Colosénses 3 - Dupade Uruode

¹ Uje uacanguretáyo Crísto, enga jogadi tu uté uje piringarãque uágaja gaté to iji uacáringane toque quigade; adi u Crísto uje piringarãque to aja gaté to nanique. Jecute acueyoi gaté jogonórone cucha. Uje uacangureni Crísto e déji gaté gu, enga chácariji dai Dupade ãrachua ome dáringai eduguéjna cuchábejna.

² Omi tu ujetiga uacáyipiedie déji gaté jogonórone cucha, enga jé ca ejnáño uacáyipiedie aja jnumi jogonórone cucha.

³ Uje e chopise ujetiga uacapatíoraño Crísto iji itoringai nanique, jecute que pijoque uacacuecaringuérique ome erámi unirisórone ore. Chamáñaje uacacuecaringuei e déji Crísto gari gu iji Dupade gari.

⁴ Yirajágo uje yocucuecaringué ichai uné guẽrasṍri tu Crísto, enga ujetiga uté di jne enga a jĩraque agúsoji gari to jne iji guéode. Enga a uacajneque uté ingoningájnai jne.

Ayáyo uacate bajade enga beyoi uacate ichade

⁵ Jecute ayáyo uacáyipie ayoredie quigode ome uaque, enga cho ujetiga cuchade udore topísi ome uaque. Yojningane u: ujetiga ca apótayo nungare ome chequé quedéjnaraque, jeoga jnani quedéjnarique ore rĩ. Mu arei tu ujetiga chequé, abai ore chedu ñane. Enga ayáyo uacasoca gajnaréngone, uacapotigué gajnaréngone ore rĩ. Enga ca beyoi uacáyipie gajnarénguenie quigode ome uaque. Enga ca ajnachoi cucha ponáyone ome uaque. Uje uacamóño uje gosi chejna raja dapotiguéode ome cuchade, enga uté gosi chicadígui Dupade. Enga cho jetiga uté gosi idupade u dagaidode cucha.

⁶ Uacamóño uje pisoca gajnaréngone udore isangurui u Dupade ujuyaquédatéi ome angoninguite parigode ore jnese uje que ore tangári Dupade.

⁷ Enga que amóñoji jnutígome cuchade unojo to ica uje uacapéso, uje cáma anguretáyo Crísto ica.

⁸ Jecute ayáyo apéso cuchade udore jnese: ca oyo uacájninga, enga ca jĩraque óraño uágome cucha gajnaréngone. Ca beyoi uacate gajnaréngone ome ñane rĩ. Ca eso ñane iyoguéode, enga ca adojnóchopo aja ñane rĩ. Enga ca acho puru gajnaréngone ome ñane, pujñiequé gajnaréngone ore rĩ.

⁹ Enga ayáyo uacarapatáringane ome ñane, uje e uaquecãcho uacasocade ome cucha bajade unojo gu uje uacanguretáyo Jesucrísto to.

¹⁰ Enga e uacabeyoi uacate ichade. Chamáñaje Dupade e chinoningase uaque ome uacate bajade gu, enga qué pésu uaque ujetiga oyópise uacanoningayasṍri uté to. Gaidi u gu ujetiga arajayopise Dupade uté gaté.

¹¹ E que cucha go ujetiga judío yoc, jeoga purása quedéjna yoque, jeoga picaque yocúdode ome circuncisión, jeoga ca picaque yocúdode. Jeoga ayoré ataque yoque, jeoga ayoré pisaque yoque, mu cucha obiréjnai tu ujetiga Crísto déji gosi. Chamáñaje Crísto dépisiji danguresórone ore gari jnese gu, enga cucha gose Crísto ome ore jnese rĩ.

¹² Dupade chijnorapise uaque jnese, enga ajegaite uágome re. Jecute beyoi adode to. Osṍcho uacojode ayoréo, enga caniraque uágome ore. Parágapo uágome ore rĩ enga adotáyo uágome ore adode jnese. Enga ajusópise ñane guio.

