Daniel 7 - Dupade Uruode

Daniel chĩ́cara cuchisódaté cuchátigo uje tṍraji yote quedéjna cuchábi

¹ Uje siqueré chojmára ome eduguéjna Belsasar uté nanique iji dáringai eduguéjna iji daniri Babilónia uté nanique, enga Daniel uté urigode cuse ga imone cucha cusapo rĩ iji dejaque uñai. Uje Daniel niji jmame ga jĩraque churúsãre darigode udore quigode. Ga urusarane udore quigode u udojo:

² "Yurigode qui u uje yĩ́cara ga emi tṍraji casaque garani yui jé aja umusoi garani, jé aja guedé garani yui, jé aja guedé cacadi yui, ga ore chubúchu yote quedéjna cuchábi jochai iji jnumi.

³ Mu igasique ga yĩ́carapo cuchisódaté cuchátigo rĩ uje tṍraji yote quedéjna cuchábi uté, ga gagájni udore, mu ore enochade chayu iji ñane jnese.

⁴ Bajai ga cho caraté quedéjnanie mu aramanie cuse ga cho arorei ome daramanie udire. Mu iji yurigode ga yitoji caraté quedéjna uaté gai. Mu uje yajire ga aramáisi base iji uté uje a uñeque chijnime gu. Ga caraté tuaté chague iji gaté iji guída quigamitodie. Ga gatoi chécãre re to ga cho ayorérique enochai, enga áyipie cuse to uje pisíome gu.

⁵ "Quigaminóri cho yajogue quedéjna guichaya uje uécha uñai doi jnumi, ga uécha uñai cho cacógode ga pajnoquéode súringara uté pijnani ga orotabite ajnoqueque gadiócho pijnani jogosórone udore. Ga yudute darade uje chojningame uaté: 'Bo jne, enga agu cucha arione iji erámi jnese jne jeta jé atiógara úringáringo piboso.'

⁶ "Cuchiso gadióguei uaté ga cho carataque quedéjnarique mu aramanie gagájni iji guidoboi. Ga uté gatoidie gagájni. Uté imenuringuei cuse uje pisíome gu, ga sué erámi unirisórone ore gáyode ome dáringai eduguéjna cuchape nanique.

⁷ "Yuricaite cucha gagájnia uaté ga gajnarenguipise ome jorane ore, ga cutejmai etotiguejna jiei iji uté. Ga uté patarane cuchadatéo uje pipesucho iji guebéode uje i tu hiérro. Uté chimo cuchade ga chajnangarásaja jnumone ome damatarane uje tamunáji cuchade aja dajesúode. Ga iquebéode iji cuchade chuchiéjna dejode. Cucha gagájnia uaté uje yĩ́cara ga sué yuricáidi cucha uñane gai, uje uedie chejna yijmanáyone iji gatoi.

⁸ "Uje yitoji uté uedie gai uje chejna yijmanáyone ga yimo úcabia uje suéji ue chojmara dosadi. Igasique ga yimo uje ue gadióguedie udire payudé ga parané aja guesi jetiga úco ujniámia suaté jogatique déji to. Úco ujniámia suaté edodie cuse ga cho ayoré enochade uje pijnani cuse. Ga suaté chósi chere-chere ome dáringa dicotare.

Daniel chĩ́cara nanique ga chimo Jnani Jnupabejna Eyúgojma uje chácariji charipi gai uje charipi uté cho eduguéjna cuchábode charipíode

⁹ "Iji yurigode uñai ga yĩ́cara piyaripíode uje udore cho eduguéjna cuchábode gajnéone piyaripío. Yimo Jnani Jnupabejna Eyúgojma uje chácariji udore uñai gai. Ga uté iguidedie póroropise rĩ uje cho jese basui ome dáringai póroro. Ga uté gatui cho jnatudíe ome dáringanie ueradé uje ichápise. Mu uté charipi ga dugudie déji ga charipi, dugudie ore cho nánga, nánga ga cho pioque ocarate cuchabé ome dáringanie nanganatáguei.

