Daniel 6 - Dupade Uruode

Ore na Daniel aja caratedie gari iji ejopié nanique

¹ Ore eduguéjnai uje i tu Darío pésu dáyipiedie nanique ome cutejmai daniri uté údode, jeta chimáta eduguéjna ponáyone ore jeta ore batigai chise 120, ga chisi ome udore úringane eduguéjna ome ore jnese jeta ore chidójnanga cuchade aja quigode iji ore uniri iji udore, udore.

² Eduguéjnai Darío pésapo dáyipiedie rĩ ujetiga chicha eduguéjna gadiótigo aja eduguéjnane udore ore yui uje 120 ore nanique. Gaidi u gu ujetiga eduguéjna gadiógode udore tangári ore enga chajnerame ore ojñane ome eduguéjnapísi uté, ujetiga jé ca eduguéjna cuchábi Darío uté chisõre iji daniri údode gatuaque. Daniel u eduguéjna gadiógode udore uñai to nanique.

³ Eduguéjnai Darío uté chajire eduguéjnane udore ore uje 120 u ore nanique, jé aja Daniel jorane ore, mu gusu irajatai tu Daniel uté ome ujode eduguéjna udore ore jnese. Ga chicha Daniel uté aja eduguéjnane udore iquei jnese. Enga Daniel u uje suse cuchade guio jnese iji ore uniri uté údode jnese.

⁴ Ga eduguéjna uñane ore chucué Daniel ba gajnetígo cucha uje uté úringai eduguéjna chãraja ore gu. Mu Daniel ujode eduguéjna udore que ore chiraja Daniel iyogué gajnetique cucha, uje Daniel angoninguite guesaque ome cuchade, ga pésupúsu cuchade aja quigode iji dáringai eduguéjna uté.

⁵ Mu eduguéjna uñane udore ore chojninga: "Que yico Daniel uté ba gajnetique cucha mu cucha chojmarai u uje jé cãra dangureni ome yocangurenone.

⁶ Uje eduguéjnane udore ore chiraja dáyipie qui ga ore tibágui eduguéjnai Darío jeta ore catecã́ri. Enga ore chojninga: –¡Eduguéjná, Darío á, picotaque opejã ua ome yoque iji deréjna pitade!–

⁷ Enga ore chojningame eduguéjnai Darío uté: –Eduguéjnane uyoque iji yocuniri udé údode e yimátago yógaja ñane ga yocáyipiedie qui chojmára iji jnumi ujetiga dirode chise 30 jne, ga ca pujuegate ome gosi jetiga catecã́ri danguretique dupa jne, mu a gusu ua jne, yoqueduguéjná, jeta ore catecã́ri ua ome dameserãtígo cucha. A jé ca putaite jnani uñeque to jne rĩ ome cuchárique, mu gusu ua jeta ore chutai ua ome cuchade jnese. Ga a yingongo udore aja yocuniri údode jnese jne, mu ujeta gosi jé ca doi quigode to jne, enga a parãte gosi aja caratedie gajnei eruque uté jne.

⁸ Ujetiga bajéode jé u yocáyipiedie quigode to ga purusãraque yocáyipiedie quigode udire jne. Ujetiga amesẽre ga acha bei aja to. Yoquigaidi u gu ujetiga jé ca gosi chécãre yocáyipiedie udire quigode, jé aja jeta ca gosi chĩro udire quigode to. Uje pérsiagosode, médiagosode ore jmapié u uté gu.–

⁹ Eduguéjnai Darío chimesẽre ore áyipiedie ga jĩraque chicha dei taja.

