Daniel 8 - Dupade Uruode

Daniel chatata denominone nanique ga imone u áyasa choquírique, áyasa quedéjnarique ore

¹ "Uje siqueredie gadioque ome eduguéjnai Belsasar uté nanique ga Daniel uyu u uje cuchade uñane chiquetápo raja yu rĩ iji yurique bajade udore quigade.

² Iji yenominone ga cho jetiga yiyáguena tié edúdi uje tié uaté i tu Ulai. Ga tié uaté chaquesu ore idáidatéi uje i tu Súsa, uje ore idáidatéi uté ibijoi u iji ore uniri Elam uté.

³ Yajire erámi tuté mu yimo áyasa choqui iji tié uaté edute uñai. Uje uedie gare ga yoríco jnese, mu yorícopise uté uedie uña mu ujnié ejo uaté uje yorícopise ome dajõra.

⁴ Ga yimo uje áyasa choqui uté chinguíra daredie aja dejode iji guedé cacadi yui, jé aja casaque garani yui, jé aja umusoi garani yui. Enga ujórique cuchiso que doi ga cási uté iquénique. Ujeta chujé dojórique cuchiso ga ujórique cuchiso que chapídome uté gotique. Uje etotiguei quérã, quérã, ga pésu dajegaidode cucha jnese.

⁵ "Uje qué yugúsiji áyasa choqui uté gai uje yajire, mu yajire ta guedé cacadi yui mu yimo áyasa quedéjna uerẽ́ iji ga chayóji gadoi ga ibisóguepise uaté ga cho jeta jé ca chuchiéjna jnumi ome dáringai bayé. Áyasa quedéjna uaté ue yoríco cuse uje tṍraji edodie ujai.

⁶ Uje áyasa quedéjna uaté chise áyasa choqui uté uje uedie gare ga cugujnáji uté ga chichagu ome daré ga chijna detotiguei aja áyasa choqui uté.

⁷ Ga chimochẽre áyasa choqui uté uedie jnese. Que dimane áyasa choqui ome dejórique jeta chajmita dejode ome damajósonique yui jeta ore chujé uñane. Áyasa quedéjna uaté churuguse áyasa choqui uté iji jnumone enga chinguíraja dejode ga que toc jeta gosi qué chiqueta uté.

⁸ "Áyasa quedéjna uaté jé jno dádi ome darajatiguei. Mu uje etotiguei jé chajnera dádi mu ue péro. Mu quigade ga uedie suépo rĩ ga gagájni ujnienie ga chusẽre emone garanone. Uña chusẽre casaque garani yui, uña chusẽre umusoi garani, jé uña chusẽre guedé garani yui, jé uña chusẽre guedé cacadi.

⁹ Ue catadábia sué iji ue uña pajei ga jĩraque imenuringuei cuse, ga imenuringuei quérã ga pésu pocaningai ome guidáyode iji umusoi garani yui, jé aja guidáyode uñane to uje ore déji guedé garani yui, ga suaté doi pocaningai ome Jnupe Ueradéjnai unirisórone iji uté to.

¹⁰ Áyasa quedéjna ue ujniámia suaté jé quérãsi dádi ga chirõre gatajnoquei ome dáringamía quérangape. Ga chise guédodie uñanie ga chimochẽre udire aja dejode, ga base iji dajogadode ga áyasa quedéjna ue ujniámia suaté chinguíra udire aja dejode.

¹¹ Ga áyasa quedéjna uaté ue ujniámia chosípise eti Dupápise jé upúsu re ga chojninga: 'Peduguéjna uyu ome gaté unirisórone udore ore jnese.' Ga chojningápo rĩ: 'Ayáyo uaquẽrapáidode cuchiso ome Dupade, ga ca abochopo uñeque rĩ.' Ga uté chácariji Dupade iguíjna ajé puyaguipísi ga pésu iyoñaringuei.

¹² Ga uté chise ore aseradéjnai uje ore ipotame Dupade gajnéone cuchiso iji gai ga chojningame darógode dasoldácho: 'Amóñoji uté ejode uje chiese puyaque mu.' Ga uté cho cucha bisidécho iji Dupade uru uréone enga cho ũré iji re ome cuchade jnese. Ga uté pésu danéningai ome ore gaté uje chiese jé uerate cuchade ome."

¹³ "Ga yudute gaté unirisórone uñai uruode uje catecã́ri dojoi gaté unirísõre ga chojninga: '¿Jé cho pírique jetiga cuchade udore íjnoque iji Dupade gajnéone gaseradéjna ejode? uje que yimóngopo ore iborigode dachicho iji gaserãte querui uté gánique rĩ, uje ore jmapié u mu jeta ore chibore udore iji gaseradéjnai uté gai gatuaque iji deréjnane jnese.' Ga gaté unirísõri uté chojningápo rĩ ome dajõrai: '¿Ga cho pírique jetiga pejnaque cucha gajnareque noñángone udore ore iji Dupade iguíjna puyai uté ajei ga pusũrurañaque ore aja jnumone iji uté? ¡Uje uté irodisórone que ore cha dáringane disorã́cho iji Dupade iguíjna uté ajei údode! ¡Ore cho cucha bisidéguiji Dupade uté anguresórone ga gajnarenguipise ore isocade ome udore ore to!'

