Apocalípsis 4 - Dupade Uruode

Dupade urasade ore icotaquéode u unojo ome Dupade iji gaté

¹ Iji unojo quigade enga yajire gaté. Enga yimo piago uñai uje guesája iji gaté. Enga dara bajade catecãrápoi yu rĩ uje cho pubuchugode jocarane. Enga chojningame yu: –Boji ti á, enga oru yu. Enga a yingo cucha piqueminórone ome ua jne uje udore a tocade jne iji cucha bajade udore quigade.–

² Enga jé u uté uje Dupade Ujopié Espíritu Sánto chingopo yenominone aja yu rĩ. Enga yimo piyaripi cuchábi iji gaté, enga eduguéjna cuchátique chácariji gai.

³ Enga yimo piyaripi uté charipísõri ingoningádatéi enga nanganata ejode. Enga cho ujetiga cucarané nanganatáguedie chijninguese re ome úringa nanganatague, uje udire íode u jaspe, cornalína ore. Enga aquesua chaparu piyaripi cuchábi uté gai uje uaté uruchachai cho cucarané uruchachai uje i tu esmerálda.

⁴ Enga yimo pangaránone jnanío uje ore chácariji dayaripíode iji piyaripi cuchábi uté ejode to, enga ore iguidedie póroropisi. Enga ore ayode coróna óro nanganatáguei. Enga 24 jnanione udore ore.

⁵ Enga ajnorane tṍraji charipi cuchábi uté, enga jocarane tõrapóji rĩ enga cho guéode uruode. Enga papose garitíode tagúji charipi cuchábi uté iquei, enga udore imoi tu uje Dupade Ujopié Espíritu Sánto gajnunie gariti to.

⁶ Enga yote quedéjnai gajnui déji charipi cuchábi uté iquei enga cho ajicarani uje díreca uéchai. Enga gaté unirísõre gagájnione déji to uje ore chague iji charipi cuchábi uté ejode enga ore edodie déji ore gai jnese.

⁷ Enga gaté unirisórone udore uñai cho caraté cuchábedie. Jé basa uñai cho ubuñurane. Enga uñai edodie cho ayoréode edodie. Enga uñai cho aroréode uje choque iji gaté.

⁸ Enga ujnoque chojmaráji tíode déji ore jnese. Enga udore ore edodie dépoji ore ujnóngone uéchade jnese rĩ. Enga que ore chimoque dínique, dejátique uje ore chicota Dupade. Enga ore chojninga: Ueque ua ome pisijnaringuéone. Ueguipise ua ome pisijnaringuéone. Yijárogo yocuruode iji jnumi uje ueguipise ua ome pisijnaringuéone. Yocangarádejná, Dupa ujopíerãi tu ua enga bajopié sué cuchade gáyode jnese. Bajogate nanique. Jé bajogadápo rĩ iji deréjnane unojo. Enga a jé bajogadápo to jne rĩ ujetiga ãriápo iji erámi rĩ.

^9-10 Uje jnanione udore uje 24 ore, ore chudute gaté unirisórone udore ore icotaquéode uje ore chacãre Dupade gai ome úringai eyúgojma, enga ore chichaga dagataidie aja Dupade uté iquei to uje chácariji dayaripi cuchábi. Enga ore chisi gai to uje que eruénique cuse. Enga ore doi enga ore chicha dayode coróna aja Dupade iquei enga ore chojninga:

¹¹ Yocangarádejna Dupá, jé tiógarapísa ujetiga picotaque ua. Chamáñaje bangoningájnai cuchadaté gu. Jé cho báringai pangarate, jé aja bajopié, uje cuchadaté ore to. Chamáñaje bamanique cuchade jnese gu iji erámi, gaté ore. Báyipie omenie u nanique gu uje cuchade udore tocade.