Daniel 11 - Dupade Uruode

¹ "Enga yicatecãraisṍri uté jé jno darai údi ome Daniel uyu nanique ga chósi tome yu: 'Uyu jé u uje yátaja médiagosode ore eduguéjnai Darío uté ica uje uté déji dáringai eduguéjna iji siqueré bajé ujetiga jnusi rome cuchade iji daniri.

² Ga a quene yingo cucha uréone udore quitígo aja ua jne jeta araja quigode to. Ga yósi tome ua: 'A pérsiagosode ore eduguéjnaringo cusapo jne rĩ mu udore ore chayu iji ñane jeta bajai cha ga uñai basája jõrai jogadi, enga a gadioque udore ore jne. Mu a uñeque cusapo jne rĩ, ga gagájni ore ome uté, mu uté a ugúcharã́que jne ome gadiógode udore ore. A uté úringai ugúcharã́que u jne jeta pésu etotiguei cuchátique. Ga a chise dáringárique pirosobate jne, ga a uté chimáta darasade ore jeta ore doi pocaningárique ome gréciagosode.

Peduguéjnane adode u udojo uje udore uñai uniri déji casaque garani yui, jé basa ga uñai uniri déji umusoi garani yui to

³ Udojo quigade ga gréciagosode a ore eduguéjna cuse to uje chirajapise pocaningane. Ga a jiei pocaningane jne iji uté dosadode ga uté isocai a u udé jne ome ore jeta chijna ore aja re. Ga a jiei punirone jeta uté sué ore eduguéjnane gáyode ga punirone unirisórone udore a ore cho deduguéjnai iji uté jnese jne. Jecute a uté gajnei erãpe querúpise jne. Ga uté a jé doi dasocáringome daniri uté údode jne.

⁴ Mu a uté chuniname eti pajuguque uté gajnéone puníño iji ñane ga péode a gagájni jne. Mu eduguéjnai uté a ca ujñapetágapo gotique jne rĩ, enga a ca uté ape disi ejórique basapója uté jogadi rĩ. Enga a jé ca Grécia uaté chisápo dáringáraque pujnuéngaitó to jne rĩ iji eduguéjnai uté quigade ga eduguéjna unejángone a ore cho dajnéngu péode jne.

⁵ 'A eduguéjnarique déji umusoi garani yui jne uje eduguéjna cuchape uté. Mu uté iroguipítique a uñeque u jne jeta suépise uté gai ome úringai picotaque enga a uté gajnei erãpe querúpise jne ome eduguéjnai uté.

⁶ A siquerérigui déji dajogatique ome udore ore enga a ore chisi ome daru iyiejnane ome ñane. Ga eduguéjna cuchábi uté uje tṍraji umusoi garani yui, a chijna daro aja eduguéjnai jne uje tṍraji casaque garani yui ga a chojningame jne: 'Ajína yuro udaque ga yocajéode cho sere ome ñane jnese gu jeta óji yuro udaque gari.' Mu a chise deréjnarique jne jeta ore chujé jnani uro uaté uje tṍraji umusoi garani, jé aja uaté abi, abai, iróguedie ore jeta ore chujé ore jnese iji uté.

⁷ Ga a eduguéjnai uje ore chujé uro, a jogasúode uñeque a cho dajocaningane ome ore jne iji casaque garani yui. Ga a uté sué ore gai jne enga a chácariji ore uniri uté jeta isoldádode chirote ejode iji uté.

⁸ Enga a uté chajníja puniri uje i tu Egípto jne, ga a chijnoque ore angurenone ayoré gajnu uje pipesudei iji guebeque nanganatágode, jé aja cucha orerane uñane uje pipesucho udore iji óro, pláta ore. Mu a siqueredie orocoi ome udojo ore jne uje a ca pocaningárique dépoji rĩ ome umusoi jogosórone jõcaratácho udore uje a ca ore dopoi pocaningárique rĩ ome casaque yuminórone jõcaratácho.

⁹ Mu a chise deréjnai jne jeta eduguéjnai iji casaque garani yui chetingare re jeta doi pocaningai ome ore iji umusoi garani, mu a etoque udore ore ga a noñome ore iji te jmete jne.