¹³ Yirajágo uje Crísto chĩro yoquisijnaringuéone jnese nanique, enga que jnusinápo rĩ. Jecute beyoi uté adode to enga adotáyo uágome uacojode ayoré ate gajnaréngone ome uaque. Enga jĩraque acadíchoi uaquetétigade ome ore to.

¹⁴ Mu cuchiyi tupúsu ujetiga ajnórañopise ñane. Ujetiga pijnoraquei déji gosi enga pisoca omone tocade iji uté gosi jnese. Enga ayoré ujñapetai tupúsu uté gosi.

¹⁵ Oyo uacajñanguíji Dupade guerani pajesereringa ome cuchade jnese. Enga jogadi a upúsu uté jne ujetiga chopise sere uacajéode. Chamáñaje Dupade ajegaidi u uté gu ome danguresórone uyoque jnese. Chamáñaje Dupade átapi yógaja ñane gu enga cho ujetiga yocaoi jé chojmarápis iji jnumi. Enga beyoi to enga acãcho Dupade gai iji deréjnane jnese ome cuchade jnese.

¹⁶ Beyoi enga ãretáyopise uacajéode ome Crísto adode, ujetiga pacadique uágome gatuaque. Enga asíñome uacayuquetotigué omone ome ñane ujetiga oyo ñane quique, enga anejénaño ñane aja piquei gatuaque. Ujetiga ajñecacho enga uacarasitigai gajnengóri upúsu Dupade. Ajñecachója Dupade iradedie, jé iji sálmonie rĩ. Enga ajñecachója to uje edoi tu Dupade.

¹⁷ Jecute uacáyipiedie jogadípise Yocangarádejnai Jesús gatuaque iji uacapesudode cucha gáyode jnese. Enga cho ujetiga Jesús gajneque uacapesudode cucha. Enga jé isocai u to ome uacojñane jnese. Chopo rĩ ujetiga Jesús gajnecho uacaruode udore to. Enga acãcho Yocai Dupade gai ome cuchade uje uacanguretáyo Jesús gu.

Páblo cho ore quique ome pisocágoningáne quigode

¹⁸ Amanachuguedie uaque á, angáchoi uacabayode enga apéso ore ipotigádode cucha. Uje e uacanguretáyo Yocangarádejnai jecute uacajnepídi tu ujetiga beyoi uté áyipiedie uniji ome uaque.

¹⁹ Acotẽrachugode uaque á, ajnóraño uacacotedie enga jé ca acho uaquejóringome ore.

²⁰ Pabode uaque á, angoninguite guesaque uágome uacayode gatuaque, uje Dupade ucuei tu uné ome uaque gu.

²¹ Abechugode uaque á, jé ca apéso uacabode ejóporinguéringo. Socaseti apéso uacabode ejóporinguéringo enga ore cho caru, enga jé ca ore chiraja dasocáringome re jne.

²² Diquirógode uaque á, beyoi uacarósõre jnutiminórone uruode jnese. Que gusu uje uacarósõri déji uaquejode ujetiga angáchoi ore ujetiga ore irasique uaque, mu jé u to uje ore déji sañeque. Uacagaidi u gu ujetiga Dupade chimo uje ũré uaque enga irasique uaque.

²³ Jé ca eso uacapesudode uñeque unerotiguérique, mu cho ujetiga ca uacarósõre ayorépisi gajnecho uacapesudode jnese. Mu cho ujetiga Yocangarádejnai gajnecho.

²⁴ Ajnusináño to uje Yocangarádejnai a cho uacoré jne uje uacabeyoi iroquéode. Enga uté gueranone e dimáneo ome uaque iji gaté. Uje uacarósõripísi tu Crísto uté gu.

²⁵ Mu ujetiga uñeque atígo gajnarécho enga a Dupade cho oré ome cucha gajnarétigo to jne. Enga Dupade a isocárique jé chojmára jne ome yoque jnese.