Efésios 4 - Dupade Uruode

Jé ũrepise uje Crísto, yitojmárangoji ñane ome yocao chojmarai uté, jecute yocajnepídi tu ujetiga yujucópise yocadode guio ome yocúringa Dupade iglésia

¹ Yijorane uaque á, adójnachopísa uje yugúsi pujurúgayode jogadi; mu qui tupúsu uje Yocangáradejnai Jesucrísto ajéode jé u ome yu gu. Jé ũré uje yo yiba yajnéone Dupade iroquéo iji de arĩa, mu cucha dacadode udojo jé chiborátaja uje Dupade uté ajequigode úringane omejnapíso e choquípisiji guesi ome uaque. ¡Cuchadatépise uje Dupade inejénamáte uágaja uacáringane uté gajnecho, enga gose Jesucrísto adode ome uaque! Jecute yijóchapise uacajéode údi ujetiga atióchopísa uacáringane pibijnángaichó ome uté iji uacacuecaringuei udé jnese.

² Iji cucha dacadode jnese ga jé ca oyo ayorédaté iji uaque, mu jecucha ga ajosoi uáguiji jnumi ujetiga apajnotáyoja ome ñane. Enga jé ca ajuécho jetiga uacojode Dupade anguresóño adode chijnime uacãrírique; jé basa ga aramuráso udore iji uacáyipiedie ga anejécho ñane údode gatuaque. Ome uacajmapié uaté ga uacajnoraquéode a jé choquípisirásiji guesi ome ñane.

³ Uacamóño uje cuchadaté Dupade Ujopié Espíritu Sánto guerani uté uje pésu ga yitojmárangoji jnumi. Jecute beyoi ga ejnáñopise uágaja ujetiga ajusópise ñane guio. ¡Jé ca ajuécho ujetiga cuchárique chajuque uáguiji ñane! Enga uaquedugádi turásu pajesereringai uté ujetiga déji uágome ñane gatuaque; chamáñaje uacajesereringai ome ñane gajnui tu ducaritique ujetiga pigarique uágaja ñane ome uté.

⁴ Ajnusináño uje Jesús anguresõre ponáyone jnese ga yocaoi chojmarápisiji jnumi ome yocúringa Dupade iglésia. Enga yocaríjogoto Dupade Ujopié Espíritu Sánto uaté jé chojmarápo to rĩ. Ome pisoca chojmarai uté uje uacatojmárañoji ñane, jé aja uje Dupade Ujopié duga uaté charite uacajéode jnese, enga uacadi jé upúsu to uje uacarodi cucha chojmarápisiji jnumi ome uacáringane pibijnángaichó ome uté. Enga qui tu uje uacajnátuyo yui ujetiga oyo uacajnéngu uacarodi cucha uté uje Dupade jé ajegaite uágome gu.

⁵ Isocai jé upo to rĩ uje chojmarápise Yocangarádejnai, ga yocanguretigai iji uté qui jé chojmarápo to rĩ; enga jé chopome yoquipijogúsõri bautísmo uté rĩ, uje qui jé chojmara to. Uje pacaque yoquedodie iji yodi uté ga yipijójome uje yitojmárangopísiji Yocangarádejna chojmarai uté.

⁶ Adójnachopó rĩ uje chojmarápise Dupade iji jnumi, enga Yocai jé upúsu uté jnese. Uté jé upúsu uje déji darasade yoquibáyode jnese ome dáringai Yoquijocayasõre. Ga angúroméone jé upo uyoque jnese rĩ ujetiga yipéjo uté áyipiedie quigode. Jé upo rĩ uje Dupa dugai uté dépisi yocajéode jnese.

Yocangarádejnai Jesucrísto uté gueranone pirajatíga ome da-iglésia uyoque jé aja yoquisagode cucha udore ome uté chayúji ñane yúode

⁷ Jé ũrepise uje chojmarápise yóguiji jnumi jnese ome yocúringane Jesucrísto gajnecho. Mu Crísto u uje doi dajéode ome ayoré chojmara, chojmarane uyoque jnese, ga guẽrate yocajnéone pirajatíga ome yoque uje cãrápisa re ome ñane jnese. Gaidi tu gu ujetiga yinguírango uté gueranone pirajatíga udore aja yocajnetígo uté iroquéo, uje cucha pisagode udore jnese cãrápisa re ome ñane to. Enga uté u uje pésu ga jé yoco yocajnéone pirajatíga udore ome dacaniratiguei uté, enga qui tu ujetiga yicoi uté ajequigode ome cuchade jnese.

