Daniel 9 - Dupade Uruode

Daniel catecã́ri Dupade ga chatata darasade israélgose ore isijnaringuéone quigode ome ga chijócha ajei údi ome ore

^1-2 "Eduguéjna cuchábi Darío guejna siqueré chojmára ome dáringai eduguéjna nanique. Ga uté dai u ore eduguéjnane uñai to uje i tu Asuéro. Darío uté unirípisi u Média nanique, mu caldéogosode ore cho dasuté iji Darío uté to nanique. Chise diri nanique ga yajire Dupade uruode atatasórone uñai urusarane uje uté i tu Jeremías. Ga yajirigode udore chatata uje siqueredie a chise 70 jne ome Jerusalén úringárique pujuya. Uje a jé Dupade urúo nanique ome daroi Jeremías uté gu.

³ Yujnusina udojo ga yicatecã́ri Dupade ome yujode israélgose ore iji yocuniri. Ga jnusiétaque yu ga yiji yiguidé ojorẽ́ ga yigui uje chichagu yibai teque-teque, ga yácariji puchucurui ome yúringai áyuguhebátaque. Ga yo yuyágome yu.

⁴ Ga yicatecã́ri yangureni Dupade ga yatata israélgosode yoquisijnaringuéone quigode ome uté. Ga yojningame uté: 'Dupa Eyúgojmá, cuchadatei tu ua ga que po ua ome báringai ujopíerãque cuchape gotique. Ga jecucha bojningane cucha ome yoque tocade. Uje yijnórango ua ga bango báringai ijnorataque aja yoque to, uyoque uje que yiyógopó bojningane cucha gánique rĩ.

⁵ Mu yoquisocade gajnarécho ome ua uje yipéjo betégode cucha udore. Ga sijnaque yoque; ga que yocajénique tejnu aja yoquejominónique yocujo ayoré; ga yicadíjoi baruode quigode uje baréngone cucha déji barusarane udore, ga yiyógopó baroqué gajnéone cucha gai to.

⁶ Ga que yico barógode unétique gotique uje udore que ore chimoque baru quitique ome yoque uje ore chatata jóroga baruode ome yoqueduguéjna cuchábi cásodicáite nanique, jé aja ore ujodie dacasutei ore, jé aja yocáquiode jnani bajaque udore ore, jé aja disi ejode ore uyoque iji israélgosode yocujade.

⁷ Dupade ũré tu ua ome cuchade ga betéquetí o bajuñame ayorérique uyoque bisideque. Mu judíode ore uyóguiji deréjnai tudé ajegátaque yoque ome yoquisoca gajnaréngone uje israélgosode ore yipéjo iji baquei. Yojningane u israélgosode ore uyoque iji yoquijogadode puníño uje jé bachajapite ore jogadode iji ore píode purása quedéjna ujade, uje bajócãre yóguiji yocunirípisi uté nanique gu yoquipotigué noñángone uje yajo baruode quigode aja nanique. Ga yojningane u yocurasade ore to uje jé ore déji Jerusalén uaté.

⁸ Dupadé, jé yocopise yoqueduguéjna cásodicáite, jnani bajaque, uje ore cusu rome badode nanique ga yoco yocáyugu yógome cuchade udore. Uje yocate gajnaréngone udore gajnengóri tu ua.

⁹ Mu Dupápise yocangureni ua, ga a jé tiógara jeta osõre yoque ga ãrope yocate gajnaréngone udore iji yoque. Uje yocadode gajnarécho ome ua.

¹⁰ Enga que yangácoi ua gotique, Dupadé, uje yocangureni ua mu. Ga que yico bacajnaquéode unétique rĩ iji barógode udore ore pijnanone uje ore chatata baruode udore quigode ome yoque.

¹¹ Iji Israel údode nanique ga que uñeque chise bacajnaquéode unétique gotique. Uje ore chirajapise baroquéode udore mu que ore doi quitique gotique. Jecute baro casicaite Moisés urusarane udore quigode chise dáringane tocachucho iji diri tudé. Uje máraque yógome ua gu uje yipéjo cucha gajnaréngone ome ua.

¹² Bango yoqueduguéjnane, uyoque nanique uje a bo bajuñame yoque jeta angoninguite parique yógome ua jne. Mu baru quigode udore ome yoque e chise dáringane tocachucho ome jerusaléngosode ore úringane chucho ome desórone, uje barúo nanique ga e chise dáringane tocachucho gu uje que yicoi baru quitique gotique. Bajuyaquéode udore ome Jerusalén cáma pimo udore uñeque quitique gotique iji erámi jeta jé cho bajuyaquéode udore ome Jerusalén.

