Apocalípsis 9 - Dupade Uruode

¹ Enga Dupade iroque chejna yijmanai chubúchapo dabuchui te rĩ. Enga yimo Dupade iroque uñai uje basája jnumi. Enga cho guédo basugué uje basája jnumi. Enga Dupade chisi ome llave ome guédo uaté ome ejopié cuchabé uje que eruénique cuse.

² Enga uje chuchẽre ejo cuchabé gai uje que eruénique cuse, enga úyujnanie chicáji gaté. Enga cho ejo piqueta cuchabé úyujnanie. Ejo cuchabé tuaté úyujnanie irágu gaté yui enga chajni guedé edo enga topiéjna.

³ Enga chuguyúgu quedéjnanie tṍraji uaté úyujnanie. Enga ore chóna erã́tique údode. Mu pecãra ore adode, enga ore cho suárechequedíe uje chigase ore.

⁴ Mu Dupade chãraque ujetiga ore cho dajuñame erãp ijóningane, poridie, cucha pacade ore. Mu gusu ujetiga ore chigase ayoréode uje que pajópi Dupade i aja ore enochade to.

⁵ Mu Dupade chãraque ujetiga ore chujépise dagayade ore iji erámone. Mu gusu guedosíode uje chejna yijmanai ome chuguyúgu quedéjnanie ujetiga ore chigase erámone unirisórone ore. Enga udire ore cayapídode achabode cho suárechequedíe cayapídode achabode.

⁶ A chuguyúgu quedéjnanie cayade ore chucué jórogui datoringárique jne iji dirode udore. Mu a ca ore chise jne. Cho jetiga pitoringai jnome ore gu.

⁷ Enga chuguyúgu quedéjnanie ore cho buricade uje e dimane ore ome pocaningai yui. Enga cuchárique déji ore gatoidie gai uje cho ayode coróna uje pipesudéji óro nanganatague. Mu edodie chopise ayoréode edodie.

⁸ Enga ore acarane cho chequedíe acarane uje umáño. Enga ore patarane chopo caraté quedéjnanie patarane rĩ.

⁹ Enga cho jetiga chuguyúgu quedéjnanie ore chigui daguidé guebéode ome dagaidi pocaningai yui ujetiga ca ore umajosórone õrachade chacája ore. Enga ore ujnóngone jocarane chichagu gatajnoquei tuté ome dajocarane. Enga cho guebéquedatéode, buricade ore guichade jocarãpídode uje uásejna ore uje ore chayo aja pocaningai yui.

¹⁰ Enga ore carigode cho suárechequedíe carigode uje ore ojodie déji. Enga ore chigase erámone jogosórone ore ome dojodie udire. Enga udire ore guejnane guedosío chejna yijmanai uje ore chigase erámone jogosórone aja dajesúode.

¹¹ Enga chuguyúgu quedéjnanie ore eduguéjnai cuse uje cho Dupade irógode. Enga ejo cuchabé tuaté uje que eruénique cuse gajnengóri u uté. Enga Dupade irógode gajnui tuté i tu Abadón iji hebréode ore uruode. Jé basa i tu Apolión ome gréciagosode ore. Uje Abadón, Apolión ore urui jé qui chojmára uté. Enga qui tu: jnani dequejnangóri.

¹² Erámone unirisórone e ore tṍra paguté sutabáidode cucha gajnaréngone uñai taja daquigade. Mu amirone qué déji enga gare.

¹³ Enga Dupade iroque chojmaráití chubúchu dabuchui enga jĩraque yudute darade uje tṍraji gaserani uje óro nanganatague uje déji Dupade iquei. Darade udore tṍraji ue gagájnione uje déji ajidedie jnese.

¹⁴ Enga darade catecã́ri Dupade iroi uje e chubúchu dabuchui te que enga chojninga: –Ejñu Satanás iroque gagájnione udore uje e pigarique ore iji tié cuchabé pijnanai uje i tu Éufrates.–

¹⁵ Enga jé u uje Dupade iroi uté jno enga chejñu Satanás iroque gagájnione udore ore ujetiga ore chujé ayoréode ore peque gatéode iji erámi údode. Chamáñaje pigarique udore ore nanique gu ujetiga dimane ore ome Dupade ojningai tuté dire. Chamáñaje Dupade ipesute cuchade udore jogadode gu ujetiga ore tocadepísiji, jeoga guedé batiga, jeoga dire, jeoga guedosi, jeoga sequeré.

¹⁶ Enga yudute Satanás iroque gagájnione udore ore isoldádode ore guejnanie ayorei. Enga 200 millones u ore jnese. Enga ore cháji buricade gáyode jnese.

¹⁷ Enga yimo buricade udore iji yenominone enga udore ore charipísorone ore iguidedie guebecho enga uruchachade déji ore aróbedie jnese. Enga charumájna ujade, jeque azul u ujade, jeque sare ujade. Enga buricade udore ore gatoidie cho caraté quedéjnanie gatoidie enga pioi ocaraidie, úyujnanie tṍraji ore pijnanone jnese, uje ai u azufre ai to.

¹⁸ Enga ore chujé erámone jogosórone peque gatei ome pioi, úyujnanie, azufre ore uje tṍraji ore pijnanone enga uásejna ore yugode iji ore.

¹⁹ Mu buricade udore que gusu ore ujopiedie iji ore pijnanone go, ujetiga ore chujé erámone jogosórone. Mu dépoji ore carigode rĩ. Uje ore carigode cho ugade. Enga ore cho dajuñame erámi unirisórone ore ome dacarigode to.

²⁰ Mu ayoréode ore uje que ore toji pujuyaquéode udore jmainie to jé ore chajo rágaja dasijnaringuéone. Enga que ore cha dangaranenie pujopié gajnarénguei. Enga que ore chapo dangaránone ayoré gajnúo rĩ uje pipesucho ore iji guebéode uje ore íode u óro, pláta, bronce ore, jé iji cucarané nanganatáguedie, pidode ore. Uje ore angaránone udore que ore chimo cuchárique, que ore chudúdapo cuchárique rĩ, enga que ore digápo rĩ.

²¹ Que ore chapo jõcarataque rĩ ome ñane. Que ore chapo pujopié gajnarénguenie, dajuyaquéode rĩ ome ñane. Que ore chapo punganingane ome chequé unejánguenie, jnani quedéjnane ore rĩ. Que ore chapo oriei rĩ ome uñane ugúchade.