Efésios 1 - Dupade Uruode

Apóstol Páblo chiroque darasitigade aja dojode Jesús anguresóño iji oridai Éfeso uté

¹ Páblo u yu uje yiroque yurusarane cárta aja uáguiji uaquedai Éfeso uté. Ga yurúsãre udojo ome yúringai Jesucrísto utocaite apóstol. Chamáñaje Dupade jé upúsu uje pésu dajéode ome yajnepídi udé gu. Enga yurusarane udojo gajnesórone u Dupade gajnéone uáguiji te; ga yuruode qui jé u uaque uje uacatojmárañoji Jesucrísto.

² ¡Ga yipésupú ga Yocai Dupade, Yocangarádejnai Jesucrísto ore chajnera dacaniratiguei údi ome uaque, ga ore ajesereringai jogate uaque gatuaque to jne jõ!

Dupade chacacãre yógome deranone cucha pitijabate oreránguejnane jnese iji gaté

³ ¡Urénga, pisígai opejã Yocangarádejnai Jesucrísto Dayé Dupade uté! Chamáñaje uté jé upúsu uje e chacacãre yógome cucha pitijabate ponáyone jnese iji gatajnoquei. Enga gose uje yitomárangoji Crísto. Jé ũrepise uje eyúgojma Dupade guẽrate oreránguejnane udore ome uyoque, jecute que ore eruénique cusipise.

⁴ Enga Dupade isoca ueradi uté ome Jesús anguresórone uyoque jé chajnapise áyipie iyajmenie iji jnumone. Uje cáma pipesute erámi iji taningapísi nanique, mu Dupade jé ajegaite aro yoque ujetiga cháta yógaja Crísto. Jnari yógome re, enga gaidi tu ujetiga yocúringáringo ujñapetáguipíso jogadi turásu, enga jé ca yoquiyoguérique cusirase iji uté iquei.

⁵ Jecute ome dajnoraquei uté, ga Dupade pésu dáyipie icaite ujetiga cho dabíji uyógome Jesucrísto uté adode. Enga jé u uje Dupade doi dajequigode udore, enga chachietáji re uje uerate isocai uté gu.

⁶ Ome cucha dacate pitijabádode udojo jnese, ga Dupade gaidi tu ujetiga cutejmai dacaniratiguédaté choqui guesi ome dáringai cuchadaté. ¡Adójnacho uje ingoningarãque Dupade icaniratiguédatéi uté uje e chingongarája yoque, yijorane uaque á! Que yitiójo uté icaniratiguédatéi uté, mu yoco yocajnenguíji gu uje Dupade chimesẽre yógome dedójnari dajnacare Jesucrísto adode ome yoque.

⁷ Jesucrísto uté upúsu uje chimate yocoré ome dayoi úringai pojneque nanique. Chamáñaje yocajneque pitoringai ome yocúringane máracho ome Dupade, enga gose yoquisijnaringuéone. Mu Jesucrísto e chirame yógome yocajnei pitoringa uté, uje chojne ome dayoi iji curesei ome yoquisijnaringuéone úringane pĩrocho. Enga Dupade isocai jé u uté uje chingongara dacaniratiguédatéi úringai cuchadaté aja yoque.

⁸ ¡Urénga, cucha oreránguejna Dupade icaniratiguédatéi uté uje chejnája uyoque, jõ! Enga Dupade pésu cucha pitijabádode udojo jnese ome dáyuquetotiguejnái, darajatígadatéi ore jnese.

^9-10 Ga udore ore jnese chajnapise uté áyipie iyajmenie iji jnumone. U gu uje Dupade érãtique chirajaque dasocárique ome dajequigode cucha uñeque. Jecute ueracho udore quigode jnese ome uté. Jé ũré uje Dupade áyipiedie uñanie pipoguiédei nanique, uje cáma Dupade uté pota ujetiga chuchẽri iji guesode nanique gu. Mu iji deréjnane udojo ga Dupade e chijnime dáyipiedie udire ome danguresórone uyoque. Enga e choqui guesi uje Crísto jé upúsu Dupade utocaidi uté ome ajequigode udore úringane pimanicho aja guesi jnese. Enga cucha dacadode udore jnese tocachúringai a jé upúsu jne ujetiga e chise Dupade ajegaitique dire uté. Enga a quene Dupade cháta damaningone cucha uásejna aja ñane, jé iji gaté, jnumi ore jnese jne. Gaidi tu gu ujetiga udore jnese ijocayasṍri chojmarápisiji jnumi, enga Crísto u jne.

Dupade u uje gaite dajéode ome dasocade jnese

¹¹ Uje Crísto jé yitojmárango ga qui jé u to uje Dupade cho dajnenguíji uyoque. Enga pésu dáyipie jetiga yoco yocajnéngu uté gajnéone cucha oreránguejna jne ome yocúringane uté abío. Chamáñaje Dupade jé ajegaite aro yoque gu iji erámi taningane iquéode. Enga uté isocai ome yoque jé chajna áyipie iyajmenie jnese iji jnumone, uje Dupade jecucha ga chimate dajegaidode cucha jnese aja guesi gu.

¹² Enga uté gaidi upúsu ome Jesús anguresõre bajade uyoque ujetiga yipijójo ome yocúringane uté anguresóño, ¡enga a jé chiborátarásaja picotaquéode ome cutejmai Dupade ingoningájnadaté jne! Enga Jesús anguresõre bajade uyoque u uje e yanguretágo yoquijnati Crísto yui ome uyoque bajaque nanique.

