Efésios 3 - Dupade Uruode

Dupade áyipie iyajmenie udire pipoguiédei nanique, mu Dupade e chuchẽri udire iji guesode ome Páblo uté

¹ Jé ũré uje querújnapise Dupade adíso ucode ome purása quedéjnane uaque, yijorane uaque á. Jecute yajei jochaquéode jé u ome uté ujetiga pésu ga adode udore quigode choquípisiji guesi ome uaque. Adójnacho uje jé idé enga yugúsiji pujurúgayode ore jogadi ome yúringai pisaque. Ore cho dasaguíji yu, mu ome Páblo uyu ga yisasṍri tupúsu Jesucrísto. Chamáñaje yo yiba yajnéone uté iroquéo ome yu uje yacate purása quedéjnane uágome uté ujnomé ueradi ujetiga agutíñañome to.

² A e adúcho Dupade isocai uté ome yu jõ uje ichajapite yu aja yajnepite ueradi udé, ga gose icaniratiguédatéi; cho datocaidi iji yu ujetiga yatata pujnomé ueradi uté ome uaque, enga a jé urásu jeta uté icaniratiguei choquípisiji guesi ome uaque to.

³ Enga yatatagode ome uaque qui jé upúsu Dupade áyipie pipoguiédedie udire uje quene yatata quique garósiode ome uaque que iji yurusãráiso ucode. Uacamóño uje que yiraja udire quigode bisideque, mu Dupade uté u uje chijnime dáyipiedie udire ome yu, jecute yiraja quigode to.

⁴ Ujetiga ãrarachója yurusãráiso udore gai ga a pijógome uaque jne yirajatigade iji Dupade ipoguiédedie dáyipiei uje júdi tupúsu Dajúdebei Piquetangore Crísto uté.

⁵ Jé ũré uje páyipie pipoguiédedie udire quigode cáma choquípisiji guesi ome yocáqui cásodicáite iji yoquiquigade nanique. Mu quene Dupade chuchẽ́ripísi dáyipie iyajmenie udire iji guesode ome dedugádode apóstoles, daruode júsorone profétas ore iji deréjnane udojo jeta ore chajnerame ome erámi. Enga Dupade angúrome u Dajopié Espíritu Sánto uje pésu ga quigode e pijógome ore.

⁶ Enga Dupade áyipie pipoguiédedie udire qui jé upúsu udé: ome Pujnomé Ueradi uté quigode ga e purása quedéjnane uaque, judíode yoquipérogai cucha pagutíyabáte eyúgojmane jnese uje Dupade gueranome dabode uyoque. Que gusu uté mu ome judíode, purása quedéjnane uyoque ga Dupade e pésu puague chojmara iji puague gáredie uyoque to, ga yocajnui tu pao chojmarai ome yocúringa uté iglésia. Jõrai tupo rĩ uje Dupade ichagájade darúo jnese ome darasade judíogose nanique ga e chuságaja purása quedéjnane uaque to. ¡Jé yocopise ñane! Ga cucha dacate ueradode udojo jnese chise dáringane tocachucho ome Jesucrísto adode; uje yichago yocanguretigai aja uté, enga jé u uje yitojmárangoji jnumi jnese.

⁷ Yiraja uje que yitiógarapísa yisai udé arĩa, mu Dupade u uje guẽrate yúringai daroque ome yu, ga gose icaniratiguédatéi uté. Tagúome cutejma dajopiédaté, ga chimate yu aja yúringai Pujnomé Ueradi atatasõre.

⁸ ¡Urénga, yitijapísa Dupade isocai uté uje juéga yu ome yúringai datocaite, jõ! Uyu u gu uje yugúsi yujode Dupade anguresõre ore quigade jnese ome yúringamí cucha bisidégape. Mu Dupade pésu yajnepite ueradi udé ome yu ujetiga yacate purása quedéjnane uágome cucha pitijabate oreránguejnane uje déji Crísto jnese. ¡Que toc ujetiga pisecarãte ore, uje que ore eruojmárique erãpe cuse! ¡Ga erámi unirisórone yoquirajatígabi chiságosi cucha pitijabádode udore quigode!

⁹ Yajnepídi jé jno dádi to ujetiga yichapísa Dupade uté áyipie pipoguiede cásidicáite aja guesáringai enga choquípisiji guesi tome ayoré ponáyone jnese, ujetiga ore chirajapise udire quigode to. Cucha pitijabade diyajmé Dupade ipoguiédedie dáyipiei udire ome yoque arĩa. Uje jé jogate aro Cuchade Jnese Ipesusṍri Dupade uté áyipie iji erámone taningárique iquénique nanique.

¹⁰ Adójnacho uje Dupade ajequigode uje pésu cuchade udojo jnese u jetiga chingongara dayuquetotiguéode quique ponáyone jnese aja gaté unirisórone ore uje ore déji dajnepídode iji gatajnoquei, jé aja pujopié uñanie jnese iji gatajnoquei yui. Chamáñaje Dupade ajegaidé aro da-iglésia ujetiga tagúome ga áyipie iyajmenie udire pijoque iji deréjnane udojo. ¡Jecute quene Dupade ayuquetotiguéode quique ponáyone jnese choquípisirásiji guesode ome pujopiedie udire jnese iji gaté!

¹¹ Enga cucha dacate ueradode udojo jnese chajnapise Dupade áyipie iyajmenie quigode iji jnumone. Chamáñaje Dupade angúromei tu Dajúdebei Piquetangore Crísto ome udore úringane pimanicho aja guesode jnese, uje Yocangarádejnai Jesús jé upúsu uté.