¹³ Jé ũré uje gajnareque cucha tocachugode ome yoque. Jé quigode upúsu Moisés casicaite urusarane quigode. Mu jé yoquisoca uje yoquetéquetí yucuegoi ua, Pangarádejná, Yocangureni Dupade á. Mu uje yimóngo cucha uréone uje garani u ua, mu que yipéjo udore gotique, mu jé yajógo yógaja yocate gajnaréngone udore quigode.

¹⁴ Jecute, Dupade á, e bapesute udore ome yoque jeta na yógaja jnumi. Israélgosode Yocangarádejnai tu ua, ga yoco yoquidupade iji ua to nanique. Enga yirajágo to uje Dupa ũré tu ua ome cuchade, ga que o barupatáringa gotique ome bapesutique cucha. Mu yoquetéquetí yangácoi baru quitique.

¹⁵ 'Yocangureni Dupá, bangongara cutejmai betotiguejna aja egíptogosode nanique uje bajnime israélgosode yocayode jnani bajácho iji ore jmainie nanique. Iji dirode udore nanique ga bei cucha uerate, jé aja dirode udojo to, uje ujnomerãque bei uté. Mu barasade uyoque ga yipéjo cucha gajnaréngone gatuaque.

¹⁶ Mu Dupade á, yirajágo ua uje osõratai tu ua. Be ga ajuque cuchade udore iji Jerusalén gai uje e bajuyaquéode udore na yógaja jnumi. Jerusalén uaté jé u uje bo bedai iji uaté to nanique ga báringai puyaque chisa uaté, jé aja cucarani uté eruei to uje bangoningájnai déji uté ga puyaque. Erámi unirisórone ore iji Jerusalén dosadode ore chujñieta bedai Jerusalén uaté gu yoque uje yocadode gajnarécho ome ua. Ga barasade uyoque e yico yocúringane pujñiécho ome betesórone udore ore to. Ga jé yocopise barása jnani baja cásodicáite ore to uje gajnareque ore isocade ome ua nanique.

¹⁷ Yocangureni Dupade á, angári baroi uyu yicatecãraitigade udojo uje yijócha bajei údi ome yurasade uyoque. Angári yu gu bei ueradéjnai jeta picotaque opejã bei tuté gatuaque jne gu bapesútedatéode ome yoque jne. Ajire baguíjna cuchábi casica iji jnumi, ga ueradápo baguíjnai uté rĩ. Ejna bajnoraquei aja jne.

¹⁸ Osõre yu, yangureni Dupade, ga apésu yojningane udojo ome yoque. Uje e cucha carĩ yóguiji udore jmainie, ga jé cho bedáidatéi Jerusalén uaté uje e cucha carĩ ome dáringai pujuya. Yojningai u ore idáidatéi cuchábi uje jecucha ore chicáji nanique jeta ore catecã́ri ua iji uté. Que yocangurenone uyoque gotique jetiga asi ome yocutaidode udore ome yoque gu jetiga uerate yocadode, uje que togome yoque jeta yipéco cucha arégode, mu yocangureni tupúsu ua ome yocutaidode udore uje yirajágo ua gu uje posongaquei jiépisiji ua gu ome yoque.

¹⁹ 'Yangureni Dupade á, ¡osõre yoque enga angári yoque, enga acadígui yocate gajnaréngone udore! ¡Be ga átaja yoque, Dupade á! Que gusu yoque uje yutai ua ome yoque, Dupade á. Mu yutai ua ome bedáidatéi, barasade ore jnese. Dupade ¡jé ca udojo igasíquéo jne! Uje yogota yuruode iji jnumi ome ua. ¡Jĩraque aquĩ́ra udojo ome yoque!'

Dupade iroi Gabriel chiquetápo raja Daniel nanique rĩ

²⁰ "Jé yi yicatecãraitigade údi ome Dupade ica, ga yingo yate gajnaréngone aja uté, jé aja yurasade israélgoso ore uje yatata ore ate gajnaréngone aja uté to. Yijócha yangaráni Dupa uté ajei údi jeta chãraque cucarãte cuchábi uté iji Jerusalén ajei uje ingoningájnai déji uté.

²¹ Uje qué yugúsiji yicatecãraitigade gai ga Gabriel uté uje chiqueta raja yu iji yenominone unojo ica, uté chója gadoi iji yijogadi uté. Ga chirõre guedé batigai uje jecucha judíode ore yipotágome yoquẽrapáidode cuchiso ome Dupade iji gaseradéjnai gai nanique, uje Gabriel uté chise yu iji uté.

²² Ga uté chojningame yu: 'Daniel, yise ua gu jeta yingo cuchade udore quigode aja ua jetiga araja to.