¹⁰ Ga yote quedéjna chayo iji uté iquei ga pioque papótique aja dajesui. Ga uté irógode jiépisi ga que pirajaque ore eruénique gotique. Ga uté iquei uje ore cháguena gatéode ga ayoré ponáyo ore u uje a pisecarãte ore marínga, que pejnaque ore gotique. Ga e dimane Jnani Jnupabejna Eyúgojma uté jeta chisa degode darujna ao ga chungare udore jeta chajire dejominórone udore adode aja quigode.

¹¹ "Mu yĩ́carapo yuricáidi cuchiso uqué úco ujniámia suaté rĩ. Ga yitosíji suaté gai ome cutejmai dacotaqué ome re. Mu uje igasique ga yuricáidi cucha gagájnia uaté uje gajnarenguipise uaté ome yuricáidode cucha uñane, ga chugué uaté ga pajnangaráña aja jnumi, ga parãte uaté pépitade aja pioi jeta pipotámeo.

¹² Mu yuricaite cucha uñane ga pijnimique udore etotiguei iji ore mu cáma pujuegate jeta chuque ore uje cáma ore gajnei dire u gu.

¹³ Mu cáma yurigode chise deruei gotique iji dejai uté: Mu yĩ́carapo rĩ ga yimo ayorérique uje tṍraji gatajnoquei, uje cho jnani erámi udé jogosónique ayoré. Ga uté quítequiguíji Jnani Jnupabejna Eyúgojma uté iji charidi. Ga chose uté yui.

¹⁴ Ga Jnani Jnupabejna Eyúgojma uté tẽra erámi jogosṍri uté ayoré úringai pujnuéngaisṍre ome uté, jeta chise dáringárique eduguéjna to iji erámi tudé. Ga chojninga: '¡Picotaque opejã ua jne! uje erámi unirisórone uje ore cãra daruode ome ñane marínga, a jé ore cho deduguéjnai iji ua jnese jne iji daníningo, enga a ore doi baroquérigo jnese jne. Ga báringai eduguéjna uté a jé ca chise deruénique jne, ga a ca uñeque chijnime ua iji báringai eduguéjna uté jne. Uje bamenuringuei a jé ca chise deruénique to jne gu.'

¹⁵ "Daniel uyu uje yo yáyugu yurigode quigode ga pésu yute togode uje yitodo udore.

¹⁶ Yijose udore uñai yui uje cháguena Jnani Jnupabejna Eyúgojma uté iquei. Ga yojningame uté: 'Ope udore quigome yu.' Uté chimesẽre jeta cho quigome yu ga chojningame yu:

¹⁷ 'Baricaite cuchiso guichaya gagájnione udore imone u eduguéjna gagájnione ore uje a ore cho dajnéngu erámi udé údode jnese jne ome dáringane eduguéjna cuchábio.

¹⁸ Mu quigade ga Dupa Pujnuéngaisṍri chijnimíji udore ore gari ga chisi ome darásapísode, ga a jé ca pijnimingápo jne rĩ iji udore ore gari jne rĩ. Enga a udore ore u jne ujetiga ore chiroque erámi unirisórone ore jnese, jé aja deréjna pitade údode.'

¹⁹ "Ga yicatecãrápoi uté rĩ ga yojninga: 'Opísape yimoi cuchiso gagájnia uaté quique ome yu uje noñanguipise uté ome ujode cuchiso udore ore. Uje uté patarane pipesucho iji guebéode, ga úsugurúode pipesucho iji bronce. Uje chimo cuchade ga jĩraque tamunáji cuchade enga chajnangarase cuchade iédie aja dejode ome dásugurúode.

