Colosénses 2 - Dupade Uruode

¹ Yipota ujetiga arajáyo uje yejna yiguesi gu colósasgosode uaque. Enga yejnapo yiguesi to rĩ ome laodicéagosode ore. Yejnapo yiguesi to rĩ ome ayoré uñane jnese uje cáma ore chimo yu to.

² Yajéode u gu ujetiga ditijínaque ore ome Dupade adode, enga pijnoraquei dépisiji ore ome ñane. Yajéode u to ujetiga ore chiraja Dupade uruode quigode ujetiga ca ore chagutu rágome uté adode. Yipotapísa to ujetiga ore chiraja uje Dupade áyipie ipoguiédedie quigode upúsu Crísto adode ome yoque.

³ Chamáñaje payuquetotiguéode jnese, jé aja pirajatigade jnese rĩ ore garani upúsu Crísto enga que tṍraji siñeque go.

⁴ Jecute yuruode udore qui tu ome uaque ujetiga ca beyoi enga pãraque uaque ome puru unere bisidétigo jne.

⁵ Uje idája yu iji uaque múñi, yáyipie jecucha déji uáguiji te. Enga yirasique yu gu uje uacajusópise uacadode guio ome Dupade, enga uacapúyoja uacanguretigai iji Crísto.

⁶ Yiraja uje uacasayo Yocangarádejnai Jesucrísto ome uacáyipiedie nanique. Jecute beyoi enga adotáyo uáguiji Crísto uté ejode to jne.

⁷ Enga beyoi yocacajnaquéode enga apúyoja uacanguretigai iji Jesucrísto. Oyo poria uje erode chajuque jnumi enga purúja jnumi. Enga jecucha acãcho Dupade gai ome cuchade jnese.

Pucuecaringué ichai jogadi tu panguretigai ome Jesucrísto

⁸ Ajuso uaqueo ome pacadisõre tágode ore uje ore chacate uágome dáyipie bisidéguedie, dabotaquéode ore. Uje udore ore acajnaquéode que garani tu Crísto to go, mu garani tu ore jmapié dipesedie, jé upo páyipie ayoré dipesedie rĩ.

⁹ Uacarajáyo uje Dupade adipísode déji Crísto to uje chojmarápise ore iji jnumi gu.

¹⁰ Jecute e Dupade iragupúsu uacajei uje uté cháta uágaja Crísto gu. Enga uacangureni Crísto u uje jnuéngai dacasutedie, pujopiedie ore gáyode jnese iji erámone, jé iji gaté yui to rĩ.

¹¹ Uje Crísto, uacatojmárañoji jnumi enga cho ujetiga e picaque uacádode ome circuncisión ujetiga apijóchome Dupade to. Mu que cho judíode ore jmapiedie gotique uje ore chica pute guesíminóri, mu Yoquiquetasṍri Crísto aquesupídi jogadi tu yocajei. Chamáñaje ayoréode uyoque yoquisijnaringuéone garani u gu. Jecute uté icapídode iji yocajei imoi tu uje chiqueta yóguiji yoquisijnaringuéone ujetiga yipijójome Dupade to.

¹² Uje ore chaca uaquedodie iji yodi nanique, enga imoi tu uje uacanguretáyo Dupa Pujnuéngaisṍri uje chiringare Crísto iji itoringai nanique. Enga gajnui tu ujetiga uacapatíoraño Jesús iji ode. Enga gajnui tupo rĩ ujetiga jé ajínañopo aja gaté rĩ uje ecápo rĩ iji dode.

¹³ Uacoyo ayoré togode uje uacagúsoji uacasijnaringuéone gai nanique. Uje que picaque uacádode nanique enga que cucha Dupade ome uaque to nanique. Mu uje uacanguretáyo Crísto enga jogadi u uje Dupade chisi ome pucuecaringuei ome uaque, adi u uje chatire pucuecaringuei Crísto gai to nanique. Enga Dupade chĩrópise uacasijnaringuéone jnese.

