á. Jecute ajusópise uacadode guio iji uacacuecaringuei udé jnese. Jé ca beyoi áyipie eyúgode udore isocade gotique, uje payuquetotiguei chonapísa ore; e mu beyoi ga jecucha ajnáño payuquetotiguei quigode iji jnumone gatuaque.

¹⁶ Enga jĩraque ejnáño uágaja cucha arégode úringane pipesucho uje qué piotiguei déji ome uaque. Enga cuchiyíode u deréjnane udojo; chamáñaje cucha gajnaréngone piéjna erámi udé jnese gu.

¹⁷ Jecute yigota yuruode iji jnumi ome uaque: Jé ca aracho táyipiegode udore aja ore itáyipietigade gotique. Mu etingacho ujetiga arajáyo Yocangarádejnai ajequigode ome uaque enga eduyo udore quigode.

¹⁸ Jé ca ũruso uágome vínoi, yote pioque ponáyone udore jnese, yijorane uaque á. Chamáñaje yote pioi yugode ijocayato tu dajodé uaté, enga ore ũrusoringuéone chiborátaja pisoca noñaque ponáyone jnese uje pajegátigai gose pisocade udore. Jé basa ga eduyo ajuécho uágome Dupade Ujopié Espíritu Sánto uaté, ujetiga uaté u uje chĩreta uacáyipiedie ome dajequigode cucha enga chijocase uaque gatuaque.

¹⁹ Beyoi to enga ejnáño uágaja uacacotaquéode ome Yocangarádejnai, enga beyoi ga ajnusoi uágome uñane iji Dupade adode uje uacaracho uté iradedie jé aja Sálmonie; ga ajnicho uacaradedie jeta unerepísei udire to ome Dupade.

²⁰ Enga jecucha ga asíyo Yocai Dupade uté gai ome cuchade jnese gatuaque. Ga ajnusináño uté gajnéone uacacotaquéo udore jnese ome Yocangarádejnai Jesucrísto i; chamáñaje Jesucrísto adode u uje pésu ga guesája uté yui ome uaque.

Ome yocúringa Crísto iglésia uaté, ga Páblo cho yoquiquique jeta yoquisocade cunguésõri yoquirósõri Crísto jmapiedie

²¹ Yujode Dupade anguresõre uaque á, ome uacáringane pajnotácho ome ñane ga oyo bajágu uacajorane ore ome cuchade. Ujetiga angachopísi ñane ga qui jé upúsu uje uacangáchoi uacarósõri Crísto uté.

Páblo cho amanachuguedie, acotẽrachugode ore quique ome dáringane pijogasúo, uje ore gajnepídode ome ñane gajnui tu Crísto isocai ome da-iglésia uaté

²² Chequé amanachuguedie uaque á, yuruode gajnetodie u uáguiji udé. Ga yutṍri uaque ujetiga angachopísi uacabayode. Adi jé u uje uacangáchoi Yocangarádejnai uté.

²³ Chamáñaje jnani acotẽrachui uté gajnui tu dacoté gatoi, ome uté úringai uaté eduguéjna. Enga jé cunguésõri Crísto adi ome da-iglésia uyoque to uje yoco yocatoi iji uté ome uté úringai yoquijocayasõre; jé basa ga uté cho daóji da-iglésia uyoque, ome dáringai Yoquiquetasõre.

²⁴ Jecute ome Crísto iglésia uaté jmapié uje cho bajágu Crísto ga juéga re ome uté áyipie quigode jnese ome re, enga chequé amanachugué chojmara, chojmaranie jnese gajnepídi jé u to ujetiga juéga re ome dabai áyipie quigode cucha udore jnese gatuaque. ¡Apéso cuchade udojo gu uje uacoyo uacangaránone iji uacabayode udore; enga qui jé u to uje uacoyo cuchadatépise iji Crísto uté to, ome uté úringai uacajnesõre!