²⁰ Jé aja uje yipota jeta yiraja uté uedie quitique to uje uedie chejna yijmanáyone. Enga garamia úcabia cusosi ga edodie cuse uje cho ayoré enochade ga pijnani déji ga chósi chere-chere ome dáringamía dicotárape. Ga uté ue gadióguedie pijnimei jeta úcabia chácariji udire jogadi ga cuchadaté ome joranie ujo ue ore jnese.

²¹ Iji yurigode ga úcabia suaté doi pocaningai ome Dupade urása cásodicáite ga yuchome ore.

²² Yuchome ore ga jé u uje Jnani Jnupabejna Eyúgojma uté basája dayaridi jeta chajire cucha dacadode aja quigode ga chirota darasade enga cho ayoré ujñapetaque iji udore, enga ũrepise ome uruode udore jnese. Uje e deréjna eruei u jeta Dupade urasade udore ore chise dáringane pujnuéngaisóño to iji uté, ga a udore ore cho dajnéngu erámi údode jne.'

²³ Ga yicatecãraisṍri uté chósi tome dáringai dara: 'Cuchiso gagájnia uaté quene basája dáringai eduguéjna iji cuchiso guichaya gadiógode udore ore quigade. Ga a uté isocade quedéjnapise jne iji dáringai eduguéjna, ga isocade chayúji ñane ome eduguéjna bajade udore ore. Cuchiso guichaya gagájnia uaté jeta basája dáringai eduguéjna iji erámi udé enga a josipíeranguipíse uté jne enga a jé ca posongaquérique déji ajénique jne ome erámi unirísonique. Ga aringaquéode a jiépisi iji erámi údode enga cho jeta erámi unirisórone ore cho caru iji uté jmainie ga chácariji ore údode ome cutejmane datuátiga.

²⁴ Cuchiso gagájnia uaté uedie uje chejna yijmanáyone ga imone u eduguéjna cuchábode uje chejna yijmanáyone. Uje eduguéjnane unojo qué ore déji dáringane eduguéjna uje ore chejna yijmanáyone ga uñai a dépoji rĩ, ga a jé uté cãrápisa re ome bajade udore jne. Eduguéjnane udore uje ore chejna yijmanáyone, ore quigaminóri a doi pocaningai ome eduguéjna gadiótigo iji udore ore, ga sué ore gai jne jeta chácariji udore ore jogadi.

²⁵ Ga eduguéjna ejoi uté a chietáyime Dupa Pujnuéngaisṍri uté jne. Ga a uté doi pocaningai ome Dupade urása cásodicáite ore jne rĩ, uje gaidi u gu jeta chejna Dupade urasade iji udore, udore. Ga a chetingarápo rĩ jeta chécãre Dupade garéngone cucha quigode, jé aja ore jnusinamánone dire puyácho. Mu a Dupade urasade udore ore déji uté jmainie jne, jé aja siqueré gadióguedie jeta nóna pei.

²⁶ Mu uté a chuniname eti dimane Jnani Jnupabejna Casé Eyúgojma uté iji dayaripi cuchábi jeta chingo uté gajnéone pujuyaquéo ome uté. Ga jé u uje pijnimique uté cutejmai etotigué tiji, ga a parãte uté aja quedéjnane jne.

²⁷ Ga a eduguéjna ponai iji erámi údode, jé aja ore etotiguéode a peranome Dupa Pujnuéngaisṍri urasapísode ore jne enga pijoque jne udore ore ingoningájnai iji erámi údode jnese. Ga eduguéjnapise ore, enga ore úringane eduguéjna jé ca eruénique erãpe cuse. Ga erámi unirisórone a ore chimesẽre ore jnese jne, enga a ca ore chetaque ore jne ome ore úringane peduguéjna, enga a ore doi ore ojningane cucha jnese jne iji dedáyode jnese iji erámi údode jnese.'

²⁸ "Yujúdode udore eruei u udé. Daniel uyu u uje áyuguhebátaque yu ga yiserẽrája iji udore jmainie, mu que yatata udore quigode ome yujórique ayoré gotique. Gusu uje yurúsãre udore quigode iji aode udojo."