¹⁰ 'Mu eduguéjnai uté iji casaque garani yui, a ujnacarode pésu re ome pocaningai yui ga a ore chimáta darasade enga a ca pimo udore ore eruénique jne ome dáringane jõcaratácho. Mu a chise diri jne ujeta ore eduguéjnai ujnacarode uñai nóna dasoldádode aja ore iji umusoi garani yui, ga a uté chujé ore aja dajesúode jne enga a cho yote quedéjnai bayátique ome dáringai pirosobate aja dajesui jne. Iji udore jocaningai ejoi ga a ore chise umusoi garani eduguéjna jogapi ore idai to ome dajocaningai.

¹¹ Eduguéjnai iji casaque garani yui a ijnimique umusoi yuminóri eduguéjna ájningai jne uje ore chirõre uté jogapi ore idai ome dáringane jõcaratácho, ga umusoi garani uté eduguéjna a chachai ore ga a chejna udore ore jnese jne iji dedai uté yui.

¹² Eduguéjnai uté iji umusoi garani yui a chimo jne uje jiei chugode iji damajosórone udore ore ga jé u uje a uté chicotápise re, mu a garósi dirode ome uté úringai eduguéjna pujnuéngaisṍre jne.

¹³ Mu a chise deréjnarique jne jeta eduguéjnai uté iji casaque garani yui chimáta dasoldate dipeséode ome dajocaningai yui. Ga a uté isoldádode a sué ore isoldate bajade ore betígajnai gai jne. Ga a siqueredie déji dabatigárique jne enga a quene uté doi pocaningai ome umusoi yuminóri eduguéjna urasade ore jne. Ga a jé jorane u damatade dasoldate dipeséo ore jne uje a dimane ore ome ore jocaningai uté yui, ga a udore ore ujuya doidode dõráchacho jne.

¹⁴ 'A jiei ayoréode jne jeta ore doi pocaningai ome umusoi yuminórone ayoré ore eduguéjnai uté to. A israélgosode uñéngo u to uje sijnanguipise ore iji darasade ujade, ga a ore doi pocaningai ome uté to mu a ca cuchárique tṍraji ore jocaningárique ome uté. Purusãraque cuchade udojo iji Dupade uruode enga uje tocade ga jé chopise ore urusarane quigode udore.

¹⁵ Casaque yuminóri eduguéjna a cho dajocaningame ore idánique jne iji umusoi garani yui uje ore ujuyaquéode chaparu uté gai uje yoríco udore. Ga ore eduguéjnai uté uje tṍraji casaque garani yui a chiraja dajmapié ujeta irógode ore chujé dachiejnátigo cucha aja ore ujuyaquéode udore iji guesi, jeta ore chajna udore aja udore ore idai uté ajei enga a ore sué ore gai iji ore idai uté jne. Ga umusoi yuminórone pocaningai irajasóño a ca ore ujñapegome desórone udore ore jne.

¹⁶ Casaque yuminóri eduguéjna uté uje uté sué ore idáyode udore gai aja dajesúode, ga a jé u jne uje a doi dáyipie quitígome dajosipiérigui ome dajnuéngayode puníño unirisórone ore, ga a jé ca uñeque cási uté iquénique jne. Enga a jé chuságaja Puniri Ueradi jne rĩ iji uté. Ga a uté chejna cuchade iji daquei jne jeta chise iji dajesúode jeta doi pocaningai ome udore.

¹⁷ Ga eduguéjnai iji casaque garani yui a chisi ome daru iyiejájnane ome dojoi eduguéjna jne rĩ iji umusoi garani yui. Enga a chisi ome daro ome eduguéjnai jne uje déji umusoi garani jeta cho dacoté iji uaté. Mu gaidi u ujetiga uro uaté chajire eduguéjnai uté adode iji uniri ga jĩraque chingo isocade aja dayé jeta dayé cho dajocaningame ore jne ga jĩraque chejna ore. Mu a ca uté áyipiedie quigode tocade gotique jne.

¹⁸ Ga a jé u jne jetiga eduguéjna casaque yuminóri doi pocaningai ome ore idáyode iji yote quedéjnai edúdode ga a sué ore gai jne aja dajesui. Mu a chise dojórique eduguéjna jne uje a sué gai jne ga ujoi eduguéjna chinguíra pajegátigai aja uté.

