Daniel 2 - Dupade Uruode

Eduguéjna cuchábi Nabucodonosor urigode cuse nanique ga catecã́ri jórogui iroque irajatade jeta chiraja imóringo cucha

¹ Uje Nabucodonosor uté chise siqueré gáredie ome dáringai eduguéjna nanique ga urigode cuse nanique, ga cho dáyugu ome darigode udore quigode. Ga moi deroco ome uje chucué dáyipie quicho iji dajei ome urigode udore imóringo cucha.

² Ga jé u uje ore eduguéjnai uté tibidi irajatade, daijnane ore iji daniri údode jeta uñeque chatata urigode imóringo cucha ome. Ga ore tṍraji dajñarenie jeta ore basája eduguéjnai uté iquei.

³ Ga Nabucodonosor uté chojninga: –Yurigode cuse que. Ga yáyipie déji jórogui jeta yiraja imóringo cucha.–

⁴ Ga irajatade udore ore chojningame deduguéjnai: –¡Picotaque opejã ua, Yoqueduguéjná! Be ga atata barigode udore quigode ome yoque jeta yatatago imóringo cucha ome ua.–

⁵ Mu eduguéjnai uté chojningame daijnane udore ore: –A ca yingo yurigode quigode ome uaque jne, mu angoño yuriso quitígo ome yu bajaque jeta arajáyo, ga quene jogadi u ujetiga atatayo imóringo cucha ome yu. Mu jetiga jé ca arajáyo yuricáidi uqué cucha gotique ga a yajuque uágaja jnumi jnese jne, ga a yujépo uacaguíjnane aja jnumi to jne rĩ.–

⁶ Ga eduguéjnai chojningame ore: –Atatayo yuricáidi uqué cucha ome yu, jeta arajáyo quitique ga a yẽrája uaque jne. Enga a eso uacáringáringo atácho jne jé aja uacáringáringo picotacho to. Beyoi bu, ga atatayo yuricáidi uqué gotique ga angoño imóringo cucha ome yu.–

⁷ Ga irajatade e ore chojningápo rĩ: –Yoqueduguéjná, be ga atata barigode udore quigode ome yoque bajaque ga jé u jeta yatatago barigode imóringo cucha ome ua jne jeta atata udore bajaque.–

⁸ Ga eduguéjnai uté chojningame irajatade udore ore: –Uacagaidi u arĩa jeta yáyipiedie chicai sañeque ome yuruode ucode ome uaque jeta yajuque uágaja jnumi enga jé u uje uacacatecãchoi yu ome uacachérecheréringane. Mu que arajáyo yurigode udore quigode gu.

⁹ Jecute yósi tome uaque: jĩraque atatayo yuricáidi uqué quigode ome yu, ja seca yejna uaque jnese jne ga uacáringáringo chuque cho ñane ome yu. Mu e yiraja uje uacagaidi u jeta yatata yuricáidi cucha ome uaque ga a jĩraque apésorásu imóringo cucha ome uacarupatáringane, jé aja uacaringaquéringo, jeta jé ca yujé uaque. Mu uaque u jeta atatayo yuricáidi cucha ome yu. Ga jogadi u uje quene pijoque uacáringane irajatácho ome yu to, jé aja jeta yangári uacajútigo udore ome yu ome yurigode imóringo cucha.–

¹⁰ Mu irajatade ore chojningame ore eduguéjnai uté: –Yoqueduguéjná, que uñeque déji erã́tique jeta chiraja cuchárique bisideque eti ca pute. Jé aja uje que peduguéjnarique déji erã́tique jeta chutṍri irajatátigo, daijnáringo ore ome daritígo imóringo cucha jeta cáma uté gosi chatata daricáitique quigode bajaque.

¹¹ Peduguéjná, urénga bojningai uté ome yoque chácari yocúdode uje que yirajágo quitique. A dupárique iji toniñeque chirajárase udore quigode, mu que déji erã́tique udé to.–

¹² Uje Nabucodonosor chudute ore uruode udore enga ájningarãque ome irajatade, daijnane udore ore. Ga jé u uje chiroque dáyipiedie aja daniri údode ujetiga ore chujé irajatade, daijnane ore iji ore uniri Babilónia údode jnese.

¹³ Uje ore chatata eduguéjnai uté áyipiedie quigode, ga ore chucué Daniel, jorane ore to jeta ore chujé udore ore to.