¹⁴ Ga gaté unirísõri jõrai chajnai uruode ga chojninga: 'A dirode chise 2.300 jne enga quene udore chise dáringane pinoningañacho. Ga jogadi u jeta Dupade iguíjna puyai uté chisápo dáringai ujñapetágapo jne rĩ.'

¹⁵ "Daniel uyu uje yopise yáyugu cuchade udore uje chiqueta raja yu que, ga yipota jóroga jeta yiraja quitique. Mu igasique ga ayorérique chiqueta raja yu uje cho ayoré erámi jogosónique iji re.

¹⁶ Ga yudute ayorérique uruode uje tṍraji tié edúdi uje tié uaté i tu Ulai. Ga ayoré darai uté chojningame daruode: '¡Gabriél! O uté imone cucha quigome.'

¹⁷ "Ga uté chose gadoi mu chajuque yaguté. Ga yichaga yigataidie aja jnumi ga yenochai chise jnumi iji uté iquei. Mu uté catecã́ri yu ga chojninga: 'Ayorei á, bamone cucha udore a chise dáringáringo tocachucho iji erámi eruei yui jne.'

¹⁸ "Uje uté qué catecã́ri yu, mu a yo sere ga yuniname eti yugúsiji jnumi. Yicatecãraisṍri uté chiringare yu aja gaté ga yiyague.

¹⁹ Ga chojningame yu: 'A yingo udore quigode aja ua jne jeta chise dáringáringo tocachucho iji erámi eruei yui. Yojningane udore cucha tocachucho u uje a jé ca Dupade chaquĩ́rapo re ome dájningai jne rĩ ome dajuyaqué gajnéone cucha iji erámi eruei yúode.

²⁰ 'Áyasa choqui uté uje uedie gare imone u peduguéjna cuchábode iji ore unirone Pérsia, Média ore.

²¹ Jé basa ga áyasa quedéjna uerẽ́ tuaté imoi u gréciagosode ore eduguéjna cuchábi. Áyasa quedéjna ue yoríco iji edodie ujai imoi u gréciagosode eduguéjna cuchape bajai uté.

²² Áyasa quedéjna ue pérogue uaté jogadi, ga ue gagájninie suéji jogadi, ga udire imone u gréciagosode ore eduguéjna gagájnione udore ore jne. Mu a jé ca udore ore etotiguei cho gréciagosode ore eduguéjna bajai uté jne.'

²³ "Yicatecãraisṍri uté uruode chósi tome yu: 'Eduguéjna gagájnione udore ore a jé ca udore ore bisitique pijoque jne iji dáringai uté eduguéjna. Ga udore ore urasade adode a gajnarénguipíso. Mu eduguéjna uñeque a déji udore ore quigade jne jeta íjnoque pajesereringai iji uté ome ujórique ayoré ore. Ga a uté aringácachoquí ome darasade ore jne.

²⁴ A sijnanguipise eduguéjnai uté jne ga pujnuéngaisṍripíse. Mu a ca etotiguei tṍraji uté gotique, mu etotiguei gãrapi a u uñeque jne. Ujetiga a jé ca gosi tangári uté to jne, ga a pésu dajosipiedie ome gosode jne, enga uté ipesudode cucha a chácariji erámi unirisórone ore údode jne ome dasoca noñángone. Ga a pujnuéngaisṍripíse uté ome ipesudode cucha jnese. A jnani uerate jnanírique jne marínga, jé uté cho dajocaningame uté. Ga a uté cho dajocaningame Dupade urasapísode, ga a yugode jiépisi iji udore ore jne uje ore chetaque ojningane cucha quigode gu.

²⁵ Ga a uté chisi dabai ome dáringárique ayoré uerate, mu cachi isígai re uje áyipiedie quigode gajnarénguipíso gu, ga a jiei uté arane dojo ayoréo ore iji erámi údode. A uté chojningame ayoréode ore jne: 'Ca atodóyo yu uje yijõrapise uaque.' Mu jĩraque chujé udore ore ga chimate ore aja jnumi. Ga a uté pota pocaningai ome Pasuté Eyúgojma jne iji idai. Mu a jé ca togome jne jeta doi ga sué Pasuté Eyúgojma uaté gai. Uje a Peduguéjna Eyúgojma uaté cho dajuñame uté jne enga chajnangarásaja erámi údode.

²⁶ 'Badudigode cucha quigode uje e pingoque aja ua jé ũrepise udore quigode, uje bacatecãraisṍri chĩ́care dirode, dejade ore batigai uje a ore chise 2.300 jne. Mu jé ca atata udojo ome bojórique ayoré uje a udojo tocade jne, mu que jĩraque tocade uje dirode qué orocoi ome udore jeta pimo iji erámi eruei yui.'

²⁷ "Daniel uyu uje yiserẽrája iji udojo jmainie ga ejnarétaque yu ome yimone udojo quigode, ga orocoi dirode ome yu uje yejnáreque yu. Quigade ga yĩriji enga yajirápo peduguéjnane ore isagode cucha yui to rĩ iji yocuniri udé údode. Mu áyuguhebátaque yu ome yimone udore quigode uje que yijnime udore ãrírique gu."