²³ Bacatecãraitíga bajai uté ome Dupade, ga jĩraque chudute, enga a doi baru quigode udore jne. Uje yise ua gu jetiga yatata udore quigode ome ua uje Dupade chimesẽripise ua, Daniel. Mu angaripísi quigode uje yatata quigode ome ua jne ujetiga araja udore imone cucha. Ga yósi tome ua jne:

²⁴ 'Barasade ore gajnéone pujuyaquéo a quene chécãre re jetiga ore guejnanie siquerei chise 490, jé aja Dupade edójnari uté pidai Jerusalén uaté jeta chisápo dáringáraque ujnomerẽ́ rĩ. Jé aja jetiga barasade israélgoso ore chejna siqueredie udire guesi uje batigai u 490, ga quene paquĩraque ore ome ore úringane ducusuréchoquío, jé aja ore úringane cucha gajnaréngone ipesusóño. Ga jogadi a u jne jetiga pĩroque ore isijnaringuéone iji ore, uje a uñeque cho dajnéngu udore ore isijnaringuéone. Ga jé isocai upome ore jne rĩ uje quene jnani ũréo ore gu iji siqueredie udire quigade. Enga a jé ca ore chisápo dáringane jnani ũré eruénique jne rĩ. Ga jogadi a jé upo jne rĩ jeta Dupade uruode atatasórone jnani bajácho ore imone cucha, jé aja ore uruode a chise dáringane tocachucho jnese, enga jogadi u jne jeta Dupade Utocaidi úringai peduguéjna jé u jne uje ueque uté ome pisijnaringuéone jnese.

²⁵ Daniel á, adójnangapísa udore jeta araja quigode uje a yingo ua jne: A chise dínique jne jeta a piroque ore aja jeta ore pésapo ore idai Jerusalén uté aja gaté rĩ. Enga a siqueredie chise 49 jne ome úringárique pimaningápo aja gaté rĩ. Mu siqueré eruemitodie a batigai chise 434 jne ga quene Dupade ojningai Peduguéjna Cuchape chingongara raja Jerusalén unirisórone udore ore. A pimaningápo dajéredie iji Jerusalén uté údode jne rĩ, jé aja ore ujuyaquéode iji Jerusalén uaté gai, mu a jiei pujuré gajnéone cucha iji deréjnane udore uje ore pésapo dedai adode uñane aja quigode.

²⁶ Mu iji siqueredie udire eruei uje 434 ore enga a ore chibéro Dupade ojningai Eduguéjna Cuchape uniri eruei jne iji erámi tudé. Ga a Dupade iguíjna cuchábi iji Jerusalén a chise dáringai pajnangarañaque jne ga gose eduguéjna cuchape di uté gãrapíode darása ore jne jeta ore chajnangarásaja dejode, ga a jé chuságaja ore idáidatéi cuchábi Jerusalén uaté to jne jeta ore chajnangarásaja dejode. Eduguéjna chui uté quigade ga erámi a cho chíguiji jnumi jne mu quigade ga siqueredie a chirõre 490 jne, enga jé u jetiga cuchade chague israélgosode gai jne, ga a cuchade udore cho erãpe bayátique aja dajesúrique jne. Ga a jé udore chuságaja pocaningane jne jeta jno dádi jé aja deruénique, jé aja uje cucha chungórone a tṍraji dajñarenie jne ome ore. Uje e pimanei páyipiedie udire quigode ome ore yui nanique gu.

²⁷ Ujetiga siqueredie uje 490 udire amirenie e gare iji ti enga a barasade ore chudute eduguéjna cuchábi di uté urúrigo jetiga cha pajei dotáningai ome ore ga a chojninga: 'A yáta cuchade aja israélgosode uaque jne iji uacaniri.' A siqueredie gadioque enga nóna pei jetiga eduguéjna di uté chinoningase daru iyiejna casodica ome israélgosode ore. Ga jé u uje uté jĩraque úringai ducusuréchoquí chise ga que juégapome israélgosode rĩ jeta jé ore tẽra dachitique cuchiso ome Dupade. Ga charángapo to jne rĩ jeta israélgosode tẽrapome Dupade rĩ ome dẽrapáidode cucha uñane. Ga eduguéjna cuchape di uté chijna dapesutique cucha noñánguipíse aja Dupade iguíjna puyai ajei jne uje que piyaque uté unétique gotique ome úringai noñaque. Mu a uté chuniname eti gajnei pujuyaqué diringai tu ome uté uje e pipesudome uté yui gu, uje uté ate gajnaréngone que déji pajénique ome úringane pipesucho gu.'"