Dupade chatata eduguéjnai urigode quigode ome Daniel iji dejai, ga dire uñai enga Daniel doi enga chatatame eduguéjnai

¹⁴ Mu diri di jeta chuque irajatade udore ore jnese ga soldádode ore eduguéjnai uje uté i tu Arioc di jeta jno Daniel, jorane ore údi to jeta chujé ore to. Mu Daniel catecã́ri uté ga chusípise daruode guio ome, jé aja uje pirajatigai irágu Daniel uté áyipie.

¹⁵ Daniel chojningame soldádode eduguéjnai uté: –¿Gotique gu a uje eduguéjna cuchábi chiroque dáyipie údi aja daniri údode jeta chejna irajatade ore? Uje a ore eruei u jnese jne.– Soldádode eduguéjnai Arioc jĩraque chajnai Daniel uruode ga chingopísa udore quigode ome Daniel ore.

¹⁶ Ga jé u uje Daniel tibágui eduguéjna cuchábi uté ga catecã́ri enga chósi tome daruode: –Ujeta ajuéga darai ome yu ga yatata baricáidi cucha ome ua ga yatatapo baricáidi uté imone cucha quigode ome ua rĩ. Mu a jé ca jĩraque yingo ua jne. Jeta yejna dire chojmarárique ga a yisápo ua iji de rĩ ga quene yingo barigode udore quigode ome ua jnese.–

¹⁷ Uje Daniel chajni ga chingo cuchade udore aja dajorane ore uje ore íode u Ananías, Misael, Azarías ore.

¹⁸ Daniel gaidi u gu jeta ore catecã́ri Dupa ugurui uje déji gatajnoquei ome raque jeta chingo eduguéjnai cuchábi urigode quigode ome Daniel uté. Jeta jé ca ore chujé udore to ga jé ca ore patĩ́ora irajatade udore uje ore uniri tu Babilónia.

¹⁹ Dejai uté jé u uje eduguéjna cuchábi uricáidi cucha choqui guesi ome Daniel uje que irajatade ore chiraja quitique diríca, jé aja urigode imone cucha. Dupade chingo eduguéjna cuchábi urigode quigode jnese ome Daniel uté iji Daniel urigode to. Daniel uté chicota Dupade iji gaté uje chingo eduguéjna urigode quigode aja.

²⁰ Daniel icotaquéode ome Dupade júdode u udojo nanique: "Picotaquei opejã Dupade ome yoque, iji deréjna pitade jnese. Uje pirajatigai gãrapi tu uté, jé aja cutejmai etotiguei.

²¹ Uje ua u uje bapésu cuchade ga déji erámi gu ua. Ga ipesute siqueré eruei jé aja esoi eruei ore. U to uje ichajapite pasutedie aja ore jogadode, mu jé upo rĩ uje ijnimique udore ore iji ore jogadode. Ga guẽrate irajatade ore irajatigai ome ore, jé aja áyipierane ore uje guẽrate ore áyipie quigode ome ore to.

²² Dupade upo rĩ uje érãtique chirajaque cucha pipoguiétique gotique, ga cucha pipoguiétique chácari te paque ome uté, uje pésu úringai pirajaque ome jnanione ore, uyoque. Ga chiraja cuchade jnese iji utataringuéone uje dírecaringuéi jé u gu.

²³ Dupade á, que gusu jeta yo yangarániji ua, mu yocáquiode ore angaráni jé upo ua to nanique rĩ. Yacãre babai gu uje bẽrate pirajatigai, petotiguei ore ome yu, ga a ca yiya yicota ua jne. Uje bango yocutaidi uqué aja yu ga e yiraja eduguéjna cuchábi urigode quigode gu ua. Yojningai u uje eduguéjna cuchábi chopise dáyugu ome que."

²⁴ Mu uje dire ga Daniel tibágui soldádode asuté uaté uje i tu Arioc, uje eduguéjna cuchábi chiroque ore aja irajatade diríca jeta ore chujé ore iji Babilónia uté údode jnese. Daniel chojningame soldádode asuté uaté: –Ca ajéyo irajatade iji uacaniri udé, mu ajína yu aja eduguéjna cuchábi Nabucodonosor uté ga a yatata uricáidi cucha ome jne, jé aja urigode imone cucha.–

²⁵ Ga Arioc uté que chajirape cuchárique ga jĩraque nóna Daniel aja eduguéjna cuchábi uté. Uje ore chise eduguéjna cuchábi uté iji jogadi ga Arioc catecã́ri ga chojningame: –Yijína yoquisa casodica judío uñai aja de jeta chatata baricáidi cucha ome ua, jé aja barigode udore imone cucha jnese.–

²⁶ Ga eduguéjna cuchábi catecã́ri Daniel mu que chĩ́care Daniel aja gotique mu ĩcarai tu babilóniagosode ipesudi i aja ga chojningame: –Beltsasar á, ¿arajárase yuricáidi cucha gotique, jé aja imóringo cucha?–

²⁷ Ga Daniel chojninga: –Irajatade que ore chijnime barigode udore ãrírique, jé aja daijnane ore.

