Daniel 4 - Dupade Uruode

Eduguéjna cuchábi Nabucodonosor chise dáringai ayuquiso nanique ga gusu iji dajesúode ome darasade

¹ Chise diri nanique uje eduguéjnai Nabucodonosor chogota daricáidode cucha ome darasade ore jeta ore churúsãre uté júdode darique quicho. Ga chósi tome ore: "Eduguéjna Cuchábi uyu uje yósi tome uaque: Yipésupú ga pajesereringai déji uaque jne jõ, jé aja jeta jé ca cuchárique chonapo uaque uñeque jne rĩ. Yojningane u uáguiji uaquedáyode, jé aja erámi udé jogosórone uac, jé aja uje uacaruode cãra ome ñane to. Uje uacajnecho yuruode jnese.

² Uje yipota jeta arajáyo to uje Dupa Pujnuéngaisṍri ipesudode cucha ome yu cucha pitijabácho udore ome yu ica.

³ Uje cuchadaté uté ipesudode cucha ome yu. Uje cucha pimojma uté ipesudode cucha ome yu. Uje eduguéjna cuchape Dupa uté to, ga uté ujopié pijógome yoque, jé aja disi ejórigo, jé aja ore ujórigo disi ejogatéo. Ga Eduguéjna Cuchábi Dupa uté úringai eduguéjna cuchape a ca eruénique cusapo jne rĩ."

⁴ Ga jé u uje eduguéjnai Nabucodonosor chatata daricáidode cucha quigode. Ga chojninga: "Nabucodonosor uyu uje yo paráguiji yiguíjna cuchábi ajei ica. Ga que cuchárique chona yu gotique ica. Yitoji yajnéone cucha udore gai enga sué yibai.

⁵ Mu chise dejaque uñai uje yimo ga yĩ́cara yurigode uje yĩ́cara cucha pirosobátique. Ga yĩriji. Mu uje yimopo rĩ ga jé isoca uje yĩ́carapo yurigode ga choqui guesi ome yu uje yipáñaji udore ome yedodie ga chajuque yaguté. Ga yo cuyuque ga yáyipie déji udojo quigode.

⁶ Iji durasé ga yibidi irajatade, daijnane ore iji Babilónia údode jeta ore di enga ore chucué yurigode udore imóringo cucha.

⁷ Ga jé u uje irajatade, daijnane udore ore di uje que cuchárique piragome ore. Jé aja guédodie irajasórone, ore di to. Ga ore tṍraji yocuniri udé údode jnese. Ore chetingare jóroque yurigode úringane pirajacho mu que ore chijnime ãrírique gotique."

⁸ Ga Nabucodonosor chojninga: "Ejoi tu Daniel jetiga basája yiquei to iji yiguíjna cuchábi ajei. Uje yĩcarai tu Beltsasar aja uté nanique, uje yangurenone dupa jõrai tu uté. Daniel uté u uje jecucha Dupa gotique ujopié nóna aja quedéjnane. Ga yingo yurigode aja uté.

⁹ Ga yósi tome: 'Beltsasar á, obiréjnapise ua ome daijnane, irajatade ore jnese iji yuniri tudé. Yiraja uje barajatigai sué udore ore irajatigade gai gu uje Dupa gotique ujopié u uje nóna ua aja quedéjnane. Yiraja uje baraja cucha pirajágode gu uje uté guẽrate barajatigai ome ua. Ga angáramí yuri casodé quigode to jne uje a qué yingo ua, mu jeta e yiya yatata ga jé u jeta ango yurigode imóringo cucha ome yu.

¹⁰ Yurigode quigode u udojo diríca iji dejai. "Uje yĩ́cara pórechoquí umarejna iji garai gatócoro.

¹¹ Uje yuricaidé pore uaté qué jno dabubíe údi aja gaté ga pajei quérã to, ga poredaté uaté iji pajei. Ga uaté ójo chise gatajnoquei, ga pimongué uaté iji gaté uje yoríco gu ga erámi unirisórone ore chimo jnese iji gaté.