¹⁴ Chamáñaje cho jetiga yoquijnose carubode déji Dupade gari nanique uje yiyógo uté áyipiedie gáyode gu. Enga yocajnei pujuyaqué déji yoquiquei. Mu Dupade chĩro yoquijnose carubode udore iji dari gu uje ujnacari Crísto cho yoquisijnaringuéone oré ome dáringai chuque uje toji curesei gai ome yoque.

¹⁵ Enga uje Crísto toji curesei gai nanique enga sué Satanás, irógode ore gáyode jnese. Uje chiese pangarádejna ore iji erámone unojo. Enga gajnui tu ujetiga Crísto isaque ore enga jno ore údi ujetiga chingo ore aja darasade. Gaidi u gu ujetiga urasade ore chimo udore ore uje pujnuéngai ore enga que qué ore bisitique pijoque ome cucha dacatique yui.

Acueyoi gaté jogonórone cucha

¹⁶ Jecute ca angáchoi jnanione uñane acajnaquéode uje ore chacate uágome cucha pibose puyade, uje ore chiroque uágaja dajnusinamánone dire, uje ore chãraque cucha pisagode ome uaque iji sábadode.

¹⁷ Uje yimóngo ayorérique oréraque enga yirajágo uje idógosi oresṍri iji. Enga a jé isocai u to ome judíode ore jmapiedie jnese. Cachi pocoré bisideque cuchade udore. Mu tocade enga oresṍri tupúsu Crísto iji cuchade udore quigade.

¹⁸ A ajusécho Dupade gueranone cucha ome uaque jne ujetiga angáchoi pacadisõre tágode. Jecute ajusópise uaqueo ome jnanione udore ore. Uje ore cho jnani paraguipísode iji raque iji uacajade, enga ore chiroque uágaja dacatecãrainone gaté unirísoño. Ore chisi dabáyode bisideque uje chiese irajatáguejna ore, uje udore que ore cho dojñaji damórique cucha go, enga ore acajnaquéode udore garani upúsu dáyipie ayoredie.

¹⁹ Enga udore ore que ore casapoi Crísto yúrique rĩ. Jé basa Crísto anguresõripísode ore cho datoi iji Crísto, enga Crísto chopise daoi iji danguresórone ore to. Enga Crísto u uje ipesute daoi ijóningai. Enga chicha daoi tuté adode aja jogadode. Enga pésu enga aoi adode nóna ñane aja gaté uje quérã. Chamáñaje Dupade áyipiedie quigode jé u gu.

²⁰ Uacapatíoraño Crísto nanique iji itoringai, jecute páyipie ayoredie e que cucha ome uaque. Jecute ¿gotique gu a uje jé qué uacabeyoi erámi jogosórone acajnaqué bisidégode? Cho ujetiga jé qué uacagúsoji uacáyipie ayoredie gáyode jõ.

²¹ Uje udore ore chojningame uaque: "Ca asayo cuchade unojo." Jeoga ore chojninga: "Ca acho cuchade unojo." Jeoga ore chojningápo rĩ: "Jé ca etingacho cuchade unojo."

²² Uje pacajnaquéode unojo que garani tu Dupade go mu garani tu jnanione iji erámone. Uje udore ore garéngone cucha puyácho ome uaque que bisitique pijoque. Enga a jĩraque cuchade udore íjnoque jnese jne.

²³ A uacuñane jos eti áyipierãque jnanione udore ore jõ, enga uerate ore acajnaquéode quigode ome uacajéode. Chamáñaje ore chãraque cuchade ome raque gatuaque, enga ore chejna rángaja dacatecãraitigade ome dangurenone cucha. Mu que ore ipesudode udore chatapísaja ore gotique. Chamáñaje ore áyipie ayoredie jé qué jogate ore, enga ore ipotiguéode ome erámone jogonórone cucha qué déji ore to.