¹⁰ Daniel chiraja uje ore áyipie chojmára ome daréngone iji Daniel jeta gosi jé ca catecãrápoi danguretique Dupa rĩ. Chirajápo uje eduguéjnai Darío chicha dei aja uté to rĩ, mu Daniel que cha catecã́ri dangureni Dupa gotique. Ga Daniel chicai daguíjnai, ga chacája damochápidí ga chuchẽre daguíjnai bocadi gai uje déji guedé garani yui uje déji Jerusalén casicaite yui. Ga chichaga dagataidie aja jnumi jetiga catecã́ri dangureni Dupa jeta chicota uté ome úringai cuchadaté. Daniel jé isocai u dasocai gatuaque uje icotai u Dupápisi uje catecã́ri ga gadioque iji deréjnane jnese.

¹¹ Ga eduguéjnane udore uñane ore chise Daniel iji iguíjnai uje qué catecã́ri dangureni Dupápisi iji uté.

¹² Ga jĩraque ore chayóji eduguéjna cuchábi yui jeta ore chingo. Ga ore chojningame: –Yoqueduguéjná, e purusãrai báyipiedie quigode diríca jeta chise 30 días ga ca gosi catecã́ri danguretique dupa, jé aja ujetiga ca chutai cuchárique iji dajõrárique jnani, jeta gusu ore catecãraini u ua. Mu ujetiga gosi cãra dacatecãraitique ga parãte gosi aja caratedie gari iji erui uté. Uje e pirajai páyipiedie udire jnese iji yocuniri údode. ¿Jé ũré yógome udire a?– Eduguéjna cuchábi Darío chajnai ore uruode ga chojninga: –Jé u arĩa. Uje e yurúsãre yi iji diríca, páyipiedie udire, ga e que toc jeta pironguei udire, jeoga pecãra udire quitique. Uje médiagosode, pérsiagosode ore uyoque yoquisocai u uté gu.–

¹³ Ga ore chojninga: –Yoqueduguéjná, Daniel uté que chuse cuchárique guio gotique, ga que dopoi báyipie casidé quigode to uje paréngone cucha déji, mu jé isoca dasocai uje catecã́ri danguretique dupa gotique ga gadioque iji deréjnai.–

¹⁴ Uje eduguéjna cuchábi chudute ore ojñane udore ome Daniel ga áyuguhebátaque ome Daniel, ga chucué dáyipie ome Daniel iji diri tuté údode, jé aja guedéjnoringái. Chucué dasocai jeta chiqueta Daniel, mu que togome.

¹⁵ Mu eduguéjnane udore tibágapoi eduguéjna cuchábi gaté rĩ, ga ore chojninga: –Barajapise pérsiagosode, médiagosode yoquisocade, uje e purusãracho páyipie quitique, enga e que toc jetiga gosi doi ga chĩro udore quigode gaté enga que togápo jeta pecãraque udore quitique rĩ.–

¹⁶ Ga jé u uje eduguéjna cuchábi chiroque ore aja Daniel yui jeta ore chijnája eduguéjna cuchábi uté ga ore tṍra Daniel aja caratedie gari iji ejopié. Uje cáma ore tṍra Daniel aja dajuyaquei ga eduguéjna cuchábi catecã́ri Daniel bajaque, enga chojningame: –Daniel, ¡yipésupú ga bangureni Dupa chiqueta ua gajiné jõ! uje que amorase uté iji bajei ga bapésu ojningane cucha jnese.–

¹⁷ Uje ore na Daniel aja caratedie gari iji ejopié ga ore doi cucarané ga ore suru Daniel jogapié uaté ejopié piagoi ome cucarané uaté. Ga eduguéjna cuchábi ujode eduguéjna ore chanire odobe aja Daniel pié uaté ejopié joride uje pérsiagosode, médiagosode ore uniri i déji uaté uje ore áyipiedie jé chojmára ome dáyipiedie quigode diríca gu. Ga eduguéjna cuchábi chanire dajnépise odobe aja Daniel pié uaté ejo joride te rĩ ga imoi u uje que pucherángai ejo uaté jeta jé ca pingoque eduguéjnai uté bajac.

