Daniel 12 - Dupade Uruode

A jé ca pucherángai Daniel urusarane ome cucha piqueminórone jne, jé aja erámi yuábode

¹ 'Cuchade udore quigade ga gaté unirísõri uje i tu Miguel di jne. Yojningai uté u uje jecucha chirota barasade udore ore. 'A paguté joradie chise erámi unirisórone ore jnese jne ome gaté unirísõri uté irotaquei ome barasade udore ore. Uje que pimo udojo nanique iji ore idáningo jeta ore gajnéringui paguté jora jé cho udire nanique. Uje udore tocade ga a gusu piquetade u barasade ore jne uje purusãracho ore íode iji Dupade oidode darujna ao.

² Uje e ore toi ica, ga a ore niji iji dódedie jne ga jiépisi ore jne, enga uñane niji gu jeta chicáji gaté uje que chisápo dáringárique tóguiji jne rĩ. Jé basa ga uñane niji to gu jetiga chajéngui jórogome dadode uje uté qui u paguté joradie jogadi, uje paguté joradie udire que chise deruénique gotique.

³ Jnani áyipierane udore uje jiei ore acadigode uje ore chacate ore ome dajeque caputai qui, ga a udore ore idírecaringuéi cho guedé idírecaringuéi uje chijñate erámi gai. ¡Ga a ore nanganata to jne iji deréjna pitade jnese, enga a ore chopise guédodie ome dáringáringui nanganatáguei!

⁴ 'Mu ua ga, Daniel, adójnangapísa udore, mu jé ca ajnungu jmare udore mu apocásu barusarane aja ñane enga aga barusarane eruéode aja ñane jeta jé ca pucherángai jé aja erámi yuábode. Ga bajirigode udore uje barúsãre quigode iji barusarane a chise dáringáringo tocachucho jne jeta ayorérigo ore chacája ñane ome dapesutígo cucha jeta ore chucué darajatígo cucha dacate iji dáyipie.'

⁵ "Daniel uyu uje yimo jnani gárode uje ore cháguena ñane tiógareode iji yote quedéjnai uéchamitó. Uñai cháguena uéchamitó, jé uñai cháguena uéchamitó uña.

⁶ Jnanione uñai cháguena yodi gai iji yote quedéjnai ajei ga iguidedie póroropísi uje iguidedie udire pipesudei iji líno póroro. Uñai uje cháguena guesi ga catecã́ri yodi ajei jogosṍri uté uje cháguena yodi gai. Ga chojninga: "¿Cho rique jetiga cucha pagutéjoragosode udore chise deruénique?"

⁷ Jnani uté uje cháguena yodi ajei uje iguidedie póroro ga chãrai dajmanecade iji gaté ga chĩ́care Dupa Eyúgojmai i uje que uté cho darupatáringa gotique. Enga uté catecã́ri ga chósi tome: 'Ujetiga siqueredie gadioque enga nóna pei ga a Dupade urasade israélgoso jatíbase ore jne iji dajnenie pujuré jmainie, ga jogadi a u jne jeta quene cuchade udore chise deruei.'

⁸ "Daniel uyu yudute udore quigode mu que yiraja quitique gotique. Ga jé u uje yicatecã́ri uté to ga yojningame: 'Yangaráni á, ¿Cucha tocachutígo tocade iji udore quigade jne a?'

⁹ Ga uté chajnai yuruode ga chojningame yu: 'Daniel, jé bo bajmapié údi aja baquei. Uje a jé ca yo quigome ua jne, uje Dupade ajéode u gu ujetiga pipoguiete udore jne, ga a quene udore pijoque jne jeta chise dáringane tocachucho iji dire erueminórone udore.

¹⁰ A jiei ore jne jetiga ore chejnáringui jóroque re ome cuchade jeta chácariji ore údode, mu a quigade jne ga a jé ore chise dáringáringo purucho to ome, ga ore úringáringo ujñapetácho quene pijoque to. Mu ducusuréchoquíode a jé ore ate jne uje que ore cho dáyugu datique ga ore chejna raja date gajnareque noñángone udore. Ga a ca ore chidójnanga cucha tocachugode udore gotique to jne. Mu jnani áyipierane a ore chiraja cucha tocachugode udore quigode.

¹¹ A chise deréjnai jne jeta jé ca pujuegádapo jne rĩ jetiga israélgosode ore tẽrápo dachidode cuchiso ome Dupade rĩ. Mu iji udojo quigade ga ore isecaranone dire a chise 1.290 jne, ga jé u jne jeta pichajapite cucha noñátique aja Dupade iguíjnai cuchábi ajei iji Jerusalén uaté.

¹² Mu a pininaquei gajnesórone u udore ore jne uje que ore cha dangoroné gotique aja dirode udore eruei uje dirode udore a chise 1.335 jne, uje ore chidota re iji danguretigai gu.

¹³ Mu, Daniel, jé bo basocai uté údi aja beruénique jetiga atoi. A o bajñare jne. Mu a chise dire erueminórone jne enga a jé u jne jeta piringarangápo ua jne rĩ, enga báringai pẽrája jogadi a u ome ua jne.'"