⁸ Ga adójnacho uje Crísto isocai uté uje chisíome deranone ome yoque jé cunguésõri purusãrasõre uñai urusarane iji Dupade uru cásodicáite udore, uje chósi te: "Uje uté suépise damajosórone ore gáyode ga jé u uje jnome gaté yui, mu chiroque dajurúgayode damajósoño udore aja daquigade jnese ome dáringai ore jnuéngaisṍre. Ga quene jogadi u uje uté chisíome dẽrate ueradode ome dajnorasórone ore."

⁹ (Adójnacho Dupade uru cásodicáite udore uje chojninga: "uté e jnome gaté yui." ¿Ama uruode udore quitiguirase a? ¿Ama jé ca qui turásu a, uje chisírase jnumi bajaque a? Crísto chisípise jnumi udé bajaque to arĩa, uje Dupade uruode udore qui tu uje uté tṍraji jnaropié ome gaté.

¹⁰ Jecute e pijoque uje Dupade uru cásodicáite udore chichagápisa raja Dupade Júdebei Piquetangore Crísto uté uje chise jnumi nanique. Uté jé upúsu uje chicáji jogadi uté uje idájapísiji jnumi ga chãrajápisaja gaté, gatajnoquei ore jnese. ¡Enga chĩretápise pijogadode jnese ome cutejma dajopiédaté! ¡Jé qui tu uje pimanique cuchade jnese aja dáringane ujñapetácho ome Crísto uté úringai Pijocayasõre!)

Crísto gueranone cucha ome da-iglésia jé chuságaja peduguéjnane udore iji yocuáguedie to

¹¹ Ome Crísto uté úringai Cuchade Jnese Ijocayasõre, enga pésupúsu dajequigode ome da-iglésia uaté. Ga uté jé upúsu uje guẽrate dajegaidode darócho ome da-iglésia, uje ucuei tu iglésia uaté omitigárique gu. Jecute gueranone uñane u apóstoles, ome ore úringane Dupade iroguipíso. Jé basa ga profétas u uñane, uje ore chatata dajnepídode Dupade urúo. Jé basa ga Pujnomé Ueradi júsorone u uñane, ga ore jno Jesús úringai piquetangore ujnomei údi aja uñane uje cáma ore changureta to. Jé basa ga pastores u uñane, enga ore gajnepídi tu ujetiga ore chañurúpusu dojode Dupade anguresóño guio; jé upo rĩ ujetiga ore chacadipise udore ore. Ga ore isocai uté acãrájane u áyasadie irodisóningo uje susípise darodedie udire guio.

¹² Crísto áyipie quigode ome datocaidode jnanío ucode jnese u ujetiga ore chisa dejode ome dojode Dupade anguresõre uñane jnese. Uje ore átapiode jé urásu udore ujetiga ore chirajapise dasocai ome dajnéone pirajatíga uje Crísto gueranome ore to. Enga Crísto utocaidode udore isocai uté a jé chiborátaja ujetiga dimane átapiode udore jnese ome dajnetígo Dupade iroquéo yui. Ujetiga ore dopísi dajnepídode udore quigode enga pésu iglésia uaté iquéraningai enga a uajate yoque aja gaté jnese ome yocúringai Crísto ao uté.

¹³ Ga pisagode cucha udojo jnese a jé chajnera dádi jne, enga a jé chuságaja ujetiga yitojmárango jnese iji panguretíga chojmarai uté; jé upo rĩ ujetiga yoquirajatigade qui chojmarápisiji jnumi jnese ome Dupade Ujnacari uté. Chamáñaje pisocai uté iborátajai tu yoquiquéraningai gaté, jé aja ujetiga yico yocúringane jnanío ome Dupade, enga a jé chuságaja ujetiga yocópise Crísto ome ujñapetáringai jnese jne.

¹⁴ Ome yocadi uté, enga a jé ca yocópo disi parátagabode rĩ, uje ore áyipie jecucha cho quiyíguiyí ome cuchade; ga ore gajnami su cucátique uje emi dosi ga chungurásosipísiji gaté ome yote quedéjnai uté cutejmanie imeséra udire, enga jno cucábi suté údi aja sona. Adójnacho uje Dupade anguresõre serẽrachugode isocai jé upúsu disiode isocai uté, uje jĩraque dimane ore ome pacajnaqué taque ichade yui. Enga piéjna erámi ome ayoré aringácachoquíode udore uje ore chuquéjnai dojode ayoréo uyoque. Chamáñaje ore gaidi tu gu ujetiga ore chijna yógaja dacajnaqué tágode ome dajosipié uaté. ¡Ore pésupúsu dáyipie quigode ome yocúringárique pucuayaque yui!

