Daniel 1 - Dupade Uruode

Purusarane udojo júdi u Daniel atígo uje déji babilóniagosode ore uniri uté nanique

¹ Uje judágosode ore eduguéjna cuchábi Joacim guejnanie siqueré gadióguiji dáringai eduguéjna nanique ga babilóniagosode doi pocaningai ome ore. Babilóniagosode ore asuté Nabucodonosor nóna darasade ore aja Joacim ore idáidaté uté uje i tu Jerusalén ga ore chaparu guidai uté gai ome dáringane jõcaratácho.

² Ga Pangarádejnai Dupade juéga jetiga babilóniagosode ore sué judágosode udore ore gai iji ore idai Jerusalén uté. Jé aja uje Dupade juéga ore asuté Joacim uté to ome babilóniagosode jeta ore chisa uté to. Jé aja uje Dupade juégapo daréngone cucha ueracho to rĩ uje déji daguíjnai ajei uje que pujuegate ome ayoré gajnaréngone jeta ore chisa, ga gusu Dupade iroguipísode ore chisa nanique, mu juéga jeta babilóniagosode ore chisa. Ga ore chisa nanique ga ore jno cucha oreránguejnane udore údi aja daniri, ga ore di údi iji daniri ga ore chicháji dangurenone dupa quedéjna ore iguíjnane to. Mu babilóniagosode que ore jno Dupade garéngone udore cucha údi jnese nanique mu ore noñome pei iji doidode jogadi nanique iji pocaningai uté quigade. Eduguéjnai Nabucodonosor jno dasagode judágoso údi to aja dedai Babilónia jeta cho daróguiji udore ore bisidec iji daniri.

^3-4 Uje babilóniagosode ore chise daniri ga ore asuté Nabucodonosor tibidi daroguipísi uje irodique iguíjna cuchábi uté. Ga uté i u Aspenaz nanique. Ga chojningame uté: –Ajnime ore eduguéjna cuchábi ujnacarode iji urasade israélgoso ore ujade ga angara ore jogatígome yu, jé aja ayoré atade ore ujnacarode to jeta angara ore jogadi. Yojningane upo jnacarode rĩ uje ore tirógaja jnumi jeta angara udore ore jogatique to, ujetiga jé ca ore isoringuérique cus. Yojningane u udore ore jeta áyipierãque ore ga irajataque ore ome dojode jnacare ore. Jé aja jetiga pajegátigade déji jnacarode udore ore to. Chamáñaje yipota udore ore gu jeta ore chirote yiguíjna cuchábi udé iji yejoi.– Nabucodonosor qué jno daruode údi ome daroguipísi uté ga chojninga: –Ajnáño udore ore aja de jeta acacho ore ome babilóniagosode yocuruode jne uje ore chojningame caldéogosode uruode. Yigaidi tu gu ujetiga ore chajire aode to uje pipesucho iji yocurúpisode, ga ore chirajapise udore quitígo.–

⁵ Nabucodonosor chirógapo ore nanique rĩ jeta jnacarode udore ore tagu uté pose uneréjnane to iji dirode jnese, jé aja jeta ore chóji uté jodi víno to uje uerate uje oredie jiei. Nabucodonosor chirógapo jnacarode udore ore rĩ jeta pacadique ore ome cucha pisagode isocade jeta ore guejnanie siqueré gadioc ome dáringáringo pacadicho ga jé u jeta ore chirajapise. Ga quene ore doi eduguéjna cuchábi iroquéode iji iguíjna cuchábi jeta ore chise siqueré gadióguedie udire ome dáringane pacadicho.

Ore jno Daniel, jorane ore údi aja Nabucodonosor iguíjna cuchábi nanique

⁶ Jiei jnacarode udore ore mu ibijógode u Daniel, Ananías, Misael, Azarías ore. Ga judágose ueque udojo ore.

⁷ Enga jĩraque eduguéjna cuchábi iroguipísi chécãre udore ore íode nanique. Ga Daniel i ejoi u Beltsasar. Jé basa ga Ananías i ejoi u Sadrac. Enga Misael uté i ejoi u Mesac. Jé basa ga Azarías i ejoi tu Abed-nego.