¹² Ga ueradé poria uaté acarane jé aja adie uje a ayorérique tagu ga que petegue uaté adie ome unéningai, jeta erámi unirisórone ore tagu uaté adie jnese iji danirone údode. Ga cuchisode iji erámi údode jnese ore cho daburúdiji uaté uburúdi ga ore cho dajñare iji uaté uburúdi. Jé basa ga chugúpẽre ponai iji erámi ore pésu daguíjnane iji poria uaté jmanecade. Ga erámi unirisórone ore iji erámi údode que ore chuseque poria uaté, uje ore agutíyabáde uaté gu."

^13-14 Ga Nabucodonosor qué jno daruode údi ga chojninga: "Mu igasique ga yimo gaté unirísõri iji yenominone uje iringui pujnomei. Uje tṍraji gaté ga chinguíra dabijnani aja erámi enga chojninga: '¡Acuráso poria uaté ga aquesúyo jmanecade aja jnumi jnese jne! Enga ajnicho acarane ga angaráño adie jogadi ome enga a ducarané adie udire jne. Cuchisode uáguiji uaté uburúdi, acáyoji quedéjnane ome uaté, jé aja chugúperenie uaque uje uacaguíjnane déji uaté jmanecade acáyoji uacajesúrigo.

¹⁵ Mu uaté pajei jé dóji jnumi jé aja poria uaté ero. Mu agacho poria uaté ero ome ojnaquéro umáreringui jne uje pipesudéji bronce, hiérro ore, ga agacho uaté iji erãp ijóningai ujade. Yojningápisi u jnanírique uje a uté cho cuchisode jne ga a tagu erãp ijóningai iji dejode ga a guejnatui yore uaté gai to jne iji durasedie jnese.

¹⁶ A uté áyipie nóña ga edojise jne, ga chose eti cuchisóji re jne. Ga a uté ibetaringuei chejna siqueredie jne jeta garijiti.

¹⁷ Dupade jé u uje chiroque datocaidode yógaja erámi jeta yatatago ujuyaquéode ome peduguéjna cuchábi uté jne. Dupade pésu gu jeta jnanione ore chiraja uje Dupa Eyúgojma uté jé doi dáyipie quitígome eduguéjnane ore iji erámi údode. Uje Dupade u uje ichajapite eduguéjnane aja ore úringai eduguéjna. Jé aja ayorérique, jeta ayoré poritaque marínga, Dupade ichajapite eduguéjnarique jogadi ga jé eduguéjna cuchape uté gosi. Uje a jé ca ibijoque uté iji daniri mu Dupade a ajéo ga jé ipesute úringai eduguéjna cuchap.'

¹⁸ "Nabucodonosor uyu uje yurigode u udojo diríca. Beltsasár, be ga atata yurigode udore quigode ome yu, jé aja imóringo cucha. Uje que irajatade uñeque iji yuniri chiraja udore quitique gotique. Mu yangureni u ua jeta araja quigode uje Dupa pangureni ujopié déji ua."

¹⁹ Ga Nabucodonosor chojninga: "Uje yiya yatata yurigode ga Daniel uje yĩcarai tu Beltsasar aja uté, ga uté edodie jarobei ome yurigode udore quigode. Uje a Dupade chingo udore quigode aja uté áyipie jnese. Mu uje eduguéjnai uyu ga yojningame Daniel uté: 'Beltsasár, jé ca o báyugu ua ome yurigode udore quigode. Jé ca agutu ua ome jeta atata udore imóringo cucha ome yu.' Ga jé u uje Beltsasar uté narare ga chósi tome yu: 'Urénga, barigode udore, omi tu jeta imone u bamajosórone ore jne, yoqueduguéjná, ga ca imoi tu ua jne.

²⁰ Mu a ca yipógu ome ua jne. Baricaidé uaté pore yoríco imoi jé u ua, Yoqueduguéjná, uje que pimongue uaté abubíe yoríco iji erámi údode ga ua jé u uaté.

