Apocalípsis 3 - Dupade Uruode

Jesús uruode u unojo ome iglésia uaté iji ore idai Sárdis

¹ Enga Jesús chojningápome yu rĩ: –Arúsãrape yuruode ome Dupade anguresórone angaráni uje déji Sárdis enga ósi te: "Uacacatecãraisṍri uyu u uje yaríjogoto u Dupade Ujopié Espíritu Sánto gajnu garitidie. Enga guédo garitidie dépoji yari to rĩ. Enga yirajapise uacadode jnese. Yiraja uje uacajnomei chise erámi jnese uje chiese ayoré ijõripise uaque. Mu ome Dupade enga e toque uaque.

² Jecute ãrijíño iji uacamoi. Aringachopo uacanguretigade ome Dupade rĩ. Uje garósosi Dupade ate ujñapetábode uje qué uacabeyósi. Socaseti bijnápise jne ome uaque. Chamáñaje yimo gu uje que omío uacapesudode udore ome yai Dupade.

³ Beyoi enga ca acadíchoi ore acajnaqué cásodicáite to ome uaque, enga beyoi udore quigode. Enga beyoi enga ecãcho uacadode. Ujetiga ca ãrijíño iji uacamoi tuté jne, enga a yṍraji te jne ome uaque, enga yajnui a u oriechoqui jne uje que pirajaque diringárique.

⁴ Mu yiraja uje uacuñane qué déji Sárdis uje que átayo uágaja pisijnaringuéone ipesungórone udore ore to. Enga a uaque u jne ujetiga ajínaño yu aja quedéjnane, enga a aguíyo bora pórorodie to jne. Jé uacatióchopísa gu, uje que átayo uágaja pisijnaringuéone ipesungórone ore to.

⁵ Ujeta ca Satanás chijnime uacãrírique enga a aguíyo Dupade gueranéringui bora pórorodie jne. Enga a ca yĩro uaquéode iji darujna aoi te jne uje pucuecaringuei quisórone ore íode déji jnese. Enga a yingo uágaja Yapade jne. Enga a yingopo uágaja Yapade irógode gaté unirísoño ore jnese jne rĩ.

⁶ Ujetiga angoninguite guesaque Dupade anguresórone uaque, enga ca ajusécho Dupade Ujopié Espíritu Sánto uruode ome uaque."–

Jesús uruode u unojo ome iglésia uaté iji ore idai Filadélfia

⁷ Enga Jesús chojningápome yu rĩ: –Arúsãrape yuruode ome Dupade anguresórone angaráni uje déji Filadélfia enga ósi te: "Ueguipise uacacatecãraisṍri uyu ome pisijnaringuéone enga ũrepise yu rĩ. Enga jnani bajai eduguéjna David gajné llave déji yu. Jecute a yuchẽre cuchárique gai enga que toc ujetiga uñeque suruápo gai rĩ. Jé basa a yujuru cuchárique gai enga que toc ujetiga uñeque chuchẽre gai.

⁸ Yiraja uacapesudode cucha jnese. Yiraja uje que jiei uaque go, mu uacangáchoi yuruode enga que otigáso yu to go. Jecute uacajnei tu ujetiga qué beyoi yiroquéode. Cho jetiga yuchẽre piagórique gai tome uaque ujetiga boyo yuruode údi. Enga que toque ujetiga uñeque suru piagoi tuté gai ome uaque.

⁹ Jnanione uñane iji uaquedai chiese judío ore enga ore gaidode u Dupade uruode. Mu taque udore ore. Uje ore jorane u Satanás adode gaisórone gu. Mu diga udore ore chiraja jne uje yijnoranguipísode u uaque. Enga a yipésu jne ujetiga udore ore chichaga dagataidie aja jnumi tiji uacaquei.

¹⁰ Uaque u uje uacabeyopísi yuruode quigode uje yojninga: adotáyo uáguiji petingaquéode jmainie jne. Jecute a yãraque uaque jne ujetiga diga pequetingaquéode chise erámi jnese. Chamáñaje a yetingaco erámi unirisórone ore jnese jne gu iji erámi údode.

¹¹ A serã yĩri jne. Jecute jé adotáyo uáguiji uacayaridi tuté iji yadode. Socaseti ca adotáyo uáguiji yadode enga amíningachó Dupade gueranone cucha ome uaque jne.