⁸ Uje Daniel uté chudute to uje a ore tagu eduguéjna cuchábi posode to jne, ga jĩraque Daniel uté chetaque uje que pota úringáringo pibose to, jé u to jeta chóji jódode víno to uje a chójirase ga jĩraque ipesute dagajnarétigai ome Dupade. Ga Daniel chojninga iji dáyipie: "A jé ca yóji uté jódode to jne, jé aja posode uje Dupade chetaque purása quedéjnane posode ome judíode ore, uyoque gu." Ga Daniel catecã́ri eduguéjna cuchábi iroguipísi uté jeta jé ca chiroque Daniel, jõra gadiógode udore ore aja deduguéjnai posode úringáringo pibose, jé aja jódode úringáringo pijócho to.

⁹ Ga Dupade pésu eduguéjna cuchábi iroguipísi uté ga chisi ome pirasitigai ome jeta irasi u Daniel iji ujode jnacare ore ujade.

¹⁰ Jecute eduguéjnai cuchábi iróquegatéi pota jóroga jeta doi Daniel uruode mu chojninga: –Yoqueduguéjna cuchábi jé urúo jeta uacabosode jé u uté posode to, jé aja jodi víno jeta ójiyo to. Ja seca chimo jne jetiga godoque uaque ome uacajorane ga a uté chisíome yu ome pitoringai jeta chujé yu uje cho yibai iji uaque.–

¹¹ Eduguéjnai iróquegatéi chicha dojoi eduguéjna uñai aja jeta uté ajirique Daniel, jorane ore yui uje jorane udore ore íode u Ananías, Misael, Azarías ore.

¹² Ga Daniel chojningame daruode uje catecã́ri ore irodisṍri uté: –Etingarape yoque jé aja dirode jeta chejna yijmanáyone ga gusu asi ome cucha pacadie adie ome yoque jeta yedugo úringane piboso, jé aja yodi jeta yójigo to.

¹³ Ujeta yejnángo dirode udore guesi enga ajire yocujode jnacare ore jnese jne uje ore posode u eduguéjnai posode, jé aja yoque uje yingarángo yoquibosode ome ore posode. Ga a jé u jne jeta araja jeta arégode u yoque gosode ome ua. Enga jé u jne jeta yicoi baruode quigode ome yoque jne.–

¹⁴ Ga Daniel, ore irodisṍri uté chimesẽre Daniel uru quigode ga chetingare ore aja dirode uje chejna yijmanáyone.

¹⁵ Iji dirode udore eruei ga Daniel, jorane ijoréjnapise ore gatuaque, ga etógapo ore rĩ ome dojode jnacare ore jnese uje ore pose eduguéjna cuchábi posode to.

¹⁶ Jecute Daniel ore irodisṍri que diapo eduguéjnai posode, víno ore údi ome ore rĩ, mu chedu cucha pacade adie, yodi ome ore.

¹⁷ Dupade chisi ome pirajatigai ome jnacare gagájnione udore ore jeta ore chiraja cuchade. Jiei ore ajirigode darujna ao ga ore chirajapise udore acajnaquéode jnese. Daniel uté irajade u to pedominone quigode ujeta chatata, jé aja purigode quigode to.

¹⁸ Uje siqueredie gadiógome Daniel, ore ujode jnacare iji Babilónia nanique ga eduguéjna cuchábi iroguipísi jno ore údi aja ore eduguéjna cuchábi Nabucodonosor uté iquei iji iguíjna cuchábi ajei.

¹⁹ Eduguéjna cuchábi catecã́ri jnacarode udore ore jnese uje chisa ore iji ore uniri Judá nanique ga que chimo udore ore gajnúrique jnacare jeta gosi jé cho Daniel, Ananías, Misael, Azarías ore ome darajatígadatéode. Ga eduguéjna cuchábi uté jĩraque ajegaite jnacare gagájnione udore ore ujetiga ore doi iroquéode iji ejode iji iguíjna cuchábi uté ajei.

²⁰ Eduguéjnai Nabucodonosor uté jecucha ga catecã́ri Daniel ore ome cuchárique enga jĩraque ore chajnai ga ore chatatapísa darajatigade ome eduguéjnai gatuaque. Jecute obiréjna ome uté uje ore irajatigade suépise daijnane, cucha piqueminórone irajasórone uñane ore irajatigade gai, uje urásapise udore ore múñi.

²¹ Ga Daniel jé jogate peduguéjnane ore iguíjna cuchábi, jé aja diri uje ore eduguéjnai u Círo nanique. Ga Círo uté tangári Daniel áyipiedie nanique rĩ ome irajatigade. Ga Daniel doi uté iroquéode to iji siqueré bajé tuaté nanique ome Círo úringai ore eduguéjna.