Apocalípsis 7 - Dupade Uruode

A Dupade irógode churúsãre Dupade urusarane iji Israel abode ape disi ejode ore enochade jne

¹ Quigade enga yimo Dupade iroque gagájnione uñane iji yenominone. Enga ore déji emone garanone. Chojmarai déji umusoi garani, uñai déji casaque garani. Jeque jõrai dépoji guedé garani te rĩ. Jeque jõrai dépoji guedé cacadi te rĩ. Enga udore ore chãraque emone quigode ome, ujetiga ca chubúchu erámone, yote quedéjnane, poridie ore jnese.

² Enga e perané pujopié tome ore ujetiga ore cho dajuñame erámone, yote quedéjnane ore jnese. Mu yimópo Dupade irógode uñai te rĩ uje tṍraji guedé garani, enga chijna Dupápisi i erã́sori ujetiga chajója Dupade anguresõripísode ore enochade ome. Dupade iroi tuté catecã́ri iroque gagájnione udore ore enga chojningame ore iji dabijnacaraidie:

³ –Ca oyope uacajuñame erámi, yote quedéjnane, poridie ore, jé aja ujetiga yajógoja Yoquidupade i erã́sori taja irógode ore enochade.–

⁴ Enga yudute uje uásejna ore uje Dupade iroi churúsãre ore enochade. Enga udore ore jnese ore gãrapíode u jnani bajai Israel ujnacarode uje gare ore iji yirídai nanique. Enga 144 mil u ore batigai.

⁵ Jnani bajai Judá ape disi ejode 12 mil uje pajója Dupade i aja ore. Jnani bajai Rubén ape disi ejode 12 mil to uje ore chajója Dupade i aja ore enochade to. Jnani bajai Gad ape disi ejode 12 mil to uje ore chajo Dupade i aja ore enochade to.

⁶ Jnani bajai Aser ape disi ejode 12 mil to uje ore chajo Dupade i aja ore. Jnani bajai Neftalí ape disi ejode 12 mil to uje ore chajo Dupade i aja ore to. Jnani bajai Manasés ape disi ejode 12 mil to uje ore chajo Dupade i aja ore to.

⁷ Jnani bajai Simeón ape disi ejode 12 mil to uje ore chajo Dupade i aja ore to. Jnani bajai Leví ape disi ejode 12 mil to uje ore chajo Dupade i aja ore to. Jnani bajai Ísacar ape disi ejode 12 mil to uje ore chajo Dupade i aja ore to.

⁸ Jnani bajai Zabulón ape disi ejode 12 mil to uje ore chajo Dupade i aja ore. Jnani bajai José ape disi ejode 12 mil to uje ore chajo Dupade i aja ore to. Jnani bajai Benjamín ape disi ejode 12 mil to uje ore chajo Dupade i aja ore to.

Juan chimo ayorébui iji gaté uje ore iguidedie póroropisi

⁹ Unojo quigade enga yimo ayoré dipeséjnane. Enga ducunirone unirisórone ore déji jnese. Ayoré ponáyone ore déji jnese uje ore uruode cãra rome ñane. Enga udore ore cháguiji charipi cuchábi charipísõri, Áyasa gajnui Jesús iquei jnese. ¡Enga que diquirajaque udore ore ujetiga pisecarãte ore uje jiépisi ore gu! Enga udore ore iguidedie póroropisi, enga ore chijnapo ijnanie ojodie rĩ iji dajmainie.

¹⁰ Enga ore pijnacarachi enga ore chojninga: Yoquiquetangóri u Dupade uje chácariji dayaripi cuchábi gai. Chamáñaje Abi toi ome yoque gu enga gajnua tu áyasa pẽrapáideraque ome yoque.

¹¹ Enga Dupade iroque dipeséode chaparu gai iji charipi cuchábi. Enga pangaránone uje 24 ore, jé aja Dupade utocaite gagájnione ore déji Dupade iquei jnese. Enga udore ore jnese ore chichaga dagataidie aja jnumi iji Dupade iquei ujetiga ore chicota.

¹² Enga ore chojninga: ¡Amén! Yicoi enga yicotágo Dupade enga yacãco gai. Chamáñaje ingoningájnai, ayuquetotiguei, etotiguéode cuchadatéo. Pangarádejna cuchape enga ujopíerã́quedaté. Jecute jé tiógarapísa gajnéone yoquicotaquéo iji deréjnane jnese. ­¡Amén!

¹³ Diga pangaránone udore uñai catecã́ri yu enga chojninga: –¿Araja bora pórorodie iguisórone gosode a? ¿Ja arajápo ore garani te rĩ a?–

¹⁴ Enga yichajnai jnani tuté enga yojningame: –Cachi baraja arĩ́e. Angome yu.– Enga uté chojningame yu: –Udore ore u uje ore chejna cucha dosógode aja daquigade. Enga ore churu dáyipiedie, daguidedie ore iji Yoquiquetasṍri iyoi enga e ichapise ore.

¹⁵ Jecute ore déji charipi cuchábi tuté iquei enga que ore chimoque dínique, dejátique uje ore pésu Dupade ipotigádode cucha iji iguíjnai. Enga Dupade déji ore gari enga a chirodipise ore jne enga a chirotápise ore jne rĩ.

¹⁶ Jecute a e ca chaguhénique chejnapo ore jne rĩ. Enga a e ca ore cajnórapo iji jne rĩ. Enga a e ca ore chejnáreque guedé ojo dotárenie jne rĩ iji deréjnane jnese.

¹⁷ Chamáñaje Jesús uté u uje déji Dupade charipi cuchábi gatócoro ujetiga chirodipise ore. Yojningai u uté uje tẽra re ome ore nanique, enga gajnua u áyasa pẽrapáideraque. Enga a cho áyasa iji darodigode udore jne. Enga a chorei ore iji yote uecai garani jne ujetiga ore chóji gatuaque. Enga a Dupade doi enga churupise ore educadode jnese jne, enga a ca ore popo jne rĩ iji deréjnane jnese.–