Apocalípsis 6 - Dupade Uruode

Jesucrísto u uje gajnua tu áyasa pẽrapaidé uje chijnime cucha catágode udore ore iji darujna aoi gai

¹ Enga yajire Uté uje gajnua tu áyasa pẽrapaidé uje chijnime cucha cataque bajai. Enga yudute gaté unirísõre gagájnione uñai uruode uje ibisócho enga cho guéode uruode enga chojninga: –Jé ajire cucha dacadode udore to á.–

² Jecute yajire, enga yimo burica póroroi iji ti enga charipísõri chijna docoji iji dajmainie ome pocaningai yui. Enga ore chisi ome uté ayoi coróna tome. Enga uté jno enga obiréjna uje jnusi rome dajocaningai. Gaidi u gu ujetiga úringai pujnuéngaisṍre pijoque.

³ Unojo quigade enga Uté uje gajnua tu áyasa pẽrapaidé chijnimápo cucha catágode uñai, enga yudute gaté unirísõre gagájnione uñai uruode uje chojninga: –Boji ti ga ajire to.–

⁴ Enga buricai uñai tocadepo rĩ uje gati aoi. Enga Dupade chisi ome dajopié ome charipísõri ujetiga chinoningase pajesereringai iji erámi údode jnese. Enga ujopié pésu enga jnanione ore chujé ñane iji erámi údode jnese rĩ. Enga Dupade chisi ome quesé asícojna cuchábi ome buricai charipísõri uté.

⁵ Uje Uté uje gajnua tu áyasa pẽrapaidé chijnimápo cucha catágode uñai rĩ enga e gadioque ijnimingone. Enga jé u uje yudute gaté unirísõre gadioi uje chojninga: –Boji te á. Enga jé ajire to.– Jecute yajire. Enga yimo burica utatai tiji enga charipísõri chijna cucha imenuringuéone erã́sori iji dajmanai uje ore chajire cuchade imenuringuéone iji.

⁶ Enga yudúdapo darade rĩ iji gaté unirísõre gagájnione ore ujai uje catecã́ri buricai charipísõri enga chojninga: –Apésu cuchade oredie ome erámi unirisórone enga jiei. Enga a gosi doi kílo chojmarai iji trígo mu a chopise diri oredie jne. Jeoga doi kílo gadiógode iji cebáda mu chejna diri oredie aja rĩ. Jé basa ga ca o bajuñame ore acadie úvai, aceitúna ore ujetiga ca víno, aceite ore íjnoque to.–

⁷ Uje Uté uje gajnua tu áyasa pẽrapaidé chijnimápo cucha catágode uñai te rĩ enga e gagájni ijnimingone, enga yudute gaté unirísõre gagájnia uruode uje chojninga: –Boji te, enga ajire to.–

⁸ Yajire mu yimo buricai enga aoi sare. Enga uté i tu Pitoringai. Yimo uñai iji uté quigade rĩ, uje chajna bajai uté, enga uté i tu Jnaropié. Enga Dupade chisi ome dajopié ome ore ujetiga ore chequésãre erámi unirisórone peque gatei. Udore ore utocaidode u pocaningane, jé aja chaguhéode, dequejnaréquedatéode, jé aja cuchiso sijnángone ore.

⁹ Uje Uté uje gajnua tu áyasa pẽrapaidé chijnime cucha catágode uñai uje e chejna yijmanai, enga jé u uje yimo Dupade anguresórone ore áyipiedie, uje chuque ore nanique uje ore cho daba datatagode Dupade urúo. Enga páyipiedie udire déji gaserani údi uje cuchiso pẽrapáidode gajneque ome Dupade.

¹⁰ Enga yudute iji yenominone uje ayoré togode udore ore tibite enga ore chojninga: –Pangarádejna Pujnuéngaisṍripísi á, ueguipise ua ome pisijnaringuéone enga que ajéninga barúrique. ¿Jé deréjnaringo cho rique jne a ujetiga e ajire yoquisórone jnutiminóño ore adode aja quigode to a, ujetiga e arota yoque to?–

¹¹ Enga ore chisi ome ore iguidé pórorodie ome ore enga ore chaquĩ́ra ore. Enga ore chojningame ore: –Adotáyope uágaja enga arochope uacabayade ore yui. Uje qué uñane ore déji ujetiga ore chopo daba dapesudode Jesucrísto iroquéode to jne rĩ. Mu ujetiga ore chujé ore ome danguretigai enga jogadi jé u jne ujetiga Dupade chirota uaque.–

¹² Yimo uje Uté uje gajnua tu áyasa pẽrapaidé chijnime cucha cataque chojmaráití. Enga jé u uje jnupe tãrarachui tṍraji. Enga guedé edo toi enga opoipise. Enga gajnui tu piguidé utatapíseraque uje piguidé enga imoi tu uje ayorérique úchachárique toi. Enga guedoside chécãre re enga gatípise enga gajnua tu diquiyojnáraque.

¹³ Enga yimo guédodie iji guéode enga ore basája jnumi. Enga cho pijninguéñanie aja jnumi.

¹⁴ Enga guéode íjnoque bisideque. Enga gajnui u darujna aórique uje pipocayaque aja ñane. Enga yote quedéjnane abuedie, cucaranone ore chécãre dajogadode jnese iji erámi údode jnese.

¹⁵ Enga erámone jogosórone eduguéjnane ore chacose re iji cucarã́tedódie, jé iji cucarãte ujade rĩ. Que gusu ore, mu ayoré gajnaréngone ore chacose re to. Jec upo soldádode eduguéjnane, atade, dacasutedie ore chacose raque jnese to. Ayoré pisagode, jé aja ayoré dacajnéone ore chacose raque to rĩ.

¹⁶ Enga ore tibite enga ore chojningame cucaranone udore, jé aja cucaranenie udire: –Cucaranone uaque á, beyoi enga apéroyo yoquibáyode. Enga apócho yoque ome Eduguéjna Cuchábi uté uje déji dayaripi cuchábi gai iji gaté. Jé ome yocajnei Áyasa ujuyaqueque iyiejnai tuté to rĩ.–

¹⁷ Chamáñaje deréjnai e di gu ujetiga Dupade ujuyaqueque cuchábi e di. ¡Enga a ca ayorérique déji jne ujetiga chapite!