Colosénses 1 - Dupade Uruode

Páblo chatata darasitigade ome colósasgosode ore

^1-2 Páblo uyu enga yaríjogosṍri tu Timotéo. Enga yurúsãre yuruode ome yocujode Dupade urasade uaque iji uaquedáidatéi Colósas uje uacanguretáyopise Crísto to. Jesucrísto iroguipísode apóstol uñai tu yu uje Dupade jé ajéo ome yu gu ujetiga yiji Jesucrísto iroquéode to. Yajéode u ujetiga Yocai Dupade chatapísaja uaque enga chisi ome pajesereringai ome uaque.

Páblo icatecãraitigade u unojo ome Dupade anguresórone ore

³ Jecucha ga yacãco Yocangarádejnai Jesucrísto dai Dupade gai ome uaque uje yicatecãcoi ome uaque.

⁴ Uje uacajnomei e chise yoque uje uacanguretáyopise Jesucrísto, enga uacajnórañopise uacojode Dupade anguresóño ore jnese.

⁵ Uacáyipiedie déji gateminórone cucha gu uje e dimane ome uaque iji Dupade idai iji gaté. Enga jĩraque uacanguretáyo cuchade udore yúode to nanique uje uacadúcho Dupade uru uréone, enga ore cho quique Dupade áyipie omenie ome uaque ujetiga piquetaque uaque ome Dupade.

⁶ Uje uacadúcho pacaditigade nanique ome Dupade ijnoraquei ome uaque, enga jĩraque uacanguretáyo. Uje uacarajáyo gu uje jé ũrepise pacaditigade udore. Enga uacadudigode Dupade urúo udore e chubu erámone jnese, enga e uásejnapise erámi jogosórone ore uje ore changureta Dupade uruode unojo to.

⁷ Uacacadisṍri ome Dupade uruode u yoquijõrai Epáfras nanique. Uje yoquibaya uté to ome Crísto iroquéode, enga uté chejnápise re aja dagaidode Crísto iroquéo uje déji uacajade nanique.

⁸ Enga Epáfras uté u uje di uacajnomei údi diríca iji yoque, enga chatatame yoque uje Dupade Ujopié Espíritu Sánto déji uaque jecute uacajnórañopise uacojode Dupade anguresóño ore.

⁹ Jecute uje yudúco uacajnomei diríca, ga jĩraque yicatecãcoi Dupade ome uaque, enga que yiyágo yicatecãcoi ome uaque. Enga yoquicatecãraitigade quigode u unojo: ujetiga Dupade chĩreta uágome payuquetotiguei, pirajatigade ore ome dadode, ujetiga arajáyo áyipiedie ome uaque enga jĩraque apéso quigode.

¹⁰ Ujetiga cuchade udore chise uaque enga a u jne ujetiga ajuso uaqueo enga a apijócho jne ome uacáringane Yocangarádejnai anguresõre. Enga a apéso ajegaidode cucha gatuaque jne. Enga a uacajnimique cucha omone jnese jne aja guesi ome uacadode udore. Enga arajayopise Dupade adode gaté to jne rĩ.

¹¹ Yicatecãcoi Dupade to ome uaque ujetiga na dajopié iyiejna taja uaque ujetiga apúyoja adode, enga adotáyo uágome cucha ponáyone jnese, enga ca ayáyo anínaño uágome Dupade adode.

¹² Enga acãcho Yocai Dupade gai to uje pésu yoque enga e dimane yógome idai yui to. Uje díreca tijode iji Dupade idai tuté, enga Dupade a tẽrája darasade ore jne iji dedai uté. Enga a yocajnetígo cucha déji to jne ome yoque.

¹³ Cho ujetiga Satanás suru yoquibai iji ijnangununie ajei nanique, mu Dupade e chijnime yóguiji ijnangununie enga e chicha yógaja dírecaringuéi ujetiga yoco yoqueduguéjnai iji ujnacari Jesucrísto, uje Dupade ijnoranguipísi tu dajnacari tuté gu.

¹⁴ Enga yoquiquetangóri upúsu Jesucrísto uté uje toi ome yoquisijnaringuéone. Jecute Dupade e chĩrópise yoquisijnaringuéone jnese.

Crísto cho yoquisijnaringuéone oré ome dáringai chuque ujetiga pajesereringai dépoji yoque rĩ ome Dupade

¹⁵ Pibojma Dupade, mu quene pimo uje Ujnacari di iji jnumi. Uje uté jé chopise dayé Dupade ome cuchade jnese. Enga bajaguipise Ujnacari tuté ome cuchade jnese, enga u uje gajneque cuchade jnese.