²⁸ Mu gusu Dupápisi uje déji gaté, enga que cuchárique déji jeta piragome uté. Ga chatata barigode udore quigode ome yu que, ga a yingo cucha tocachugode ome ua jne iji yoquiquéode uje barigode udore imone cucha u gu.

²⁹ Peduguéjná, uje e baterẽta diríca iji bamochápi, mu moi derocome ua diríca. Enga jé u uje bejna báyipiedie aja cucha piqueminórone jeta tocade jne iji yoquiquei. Ga jé u diríca uje Dupápisi uté chisi ome moi ome ua ga chisiapome barigode udore ome ua to rĩ. Dupade uté u uje chiraja cucha piqueminórone jnese, ga uté u to jeta chingo udore quigode ome ayoréode.

³⁰ Que gusu ua ome barigode udore diríca, uje yurigode jé u baricáidi cucha to iji dejai tuqué, ga jé u uje yiraja barigode udore quigode uje irajatade que ore chijnime ãrírique diríca. Que qui tu gotique uje irajataque yu ome udore ore, mu Dupade chingome yu gu jeta yatata quitígo ome ua, Peduguéjná Nabucodonosor á. Dupade gaidi tu gu ujetiga araja udore quigode to uje Dupade u gu uje chicháji báyipiedie udire aja báyipie ajei diríca iji bamochádi.

³¹ A e yingo baricáidi ome ua jne uje baricáidi u ayoré gajnúrique uje pipesute uté. Ga uté chajuque baguté ome úringai nanganataque uje yorícojnapise uté.

³² Uje pipesute baricáidi uté ayoré gajnu gatoi iji óro ueguipísi. Jé basa ga uté arobé, jmanecade ore pipesudé iji pláta uéguedie. Jé basa ga uté ica aja etarúdode ore ga pipesucho iji bronce uei.

³³ Jé basa uté otadábode ga pipesucho iji guebéode. Mu uté guídade ga ore chimere dachabei, guebéode ore iji ñane ome uté guídade jnese.

³⁴ Uje cho jetiga agúsiji baricáidi uté ejoi ga batoji ayoré gajnui uté oré gai iji barigode. Mu baniname eti cucaranéraque basíji cototéraque ójo bisideque uje que ayorérique garané cucarané tuaté mu base ayoré gajnui uté guídade gai ga chimochẽre guídade jnese.

³⁵ Ga bamone udore iji barigode u uje cucarané chimochẽre ayoré gajnui uté guídade ga cṍraja jnumi ga guebéode, jé aja dachabei, bronce, pláta, óro ore urúji jnumi ga ore cho puchucurui iji jnumi. Ga emi di ga que abejnátaque déji jogadi gotique. Mu cucarané uaté uje base ayoré gajnui guídade gai ga uaté sué ga nóña ga cucarãte yoríco iji jogadi uté, ga uté suru dajogadi uté ome dáringai cucarãte cuchap.

³⁶ "Barigode quigode u udojo, ¿jec ũré, Peduguéjná? Mu a qué yatata barigode udore imone ome ua gaté, Peduguéjná.

³⁷ Peduguéjná, ua u uje bajnué bojode eduguéjna gai iji punirone jnese. Uje Dupade ichajapite báringai peduguéjna iji bajogadi udé gu. Ga guẽrate betotiguei ome ua, jé aja báringai picotaque to, jé aja bamenuringuejnai.

³⁸ Bajneque pijogadode jnese uje jnanione jé ore déji to, jé aja pijogadode uñane jnese to uje gusu chugúperone, cuchisode ore déji, mu jé bajnecho pijogadode udore ore to. Ga que cuchárique déji jeta jé ca Dupade chicháji bajmainie. Ga baricáidi uté ayoré gajnu gatoi uje óro uéguei imoi jé u ua ome báringai peduguéjna.

³⁹ Que pujnuéngai ua ome báringai eduguéjna gotique. Mu barigode uje bẽ́cara pláta, ga qui u uje bojórique eduguéjna a déji jne jeta chácariji bayaridi, ga a uté tṍraji punire quedéjnarique uñeque. Mu a jé ca uté cho báringai eduguéjna cuchape pirosobate jne. Mu a uñeque basapója uté quigade jne rĩ enga a basapója eduguéjna uté jogadi to rĩ. Uje bronce imoi u eduguéjna ejogatei uté. A uté gajnepídi erãpe erámi údode jnese jne.

