Daniel 10 - Dupade Uruode

Daniel chisõre iji yote quedéjnai edúdode uje uté i tu Tígris, ga toji ta gai ga chimo jnanírique iji uje iguidedie póroropise

¹ Siqueredie gadiógome pérsiagosode ore eduguéjnai Círo uté nanique ome úringai eduguéjna, ga cucha uréone uñane chiquetápo raja Daniel uté rĩ, uje uté i uñai u Beltsasar nanique. Mu uté imone cucha quigójma jeta pirajaque quigode. Mu Daniel uté áyipie jogadípise jeta chiraja udore quigode uje jecucha chucué quicho. Ga chise diri uje Daniel chiraja damone udore cucha quigode.

² Daniel e churúsãre damone cucha quigode nanique ga chósi tome darusarane quigode: "Daniel uyu uje áyuguhebátaque yu iji semána gadióguedie.

³ Ga que chagúrique déji yajénique gotique. Uje ore ipesudode cucha pibose unéri jóronguio ome yu mu que déji yajénique jeta yagu udore. Jé aja cucha arione, víno ore uje que yagu udore to. Enga que yáyipiedie déji jeta yanguñéra cucha ai unénique aja yibai jé aja semána gadióguedie udire eruei.

⁴ Chise guedosi bajai jogadi dire uje 24 u enga yisõre iji yote quedéjnai edúdode uje uté i tu Tígris.

⁵ Ga yitoji ta gai ga yimo jnanírique iji uje iguidedie pipesudei iji ore acai uje i tu líno ca póroropise. Ga chijna dagarubi uje pipesudíji óro uei.

⁶ Ga uté pajei cho nánga, nánga enga dáringai nanganataque cho cucarané nanganatague uje i tu 'topácio' ome úringai nanganataque. Ga uté edodie chopise ajnorápieraque ome dáringanie nanganatáguei. Ga uté edo ajícasédie cho papótique ome dáringanie ditagué. Ga uté jmanecade, guídade ore cho nánga, nánga ga cho guebeque orerãi uje i tu bronce ome dáringai nanganataque. Ga uté uruode cho pichora cuchátique.

⁷ "Gusu yu uje yipáñaji yimone udore cucha, mu yaríjogonórone jnanío que ore chimo udore to. Mu udore ore chiraja uje pisadodéringai chise ore ga ore chayo jeta ore pógu re.

⁸ Gusu yu iji uje yimo udore iji yedominone. Ga cuchadaté udore ome yu. Ga yo caru iji udore jmainie uje yiserẽrája iji uté.

⁹ Uje yudute yimoi uté jnani uruode ome yu ga yo sere ga yicṍraja jnumi.

¹⁰ Mu igasique ga pijmanárique chiringare yu aja gaté, ga yisa jnumi ome yijmanáyone, ga yajna jnumi uje yichaga yigataidie aja jnumi.

¹¹ Ga puruode udore chojningame yu: 'Daniel á, Dupade ijnorai chá, angaripísi yuruode uje a yo udore quigode ome ua jne. Ayague uje jé pingoque yu aja ua que.' "Uje e yejna puruode udojo úringane pududicho guesi que, ga yiyague mu yo ta-ta-ta-ta.

¹² Ga yicatecãraisṍri uté chojningame yu: 'Daniel á, ca atodo. Uje bapota baraja cucha quigójmane udore quitique to diríca enga bo bayágome ua diríca uje beteque chagúi ome udore jeta araja udore quitique to, ga báyipie déji Dupade úringai pátajasṍri ome udore diríca, ga jé u uje Dupade tangári bacatecãraitigade udore quigode diríca. Ga uté chiroque yu aja bei jeta yicatecã́ri ua.

¹³ Mu que yise ua míraque, Daniel, uje eduguéjnai uté uje gajneque puniri Pérsia udé chãraque ore uniri udé yui. Uté chãraque bei ome yu ga dirode ore chise 21 días uje uté pésu pocaningai ome yu. Mu yujoi gaté unirísõre uje i tu Miguel chise yu jeta chátaja yu ome peduguéjnane udore ore uje ore cho dajnéngu Pérsia udé údode. Ga yojningai uté Miguel gaté unirisórone ore asuté u uté.

¹⁴ Yise ua iji de gu jetiga yingo cucha tocachugode udore aja ua uje a tocade jne ome barasade ore iji ore iquei. Uje bamone udore jé imone u cucha tocachugode iji barasade ore iquei jne gu.'

¹⁵ "Uje yitoji yúdi gai ome udore ga que yo cheme gotique.

¹⁶ Igasique ga jnanírique doi yibijnanane ga chisa. Ga uté cho erámi unirísonique atique. Ga quene yĩrarare ga yojninga: 'Pangaráni á, yimone udore cucha diríca pésu yáyuguhebátigai diríca ga yiserẽrája iji udore jmainie diríca. Jé aja de uje cáma yetotiguérique cuse.

¹⁷ ¿Ga yo ringome ua jne? uje baroque yu mu yiserẽrája iji udore jmainie ga que yáyipieraque jno ome bojningane udore quigode ga que darai déji yajénique jeta yichajnai ua ome yurúrique.'

¹⁸ "Yimoi uté uje cho erámi unirísonique atique chijocásapo yu rĩ ga yetotiguei chisápo yu rĩ jeta yicatecãcoi ñane.

¹⁹ Ga chojninga: 'Ca o báyugu ua. Dupade chijnóra ua. Aya báringai áyuguhebátaque ga anína ua aja quedéjnane. Ajnusi ua ome yuru quigode udojo.' "Uje uté qué déji dáringai dara gai ga yichajnai uruode ga yojninga: 'Yangarádejná, be ga acatecã́ri yu uje yetotiguei e dépoji yu rĩ.'

^20-21 Ga chojninga: '¿Araja gotique gu a, uje yibágui ua? Yibágui ua gu jeta yingo purusãraque uréone aja ua uje déji aode udore. Yigaidi tu gu jeta araja cucha piqueminórone. Mu ujeta e yiya yicatecã́ri ua gajiné a yajni to mu a yi pocaningai ome peduguéjnai uté uje chãraque Pérsia udé yui ome yoque. Ujetiga e yiya pocaningai ome uté ga peduguéjna uñai di jne uje a tṍraji ore uniri Grécia, ga a doi pocaningai to ome yu jne. Uje yo yijocaningame udore ore ga yátajasṍre ugurui u gaté unirisórone ore eduguéjnai Miguel uté uje irodique israélgosode ore uniri uté to.'