²¹ Uje poria uaté acarane ueracho ga adie cuse ga piboté uaté adie ome ayoréode ore jnese iji erámi údode. Uje cuchisode ore moji uaté uburúdi ga chugúperone pésu daguíjnane iji uaté jmanéronie.

²² Yoqueduguéjná, baricaidé uaté pore jé ua u uje bajneque erámi udé péode ga que pimócho. Ga e bese báringai picotaque ome erámi unirisórone ore jnese. Uje que eduguéjna uñeque déji erã́tique jeta jé cho ua. Bamenuringuejnai jé u poria uaté abubíe uje bamenuringuei que eruénique erãpe cuse. Ga jé isocai tu iji erámi údode uje ore cho deduguéjna iji ua ga ore chedu ua jnese.

²³ Yoqueduguéjná, bamoi u gaté unirísõri uje tṍraji gaté uje uté jute Dupade ujuyaquéode ome poria uaté. Uje badute uje chojninga: 'Aquesúyo poria uaté iji pajei, ga ejnáño acarane, adie ore iji poria uaté.' Ga badúdapo rĩ uje chojninga: 'Poria ero jé dóji jogadi mu agacho ome ojnaquérodie uje pipesudé iji bronce, hiérro ore, ga jé jogate dajogadi iji ugarabia ujade iji garai uté ajei. Ga guejnatui yore uaté gai iji garai uté ajei, jeta nóna cuchiso aségode aja quedéjnane ga tagu ugarabia iji dejode jé aja siqueredie jeta gare iji ti.'

²⁴ Mu Yoqueduguéjná, Dupa Eyúgojmai que ujuyaquéode udore gajneto pojnaque gotique, mu ujuyaquéode udore gajnesṍri jé upúsu ua.

²⁵ Mu, Eduguéjná, a angara bajogatique ome barasade ore jne, ga bajnui a u cuchisórique jne. Ga a agu ugarabia to jne, ga bopise aquirájnarique jé aja jeta guejnatui basája babai iji durasé ga a pacata ua ome uté jne. Eduguéjná, a basocai uté jne aja siqueredie jetiga gare iji ti. Ga a quene araja jne uje Dupa Eyúgojmai etotiguei jiei ome ayoréode ore iji erámi, ga jé ipesudei dáyipie quigode ome peduguéjnane ore iji erámi to. Enga a araja jne uje Dupade u uje ichajapite ua aja báringai peduguéjna.

²⁶ Peduguéjná, uje bẽ́cara poria paquesu, mu que pijnimé uaté erode ore uje pigarique uaté ome ojnaquérodie, ga a imoi u ua jne jeta esápo báringárique peduguéjna cuchape rĩ, jeta araja uje Dupade u uje ichajapite eduguéjnane aja ore jogadode jeta jé ca ore chicota re ome dáringáringo ayorédatéo.

²⁷ Eduguéjná, jé yo baquique jeta angári yu ga a jé ca baricáidode cucha udore chimate ua aja jnumi jne. Ósi tome badode ga jé ca apésu cuchade uje gajnarécho, ga ajuse beo. Jeta abéro ua ome josipíerãi, ga áta cuchade aja jmatágode ore ga a ore chimo bosongaquei gajnetígo cucha to. Jeta be yojningane udojo cucha quigode ga a pajesereringai déji ua to jne, ga a jé bayarite bayaridi iji báringai eduguéjna uté.'"

²⁸ Ga eduguéjnai Nabucodonosor júdode daricho e pirajaque quigode jnese. Enga urigode udore tocade jnese ome uté.

²⁹ Uje siqueré chojmára iji eduguéjna cuchábi uri casodica yui, ga chisõre iji daguíjna cuchábi ójo ga catecã́ri daríjogonórone.

³⁰ Ga chojninga: "Idáidaté yoquidai Babilónia udé, uje yipesute udé ome cutejmai yetotiguejna. Ga idáidatéi u ome pidáyode jnese iji yuniri udé údode. A yitoi jne, mu yijíñome yipesudi udé pidai iji yiquigade jeta jé ca pamurañaque yu ome guidai tudé, ga a jé yijogate yurasade ore áyipiedie jeta ore chajire guidáidaté cuchábi udé."

