Colosénses 4 - Dupade Uruode

¹ Ujetiga pirósõre uaque enga ũrepise uágome uacarógode, enga ca acho uaquejóringome uacarógode ore, mu ajusópise ore guio. Ajnusináño uje uacarósõre gatei déji guéode enga Dupade u.

² Jecucha acatecãchoi Dupade, enga ãrijínaño uaquejode. Enga jecucha acãcho Dupade gai to ome cuchade.

³ Acatecãchoi Dupade to ome yoque ujetiga Yocangarádejnai chisi ome piotiguei ome yoque ujetiga yatatago pujnomé ueradi quigode ome ore jnese. Yojningai u Crísto adode ujetiga yatatago ome ore, uje quene pirajaque cuchade udore iji deréjnane unojo. Uacamóño uje yo yiba yatatagode udore uje ore suru yibai iji ne.

⁴ Acatecãchoi Dupade ome yu to ujetiga yatatagode Crísto acho choquíji guesode ome ore jnese, uje jé yajnei tu udore gu.

⁵ Ujetiga agúsoji ayoréode ore gari uje que ore changureta Dupade enga ajusópise uacadode guio. Enga ujetiga piotiguei déji ujetiga acate ore ome Crísto adode enga jĩraque acatecãchoi ore.

⁶ Mu ajuso uacaruode guio enga ore chajmára uacaruode. Enga ujetiga uñeque catecã́ri uágome cuchárique, mu e dimane uágome ujetiga oyo uté quique.

Páblo urusarane eruei u uné uje chatata darasitigade ome ore

⁷ Yoquijõrai Tíquico jecucha chátaja yu ome Yocangarádejnai iroquéode. Enga uté a chise uaque dirome, enga a chatata yadode jnese ome uaque jne.

⁸ Yajéode u gu ujetiga Tíquico chicabíji uaque ujetiga chatata yujnomei tome uaque, enga pésu uacaninaquérique.

⁹ Uacarasade uñai, Onésimo, dopísi Dupade adode to, enga a uté nóna Tíquico aja uaque to jne. Enga a udore ore chatatapísa cucha dacadode jnese jne ome uaque.

¹⁰ Yibayai tu Aristárco iji soldádode iguíjnai uné. Enga chi yiguíjna uaquei tome uté to. Enga jé chopome Bernabé iguiosi Márcos rĩ uje chi yiguíjna uaquei ome uté to. E yingome uaque ica, mu qué yingopome uaque rĩ: ujetiga ajusópise Márcos guio jne ujetiga díji uaque to.

¹¹ Chi yiguíjna uaquei to ome Jesús uje i uñai u Jústo to. Gusu udore ore iji dojode Dupade anguresõre judío ujade uje ore chátaja yu ome yisagode Dupade urúo. Enga udore ore pésu yininaquei uje ore chatapísa cuchade aja yu gu.

¹² Uacarasade uñai Epáfras dopísi Crísto iroquéode to, enga chi yiguíjna uaquei ome uté to. Uté jecucha catecã́ri Dupade ome uaque ujetiga apúyoja uacanguretigade enga ejnáño uágaja Dupade áyipiedie gaté ome uaque.

¹³ Yimópise uje Epáfras áyipiedie déji uaque gatuaque. Que gusu uaque go, mu udore iji Laodicéa jé aja Hierápolis, que ore jnoji uté ajéode to go.

¹⁴ Chi yiguíjna uaquéode to ome doctor Lúcas, uje yijnórangopise uté. Enga chi yiguíjna uaquéode ome Démas to rĩ.

¹⁵ Angoño Dupade anguresórone iji Laodicéa uje yiguíjna ore yúode ome yoque to. Angoñopome Nínfas, ujode Dupade anguresóño uje ore chamáta ñane ome Dupade uruode aja uté iguíjnai uje yiguíjna ore yúode jnese ome yoque to rĩ.

¹⁶ Ujetiga e amácho ujetiga ajicho yurusarane unojo enga aróchoja Dupade anguresórone ore iji Laodicéa jne ujetiga ore chajire to. Yipota ujetiga ore chiroque dajnéone yurusãracho aja uaque to, ujetiga ajicho unojo to.

¹⁷ Angoñome yuruode ome Arquípo uje a yósi tome jne: "Ca amoque Yocangarádejnai urúrique ome ua uje chiroque ua aja daroquéode udore ica. Enga be enga amanipise aja quigode."

¹⁸ A yurusaranguipise ejode unojo jne ome yijmainie. Enga yijócha uacajéode údi ujetiga jé ca acadíchoi yu to iji yúringai pujurúgai enga jecucha acatecãchoi Dupade ome yu to jne. Enga yajéode u ome uaque ujetiga Dupade chatapísaja uaque. Amén.