¹⁵ A jé ca yocórase udore, yijorane uaque á. Mu cucha arei tu ujetiga yajógo yógaja puru uréone quigode udore uje garani u Dupade, enga jecucha ga yujuco yocuruode udore guio ujetiga yoquijnoraquei pijógome ñane. Ome yoquijmapié uaté ga yoquiquéraningai iji Crísto a jé jno dádi aja gaté jne, jé aja ujetiga yocarorádi cho Crísto ome adode jnese. Uté jé upúsu uje yoco yocatoi iji uté, ome uté úringai yoquijocayasõre.

¹⁶ Enga Crísto uté jé u to uje imataque darasade ore aja ñane jnese, enga jé gajnui tupúsu yocao ayorei, uje yocadode jiei iji yoquibai enga cãra dasocade ome ñane jnese. Mu uje yocadode udore déji ñane jnese, ga jé u uje chojmarápise yocaoi iji jnumi. Ujetiga yocadode udore iji yoquibai déji dajogadode jnese enga pésu dajnepídode isocade jnese, ga jé u uje ijoréjna yoque ga yiquérangopíse enga a yico yocúringai etoque jne. Adi jé u to iji iglésia. Ujetiga pijnoraquei déji Dupade anguresórone uyoque ome ñane jnese, enga yipécopúsu yocajnéone uté iroquéo aja quigode jnese, enga yoquijmapié uaté a jé chiborátaja jne ujetiga Crísto iglésia uaté quérã ga ueradé aja gaté.

Yocajnepídi tu ujetiga yipijójome yocúringane direcaringué jogosóño

¹⁷ Yujode Dupade anguresóño uaque á, yaquĩraquéode cuse ome uáguiji udé uje garani tupúsu Yocangarádejnai. ¡Enga yajo yuja ujetiga angáchopísi yuru quigode udojo, ome yúringai uté utocaite! Jecute yósi tome uaque: Uje e uacagúsoji uacáringane pibijnángaichó ome Dupade uté, enga jé ca ajnerañópo uacajmapié cásidicáite údi rĩ uje uacabeyoi nanique ome uacáringane purása unejácho ome Dupade. Uacamóño uje purása quedéjna guesíminórone udore ore chejnapise dáyipiedie aja cucha bisidégode uje que quitique cuse, ome datáyipietigade udore.

¹⁸ Ga cho ujetiga ore áyipiedie udire tõrapı́siji ijnangununie ajéode, jeta jé ca ore áyipieraque pusi cucha uréone quitique go. Enga gose ore áyipie cusu cusuguedie udire uje pésu ga ore chirajaque Dupade uté; enga gusu ore agúpuraningái uté uje ijocayaque ore. Jecute Dupade guerani pucuecaringué uté chiságui ore; chamáñaje unejaque ore ome uté gu.

¹⁹ ¡Enga chimo jóroque re, uje ore adi uté jé chuságaja uje que ore chajéngopóme cucha noñátique úringárique pipesute gotique rĩ! Enga jé u uje ore juéga re ome dapotigué ayoréode ujetiga cho daróguiji ore. Ore tẽra re ome dapotigué ayoréode gajnéone cucha noñácho jnese enga ore chajmárapúsu dasoca noñaque ponáyone udore. Uje ore chejna daguesi ome dasocade udore marínga, que ore chise dapotigué ayoréode eruénique gotique.

Jé ca yujuéjopo yógome Jesús anguresórojmane irajade cucha gajnareque udore úringárique pipesute rĩ

²⁰ Jé ũrépise uje pajegátigai gose Jesús anguresórojmane isocade: Mu ome uaque, yujode Dupade anguresõre uaque á, e que toque ujetiga arachópo udore ore aja ore jmapié noñánguenie udire rĩ. Chamáñaje que pisocade udore cunguésõripísi pacajnaqué uréone quigode ome Crísto uté gotique.

²¹ A e adúcho uté ujnomé ueradi arĩa, enga pacadique uágome uté jmapié ueradedie uje uacachayo uacanguretigai aja uté. Enga uacajnéone pacajnaquéo udore chajnapise cucha uréone quigode iji jnumone; chamáñaje udore garani tupúsu Jesús uté jnese.

²² Jé ũré uje uacáringai ayoré ipotiguéode cucha u uje chijocase uaque iji uacaquiga cásodicáite. Uacarajade cucha noñácho udore u uje jecucha chãra uágome dapotiguéode udore enga pésu uacáyipiedie gajnarétigade. Mu e pacadique uágome pacajnaqué uréone quigode, uje chósi te ome uaque: achayo uacapotigué ayoréode gajnéone cucha bisidécho udore aja ti yui. ¡Ayáyopúsu udore unerai jnese! Enga gajnui tu ujetiga ejñúño piguidé iguirícojna iji uaque.