⁴⁰ Mu barigode imoi u guebei uje déji baricáidi jnani otadode, ga ojningai tu eduguéjna gagájnia jne uje uajadipise uté ga gajnui u guebeque etoi uje chimochẽre cuchade. Ga peduguéjnai uté a chejnápise dojode ayoréo iji darosadode jne, ga a eduguéjna uñane ore cho cucha pijaroguíji uté jmainie jne.

^41-42 "Barigode imoi u uje pimeraque guebei, pacataringuei iji ñane uje déji ayoré gajnui uté guídade, guídedie ore. Udore ojningai tu peduguéjnane uje ore cháta raja ñane, mu udore uñane etócho ga pirosobate ore ome erámi unirisórone. Jé basa ga serẽrája uñane.

⁴³ Mu peduguéjnane udojo iji erámi údode a ore chucué jórogui jne jeta ore cháta raja ñane, mu a ca togome ore ga a jé ore chopise guebei uje que pimeranguíji pacataringuei gotique.

⁴⁴ Iji peduguéjna ejode udojo úringane eduguéjna cuchape quigade ga Dupade uje déji gaté a chiroque peduguéjna cuchátique aja ore jne jeta jé ca uté chise deruénique. Enga que eduguéjna uñeque déji punínique jne jeta doi ga sué uté gai. A ca ayoré eduguéjna dépoji erã́tique jne rĩ ujeta Dupade ojningai uté peduguéjna cuchape gotique e di.

⁴⁵ Mu, Yeduguéjná, cucarané uaté uje bamo iji barigode que, a basíji cototéraque ójo bisideque uje que ayorérique garané tuaté, ga base ayoré gajnui uté guídade gai ga imoi u Dupade ojningai eduguéjna di uté jne. Iji barigode ga bamo uje ayoré gajnui uté íjnonguiji jnumi ga urúji jnumi uje emi chisite uté ijõri aja erámi ga tita uté jogadi, uje peduguéjnane iji erámi údode ore adi u jne jeta ore íjnonguiji erámi údode jnese ga gusu Dupade ojningai peduguéjna iji erámi tudé. Yojningane u peduguéjnane ore iji eduguéjna cuchábi uté iquei casicaite, jé aja eduguéjnane uñane uje qué ore déji iji Dupade ojningai uté diringai. Peduguéjná, Dupade uje déji gaté chingo baricáidode udore aja ua uje imone cucha qué déji baquei, mu a tocade jne. Que barigode udore cucha bisidécho gotique uje ũré quigode ga a tocade jne. Yujúdode udore barigode quicho ome ua ga jé ũrepíso to."–

⁴⁶ Eduguéjna cuchábi Nabucodonosor chudute udore ome Daniel ga chichaga dagataidie aja jnumi iji Daniel iquei ga curuté chisípise jnumi iji Daniel iquei. Ga Nabucodonosor chiroque darógode ore jeta ore pésu dẽrapáitigo cuchiso ome Daniel iji daseradéjnai gai, jé aja dẽrapáitigo cucha uña uje ore apóso udore, uje ore chojningame udore inciénso ga ai unere.

⁴⁷ Unojo quigade ga catecã́ri Daniel ga chojningame: –Que potigayaquérique déji ome yu uje uacangureni Dupa suépise pangurenone cucha jnese iji erámi tudé údode jnese. Pangarádejna cuchape ga suépise peduguéjnane uyoque jnese to iji jnumi tudé. Enga que cuchárique déji jeta piragome uté. Uje que yatata yurigode ome ua, mu bangureni Dupa chingo ua ga jĩraque batata quigode ome yu que.–

⁴⁸ Ga peduguéjna cuchábi Nabucodonosor chicha Daniel uté aja úringai eduguéjna cuchape to iji daniri uté údode. Ga tẽrája Daniel uté ome deranone cucha orerã́cho ga jiei udore oredie. Ga ore eduguéjna cuchape Daniel uté iji ore uniri Babilónia uté, ga irajatade iji ore uniri uté údode ore cho deduguéjna irajatáguiji Daniel to.

⁴⁹ Jé basa ga Daniel chutṍri Nabucodonosor uté nanique jeta jorane ore chirote cucha dacadode iji Babilónia uaté údode to. Ga jé u uje Sadrac, Mesac, Abed-nego ore, ore chise dáringáringo pasuté to ome babilóniagosode to. Jé basa ga Daniel uté cho dajõráji Nabucodonosor ga chácariji uté iguíjna cuchábi ajei to.