¹⁶ Enga Dupade Ujnacari upo rĩ uje Dupade chutṍri nanique ujetiga pésu cuchade jnese iji guéode, erámone ore jnese. Uté ipesute yoquimone cucha jnese, enga pésapo cucha ponáyone rĩ uje que yimóngo ome yoquedodie to. Pésu eduguéjnane jnese ore úringane eduguéjna, enga pésapo pujopiedie jnese rĩ. Dupade utocaidi tu Dajnacari ujetiga pésu cuchade jnese, enga Dupade ajéode u ujetiga Ujnacari gajnengápo damaningone cucha jnese rĩ.

¹⁷ Crísto jé jogate nanique uje cuchade qué íjnoque. Enga uté e u uje suse dapesudode cucha udore quigode guio iji deréjnane.

¹⁸ Que gusu udore, mu Crísto cho daopísi iji danguresórone enga ore gatoi jé u uté to. Enga guẽrate pitijínaquédatéi tome danguresórone ore, uje ore ucuecaringuei garani u gu. Uje bajaguipise Crísto ome cuchade jnese enga jé bajaguipise to uje ecápo rĩ iji pitoringai. Dupade gaidi u gu ujetiga eduguéjna cuchape Crísto ome cuchade jnese.

¹⁹ Dupade ajéode u nanique ujetiga dadipísode dépisi Crísto to ujetiga Ujnacari tuté jé chopise dayé Dupade ome cuchade jnese.

²⁰ Enga Dupade pésu dáyipiedie nanique ome erámi jogosórone, gaté jogosórone ore jnese ujetiga chátapo ore aja re rĩ, ujetiga pajesereringai dépoji ore rĩ ome ñane. Enga chimate ore aja re gu Crísto itoringai, uje toi ome ore isijnaringuéone.

²¹ Purása quedéjna uágome Dupade ica, enga uacoyo uacamajo Dupade ica. Uje gajnarenguipise uacadode ome Dupade ica gu. Mu unojo quigade u uje Dupade cho darása iji uaque enga jogadi u uté uje e pajesereringai déji Dupade, uágome ñane.

²² Uje Crísto toji curesei gai ome uaque enga imoi tu uacáringane uome ome Dupade. Dupade pésu cuchade udore gu ujetiga diga chimanipise uágaja dari uje e ueque uágome pisijnaringuéone, enga e que uacayoguérique cusipise go, enga uacáringane máraque e bijnápis ome uaque to.

²³ Jecute e uacajnei tu ujetiga apúyoja uacanguretigai. Enga oyo poria uje erode purúja jnumi. Uje uacadúcho Dupade áyipie piquetatodie iji taningai nanique, enga jé u uje uacanguretáyopise Dupade ojningane cucha yúode ome uaque. Jecute beyoi enga ca abéroyo uágome uacarodigode cucha udore yúode. Enga uacadudigode Dupade áyipie piquetatodie udire u uje e chubu erámi údode jnese. Uje udire atatasórone jõrai tu Páblo uyu to.

Páblo gajnei tu ujetiga doi Dupade iroquéode iji Jesús anguresórone ujade

²⁴ Pininaquei jogadi tu ome yu uje yo yiba yatatagode Dupade urúo ome uaque. Yiraja gu uje Crísto chejnáreque re to nanique ome danguresórone ore uje cho daoi iji ore. Enga yipotigadipísi tu ujetiga yimanipise yajnepídi taja jnumi uje yajnerámeone u Crísto adode uje chejnáreque re ome danguresórone ore nanique. Jecute yirasique yu uje yejnáreque yu iji uacabáyode.

²⁵ Jecute Dupade ajéode u ome yu ujetiga anguresórone uaque uacoyo uacaróguiji yu. Chamáñaje Dupade ucuei tu uacomitigárique gu. Jecute yajnepídi tu ome uaque ujetiga yacate uágome Dupade uruode gaté ujetiga arajáyo quigode jnese.

²⁶ Enga yatatagode ome uaque u Dupade áyipie ipoguiédedie uje que yocayode jnani bajácho chiraja to nanique. Mu Dupade ajéode e u ujetiga danguresórone disi ejode uyoque yirajágo to áyipie ipoguiédedie udire quigode.

²⁷ Enga Dupade pota ujetiga danguresórone ore chudute áyipiedie udire jnese. Chamáñaje cuchadatei gu, enga ueradépisei ome erámi unirisórone jnese. Enga áyipie omenie udire quigode u unojo: uje Crísto déji gosi, enga uté gosi a gajneque Dupade ingoningájnai jne iji gaté.

²⁸ Jecute yacaco ore jnese ome Crísto adode. Yaquírango ore jnese to ome pisijnaringuéone. Yacacopo ore jnese rĩ ujetiga ore chirajapise Dupade uruode quigode jnese. Yoquigaidi tu gu ujetiga Crísto anguresórone chojmara, chojmarane quérã enga ore chise dáringáringo jnanío jnese jne iji Crísto adode.

²⁹ Jecute yejna yiguesi ome Crísto iroquéode, enga Crísto uté u uje chisi ome petotiguei ome yu ome daroquéode udore jnese.