¹² Ujetiga ca Satanás chijnime uacãrírique enga a agúsoji Yapade gari to jne iji deréjnane jnese. Enga uacajnunie a u Dupade iguíjnai cutádode jne uje jogadípise to iji deréjnane jnese. Enga a yurúsãre yai Dupade i tiji uaque to jne rĩ. Enga a yurúsãrapo Dupade idáidatéi i tiji uaque to jne rĩ, uje uté i tu Jerusalén ichai. Enga Dupade a chiroque dedáidatéi tuté aja jnumi jne, enga a oyo uaquedai iji uté to jne. Enga a yurúsãrapo yi ichárique to jne rĩ iji uaque uje a yurasapísode u uaque jne gu.

¹³ Ujetiga angoninguite guesaque Dupade anguresórone uaque, enga ca ajusécho Dupade Ujopié Espíritu Sánto uruode ome uaque."–

Jesús uruode u unojo ome iglésia uaté iji ore idai Laodicéa

¹⁴ Enga Jesús chojningápome yu rĩ: –Arúsãrape yuruode ome Dupade anguresórone ore angaráni uje déji Laodicéa enga ósi te: "Ũrepise uacacatecãraisṍri uyu. Enga uyu u uje yatatapísa Dupade uru uréone nanique ome ore. Enga Dupade angúromei upo yu rĩ nanique ome dapesudode cucha jnese iji erámi taningane.

^15-16 Yiraja uacapesudode cucha jnese. Mu que yise uacapesudode cucha unétique. A yacãra uágaja yodi te jne. Uneréjna yote tejnui tome yoque ujetiga yójigo. Jé chopise yote jũruachui to rĩ. Mu yote pajnotai derocopis ome yoque. Ujetiga yójigorase mu deroco enga jĩraque yójnengo yoquibogórodie aja jnumi. Enga a jé yisocai tuté ome uaque jne uje uacajnúone u yote pajnotágode ome yu gu. Yajéode urásu ujetiga agúpuraipíse uté gosi, jeoga gosi dopísi yadode, mu deroco ome yu uje yanguresórone que ore chóji gaté ome yatique.

¹⁷ Uacoyo ayoré ataque iji uaque. Enga chiese ca cuchárique chona uaque ome uacajéode. Uacajosopo eti jé areguipise uaque rĩ ome Dupade adode. Mu que arajáyopise cuchárique. Uje Dupade chujnapise uaque enga cho ayoré choquíbi iji uaque, enga chopo edopariguíji uaque. Que ataguipise uaque go mu jmataguipise uaque ome Dupade adode.

¹⁸ Angáchoi yu. A yo uacaquique jne: ujetiga jec ũré enga ataque uaque enga abáchoi yu enga beyoi yugúcha orerane iji yu. Yojningane u óro omepísedie uje e piborei enga que iguínique cusipise go. Enga a quene ataguipise uaque jne ujetiga óro uaté e déji uaque. Jé yojninganie upo piguidé póroropísedie rĩ ujetiga beyoi oredie ome. Chamáñaje choquíbi uaque gu. Enga acóyo uacabai enga jogadi u uté jne ujetiga íjnoque uacajegátigai ome uaque. Yojningai upo bisidi rĩ ujeta beji yu enga aníchoja uaquedoparedie, enga amóñopo uacajiritígo rĩ.

¹⁹ Uje yijnóra gosi enga jé u uje yaquĩ́ra uté gosi ome ate gajnaréngone. Mu ujetiga ca uté gosi tangári yu enga yo uté gosi ate. Jecute aguitóyo enga ecãcho uacáyipiedie quigode.

²⁰ Yipotapísa ujetiga yugúcoji ñane gari ome yoquininaquéode. Enga cho ujetiga yibidi uaque iji uacaguíjnai piagoi. Mu gosi ujetiga chudute yuruode ga chuchẽre daguíjnai piagoi gai ome yu, enga a jĩraque yacája ajei jne. Enga jé u jne ujetiga yacásorango ñane iji uté iguíjnai ajei.

²¹ Ujetiga Satanás ca chijnime uacãrírique jne, enga a yo yujo eduguéjna iji uaque jne iji gaté. Adi uyu uje Satanás que chijnime yãrírique to nanique, enga yiyaridi e u Yai gari iji gaté ome yúringai eduguéjna cuchape.

²² Ujetiga angoninguite guesaque Dupade anguresórone uaque, enga ca ajusécho Dupade Ujopié Espíritu Sánto uruode ome uaque."–