²³ Jé basa ga ajuécho uacáyipiedie ome Dupade Ujopié Espíritu Sánto uaté ujetiga chécãre uacáyipiedie udire ga icha gatuaque.

²⁴ Chamáñaje Dupade e pésu uacáringane icha ome uaque jeta jé cunguésõri uté arĩa. Jecute uacajnepídi tu ujetiga aracho uté aja ate ujñapetade, úringai ũré ore jnese, uje Dupade uruode quigode jé u gu. Enga gajnua tu piguidé ichápise ujetiga ajmacho aja uaque.

Yocajnepídi tu ujetiga yichago yoquisoca bajade udore aja ti yui

²⁵ Jecute ome uacáringane icha ome Dupade uté, ga yutṍri uaque jetiga jé ca purupatáringárique cunguésõrapói uaque rĩ. Uje Jesús anguresõre chojmara, chojmarane uaque jnese gajnepídi u gu ujetiga chedu puru uréone ome dojórigo Jesús anguresóño ore jnese. Chamáñaje yitojmárangoji jnumi jnese ome yocao chojmarai uté.

²⁶ Ujetiga ájningarãque uaque, mu ca apéso pisijnaringuéone ga uacájningai noñaji. Jecute ca ejnáño deréjnai tiji uacájningai, mu aquíraño uacájningai uté uje cáma guedé chaca.

²⁷ Ome uacasocai uté ga a ca asíñorásome piotiguérique ome Satanás ujetiga uté tagúome daringaqué gajnéone cucha ome uaque.

²⁸ Ome ayorérique uje oriechoqui ica, mu yutṍri uté ujetiga jé ca toriapo cuchárique rĩ; chamáñaje e déji dáringai icha ome Dupade gu. A tagúome dajmainie ica ujetiga chisa cucha unejaque ponáyone udore, mu jé idé ga a tagúome dajmainie udire ujetiga chisarase dejode ome datrabajate ũré enga pimanique ome dasagode dejo udore. Enga que gusu uté ujetiga chagutíyame datrabajádi oredie udire arĩa, mu a jé chajuguína ayoré jmatágode udore ore to jne.

²⁹ Aquíraño uacabijnanone ome puru dosoque ponáyone jnese ome ñane, yijorane uaque á, uje que cucha onique tõrapísiji udore. Jé basa ga uacajnepídi u ome cucha dacadode jnese ujetiga gusu achome puru ueradode uje chatarásaja gosi uje déji dajnéone cucha dacate jmainie. Ome uacasoca ueradi uté ga a jé chiborátaja ujetiga uacangarásorone udore ore jnese jnusi rome uacaruode. Ga a ore chagutíyame uacaruode udore ome daquéraningai iji Dupade adode jne.

³⁰ Enga ajuso uacaruode, uacadode udore guio jnese, ujetiga ca apéso Dupade Ujopié Espíritu Sánto jnusiétigai to. Ajnusináño gu uje uaté charite uacáyipiedie ajépisode arĩa. Chamáñaje Dupade e ajopie Dajopié uaté aja uaque ome dáringa uacapijogúto. Enga gaidi tu gu ujetiga apijóchome uacáringane uté gajnecho jé aja ajegaitique dire uté uje chimanipise uágaja re ome uacáringane uté abipíso jne.

³¹ Jecute ome uacáringane Dupade gajnecho, ga yutoquéode jé u udojo ome uaque: Ca ajuécho ujetiga petétigade charite uacajéode, uje chopise venéno iji gosi ajei; ga ayáyopúsu uacájningadatéode, uacajei dotáningane ome ñane rĩ. Jé ca anguírañopo uacabijnanone aja ñane ome uacadojnóngamátigade, uacapojnaquéode ome ñane rĩ. Jé upo rĩ ujetiga ca ajnicho ñane iyoguéode, enga ayáyo ujetiga oyo uacarúja ñane ome uacajmangaqué gajnéone uacarúo. ¡Enga a jé chuságaja pisoca noñángone uñane jnese, ujetiga achayo udore aja ti yui jnese!

³² Jé basa ga apajnotáyoja ome ñane jnese, ga osṍcho ñane yúode gatuaque ome uacáyipie pajnotáringai uté. Jĩraque amuráso ñane adode iji jnumi, jeta jé ca uacáyipiedie jnusinápo rĩ. Chamáñaje Dupade adi jé u uté ome uaque nanique, uje chĩro uacasijnaringuéone gu Crísto ate ueradi uté ome uaque, ga que jnusinápo uacadode udore rĩ. Jecute a jé arachórase Dupade uté aja jmapié uaté jnese.