¹⁸ Uje eduguéjnai cuchábi chicáji daguíjnai cuchábi, enga áyipie que déji chagúrique, enga que áyipie dépoji dajnamáitique cucha rĩ. Jé aja uje que moi déji eduguéjna cuchábi uté edodie rĩ iji dejai údode.

¹⁹ Ga eduguéjna cuchábi uté chobéri Daniel gajnei casé eruque yui.

²⁰ Uje eduguéjna cuchábi e chirõre Daniel gajnei eruque cuchape, ga jĩraque tibidája yui, uje eduguéjna cuchábi ajei jĩraque caco ome dajnusiétigai. Ga chojningame dabijnane: –¡Daniel á! ¡Dupa Uecai iroguipísi ua yá! ¿Ama bangarádejnai Dupápisi chãraque ua ome caraté chagudie a?–

²¹ Ga Daniel chajnai eduguéjna cuchábi pijnane ga chojninga: –¡Picotaque opejã ua, Yoqueduguéjná! ¡Ga a jé ca báringai yoqueduguéjna eruénique cuse jne iji deréjna pitade jnese!

²² Yangureni Dupa chiroque daroi gaté unirísõre aja yu jeta jé ca caratedie udire chósi ti iji yu, uje Yangarádejnai suru caratedie udire pijnanone udore gu. Dupade chiraja gu uje que yatique gajnareque gotique ome. Jé aja ua, Yoqueduguéjná, que yatique gajnareque ome ua gotique to.–

²³ Ga jé u uje eduguéjna cuchábi Darío nína re ome Daniel uje qué eca, ga jĩraque chiroque ore aja jeta ore chijnime Daniel iji ejopié. Uje ore chijnime Daniel uté ga que ore chise caratedie úsugurupiátaque iji gai. Daniel uté angureni u dangureni Dupa ga que taque gotique, jecute Dupade chiqueta uté nanique iji gajnéone pujuyaqué.

²⁴ Eduguéjna cuchábi Darío chiroque darógode ore aja jnanione udore ore yui uje ore ucueque Daniel ba gajnéone cucha diríca, ga ore nóna dacotedie, dabode ore jeta ore tṍra ore aja caratedie gajnei eruque uté. Uje cáma ore chise erui uté chaquipie mu jĩraque caratedie chachẽre ore ga chajnangarase ore aja dejode.

²⁵ Ga jé u uje eduguéjna cuchábi Darío uté churúsãre darusarane ga chojninga: "¡Yipésupú ga pajesereringai, pijóningai déji uaque jnese iji uaquedáyode jnese jõ!

²⁶ Uje yurusarane udojo gajnengórone u uaque iji punirone údode jnese iji yuniri udé údode ga yósi tome uaque: ca adojnóchoja Daniel angureni Dupa uté, ga beyoi uté adode to. Uje yarecujáichi gu ome uaque. Ga yicotaquéode u udojo ome Daniel uté angureni Dupa uté to: "Dupade uté uje déji gaté ga Dupa Uecai uté. Ga uté jé jogate erã́tique ga que chise deruénique gotique. Ga uté úringai eduguéjna cuchape a jé ca chisápo deruénique jne rĩ. Ga úringai ujopíerãque a jé ca chisápo deruénique to jne rĩ.

²⁷ Piquetangore uté enga chibéro pajnéone pujuyaquéo ome gajnesórone. Ga uté pésu cucha pimojmane uje yimóngo iji gaté, jé aja jnumi jogonórone cucha uje yimóngo udore, ga yitijago udore jnese. ¡Uté jé u uje chiqueta Daniel ome caratedie úsugurujnáne diríca!"

²⁸ Daniel uté jé isoca uje eduguéjna cuchape to iji eduguéjnai Darío uté iguíjna cuchábi uté to. Uje eduguéjna uñai Círo basája eduguéjna Darío jogadi uje pérsiagose eduguéjnai uté, ga iroguipísi jé u Daniel uté to.