Apocalípsis 8 - Dupade Uruode

Jesucrísto chijnime cucha cataque erueminóripísi

¹ Uje Uté uje gajnua tu áyasa pẽrapaidé chijnime cucha cataque erueminóripísi iji darujna aoi uté, enga jé u uje ore chopise chíguiji jnumi jnese iji gaté. Enga udore ore cho chígaja guedé batigai pei.

² Enga jĩraque yimo Dupade iroque garitíode ore uje ore déji Dupade iquei, enga ore chisi ome pubuchuque garitíode ome ore.

³ Quigade enga yimo Dupade irógode uñai uje chijna papose pi iji dajmanai. Enga uté jno enga chágueji gaserani iquei uje pipesudé iji óro ueguepísei. Uje cuchiso pẽrapáidode gajneque gaserani tuté. Enga ore chisi ome aceite ai uneripísode ome uté ujetiga chãru iji dapose pi tuté iji gaserani gai. Enga jiei acéiteode uje ore chisi ome uté. Enga uje aceite uté tagu enga Dupade urasade jnese ore icatecãraitigade nóna aceite ai aja gaté.

⁴ Enga uneréjna úyujnanie uje tṍraji pi uté iji iroi jmanai. Enga ai unéri chise Dupade. Que gusu ai unéri uje chise Dupade, mu anguresórone ore icatecãraitigade chise to enga uneréjna to ome Dupade.

⁵ Enga Dupade iroi tuté chijnime pioi gueguerade iji gaserani tuté, enga chaníraja papose pi tuté. Enga doi enga tṍraji erámi gai enga ajnorane tṍraji, enga cucha jocarãque cuchábi tṍraji rĩ, jé aja guéode uruode, jé aja jnupe tãrarachui rĩ.

E dimane Dupade irógode ujetiga ore chubúchu dabuchugode

⁶ Enga Dupade iroque garitíode, uje e dimane ore ubuchugode iji ore jmainie, ore doi enga ore chicha dabuchugode aja dabijnanone ujetiga ore chubúchu.

⁷ Dupade iroque bajai chubúchu dabuchui enga ebe cuchábedie tṍraji gaté, jé aja pioi uje chimesa diquiyoi, enga ore chãru poridie peque gatei iji erámi údode, jé cho erãp ijóningane ore rĩ, chejna udore peque gatei to.

⁸ Enga Dupade iroque uñai chubúchapo dabuchui rĩ, enga jĩraque pioguéjnai tṍraji enga basája yote quedéjnane. Enga pioguéjnai uté gajnui u cototé cucháberaque. Enga jé u uje yote quedéjnane peque gatéode diquiyojnai iji jnumi.

⁹ Enga yote quedéjnane ujõsórone peque gatéode ore toi jnese. Adi jec u cucode uje pioguéjnai chejna udore peque gatéode to rĩ.

¹⁰ Enga Dupade iroque gadioi chubúchapo dabuchui te rĩ enga guédo cuchabé basíji gatajnoquei tuté enga ocaráchi aja jnumi, enga cho ibioguéjnane. Enga chequésãre tiedie peque gatéode iji erámi údode jnese jé aja sibíjnane peque gatéode to rĩ.

¹¹ Enga guédo tuaté i tu Iringongué uje chusaque yodode. Enga uásejna ayoréode uje ore chóji enga ore toi jnese. Chamáñaje yodode peque gatéode iringocho gu iji erámi údode jnese.

¹² Enga Dupade iroque gagájni e chubúchapo dabuchui rĩ. Enga jé u uje cho dajuñame guedé, guedoside, guédodie ore. Jecute guedé peque gatei topísi, jé cho guedoside peque gatei rĩ uje topísi to. Jé chopo guédodie peque gatei rĩ uje topísi. Jecute udore peque gatéode que ore idírecaringuérique cusapo rĩ ome dejórique. Jecute topiéjnapise jnumi gatuaque iji dirode, dejade ore jnese.

¹³ Jĩraque yajire gaté mu yimo Dupade irógode uñai uje choque iji gaté. Enga yudute uté pijnacaraidie uje chojninga: –¡Ja jõõõõ! Yosõripísi jóroque jnumi unirisórone ore yui ome Dupade iroque amirone isocade uje gadioc ore. Chamáñaje a udore ore chubúchu dabuchugode jne enga dopísi datéringane jne ome ore.–