³¹ Uje eduguéjnai qué déji dáringai dara gai, mu chudute darade uje tṍraji gatajnoquei uje chósi tome daruode: "Eduguéjná, Nabucodonosor á, cángaramí yuruode udojo uje báringai eduguéjna cuchape eruei e u ome ua.

³² Ga a angara baqui ome barasade ore gajiné, ga bajnui a u cuchiso norátique gajiné. Ga a quene babosode u ugarabia jne ga quene bo aquirájnarique jne jé aja siqueredie jeta gare iji ti, jeta araja uje gusu Dupa Eyúgojmai u uje sué cuchade gai jnese iji punirone údode jnese. Uje ichajapite gosi aja úringai peduguéjna ga jé ichajapite gosi aja, jeta ajéo ome gosi."

³³ Deréjnai jé u uje pirajaque Nabucodonosor gajnéone Dupade ujuyaquéo quigode, uje e pududicho udore quigode ica. Ga Nabucodonosor e chise dáringai ayuquiso ga gusu iji dajesúode ome darasade. Ga tagu ugarabia aja dajesúode ga jé cho aquirájnarique aja dajesúode. Jé aja uje guejnatui mararatája guesi iji uté gai. Ga ojoi sué, jé aja úsugurúode uje cho arori ome dásuguru yoricode.

Chise diri nanique uje eduguéjnai Nabucodonosor chajire gatajnoquei ga quene eca ome úringai ayuquiso

³⁴ Ga Nabucodonosor chatata darigode úringane pirajacho quigode uje chojninga: "Uje e pirajaque yurigode imone cucha quigode uje chise siqueredie uje gare iji ti, ga Nabucodonosor uyu yajire gatajnoquei ga quene yiqueca. Uje yiya yúringai ayuquiso ga quene yicotápise Dupade Eyúgojmai uté. Ga yósi tome yicotaquéode ome uté: 'A jé ca Dupa Eyúgojmai ujopié eruénique cuse jne. Ga erámi unirisórone a ore ape disi ejórigo a ore cho deduguéjna iji uté to iji erámi údode jne iji daníningo. Jé aja udore ore ape disi ejórigo to, a ore chopo deduguéjna iji uté gatuaque to jne rĩ.

³⁵ Erámi unirisórone ore uyoque iji erámi údode cucha bisideque yóguiji erámi udé ome uté. Uje pésu dojningane cucha quigode jnese iji erámi udé, jé aja gatajnoquei to uje pésu dojningane cucha quigode to iji gaté. Que uñeque déji jeta chaquĩ́ra uté ome cutejmai etotigué. Que uñeque déji jeta botare uté ome ipesutique cucha, jeta gosi chojningame uté: '¿Gotique uje bapésu udé?'

³⁶ "Uje quene yiya yicota Dupade ga quene yáyipie eca, uje e ayoré pórecajnapó yu rĩ. Ga Pangaráni Dupade chatirépo yúringai eduguéjna yibai te rĩ, ga yurasade ore chicotápo yu rĩ, ga jé u uje ore chopo dasuté iji yu rĩ. Ga yiróquegatéode ore tibágapoi yu rĩ, ga ore dopoi yiroquéode rĩ. Ga jé u uje yipésapo cuchade aja quigode rĩ iji yuniri. Ga jé u uje yúringai peduguéjna chajnera dádi ome yurasade ore jnese. Ga ore dosóñime yu jnese, uje que cho uqué casodica gotique.

³⁷ "Nabucodonosor u yu uje yicota Yoqueduguéjnapísi uje déji gaté. Uje uté pésu cuchade ga ueracho, ujeta cho dajuñame gosi ga jé cho dajuñame, uje ũrepise ome ajirigode yocacho udore gu. Mu ujeta gosi icota jé u re, ga gosi chuse deo uje ũré tu Dupade ome dajirigode yocacho gu. Ga chirajápo rĩ jeta chosi gosi iji jnumi."