¹⁹ Uje uté a chajníja daniri mu a cuchárique tṍraji uté jne iji dajeque pajénique ga a ca uté chisápo dedai gotique rĩ, ga a ca pirajaque uté quitique jne rĩ.

²⁰ 'Eduguéjnai iji casaque garani yui a ujórique eduguéjna a chácariji uté charidi jne. Ga a uté chutai dei casodica puníño unirisórone jeta ore cho uté oré. Mu a jé ca uté iyajmaque iji dáringai eduguéjna jne, uje a chuque jne gu, mu a jé ca chuque uté jne iji pocaningárique gotique jne.

²¹ 'Udojo quigade jne enga a ore chuniname eti jnanírique chácariji uté charidi uje que peduguéjnarique ape uté gotique. Mu a chise dáringárique peduguéjna jne gu uje a chãra ore jne uje chiese uerate áyipiedie quigode, mu a pógu dáyipie gajnarénguenie udire quigode iji dajei.

²² Eduguéjnai uté iji casaque garani yui a chejna ore aja dajesúode jne. Que gusu umajosórone uje chujé ore mu jé chuságaja eduguéjnarique to uje chisi ome daru iyiejájnane ome uté nanique.

²³ A jecucha uté chãra dojórigo eduguéjna ore jne ga a chojninga: "Yiya pocaningane ome uaque." Mu quigade ga uté doi pocaningai ome ore uje jorane iji dajocaningai garósi mu jé ore sué degode gai.

²⁴ A uté ujode eduguéjna a ore tṍra rome eti e doi pocaningai ome ore iji pachamite quedéjnarique uje ugúcharã́que unirisórone ore iji uté. Mu a jé ca uté áyipieraque dépoji dáquirigo isocai jne ome dajocaningane, uje a uté sué pidáyode unirisórone udore idáyode enga a jĩraque chajuguína ore ugúcha orerane aja dasoldádode ore jne iji uté. Uté a jé isoca jne jetiga pésu dáyipiedie ome dajocaningane yúode ga a doi pocaningane ome guidai cuchábode uje ore ujuyaquéode chaparu ore gai ga sué ore gáyode, mu a jé ca iyajmaque uté jne iji dasocade udore gotique jne.

²⁵ 'A chise dínique jne jetiga uté chachietáji re ome dajmapié uaté. Ga a isoldate dipesérigo a ore chimáta ñane jne jeta ore dopoi pocaningai ome umusoi garani jogonórone eduguéjna ore rĩ. Ga a umusoi garani jogosõre eduguéjna a chimáta dasoldate dipeséode ore to jne, ga a dimane ore jne ome pocaningai yui. Mu eduguéjnai uté iji umusoi yui a pẽrapaite uté jne ome ore enga a jé u uje uté atíbase iji udore jmainie.

²⁶ A jé uté u jne uje jecucha eduguéjnai chacásãra ñane iji dabosode ga guẽrapaite ore eduguéjnai uté jne. Jecute eduguéjnai iji umusoi garani a pẽrate jne, enga a jé u uje pisidique uté isoldádode aja quedéjnane. Ga a jiei chutígo jne iji eduguéjnai uté isoldádode ore uje ore umajosórone tṍraji casaque garani yui ome ore.

²⁷ Udojo quigade enga eduguéjnai uje tṍraji casaque garani yui, jé aja ujoi eduguéjna uje tṍraji umusoi garani ga a ore catecã́ri ñane jne iji dayaritique. Ga a ore chacásãra ñane jne iji dabotique cucha. Ga ore uruode u daringaquei gajnéone daru ome ñane jne. Ga jõra a chãra dajõrai. Mu a cáma ore chise deréjnarique ome ñane ujetiga uñeque áyipieraque chise dáringárique tocachuguei.

²⁸ A casaque garani yui jogonóri eduguéjna uté chajni ga a chijnoque ayoréode ore ugúcha orerãque dipeséode jne uje a chajnose ore ome iji dajocaningane jne iji umusoi garani. Ga chajni ga a chaquesu israélgosode ore uniri aja daniri yui ga chacája Dupade iguíjna cuchábi ajei iji israélgosode uniri uté jne enga cho cucha bisidéguiji cucha puyade iji uté jne. Ga a cho cucha bisidéguiji Moisés urusarane Dupade áyipiei quigode to jne rĩ. Uje cha dasoca noñángone udore iji israélgosode ore uniri uté enga a jé u jne jeta chajni jne aja daniri iji casaque garani yui.