¹³ Enga purása quedéjnane uacasocai jé upo yoquisocai uqué rĩ, uje e uacatojmárañoji Crísto to. Chamáñaje uacadúcho Dupade uru uréone, enga Pujnomé Ueradi uté quigode choquípisiji guesi ome uaque uje Piquetangore ugurui tu Jesucrísto. Enga uaqueduyo Jesucrísto uté úringai pangurete ome uaque, jecute jĩraque Dupade ajopie Dajopié Espíritu Sánto aja uaque ome dáringa uacapijoguto. Chamáñaje Dupade e chichaga Dajopié uaté aja danguresórone jnese yoqui nanique ujetiga yipijójome yocúringane uté gajnecho.

¹⁴ Jé ũrépise uje Dupade gueranone cucha omío jiépisi uje chichagája dabode yoqui nanique arĩa. Uje cáma chisíome cuchade udore jnese ome yoque marínga, e chisíome derané bajé Dajopié ome yoque. Enga Dupade gaidi tu jeta ca potigayaquérique déji yógome guẽrate ueradode amirone udore ore jnese, uje yoquipijoguto e déji yoque gu. Yocajnéone cucha udore a chise yoque jne iji Dupade ajegaitique dire arĩa. Chamáñaje Dupade gaite oré yoque gu, ga a chimanipise yógaja re ome yocúringane abipíso jne. ¡Urénga, Dupade jé tiógarapísa dáringai pisígai ome cutejmai dangoningájnadaté uté, jõ!

Apóstol Páblo chacãre Dupade gai ome Crísto anguresórone iji oridai Éfeso uté, enga chutai payuquetotiguei ome ore to iji uté

^15-16 Ome yu ga, uacapijóchome uacáringane Dupade icaniratiguédatéi gajnesóño, yijorane uaque á. ¡Jecute yacãre Dupade gai ome uaque! Chamáñaje uacajnomei e chise yu ica enga yudute uje uacanguretigai iji Yocangarádejnai Jesús obiréjnapise. Enga ujnomerãque uaque to ome uacajnoraquei uté uje jé chuságaja Dupade anguresórone ore jnese. Jé iji diri uté uje yudute ore ojñane ome uacajmapié uaté, enga que yiya yacãre Dupade gai ome uaque iji yicatecãraitigade gatuaque uje yujnusina uágome uté.

^17-18 Enga yajei jochaquéode gajnesṍri jé upúsu Yocangarádejnai Jesucrísto Utocaisṍri Dupa uté. ¡Yojningai tu Yocai Dupade uté uje choqui guesi ome cutejmai dáringai ingoningarãque! Jé yijócha uté ajei údi ome uaque ga cucha bajai tu ujetiga uté chacadipise uacáyipiedie ga pirajatigade choquípisiji guesi ome uaque uje garani jé u Dupade. Jé chopome payuquetotiguéode rĩ, ujetiga uté chuchẽri cucha ibirade quigode udore iji guesi ome uaque to, enga qui jé u ujetiga uacarajatigade iji Dupade uté chõre re. Ga yajei jochaquéode quigode uñai cusapo rĩ ujetiga Dupade chijñate uacáyipiedie gáyode, ga pésu jeta uté áyipie quigode ome uacaquei choquípisiji guesi ome uaque. Uje e cho dajnenguíji uaque gu, enga a jé chiborátarásaja ujetiga oyópise cuchadaté iji uacáringane pibijnángaichó ome Dupade uté. Jecute yicatecãraitigade qui jé u to ujetiga uté pésu ga uneripise uté ojningane cucha udore yúode ome uaque. ¡Urénga, Dupade uté chopise dedójnarione darása iji uyoque, jõ! Ga a pijóguirase ome uaque uje cucha ueradéjna, cucha oreránguejna uté ichagájade udore cucha uje chichagája yoqui jnese ome yocúringane uté gajnecho.

^19-20 Enga yutai Dupade gaté ujetiga pésu ga apáñañopísiji uté cutejma ujopiédaté uje e déji yógome yocanguretigai iji uté. ¡Urénga, que po Dupade ujopiéjna uaté gotique ome dáringa eyúgojma, cuchadaté ore jnese! Enga uté ujopiéjna pitijabade jé upúsu uaté uje Dupade tagúome uje chiringare dajnacari Crísto uté iji itoringai, enga jno údi aja gatajnoquei. Enga jé u uje Dupade chicha dajnacari Crísto uté aja dãrachua iji te ome dáringai pisígai.

²¹ Dupade jé ichajapite Crísto aja gajnepídi uté iji gaté uje idájai guesi ome pajnepídode uñane iji gaté, jnumi ore jnese ome dáringai pujnuéngaisṍre. Suépise peduguéjnane, gobiérnone, dacasutedie, pujopiedie jnese ore gáyode. Enga uté i tu uje pisígai ome ore íode uñane jnese; enga que gusu iji deréjnane udojo gotique, mu a jé chuságaja dire piqueminórone udore jnese jne.

²² Enga Dupade e chicha cuchade jnese aja Crísto guídade údi, enga imoi tu uje Crísto gajneque ujetiga chijocase cucha ponáyone udore jnese. Enga cuchadatei tu uje Dupade guerani u cuchade jnese jnuéngaisṍri Crísto uté ome da-iglésia uyoque, jeta Crísto chijocase cuchade iji iglésia uaté jnese. Chamáñaje Dupade ucuei tu iglésia uaté omitigárique gu.

²³ Enga Crísto cho daoi iji da-iglésia uyoque. Jé basa ga yoco yocatoi iji Crísto uté, enga jé u uje chojmarápise yóguiji jnumi. Crísto upúsu uje chĩretapise da-iglésia ome cutejma dajopié, dangoningájnai ore. Enga uté isocai uté chiborátaja uje irágupúsu erámi údode jnese ome Crísto cutejma ujopié, ingoningájnai udore jnese.