Apocalípsis 5 - Dupade Uruode

Áyasa u uje ujopié déji ujetiga chuchẽre darujna aoi gai

¹ Enga yimo charipi cuchábi charipísõri uje chisa darujna aoi iji dajmanai ãrachua enga pipocayaque. Enga purusarane déji uéchade jnese. Enga jurúgai ome cucha cataque garitíode.

² Enga yimo Dupade iroque cuchábi gaté unirísõre enga uté chejnapúsu daruode enga chojninga: –¿Ja uñeque déji yocujade ujetiga jé tiógarapísa ujetiga chijnime cucha catágode iji darujna aoi tuné údode enga chuchẽre gai a?–

³ Mu que uñeque déji gaté, jnumi, jnaropié ore ujetiga jé tiógara ujetiga chuchẽre gai. Enga que uñeque dépoji rĩ ujetiga tiógarapísa ujetiga chajire darujna aoi tuté.

⁴ Enga uje e yiraja uje que ducucherángai enga jĩraque yibóji yejode. Uje que uñeque déji ujetiga gajnei tu ujetiga chuchẽre darujna aoi gai. Que uñeque déji rĩ ujetiga naráraja gai ome yoque. Enga que uñeque tiógara to rĩ ujetiga chajire.

⁵ Jecute pangaránone uñai catecã́ri yu enga chojningame yu: –Aya ugo. Uje uñai déji uje pujnuéngaisṍre uté. Enga ujopié déji ujetiga chijnime cucha cataque garitíode iji darujna aoi uté. Enga a uté u jne ujetiga chuchẽre gai ome yoque. Yojningai u eduguéjnai jnani bajai David ape disi ejoi uje uté gãrapi tu Jacob ujnacarode uñai uje i tu Judá. Uje Jacob chojningame dajnacari Judá tuté nanique: "A eduguéjna cuchape bape disi ejórique jne, enga gajnui a u caraté quedéjna cucháberaque jne."–

⁶ Enga yimo Áyasa iji piyaripi cuchábi gai iji pangaránone, gaté unirísõre gagájnione ore ajei. Chaguesi mu obiréjna ore ajnangópidode iji uté gai. Enga yiraja uje cuchiso pẽrapaite uté ome Dupade. Enga uté uedie gariti, enga edodie garapo iji ti rĩ. Enga uté edodie upúsu Dupade Ujopié Espíritu Sánto gajnu garitíode uje Dupade iroque ore nanique aja erámi údode jnese.

⁷ Enga Áyasa tuaté sose charipi cuchábi charipísõri yui iji yenominone enga chisa darujna aoi tuté uje déji charipísõri jmanai ãrachua.

⁸ Uje e chisa darujna aoi, enga jĩraque gaté unirísõre gagájnione, pangaránone uje 24 ore, ore doi enga ore chichaga dagataidie aja jnumi tiji Áyasa iquei. Enga ore ijocayade árpai déji pangaránone udore ore jmainie jnese. Enga ore chisasíapo agapiábode rĩ uje óro nanganatágabí iji dajmanai uñane. Enga cucha ai unéri déji agapiábode udore ajéode. Enga cucha ai unéri gajnúone u Dupade anguresórone ore icatecãraitigade ome Dupade.

⁹ Udore ore chirate daradé icha uje chojninga: Que uñeque gajneque ujetiga chisa darujna aoi uné go. Mu gajnengóri tupúsu ua. Que uñeque gajnengápo rĩ ujetiga chijnime cucha catágode iji. Mu gusu ua uje bajnime. Uje ua u gu uje bẽra ua ome erámi unirisórone nanique enga bo ore isijnaringuéone oré ome bayoi uje ore chujé ua nanique iji curesei gai. Bagaidi tu gu ujetiga Dupade cho darásaji ore iji erámi údode jnese to.

¹⁰ Bapesute baquetade udore ujetiga eduguéjna ore. Bagaidi tu gu ujetiga ore u ujetiga ore pésu cuchade aja quigode to iji erámi jnese. Bapesute ore to ujetiga sacerdote ore, enga ore chedu yoquidupade iroquéode ome dojode ayoréo.

¹¹ Yajirápo gaté rĩ enga yudute Dupade iroque dipesei pijnane uje ore chicotapise Áyasa. Que toc ujetiga pisecarãte ore uje ore batigai u 'millones y millones'. Enga yimo charipi cuchábi, pangaránone, gaté unirísõre gagájnione ore iji udore ore ajei.

¹² Enga ore chejnapúsu daruode enga ore chojninga: Picotaque opejã Dupade Abi uje cho áyasa pẽrapáideraque ome erámi unirisórone. Jé tiógarapísa yoquicotaquéode ome re. Chamáñaje ujopíerã́quedaté gu, ataguipise rĩ, enga ayuquetotiguei que eruénique erãpe cuse. Jé chopo uté etotiguédatéi to rĩ. Pangarate cuchape uté rĩ enga ingoningájnai cuchadaté.

¹³ Enga yudúdapo Dupade ipesudode cucha ponáyo icotaquéode to. Enga tṍraji gaté, jnumi, jnaropié, yote quedéjnane ore jnese. Enga udore ore chojninga: Yoquicotaquéode gajnengóri u charipi cuchábi charipísõri Dupa, jé aja Áyasa to. Uje pangarate cuchape ore gu. Enga ore ingoningájnai, ore ujopié cuchadatépise. Jecute ore gajneque yoquicotaquédatéode jne iji deréjna pitade jnese.

¹⁴ Enga gaté unirísõre gagájnione udore ore chajnai ore enga ore chojninga: –¡U arĩ́e! ¡Amén!– Diga pangaránone uje 24 ore, ore chichaga dagataidie aja jnumi tiji Dupade iquei uje que Dupade uté eruénique cuse. Enga udore ore chisipise Dupade gai to.