²⁵ Enga e yibasája uacajnepídode cucha to iji udé, jnani acotẽrachugode uaque á: Jnani acotẽrachuque chojmara, chojmarane gajneque jeta chingongarapísa dajnoraquei aja dacoté uaté. Jecute uacaradi turásu Crísto uté aja jmapiedie ome da-iglésia uaté, jnani acotẽrachugode uaque á. ¡Adójnachopísa Crísto isocai uté uje chingongara dajnoraquédatéi aja da-iglésia uaté, enga jé chuságaja uje uté tẽra re ome uaté!

^26-27 Enga Crísto uté tẽra re gu uje gaidi tu ujetiga cho dajnéngu da-iglésia uaté ome úringa puyé. Enga jé u uje pésu da-iglésia uaté úringa icha ome daru piquetangórone, ga cho ujetiga purugué uaté ome yotique enga que iguínique cusapo rĩ. Jé ũrepise arĩa uje Dupade anguresórone uyoque u Crísto iglésia uaté, enga yocajnua tu gapua uje gajmai cuse; enga qui tu uje Crísto chacãra da-iglésia uyoque aja dacoté uaté. Uté potapísa ujetiga chijna yógaja re ome yocomitígajnai - iji yocúringane ujñapetácho, yocúringane ueradéjna ore jnese jne. Jecute uté jé upúsu uje pésu yocúringane ichápise, jeta jé ca yoquiguínique cuse, jeoga yocaode cacója, jeoga yoquiyoguérique cucha uñeque cuse iji uté iquei. Ome uté isocai ome yoque ga a quene yipijójome yocúringa Crísto iglésia ingoningarẽ́. ¡Enga a quene dimane yógome uté, enga gusu uté ome yoque jne!

²⁸ ¡Urénga, Crísto ijnoraquédatéi ome da-iglésia uaté choquípisiji guesi ome yoque, jõ! Enga Crísto adi uté ome da-iglésia jé cunguésõripísi jnani acotẽrachui gajnepídi ome dacoté, ujetiga uté chijnorapise uaté. Jé ũré uje uté ijnoraquei ome uaté a jé chopísirase dajnoraquei ome daópisi. Pijoque gu ujetiga gosi chijnóra dacoté, enga qui tu uje uté ijnoraquei gajnesóri jé u re to.

^29-30 ¡Uacamóño arĩa uje que uñeque déji erã́tique uje chetaque dabai ayoré petígo go! E mu jecucha ayorérique ucuei tupúsu daquetangónique cucha jnese iji dacuecaringuei udé, uje que chuseque dao ayorei gu. Enga pisocai uté jé cunguésõri Crísto adi ome da-iglésia uyoque to, uje yocajnui tu pao chojmarai ome yocúringa uté iglésia. Uté chijnorapise daoi uyoque to, enga que chuseque yoque.

³¹ Adójnachopísa uje yuruode ucode ome acotẽrachugode, amanachuguedie ore jé cunguésõri Dupade uru cásodicáite to, uje chósi te: "Jecute jnani a noñome dayé, daté ore jne, enga a cháta raja dacoté; enga ayoré gárode udore a gajnui tu ayoré chojmarai iji jnumi jne."

³² Yijorane uaque á, cucha ibiraque Dupade uruode udojo quigode arĩa, uje cho cucha pipoguiédode, mu ũréo. Enga ueradipíso udore quigode ome yoque to. Mu ome yajéode ga puruode udojo chichaga raja Crísto isocai ome da-iglésia.

³³ E mu puruode udojo que chedu Crísto adode ome da-iglésia gotique. Quisórone jé u uaque to arĩa. Jecute jnani acotẽrachuque chojmara, chojmarane iji uacajade gajnei tu ujetiga chijnóra dacoté, enga ijnoraquei ome uaté a jé cunguésõrirási dajnoraquei ome re. Jé basa ga chequé amanachugué chojmara, chojmaranie gajnei tu ujetiga cho dangaráni iji dabai uté.