¹² Jecute uje Jesucrísto, yitojmárango iji jnumi uje yichago yocanguretigai aja uté, enga jé u uje guesája Dupade yui ome uyoque jé idé. Enga quene jogadi tu uje que yagutúgopo yógome Dupade rĩ ujetiga yibájoi ome yocajegaidode cucha. A jé ca pajegátigárique chãrácapo yógome uté iquei rĩ; chamáñaje juégapísa dei ome yoque ujetiga tangaripísi yocajei jochaquéode ome re gatuaque.

¹³ ¡Uerate uje Dupade juéga dei ome yoque, yujode Dupade anguresõre uaque á! Uté chirajapise dajequigode ome uyoque jnese, jecute yijócha uacajéode údi ujetiga jé ca oyo caru iji yúringai pujuyagaite jmainie. Jé ũré uje yo yiba Pujnomé Ueradi uté quigode uje yajnerame uaque, mu a anínañorásu uaque; chamáñaje e uacagutíyabáite yu ome yacajnaquéode udore. Uje yejnáreque yu iji de marínga, yúringai pujurúgai qui tupúsu ome yu uje yucuei uacomitigárique ome Dupade.

Apóstol Páblo chutápoi Dupade rĩ ome éfesogosode ujetiga doi ga pésu ore iquéraningai iji Dupade adode gaté

¹⁴ Uje yáyipie doi cucha pitijabádode udojo jnese uje déji uyoque uje Jesucrísto, yitojmárangopísiji jnumi, enga jé u uje yichaga yigataidie aja jnumi iji Yocai Dupade uté iquei ujetiga yijócha ajei údi ome uaque.

¹⁵ Jé yoquĩcarai tu "Yocai Dupade" aja uté uje yocãrapi jé upúsu gu. Ga uté cho dajogasúji darasade ore jnese uje ore cho daji uté iji gaté, jnumi ore jnese. ¡E yoquijõra ñane jnese ome yocúringane uté jogasúo!

¹⁶ Uté upúsu uje yijócha ajei údi ujetiga tagúome Dajopié iyiejna ga pésu uacáringane etócho iji uacáyipiedie ajépisode ome garíjogonórone cucha. Chamáñaje cucha pitijabate oreránguejna Dupade garíjogonórone cucha udore jnese, enga que ore eruénique erãpe cuse. Jecute yáyipie qui jé u ujetiga juégame uaque, ga gueranone ome uaque jé péropísiji uté gajnéone cucha pitijabácho udore quigode.

¹⁷ Enga uté isoca ueradi uté a chiborátaja ujetiga Crísto uté cho dayaridébei iji uacáyipiedie ajépisode jne uje uacachayo uacanguretigai aja uté. Enga yicatecã́ri Yocai Dupade ome uaque to ujetiga adotáyo uáguiji pijnoraquei adode iji jnumi, ga acãcho uágaja poria uje erode chicapísiji jnumi; ga uacajnui tupórasu guiguíjna poratique rĩ uje uajádiji gaté ome dero ueradé uaté. Enga a jé ca toguírase ujetiga cuchárique chucuase uaque gosi.

¹⁸ Enga yicatecãraitigade udojo qui tu ujetiga Dupade chijñate éfesogosode uacáyipiedie gáyode, jé aja uté anguresórone ore jnese, ujetiga arajáyopise jnese Crísto uté ijnoraquei úringai pitijabate ome uyoque. Uté ijnoraquei querúpise ga que pejnaque gotique. Jecute umaningai jé que eruénique cuse. Ga jé chopo pajei rĩ uje que eruénique cusapo rĩ. Umaningai iji gaté que eruénique cusapo rĩ. Jé chopo iji jnumi údi rĩ, idájai iji guesi ga que eruénique cusapo rĩ.

¹⁹ ¡Jé ũré uje que piyaguipise Crísto ijnoraquédatéi eruénique! Ome erámi unirisórone uyoque jnese ga uté ijnoraquédatéi chãrajápisa yoquirajatigade eruei arĩa. Mu yutai Yocai Dupade uté ujetiga dobírasi ga chajnerame uacarajatigade ga a jé u jne jeta ijnoraquédatéi uté choquípisiji guesi ome uaque. Yáyipie qui jé u gu ujetiga irágupúsu uágome Dupade jmapié ujñapetedie jnese, ujetiga oyórase uté ome adode jnese.

^20-21 ¡Urénga, Dupade uté jé tiógarapísa dáringai pisígai, uje que pisaque pejóringome ingoningájnai gotique! A yutágorási uté ome yocajegaitígo cucha, jeoga gusu déji yocáyipie, mu uté érãtique chirajaque dasocáringome yocajegaitígo cucha udore quigode uñeque. Ome cutejma dajopiédaté uje chijocase yocáyipiedie ajéode, ga dopísi datéringane ome yocajegaidode cucha udore, uje que pipesute pajéningome cucha ueradode udore múñi. ¡Picotaque Opejã Dupade uté! ¡Yipésupú ga uté ingoningájnai choquípisiji guesi iji da-iglésia uyoque uje Jesucrísto, yitojmárangopísiji jnumi; ga uté gajnéone yoquicotaquéo jecucha jnorase dádi iji deréjna pitade jnese gatuaque! Qui jé upúsu. Amén.