²⁹ A uté básome dajocaningai garósatique jne, mu igasique ga jĩraque uté a chimátapo dasoldádode ore jne rĩ ome dajocaningárique yui ome damajone ore iji umusoi garani. Mu iji jocaninga ejoi uté enga a jé ca suépo ore gai jne rĩ uje a chacãrápo jóronga dajocaninga bajade jne rĩ.

^30-31 'A eduguéjnai uje tṍraji casaque garani yui ga e jnorásome umusoi yuminórone jeta chujé ore, mu a tṍra rome dojoi eduguéjna jne uje uté tṍraji guedé cacadi yui, ga a ore chachẽre uté isoldádode ga a jĩraque ore chayome ore jne enga ore chajníja daniri iji casaque garani yui jne. Yojningai eduguéjna uté uje tṍraji guedé cacadi yui a uté isoldadode ore píode u cucode jne aja udore ore yui uje ore tṍraji casaque garani yui. Ga eduguéjnai uté uje tṍraji casaque garani yui a dopoi dasocai jne uje chaquesu israélgosode ore uniri aja daniri yui. Ga a dopoi datuátigade ome Dupade iguíjnai jne rĩ iji uté. Enga a chicha ayoré gajnúone oredie aja Dupade iguíjnai ajei jne rĩ, enga a chãraque cucha pẽrapáidode ome judíode jeta jé ca ore tẽrapome Dupade rĩ. Ga a pésu eduguéjnaringo iji judíode ujade jne jeta udore ore chetaque Moisés urusarane Dupade uru quigode. Enga a uté isoldádode a ore chisṍriji Dupade iguíjnai cuchábi uté ajei údode jne, uje puyágome purása quedéjnane jeta ore chacája mu.

³² Eduguéjnai uté a chãra israélgosode jne ome daringaquéringo ga a chojningame ore jne: "Ayáyo anguretáyo Dupade, ga ayáyo Moisés urusarane cucha puyácho udore quigode, ga a yisi uáguiji cuchade jne." Ga israélgosode uñane a ore cha Dupade uruode úringáringo pigaicho jne. Mu Israel idaisórone a jiei ore jne uje a ore chijnóra Dupade ga a ore chejna rángaja Dupade adode jne ome úringane pigaicho iji eduguéjna cuchábi uté enominone jeta ore pésu udore iji eduguéjna josipíerãi uté iquei.

³³ A chise dínique jne jeta chuque áyipierane udore ore iji israélgosode ore ujade, uje ore cho daba dajúdode Dupade uru quicho ome darása dipeséode udore ore. Ga a papose uñéngo jne, jé basa ga a porite uñane ore gajnéone cucha jnese jne, ga a ore jno uñéngo údi jeta ore cho daróguiji ore iji punire quedéjnaringo. A jé ca jĩraque cuchade udojo íjnoque jne iji israélgosode ore ujade.

³⁴ A chise dínique jne jetiga israélgosode udore ore úringane pumajo chisírase deruénique, mu a jnaníringo cháguepo ore gai jne rĩ ga a ore chojninga: "A yaquírango uacamajosórone udore ome ore isocade jne jeta ore cha ome uaque." A ore uru quicho udore, mu a ore áyipiedie quigode u paringaquei ome israélgosode ore jne. Ga a ore ucuegode u dajegaitígo cucha iji israélgosode ore ujade jne iji ore uniri.

³⁵ Ga a chise dínique jne jetiga petingarãque Dupade uruode júsorone uñéngo ore, mu Dupade a jé u jne uje juéga udore ome ore. Gaidi u jeta obiréjna ore úringane icha ome Dupade, jé aja ore úringáringo ujñapetácho, jé aja jetiga israélgosode ore gajnéone pujuyaqué quene eruei tu ome ore, uje Dupade ojningai deréjna a jé u uté jne gu.

³⁶ 'Eduguéjnai uté iji casaque garani yui a jé doi dáyipie quitígo ome cucha ponai jnese jne. Ga a uté jé icotaque re ome cuchade jnese jne ga a jos eti sué ore angurenone dupa gáyode jnese to. Ga a uté chietáyime Dupápisi jne ome daru noñángone jne. A uté chise darétigáriguiji ujárigo jne, mu a chise dínique jne jetiga Dupade chiroque dajuyaquei gajnetique cucha aja uté. Uje Dupade chĩ́care cuchárique, ga jé u uje tocade.

³⁷ Eduguéjnai uté a jé ca áyipieraque dépoji dáquirigo anguretígo dupa quedéjna atígo jne, jé aja chequedíe ore catecãrainone dupa quedéjna. Uje a uté chojninga jne: "Yujnué udore ore gáyode jnese ome yingoningájnai gu."

³⁸ Mu a chise dínique jne uje a uté catecã́ri dangureni dupa quedéjna gotique uje uté dáquiode que ore catecã́ri uté catecãraini uté gotique nanique. Uje chiese dupa quedéjnai uté guẽrate eduguéjnane ore úringane pujnuéngaisṍre ome ore gu. A uté tẽra cucha orerane ome dangureni uté jne: óro, pláta, jé aja cuchade uñane uje orerã́cho.

³⁹ Ga a uté doi pocaningai ome idáidatérigo jne uje ore ujuyaquéode yoríco enga chaparu ore idáyode gai, enga a sué idaisórone ore gáyode jne. Enga chiese angureni dupa quedéjna uté chátaja gu. Uje uté catecãraisórone ore chicota uté enga a tẽra cuchade ome ore jne ga chajuguína jnumi aja ore jeta ore cho dajnéngu uté guẽrapáitigo jnupe pecho. Ga a pésapo ore úringáringo ibijócho jne rĩ iji darasade ore ujade.

⁴⁰ 'A chise dire erueminórone jne enga eduguéjnai iji umusoi garani a doi pocaningai ome casaque garani yuminóri eduguéjna, mu a casaque yuminóri eduguéjna uté a chachai ore jne iji garani, ga a uté cho guetṍratique jne ome dajocaningai uté uje chejna umusoi garani eduguéjnai uté isoldádode aja dajesui uté. Ga a uté chajmita ore uniri iji umusoi garani, ga a chĩreta ore uniri uté údode ome dabíode guebéquedatéo uje ore jocaningane gajnecho udore, jé aja ujeta isoldádode ore choru buricade aja dajesúode iji ore uniri údode, ga uté isoldádode uñane a chacája cucode jne aja ore uniri údode.

⁴¹ A eduguéjnai iji casaque garani yui a chise Punire Ueradi ome dáringai jõcarataque jne, ga a yutígo jiei iji israélgosode jne iji uté. Mu eduguéjnai uté iji casaque garani yui a ca doi pocaningai ome edómgosode ore to jne, jé aja moábgosode ore iji ore idai, jé aja amóngosode to, ga a udore ore chapite jnese iji dedáyode udore.

⁴² A jiei eduguéjnai uté ujnuénganingo puníño jne, ga a chicha dasoldádode aja pidáyode iji punirone udore jeta ore cho deduguéjnai iji uté to jne. Ga a uté chichapo dasoldádode aja egíptogosode ore uniri to rĩ enga a jé ca toque jeta pocãraque udore ore iji puniri uté jne.

⁴³ A uté chijna egíptogosode ore ugúcha orerane jne: óro, pláta, cucha orerane uñane iji ore uniri. Ga udojo quigade a dopoi dajocaningai ome Líbia unirisórone ore, jé aja Etiopía unirisórone ore.

⁴⁴ Mu a uté chudute pujnomérique jne jeta tṍraji guedé garani yui, jé aja casaque garani yui ga a uté tṍra rome pujnomei uté jne. Ga a jĩraque áyipie déji jeta doi pocaningai ome ore iji uté ga a chojninga jne: Yi ore jne ga yitígo a jiei iji udore ore jne.

⁴⁵ Ga a uté chicha darengúrique aja yote quedéjnai, Jerusalén ore ujai jne uje cucarãte puyai déji Jerusalén uté ajei. Mu a uté chise dáringárique pujnuéngai iji uté jeta jé ca ujórique ayoré chátapó cuchárigaja rĩ.